NEHEMAYA

1 Eme Nehemaya*+ ọmọzae Hakalaya: Whaọ evaọ amara Kislẹv* evaọ ukpe avọ udhe, mẹ jọ evaọ Shushan*+ oria adhẹzọ na.* 2 Evaọ oke yena Hanenae+ oniọvo-ọmọzae mẹ avọ ezae efa jọ a te no obọ Juda ze, mẹ tẹ nọ ae kpahe ahwo Ju nọ a kiọkọ nọ a no igbo kpo na+ jẹ nọ kpahe Jerusalẹm. 3 A te yo nọ: “Ahwo nọ a kiọkọ ubrotọ* na nọ i no igbo kpozi na a rrọ uyero oja gbe omovuọ.+ Igbẹhẹ Jerusalẹm i kporo kuotọ,+ yọ a rọ erae mahe inuethẹ riẹ no.”+

4 Nọ mẹ nwani yo eme nana, mẹ tẹ keria otọ muhọ ẹviẹ je bi weri evaọ edẹ buobu, mẹ tẹ jẹ siọ emuọriọ ba+ jẹ be lẹ se Ọghẹnẹ idhiwu na. 5 Mẹ lẹ nọ: “O Jihova, Ọghẹnẹ idhiwu na, Ọghẹnẹ nọ ọ rrọ ruaro, nọ o re mu ọwhewhe, ọnọ o re koko ọvọ riẹ je dhesẹ uyoyou nọ o rẹ hiẹ hẹ kẹ enọ i you rie je bi koko ijaje riẹ,+ 6 ivie, gaviezọ je rri omẹ* re who yo olẹ odibo ra nọ mẹ be lẹ se owhẹ nẹnẹ na, te aso te uvo+ kpahe idibo ra ahwo Izrẹl, nọ mẹ be feva izieraha ahwo Izrẹl nọ a raha izi ra. Ma raha uzi no, mẹ gbe ahwo uwou ọsẹ mẹ.+ 7 Ma gine ru owhẹ thọ gaga no+ nọ ma gbe bi ro koko izi, ijaje gbe izi oziẹobro ra ha enọ whọ rọ kẹ Mosis odibo ra.+

8 “Ivie, kareghẹhọ ẹme nọ whọ ta kẹ* Mosis odibo ra, inọ: ‘Wha tẹ raha izi mẹ, mẹ te vaha owhai ruọ udevie ahwo na.+ 9 Rekọ otẹrọnọ wha zihe bru omẹ ze je koko ijaje mẹ je ru lele ae, ahwo rai nọ a vahabọ a tẹ make rrọ obọ oka idhiwu na, me ti koko ae họ+ no obei ze jẹ rehọ ae ziọ oria nọ mẹ salọ nọ odẹ mẹ o rẹ jọ na.’+ 10 Idibo ra a rrọ, a tẹ jẹ rrọ ahwo ra nọ whọ rehọ ogaga ulogbo ra gbe obọ ogaga ra siwi no igbo.+ 11 O Jihova, ivie, gaviezọ kẹ olẹ odibo ra gbe olẹ idibo ra nọ e be rọ evawere dhozọ odẹ ra, ivie, ru ayare odibo ra kẹe nẹnẹ na, re ọzae nana o wo ọdawẹ kẹ omẹ.”+

Oke nana mẹ jọ ọwọ-egho ovie na.+

2 Evaọ amara Nisan,* evaọ ukpe avọ udhe+ Atazazis ovie na,+ a ruẹrẹ udi* họ aro riẹ, yọ wọhọ epanọ me re ru vẹre, mẹ tẹ wọ udi na jẹ rehọ iẹe kẹ ovie na.+ Rekọ me ri mu ovao họ evaọ aro riẹ ẹdẹvo ho. 2 Fikiere ovie na ọ tẹ ta kẹ omẹ nọ: “Ẹvẹ who ro mu ovao họ yọ whọ be mọ họ? Onana yọ ovao-umuhọ gheghe he, rekọ orọ oware nọ o be jọ udu kẹ ohwo uye.” Onana u te ru ozọ mu omẹ gaga.

3 Kẹsena mẹ tẹ ta kẹ ovie na nọ: “Ovie whọ rẹ rria tọ! Kọ eme me gbe mu ovao họ họ nọ okpẹwho nọ a ki esẹ-esẹ mẹ họ ọ raha kuotọ, yọ erae e to inuethẹ riẹ no?”+ 4 Ovie na ọ tẹ ta kẹ omẹ nọ: “Eme whọ be gwọlọ yare?” Mẹ tẹ nwane lẹ se Ọghẹnẹ odhiwu na.+ 5 Kẹsena mẹ tẹ ta kẹ ovie na nọ: “Otẹrọnọ o rẹ were ovie na yọ otẹrọnọ ovie na o rri odibo riẹ aro, jọ o vi omẹ kpobọ Juda, kpobọ okpẹwho nọ a ki esẹ-esẹ mẹ họ re mẹ wariẹ bọe.”+ 6 Kẹsena ovie na, avọ ayebọ riẹ* nọ ọ keria gbae, ọ tẹ nọ omẹ nọ: “Ẹvẹ erẹ ra na o ti kri te, yọ oke vẹ who ti ro zihe ze?” Fikiere o were ovie na re o vi omẹ vrẹ,+ me te se oke kẹe.+

7 Kẹsena mẹ tẹ ta kẹ ovie na nọ: “Otẹrọnọ o rẹ were ovie na, jọ ọ kẹ omẹ ileta ro se eba nọ e rrọ ofẹ Abọdekọ Ethẹ* na,+ re a jọ omẹ nyavrẹ bẹsenọ me re te Juda, 8 gbe ileta ro se Esaf ọnọ ọ be rẹrote Ọgbọ-Ire* Ovie na, re ọ kẹ omẹ ite-ire nọ ma re bru ro ru ire inuethẹ Oria Adhẹzọ+ orọ Uwou* na gbe igbẹhẹ okpẹwho na+ gbe uwou nọ mẹ te jọ.” Ovie na ọ tẹ rehọ ae kẹ omẹ,+ keme obọ uwoma Ọghẹnẹ mẹ o jọ kugbe omẹ.+

9 Me te ti te eba ofẹ Abọdekọ Ethẹ na oma, mẹ tẹ rehọ ileta ovie na kẹ ae. Ovie na o vi iletu ogbaẹmo gbe edhẹ-enyenya lele omẹ re. 10 Nọ Sanbalat+ ohwo Bẹt-horọn gbe Tobaya+ ohwo Ammọn+ oletu* na a yo kpahe onana, eva e dha rai gaga inọ ohwo jọ ọ nyaze ti ru oware uwoma kẹ ahwo Izrẹl.

11 Kẹsena me te ti te Jerusalẹm, mẹ tẹ rria etẹe edẹ esa. 12 Mẹ tẹ kpama evaọ aso, mẹ avọ umutho ezae jọ nọ mẹ rehọ gboma, yọ mẹ vuẹ ohwo ọvo oware nọ Ọghẹnẹ mẹ o fihọ omẹ udu nọ me ru kẹ Jerusalẹm hu, yọ arao ọvuọvo ọ jọ kugbe omẹ hẹ ajokpaọ ọnọ mẹ jẹ dhẹ na. 13 Mẹ tẹ rọ Unuẹthẹ Ukiekpotọ na+ ruọ otafe evaọ aso, mẹ tẹ nya aro Eyeri-Ame Araomuomu Ologbo na vrẹ kpobọ Unuẹthẹ Ẹre Enwo,+ me te je rri igbẹhẹ Jerusalẹm nọ i kporo kuotọ na gbe inuethẹ riẹ nọ erae e to na.+ 14 Me te kpobọ Unuẹthẹ Eyeri-Ame na+ je kpobọ Ẹtẹre-Ame Ovie na, rekọ oria na o gba arao nọ mẹ jẹ dhẹ na ha. 15 Ghele na, mẹ ruabọhọ nya ukiekpotọ* na kpobọ ehru+ evaọ aso na, me te gbe je rri ugbẹhẹ na, kẹsena me te zihe ze jẹ rọ Unuẹthẹ Ukiekpotọ na ruọ eva, je zihe kpo.

16 Ethabọ isu na+ a riẹ obonọ mẹ nya gbe oware nọ me je ru hu, keme mẹ re ta oware ovo kẹ ahwo Ju na ha, izerẹ na, ikpahwo na, ethabọ isu na, gbe iruiruo nọ i kiọkọ. 17 Uwhremu na, mẹ tẹ ta kẹ ae nọ: “Wha be ruẹ uyero oja nọ ma rrọ na, Jerusalẹm ọ raha kuotọ yọ erae e to inuethẹ riẹ no. Wha nyaze, wha joma wariẹ bọ igbẹhẹ Jerusalẹm, re omovuọ nana u no otọ.” 18 Kẹsena mẹ tẹ vuẹ ae epanọ obọ uwoma Ọghẹnẹ mẹ o rọ jọ kugbe omẹ+ gbe eme nọ ovie na ọ ta kẹ omẹ.+ A tẹ ta nọ: “Joma kpama re ma bọ.” Fikiere a te kru oma* ga kẹ iruo iwoma na.+

19 Nọ Sanbalat ohwo Bẹt-horọn na, Tobaya+ ohwo Ammọn+ oletu* na, gbe Gisham ohwo Arebia na+ a yo onana, a te mu omai họ ẹhwẹ+ je bi rri omai vo, be ta nọ: “Eme wha bi ru? Wha be wọso ovie na?”+ 20 Rekọ mẹ tẹ ta nọ: “Ọghẹnẹ odhiwu na họ ọnọ ọ te kẹ omai obokparọ,+ yọ mai idibo riẹ ma te kpama re ma bọ; rekọ wha wo obọ ọvo hayo udu ọvo hayo ekareghẹhọ ọvo ho evaọ Jerusalẹm.”+

3 Elayashib+ ozerẹ okpehru na avọ inievo-emezae riẹ izerẹ na a tẹ kpama re a bọ Unuẹthẹ Igodẹ na.+ A tẹ rehọ iẹe mudhe*+ jẹ whẹ ethẹ riẹ họ; oria nọ a ro mudhe na u te Uwou Ukpehru Miya,+ je rite Uwou Ukpehru Hananẹl.+ 2 Yọ ezae Jẹriko+ a jẹ bọ kẹle ae; yọ Zakọ ọmọzae Imrae ọ jẹ bọ kẹle ae.

3 Emezae Hasaneya a bọ Unuẹthẹ Iyei na;+ a rọ ite-ire riẹ vi otọ+ kẹsena a tẹ whẹ ethẹ riẹ gbe ikeleku riẹ họ, gbe ekpọ nọ a rẹ rọ kare ẹthẹ na. 4 Mẹremọt+ ọmọzae Uraejah ọmọzae Hakọz o ru iruo aruẹrẹ kẹle ae, Mẹshulam+ ọmọzae Bẹrekaya ọmọzae Mẹshezabẹl o ru iruo aruẹrẹ kẹle ae, Zedọk ọmọzae Bena o ru iruo aruẹrẹ kẹle ae. 5 Yọ ahwo Tekoa+ a ru iruo aruẹrẹ kẹle ae, rekọ ahwo ologbo rai a hrẹ omarai kpotọ họ re a wo obọ evaọ iruo ilori rai.*

6 Joyada ọmọzae Pasiya gbe Mẹshulam ọmọzae Bẹsodaya a ruẹrẹ Unuẹthẹ Okpẹwho Anwae na;+ a rọ ite-ire riẹ vi otọ kẹsena a tẹ whẹ ethẹ riẹ gbe ikeleku riẹ họ, gbe ekpọ nọ a rẹ rọ kare ẹthẹ na. 7 Yọ Mẹlataya ohwo Gibiọn+ gbe Jedọn ohwo Mẹrọnọt a ru iruo aruẹrẹ kẹle ae, ezae Gibiọn avọ Mizpa+ nọ e jọ otọ esuo* ọba ofẹ Abọdekọ Ethẹ na.*+ 8 Uziẹl ọmọzae Hahaya, nọ ọ rrọ omọvo idhogu-igoru na, o ru iruo aruẹrẹ kẹle ae, Hananaya, nọ ọ rrọ usu ahwo nọ a re ru udẹ,* o ru iruo aruẹrẹ kẹle iẹe; yọ a rehọ itho ru* otọ Jerusalẹm rite Ugbẹhẹ Okẹkẹe na.+ 9 Refeya ọmọzae Họr, osu abọvo ubrotọ Jerusalẹm o ru iruo aruẹrẹ kẹle ae. 10 Jedeya ọmọzae Harumaf o ru iruo aruẹrẹ evaọ aro uwou obọriẹ kẹle ae, yọ Hatọsh ọmọzae Hashabnaya o ru iruo aruẹrẹ kẹle iẹe.

11 Malkaejah ọmọzae Herẹm+ gbe Hashọb ọmọzae Pehat-moab+ a ruẹrẹ ofẹ ofa,* gbe Uwou Ukpehru Ovini na.+ 12 Yọ kẹle ae Shalọm ọmọzae Halohẹsh, osu abọvo ubrotọ Jerusalẹm, o ru iruo aruẹrẹ, tei te emetẹ riẹ.

13 Henọn gbe ahwo nọ a be rria Zanoa+ a ruẹrẹ Unuẹthẹ Ukiekpotọ na;+ a bọ riẹ jẹ whẹ ethẹ riẹ họ, ikeleku riẹ, gbe ekpọ nọ a rẹ rọ kare ẹthẹ na, yọ a ruẹrẹ oria nọ u theri te ikiubiti odu ọvo (1,000)* evaọ ugbẹhẹ na rite Unuẹthẹ Ẹre Enwo.+ 14 Malkaejah ọmọzae Rikab, osu ubrotọ Bẹt-hakirẹm,+ ọ ruẹrẹ Unuẹthẹ Ẹre Enwo; ọ bọ riẹ jẹ whẹ ethẹ riẹ họ, ikeleku riẹ, gbe ekpọ nọ a rẹ rọ kare ẹthẹ na.

15 Shalọn ọmọzae Kọhoza, osu ubrotọ Mizpa,+ ọ ruẹrẹ Unuẹthẹ Eyeri-Ame na,+ ọ bọ riẹ jẹ bọ ehru riẹ, whẹ ethẹ riẹ họ, ikeleku riẹ, gbe ekpọ nọ a rẹ rọ kare ẹthẹ na, ọ tẹ jẹ ruẹrẹ ugbẹhẹ Ẹtẹre-Ame+ Uto na kpobọ Ọgbọ Ovie na+ je rite Oria-Ẹgadiẹ+ nọ u kuwhrẹrẹ no Okpẹwho Devidi ze na.+

16 U te noi no, Nehemaya ọmọzae Azbọk, osu abọvo ubrotọ Bẹt-zọr,+ o ru iruo aruẹrẹ no Eria Iki Devidi+ rite ẹtẹre-ame+ nọ a bọ na je rite obọ Uwou Ahwo Ologbo na.

17 U te noi no, ahwo Livae a ru iruo aruẹrẹ: Rihọm ọmọzae Benae; yọ kẹle iẹe, Hashabaya osu abọvo ubrotọ Kaela+ o ru iruo aruẹrẹ kẹ ubrotọ riẹ. 18 U te noi no, inievo-emezae rai a ru iruo aruẹrẹ: Bavae ọmọzae Hẹnadad, osu abọvo ubrotọ Kaela.

19 Yọ kẹle iẹe, Izẹ ọmọzae Jeshua,+ osu Mizpa, ọ jẹ ruẹrẹ abọ ọfa evaọ aro oria nọ a rẹ rọ gadiẹ kpohọ Uwou Ekwakwa Ẹmo nọ o rrọ ofẹ Odẹẹ-Ugbẹhẹ na.+

20 U te noi no, Barọk ọmọzae Zabae+ ọ rehọ ajọwha ru iruo jẹ ruẹrẹ abọ ọfa, no oria Odẹẹ-Ugbẹhẹ na rite oria nọ a rẹ rọ ruọ uwou Elayashib+ ozerẹ okpehru na.

21 U te noi no, Mẹremọt+ ọmọzae Uraejah ọmọzae Hakọz ọ ruẹrẹ abọ ọfa re, no oria nọ a rẹ rọ ruọ uwou Elayashib rite obọ oka uwou Elayashib.

22 Yọ u te noi no, izerẹ na, ezae ubrotọ Jọdan,*+ a ru iruo aruẹrẹ. 23 U te no ai no, Bẹnjamin gbe Hashọb a ru iruo aruẹrẹ evaọ aro uwou obọrai. U te no ai no, Azaraya ọmọzae Measaya ọmọzae Ananaya o ru iruo aruẹrẹ kẹle uwou obọriẹ. 24 U te noi no, Binua ọmọzae Hẹnadad ọ ruẹrẹ abọ ọfa, no uwou Azaraya rite oria Odẹẹ-Ugbẹhẹ na+ je rite ubienẹ na.

25 U te noi no, Pelal ọmọzae Uzai o ru iruo aruẹrẹ evaọ aro Odẹẹ-Ugbẹhẹ na gbe uwou ukpehru nọ u no Uwou* Ovie na ze,+ orọ obehru na, nọ o kẹle Ighẹ Iroiro na.+ U te noi no, kọ Pedaya ọmọzae Perọsh.+

26 Yọ idibo etẹmpol na*+ nọ e be rria Ofẹl+ a ru iruo aruẹrẹ rite aro Unuẹthẹ Ame na+ evaọ ofẹ ovatha-ọre na gbe uwou ukpehru nọ a bọ ziọ aro na.

27 U te no ai no, ahwo Tekoa+ a ruẹrẹ abọ ọfa, no aro uwou ukpehru ulogbo nọ a bọ ziọ aro na rite ugbẹhẹ Ofẹl.

28 Izerẹ na a ru iruo aruẹrẹ evaọ obehru Unuẹthẹ Anyenya na,+ omomọvo o ru iruo aruẹrẹ evaọ aro uwou obọriẹ.

29 U te no ai no, Zedọk+ ọmọzae Ima o ru iruo aruẹrẹ evaọ aro uwou obọriẹ.

Yọ u te noi no, Shimaya ọmọzae Shẹkenaya, ọnọ o re rou Unuẹthẹ Ovatha-Ọre na,+ o ru iruo aruẹrẹ.

30 U te noi no, Hananaya ọmọzae Shẹlẹmaya gbe Henọn ọmọzae avọ ezeza Zelaf a ruẹrẹ abọ ọfa.

U te noi no, Mẹshulam+ ọmọzae Bẹrekaya o ru iruo aruẹrẹ evaọ aro ọgwa obọriẹ.

31 U te noi no, Malkaejah omọvo utu idhogu-igoru na, o ru iruo aruẹrẹ rite uwou idibo etẹmpol na*+ gbe ethueki na, evaọ aro Unuẹthẹ Ẹkiẹriwo na je rite ọgwa obehru ubienẹ na.

32 Yọ evaọ udevie ọgwa obehru ubienẹ na avọ Unuẹthẹ Igodẹ na,+ idhogu-igoru gbe ethueki na a ru iruo aruẹrẹ.

4 Nọ Sanbalat+ ọ nwani yo nọ ma be wariẹ bọ ugbẹhẹ na, eva e tẹ dhae, o tẹ kẹe uye gaga, o te mu ahwo Ju na ẹkoko họ ese. 2 Ọ tẹ jọ iraro inievo-emezae riẹ gbe ogbaẹmo Sameria ta nọ: “Eme ahwo Ju eyẹlẹ nana a bi ru na? Kọ ae ọvo a sai ti ru onana? Kọ a ti dhe idhe? Kọ a ti ru ei re evaọ ẹdẹ ọvo? Kọ a sai ti zihe itho etuato nana nọ e rrọ udevie ezuzu enwo na ziọ uzuazọ?”+

3 Tobaya+ ohwo Ammọn+ nọ o dikihẹ akotọ riẹ ọ tẹ ta nọ: “Uruakọ dede ọ tẹ gadiẹ oware nọ a be bọ na, u re kporo ugbẹhẹ itho rai na fihọ otọ.”

4 Gaviezọ, O Ọghẹnẹ mai, keme a be jẹ omai kufiẹ,+ re who ru ẹpoviẹ rai zihe ziọ uzou obọrai,+ je ru re a mu ai kpohọ igbo evaọ orẹwho ọfa. 5 Yọ who gbolaro kẹ abe-ọriọ rai hi hayo voro uzioraha rai no aro ra ha,+ keme a la ebebabọ na eka.

6 Fikiere ma tẹ ruabọhọ ebabọ ugbẹhẹ na, ma tẹ ma ugbẹhẹ na kpobi kugbe jẹ wariẹ bọe te abọvo epanọ u kpehru te vẹre, yọ ahwo na kpobi a ruabọhọ je fi udu rai họ iruo na.

7 Nọ Sanbalat, Tobaya,+ ahwo Arebia,+ ahwo Ammọn, gbe ahwo Ashdọd+ a nwani yo nọ iruo aruẹrẹ ugbẹhẹ Jerusalẹm na e be nyaharo gbe nọ a be ma ighogho nọ e riẹ kpobi di, eva e tẹ dha ae gaga. 8 A tẹ lẹlẹ gba ẹgwae omuomu inọ aikpobi a te wọ ze te họre Jerusalẹm jẹ wha ozighi fihọ iẹe. 9 Rekọ ma tẹ lẹ se Ọghẹnẹ mai je fi ahwo họ nọ a re rou irou te aso te uvo fiki rai.

10 Ghele na, ahwo Juda a jẹ ta nọ: “O bẹ iruiruo* na no, yọ eware nọ i kporo kuotọ i re buobu; ma te sae bọ ugbẹhẹ na ha.”

11 Yọ ewegrẹ mai a be ta nọ: “Re a tẹ te riẹ hayo ruẹ omai, ma te vẹruọ udevie rai, ma ve kpe ai no jẹ dobọ iruo na ji.”

12 Oke kpobi nọ ahwo Ju nọ a be rria kẹle ae a tẹ nyaze, a je dhe omai ẹtẹta kẹ nọ:* “A te vẹruọ omai no ofẹ kpobi ze.”

13 Fikiere me te fi ezae họ eria nọ e mai kpotọ evaọ evevẹ nọ ọ rrọ emu ugbẹhẹ na evaọ eria nọ i kpefihọ, mẹ tẹ ghale ae fihọ eruerua avọ egbọdọ rai, izuẹ rai, gbe ize rai. 14 Nọ mẹ ruẹ nọ ozọ u bi mu ai, mẹ tẹ nwane kpama jẹ ta kẹ ikpahwo na,+ gbe ethabọ isu na avọ ahwo nọ a kiọkọ, inọ: “Ozọ rai u mu owhai hi.+ Wha kareghẹhọ Jihova, ọnọ ọ rrọ ruaro nọ o re mu ọwhewhe na,+ re wha họre kẹ inievo rai, emezae rai gbe emetẹ rai, eyae rai gbe iwou rai.”

15 Whaọ nọ ewegrẹ mai a yo nọ ma riẹ oware nọ a bi ru no gbe nọ Ọghẹnẹ uzẹme na ọ raha omaa rai no, mai kpobi ma tẹ wariẹ zihe kpohọ iruo ebabọ ugbẹhẹ na. 16 No umuo ẹdẹ yena vrẹ, abọvo ahwo mẹ a je ru iruo+ yọ abọvo nọ o kiọkọ a kru izuẹ, ejese gbe ize, je ku iwu-ẹmo họ. Yọ isu na+ a dikihẹ emu ahwo uwou Juda kpobi 17 nọ e jẹ bọ ugbẹhẹ na. Enọ e jẹ wọ ewha na a jẹ rọ obọ ọvo ru iruo yọ a rọ obọ nọ u kiọkọ kru okwakwa ẹmo.* 18 Ebebabọ na ọvuọvo o wo ọgbọdọ nọ ọ thọrọ fihọ eku riẹ nọ a be bọ na, yọ ọnọ o re kporo onware na+ o dikihẹ akotọ mẹ.

19 Kẹsena mẹ tẹ ta kẹ ikpahwo na, gbe ethabọ isu na, gbe ahwo nọ a kiọkọ nọ: “Iruo na e re ruaro, oria na o tẹ jẹ rrọ thethei, yọ ma ghale omamai fihọ ugbẹhẹ na thabọ no ohwohwo. 20 Nọ wha te yo edo onware na, wha nyaze ti kokohọ oria nọ ma rrọ. Ọghẹnẹ mai ọ te họre kẹ omai.”+

21 Fikiere ma tẹ ruabọhọ iruo na yọ abọvo ahwo na nọ a kiọkọ a kru izuẹ, no oke nọ oke o rọ ke rite oke nọ isi e rọ va ze. 22 Evaọ oke yena mẹ tẹ ta kẹ ahwo na nọ: “Jọ ezae na avọ ọvuọ odibo riẹ a jọ obeva Jerusalẹm aso okioke, a ve rou omai evaọ aso kẹsena a ve ru iruo evaọ uvo.” 23 Fikiere, te omẹ, te inievo mẹ, idibo mẹ,+ gbe iroiro nọ i lele omẹ, mai ọvuọvo ọ ba iwu riẹ no ho, yọ mai kpobi ọvuọ okwakwa ẹmo riẹ o kru fihọ obọze riẹ.

5 Rekọ oviẹ ogaga o tẹ romavia evaọ udevie ahwo na gbe eyae rai kpahe oware nọ inievo rai,+ ahwo Ju a bi ru ai. 2 Ejọ e jẹ ta nọ: “Mai gbe emezae mai gbe emetẹ mai ma rrọ buobu. Ma gwọlọ ibi ekakọ re ma sai wo emu nọ ma rẹ re jẹ sae jọ uzuazọ.” 3 Efa e jẹ ta nọ: “Ma be rehọ idhu mai gbe egbọ evaene mai gbe iwou mai viowa re ma sai wo ibi ekakọ evaọ oke ohọo na.” 4 Yọ efa e be jẹ ta nọ: “Ma rehọ idhu mai gbe egbọ evaene mai momo igho fiki azọhọ ovie na.+ 5 Whaọ, mai gbe inievo mai yọ uwo gbe azẹ ọvona,* yọ emọ mai a wọhọ emọ rai; dede na ma bi fi emezae mai gbe emetẹ mai họ igbo, yọ emetẹ mai jọ a rrọ igbo no.+ Rekọ ma wo ogaga nọ ma sae rọ whaha onana ha, keme idhu mai gbe egbọ evaene mai i zihe ruọ erọ amọfa no.”

6 Eva e tẹ dha omẹ gaga nọ me yo oviẹ rai gbe eme nana. 7 Fikiere mẹ tẹ jọ udu mẹ roro eware nana, me te kru ẹme nana gaga kugbe ikpahwo na, gbe ethabọ isu na, jẹ ta kẹ ae nọ: “Whai omomọvo o bi mi oniọvo riẹ isuo.”*+

Kẹsena me te se ẹgwae ologbo fiki rai. 8 Mẹ tẹ ta kẹ ae nọ: “Epanọ a rẹ daoma te kpobi, ere ma daoma te rọ dẹ ahwo Ju inievo mai nọ a zẹ kpohọ erẹwho efa zihe ze; kọ wha rẹ jẹ zẹ inievo obọrai,+ hayo kọ a rẹ jẹ wariẹ zẹ ae kẹ omai?” A tẹ fọ tou, a ruẹ ẹme ọvo ta ha. 9 Kẹsena mẹ tẹ ta nọ: “Oware nọ wha bi ru na u woma ha. Kọ u gbe fo nọ wha re wo ozodhẹ Ọghẹnẹ mai,+ re erẹwho na, ewegrẹ mai, a siọ omai ba ẹpoviẹ? 10 U te no ere no, mẹ gbe inievo mẹ gbe idibo mẹ ma bi momo igho gbe ibi ekakọ kẹ ae. Ivie, joma siọ eware nọ a re momo avọ isuo ba.+ 11 Ivie, nẹnẹ na, wha zihe idhu rai,+ egbọ evaene rai, egbọ olivi rai, gbe iwou rai kẹ ae, makọ abọvo udhusoi* orọ ugho, ibi ekakọ, enwaene ọkpokpọ, gbe ewhri nọ wha bi mi ai wọhọ isuo na.”

12 A tẹ ta nọ: “Ma ti zihe eware nana kẹ ae, yọ ma ti mi ae oware ovo ho. Ma ti ru epanọ whọ ta na ẹrẹrẹe.” Fikiere me te se izerẹ na je ru ezae yena duwu iyei inọ a ti ru eyaa nana gba. 13 Ofariẹ, me te nuhu igbama ewu mẹ* jẹ ta nọ: “Jọ Ọghẹnẹ uzẹme na ọ rọ oghẹrẹ utiona nuhu ọzae kpobi nọ o ru eyaa nana gba ha no uwou riẹ gbe ekwakwa riẹ, jọ ọ rọ oghẹrẹ utiona nuhu iei kufiẹ je ru ei fihọ ababọ.” Ogbotu na kpobi o te yo nọ: “Ami!”* A te jiri Jihova, yọ ahwo na a ru epanọ a ya.

14 U te no ere no, no umuo ẹdẹ nọ ọ rọ rehọ omẹ mu re mẹ jọ ọba rai+ evaọ ẹkwotọ Juda, no ukpe avọ udhe+ rite ukpe avọ ọgbagbivẹ+ ọrọ Atazazis ovie na,+ ikpe ikpegbivẹ, mẹ hayo inievo mẹ ọvuọvo ọ re emu nọ a rẹ kẹ ọba ha.+ 15 Rekọ eba nọ e jọ taure u te ti te omẹ, a jẹ rọ owha ogbẹgbẹdẹ wha ahwo na, a je mi ae shẹkẹl* isiliva udhuvẹ orọ ebrẹdi gbe enwaene kẹdẹ kẹdẹ. U te no ere no, idibo rai a je kienyẹ ahwo na. Rekọ me ru ere he+ fiki ozodhẹ Ọghẹnẹ.+

16 Ofariẹ, me wobọ evaọ iruo ebabọ ugbẹhẹ na, yọ ma wo udhu ovuovo ho;+ idibo mẹ kpobi a kokohọ etẹe kẹ iruo na. 17 Ahwo Ju udhuhrẹ-gbikpe (150) gbe ethabọ isu a jẹ re emu evaọ emẹjẹ mẹ, jegbe amọfa nọ a no erẹwho efa bru omai ze. 18 Kẹdẹ kẹdẹ eruẹ ọvo, igodẹ epoporiẹ ezeza, gbe evra a je there kẹ omẹ,* yọ ẹsiẹvo evaọ edẹ ikpe kpobi ma re wo oghoghẹrẹ enwaene kpobi buobu. Ghelọ enana kpobi mẹ nekpẹ emu nọ u fo nọ a rẹ kẹ ọba ha, keme owha ogbẹgbẹdẹ o rrọ ahwo na uzou no vẹre. 19 Kareghẹhọ omẹ rọkẹ iruo iwoma* mẹ, O Ọghẹnẹ mẹ, rọkẹ eware kpobi nọ me ru fiki ahwo nana.+

6 Nọ a nwane ta kẹ Sanbalat, Tobaya,+ Gisham ohwo Arebia na+ gbe ewegrẹ mai nọ i kiọkọ inọ mẹ wariẹ bọ ugbẹhẹ na no+ gbe nọ ighogho evuevo i gbe kiọkọ iẹe he (dede nọ rite oke nana mẹ re whẹ ethẹ họ inuethẹ riẹ hẹ),+ 2 Sanbalat avọ Gisham a te vi uwou nana se omẹ ababọ oke oraha, inọ: “Nyaze, re ma fi oke họ nọ ma rẹ rọ ruẹ ẹro evaọ iwhre nọ e rrọ Ukiekpotọ Opraprara Ono.”+ Rekọ ẹgwae epanọ a rẹ rọ nwa omẹ oma a jẹ gba. 3 Fikiere me te vi enyukọ bru ae, inọ: “Iruo ilogbo e rrọ omẹ obọ, mẹ te sae nyaze he. Fikieme mẹ jẹ nyabru owhai ze re iruo na e daji?” 4 A vi uwou ovona se omẹ isiane, yọ uyo ovona mẹ kẹ rai oke kpobi nọ a vi uwou na ze.

5 Kẹsena Sanbalat o te vi odibo riẹ uwou ovona se omẹ orọ avọ isiasoi, avọ ileta nọ a gba di hi nọ o rrọ obọ riẹ. 6 A kere fihọ iẹe nọ: “A jọ erẹwho na yoi no, yọ Gisham+ ọ be tae re, inọ whẹ avọ ahwo Ju wha be gba ẹgwae ọkparesuọ.+ Oyejabọ nọ wha be rọ bọ ugbẹhẹ na; yọ wọhọ epanọ iyẹrẹ nana i dhesẹ whẹ ọ be te jọ ovie rai. 7 Ofariẹ, whọ tẹ jẹ rọ eruẹaro mu re a whowho kpahe owhẹ evaọ Jerusalẹm soso nọ, ‘Ovie jọ ọ rrọ Juda!’ Whaọ obọnana a te vuẹ ovie na eware nana. Fikiere nyaze re ma ta ẹme kpahe onana.”

8 Rekọ, me te vi uwou nana zihe sei, inọ: “Eware nọ whọ be ta na ọvuọvo ọ re via ha; whẹ ọvo ọ be jọ udu ra roro ae ze na.” 9 Keme aikpobi a jẹ gwọlọ whẹ ozọ họ omai ẹro, be ta nọ: “Abọ ọ te lọhọ ae siọ iruo na ba, a gbẹ te sai ru iruo na ha.”+ Obọnana, mẹ lẹ nọ, ru abọ mẹ ga.+

10 Kẹsena mẹ tẹ nya kpobọ uwou Shimaya ọmọzae Delaya ọmọzae Mẹhetabẹl evaọ oke nọ ọ daji etẹe.* Ọ tẹ ta nọ: “Joma fi oke họ nọ ma rẹ rọ ruẹ ẹro evaọ obọ uwou Ọghẹnẹ uzẹme na, evaọ etẹmpol na, re ma kare ethẹ etẹmpol na keme a be nyaze ti kpe owhẹ. A be nyaze ti kpe owhẹ evaọ aso.” 11 Rekọ mẹ tẹ ta nọ: “Kọ u fo nọ ohwo wọhọ omẹ na ọ rẹ dhẹ? Kọ ohwo wọhọ omẹ na o re kpohọ eva etẹmpol na re ọ jọ uzuazọ?+ Mẹ be nya ha!” 12 Kẹsena me te ti vuhumu nọ Ọghẹnẹ o vi rie he, rekọ Tobaya avọ Sanbalat+ a kẹ riẹ ugho re ọ ta eruẹaruẹ nana kpahe omẹ. 13 A kẹ riẹ ugho re o ru ozọ mu omẹ je ru omẹ raha uzi, re a ruẹ oware nọ a rẹ rọ raha odẹ mẹ a vẹ sae poviẹ omẹ.

14 O Ọghẹnẹ mẹ, kareghẹhọ Tobaya+ avọ Sanbalat gbe eware nana, jegbe Noadaya ọruẹaro-aye na gbe eruẹaro nọ i kiọkọ nọ e jẹ daoma kẹse kẹse re a ru ozọ mu omẹ.

15 Ma te ku iruo ebabọ ugbẹhẹ na họ evaọ edẹ udhegbisoi amara Ilọl,* edẹ udhuvẹ gbe ikpegbivẹ o rehọ.

16 Nọ ewegrẹ mai kpobi a nwani yo kpahe iẹe, nọ erẹwho nọ e wariẹ omai họ kpobi a ruẹ e riẹ, oma o tẹ vuọ ae gholo gholo,*+ a te vuhumu nọ obufihọ Ọghẹnẹ mai ma sai ro ru iruo nana re. 17 Evaọ oke yena ikpahwo+ Juda a je vi ileta buobu se Tobaya, yọ Tobaya ọ jẹ za zihe se ae. 18 Ahwo buobu evaọ Juda a duwu iyei nọ a rẹ romakpotọ kẹe, keme ọ rehọ ọmọtẹ Shẹkenaya ọmọzae Erah,+ yọ ọmọzae riẹ Jehohenan ọ rehọ ọmọtẹ Mẹshulam+ ọmọzae Bẹrekaya. 19 U te no ere no, kẹse kẹse a jẹ hae ta ẹme owoma riẹ kẹ omẹ jẹ vuẹe ẹme nọ mẹ ta. Kẹsena Tobaya o ve vi ileta ze nọ o re ro ru ozọ mu omẹ.+

7 Nọ a nwane wariẹ bọ ugbẹhẹ na no,+ mẹ tẹ whẹ ethẹ riẹ họ;+ kẹsena mẹ tẹ rọ irou-unuẹthẹ* na,+ eso-ile na,+ gbe ahwo Livae na+ mu. 2 Mẹ tẹ rọ Hanenae oniọvo mẹ+ mu ọnọ ọ rẹ rẹrote Jerusalẹm, avọ Hananaya ọnọ o wuzou Oria Adhẹzọ na,+ keme ọ jọ ọzae nọ a mai fievahọ ọ tẹ jẹ rrọ ohwo nọ ọ be dhozọ Ọghẹnẹ uzẹme na+ vi amọfa buobu. 3 Fikiere mẹ tẹ ta kẹ ae nọ: “A re rovie inuethẹ Jerusalẹm hu bẹsenọ uvo o rẹ ga no, yọ nọ a tẹ rrọ etẹe bi rou, a re si ethẹ na họ jẹ rọ ikeleku kare ae. A vẹ jẹ rọ ahwo nọ a be rria Jerusalẹm mu iroiro, omomọvo ọ rẹ jọ oria nọ a kẹ riẹ nọ o rou yọ omomọvo ọ rẹ jọ aro uwou obọriẹ.” 4 Whaọ okpẹwho na o rrọ vevẹ lelele jẹ rrọ ruaro, yọ ahwo nọ a rrọ eva riẹ a tulo ho,+ yọ a re wariẹ iwou na bọ họ.

5 Rekọ Ọghẹnẹ mẹ o fi rie họ udu mẹ re me koko ikpahwo na gbe ethabọ isu na gbe ahwo na họ re a kere uyẹ rai fihotọ.+ Kẹsena mẹ tẹ ruẹ obe nọ a kere edẹ uyẹ ahwo nọ a kaki kpozi fihọ, yọ enẹ mẹ ruẹ nọ a kere fihọ iẹe:

6 Enana họ ahwo ubrotọ* na nọ i no udevie ahwo nọ a mu kpohọ igbo ze, enọ Nebukadneza ovie+ Babilọn o mu kpohọ igbo+ nọ i zihe ziọ Jerusalẹm gbe Juda uwhremu na, aikpobi a zihe kpohọ ọvuọ okpẹwho riẹ,+ 7 enọ i lele Zerubabẹl,+ Jeshua,+ Nehemaya, Azaraya, Remayah, Nehamanae, Mọdekae, Bilshan, Misparẹt, Bigvai, Nihọm, gbe Benah zihe ze.

Unu ezae Izrẹl nọ a kele na i kugbe:+ 8 emezae Perọsh, idu ivẹ gbe udhoree gbe ikpegbivẹ (2,172); 9 emezae Shẹfataya, egba esa gbe udhosa gbe ikpegbivẹ (372); 10 emezae Erah,+ egba ezeza gbe udhuvẹ gbe ikpegbivẹ (652); 11 emezae Pehat-moab,+ erọ emezae Jeshua avọ Joab,+ idu ivẹ gbe egba eree gbe ikpegberee (2,818); 12 emezae Ilam,+ odu ọvo gbe egba ivẹ gbe udhuvẹ gbe ikpegbene (1,254); 13 emezae Zatu, egba eree gbe udhuvẹ-gbisoi (845); 14 emezae Zakae, egba ihrẹ gbe udhosa (760); 15 emezae Binua, egba ezeza gbe udhuvẹ-gberee (648); 16 emezae Bibae, egba ezeza gbe udhegberee (628); 17 emezae Azgad, idu ivẹ gbe egba esa gbe udhegbivẹ (2,322); 18 emezae Adonaekam, egba ezeza gbe udhosa-gbihrẹ (667); 19 emezae Bigvai, idu ivẹ gbe udhosa-gbihrẹ (2,067); 20 emezae Edin, egba ezeza gbe udhuvẹ gbe ikpegbisoi (655); 21 emezae Eta, ọrọ Hẹzikaya, udhone gbe ikpegberee; 22 emezae Heshọm, egba esa gbe udhegberee (328); 23 emezae Bizai, egba esa gbe udhegbene (324); 24 emezae Herẹf, udhusoi gbe ikpegbivẹ (112); 25 emezae Gibiọn,+ udhone gbe ikpegbisoi; 26 ezae Bẹtlẹhẹm gbe Nẹtofa, udhuzii-gberee (188); 27 ezae Anatọt,+ udhozeza-gberee (128); 28 ezae Bẹt-azmevẹt, udhuvẹ-gbivẹ; 29 ezae Kiriat-jierim,+ Kẹfaera, gbe Biẹrọt,+ egba ihrẹ gbe udhuvẹ-gbesa (743); 30 ezae Rema gbe Giba,+ egba ezeza gbe udhegbọvo (621); 31 ezae Mikmas,+ udhozeza-gbivẹ (122); 32 ezae Bẹtẹl+ gbe Ai,+ udhozeza-gbesa (123); 33 ezae Nibo ọdekọ, udhuvẹ gbe ikpegbivẹ; 34 emezae Ilam ọdekọ, odu ọvo gbe egba ivẹ gbe udhuvẹ gbe ikpegbene (1,254); 35 emezae Herẹm, egba esa gbe udhe (320); 36 emezae Jẹriko, egba esa gbe udhuvẹ-gbisoi (345); 37 emezae Lọd, Hedid, gbe Ono,+ egba ihrẹ gbe udhegbọvo (721); 38 emezae Sẹneya, idu esa gbe egba izii gbe ọgba (3,930).

39 Izerẹ na:+ emezae Jedeya ọrọ uwou Jeshua, egba izii gbe udhosa gbe ikpegbesa (973); 40 emezae Ima, odu ọvo gbe udhuvẹ gbe ikpegbivẹ (1,052); 41 emezae Pashọ,+ odu ọvo gbe egba ivẹ gbe udhuvẹ-gbihrẹ (1,247); 42 emezae Herẹm,+ odu ọvo gbe ikpegbihrẹ (1,017).

43 Ahwo Livae:+ emezae Jeshua, ọrọ Kadmiẹl,+ ọrọ emezae Hodeva, udhosa gbe ikpegbene. 44 Eso-ile na:+ emezae Esaf,+ udhuhrẹ-gberee (148). 45 Irou-unuẹthẹ* na:+ emezae Shalọm, emezae Eta, emezae Talmọn, emezae Akọb,+ emezae Hataeta, emezae Shobai, udhozeza gbe ikpegberee (138).

46 Idibo etẹmpol na:*+ emezae Zaeha, emezae Hasufa, emezae Tabeọt, 47 emezae Kirọs, emezae Saya, emezae Pedọn, 48 emezae Lebana, emezae Hagaba, emezae Salmae, 49 emezae Henan, emezae Gidẹl, emezae Geha, 50 emezae Rieya, emezae Rizin, emezae Nekoda, 51 emezae Gazam, emezae Uza, emezae Pasiya, 52 emezae Bisai, emezae Mẹyunẹm, emezae Nẹfọshẹsim, 53 emezae Bakbọk, emezae Hakufa, emezae Hahọ, 54 emezae Bazliat, emezae Mahaeda, emezae Hasha, 55 emezae Bakọs, emezae Sisera, emezae Timah, 56 emezae Nezaya, emezae Hataefa.

57 Emezae idibo Solomọn:+ emezae Sotae, emezae Sofirẹt, emezae Pẹraeda, 58 emezae Jealah, emezae Dakọn, emezae Gidẹl, 59 emezae Shẹfataya, emezae Hẹtil, emezae Pokirẹt-hazebeim, emezae Amọn. 60 Idibo etẹmpol na* kpobi+ gbe emezae idibo Solomọn i bu te egba esa gbe udhone gbe ikpegbivẹ (392).

61 Enana i no Tẹl-mila, Tẹl-hasha, Kirub, Addọn, gbe Ima ze, rekọ a sai dhesẹ unuwou abọ ọsẹ rai gbe oria nọ a no ze he, sọ ahwo Izrẹl a ginẹ rrọ:+ 62 emezae Delaya, emezae Tobaya, emezae Nekoda, egba ezeza gbe udhuvẹ-gbivẹ (642). 63 Yọ erọ izerẹ na: emezae Habaya, emezae Hakọz,+ emezae Bazilae,+ ọnọ ọ jọ usu emetẹ Bazilae ohwo Giliad na wo aye, ọnọ a rọ odẹ ọsẹ aye riẹ se. 64 Enana a gwọlọ eria nọ a kere ikuigbe uyẹ rai fihọ re a sai dhesẹ uyẹ nọ a no ze, rekọ a ruẹ e rai hi, fikiere a tẹ ta kẹ ae nọ a te enọ e rẹ jọ ọkwa-ozerẹ hẹ.*+ 65 Ọba* na+ ọ ta kẹ ae nọ a rẹ re eware nọ e mae rrọ ọrẹri na ha+ bẹsenọ a rẹ ruẹ ozerẹ nọ ọ rẹ rehọ Yurim avọ Tumim+ gwọlọ otọ onana via no.

66 Ogbotu* na soso a bu te idu udhuvẹ-gbivẹ gbe egba esa gbe udhosa (42,360),+ 67 yọ a kele erigbo emezae gbe erọ emetẹ rai kugbe he,+ enọ i bu te idu ihrẹ gbe egba esa gbe ọgbagbihrẹ (7,337); u te no ere no a wo eso-ile emezae gbe emetẹ nọ i bu te egba ivẹ gbe udhuvẹ-gbisoi (245).+ 68 Enyenya rai i bu te egba ihrẹ gbe ọgbagbezeza (736), isi* rai i bu te egba ivẹ gbe udhuvẹ-gbisoi (245), 69 ekamẹle rai i bu te egba ene gbe ọgbagbisoi (435), eketekete rai i bu te idu ezeza gbe egba ihrẹ gbe udhe (6,720).

70 Ejọ nọ i wuzou inuwou abọ ọsẹ rai a zọhọ fihọ iruo na.+ Ọba* na o fi edrakma* igoru odu ọvo (1,000) họ ẹkpa-ugho na, imidhe ikokodo udhuvẹ-gbikpe, gbe iwu ithethei izerẹ egba isoi gbe ọgba (530).+ 71 Yọ ejọ evaọ usu enọ i wuzou inuwou abọ ọsẹ a zọhọ edrakma igoru idu udhe (20,000) gbe emaina* isiliva idu ivẹ gbe egba ivẹ (2,200) fihọ ẹkpa-ugho iruo ebabọ na. 72 Yọ ahwo nọ a kiọkọ a zọhọ edrakma igoru idu udhe (20,000), emaina isiliva idu ivẹ (2,000), gbe iwu ithethei izerẹ udhosa-gbihrẹ.

73 Kẹsena izerẹ na, ahwo Livae, irou-unuẹthẹ* na, eso-ile na,+ ahwo na jọ, idibo etẹmpol na,* gbe ahwo Izrẹl nọ a kiọkọ kpobi* a te mu ikpewho rai họ ẹria.+ Nọ amara avọ ihrẹ o te,+ yọ ahwo Izrẹl a mu ikpewho rai họ ẹria no.+

8 Ahwo na kpobi a te kokohọ evaọ okugbe ọvo evaọ oko-ore nọ ọ rrọ aro Unuẹthẹ Ame na,+ a tẹ ta kẹ Ẹzra+ okere-obe na nọ ọ rehọ obe Uzi Mosis na ze,+ onọ Jihova ọ kẹ ahwo Izrẹl nọ a koko.+ 2 Fikiere Ẹzra ozerẹ na ọ tẹ rehọ Uzi na ziọ aro ogbotu+ ezae, eyae, gbe ahwo kpobi nọ a rẹ sae gaviezọ je wo otoriẹ, evaọ ẹdẹ ọsosuọ amara avọ ihrẹ na.+ 3 O te se noi ze do via+ evaọ oko-ore nọ ọ rrọ aro Unuẹthẹ Ame na no ohiohiẹ rite ọre-tuzou, kẹ ezae na, eyae na, gbe ahwo kpobi nọ a rẹ sai wo otoriẹ; yọ ahwo na a gaviezọ ziezi+ kẹ obe Uzi na. 4 Ẹzra okere-obe na o dikihẹ agbada-ẹmeọta ure nọ a ru fiki okokohọ na; enọ i dikihẹ obọze riẹ họ Matataya, Shima, Anaya, Uraya, Hilkaya, gbe Measaya; abọ ẹkpẹlobọ riẹ kọ Pedaya, Mishẹl, Malkaejah,+ Heshọm, Hash-badana, Zẹkaraya, gbe Mẹshulam.

5 Nọ Ẹzra o rovie obe na ahwo na kpobi a ruẹ e riẹ, keme o kpehru vi ahwo na kpobi. Nọ o rovie iei, ahwo na kpobi a tẹ kpama dikihẹ. 6 Kẹsena Ẹzra o te jiri Jihova Ọghẹnẹ uzẹme na, Ọnọ ọ re ruaro na, ahwo na kpobi a te yo nọ “Ami!* Ami!”+ a tẹ kpare abọ rai kpehru. Kẹsena a te guzou kpotọ je kiẹzẹ vovao tuotọ kẹ Jihova. 7 Yọ Jeshua, Benae, Shẹrẹbaya,+ Jemin, Akọb, Shabẹtae, Hodaya, Measaya, Kẹlaeta, Azaraya, Jozebad,+ Henan, gbe Pẹleya, enọ e jọ ahwo Livae, a jẹ fa otọ Uzi na kẹ ahwo na,+ yọ ahwo na a gbe dikihẹ. 8 A tẹ ruabọhọ je se no obe na ze do via, ro no Uzi Ọghẹnẹ uzẹme na ze, bi ru ei vẹ ziezi jẹ fa otọ riẹ; a tẹ rọ ere fiobọhọ kẹ ahwo na wo otoriẹ eware nọ a je se na.*+

9 Nehemaya nọ ọ jọ ọba* evaọ oke yena, Ẹzra+ ozerẹ gbe okere-obe na, gbe ahwo Livae nọ a je wuhrẹ ahwo na a tẹ ta kẹ ahwo na kpobi nọ: “Ẹdẹ nana ẹdẹ ọrẹri kẹ Jihova Ọghẹnẹ rai.+ Wha weri hayo viẹ hẹ.” Keme ahwo na kpobi a jẹ viẹ nọ a je yo eme Uzi na. 10 Ọ ta kẹ ae nọ: “Wha nya, wha re emamọ eware* jẹ da eware ememere, je vi emu se+ enọ i wo ho; keme ẹdẹ nana ẹdẹ ọrẹri kẹ Olori mai, fikiere wha ru ọkọkora ha, keme oghọghọ Jihova họ oria omofọwẹ* rai.” 11 Yọ ahwo Livae na a je ru ahwo na kpobi re a fọ, be ta kẹ ae nọ: “Wha fibo! keme ẹdẹ nana ẹdẹ ọrẹri, wha weri hi.” 12 Fikiere ahwo na kpobi a tẹ nyavrẹ nyae re jẹ da je vi emu se amọfa, a tẹ jẹ ghọghọ gaga,+ keme a wo otoriẹ eme nọ a se kẹ ae na.+

13 Evaọ ẹdẹ avọ ivẹ, enọ i wuzou inuwou abọ ọsẹ ahwo na kpobi, izerẹ na, gbe ahwo Livae a te kokohọ wariẹ Ẹzra okere-obe na họ re a gbe wo otoriẹ eme Uzi na didi. 14 Kẹsena a tẹ ruẹ nọ a kere fihọ Uzi nọ Jihova ọ rehọ ẹkwoma Mosis jie na inọ ahwo Izrẹl a rẹ rria iwou-owhre* evaọ etoke ehaa amara avọ ihrẹ na.+ 15 yọ a re whowho+ je woro evaọ ikpewho rai kpobi gbe Jerusalẹm soso nọ: “Wha kpobọ ubrotọ igbehru na re wha nawo egha-ire nọ i wo ebe ziezi no ire olivi, ire epaene, ire idodo gbe iriẹ ze, gbe egha-ire nọ i wo ebe ziezi erọ ire efa re wha rọ bọ iwou-owhre, wọhọ epanọ a kere.”

16 Fikiere ahwo na a tẹ nya, a tẹ rehọ ae ze re a bọ iwou-owhre kẹ omarai, kohwo kohwo ọ bọ fihọ ehru uwou riẹ, ighẹ rai, evaọ ighẹ uwou Ọghẹnẹ uzẹme na,+ evaọ oko-ore Unuẹthẹ Ame na,+ gbe evaọ oko-ore Unuẹthẹ Ifremu.+ 17 Enẹ ahwo ukoko na kpobi nọ a no igbo ze a rọ bọ iwou-owhre, a tẹ jẹ rria eva iwou-owhre na, ahwo Izrẹl a ri ru ei enẹ ẹdẹvo ho no anwọ oke Joshua+ ọmọzae Nọn ze rite ẹdẹ yena, onana o tẹ wha oghọghọ ulogbo ze.+ 18 Yọ kẹdẹ kẹdẹ a je se no obe Uzi Ọghẹnẹ uzẹme na ze,+ no ẹdẹ ọsosuọ rite ẹdẹ urere. Yọ a ru ehaa na edẹ ihrẹ, ẹdẹ avọ eree a te ru okokohọ urirẹ wọhọ epanọ o gwọlọ.+

9 Evaọ ẹdẹ avọ udhegbene amara nana ahwo Izrẹl a te kokohọ; a siọ emuọriọ ba yọ a ku ehọ-ekpa* họ jẹ whẹ ovu fihọ oma rai.+ 2 Emotọ Izrẹl a tẹ hẹriẹ omarai no ahwo erẹwho efa na kpobi,+ a te dikihẹ jẹ feva izieraha rai gbe iruthọ esẹ rai.+ 3 Kẹsena a te dikihẹ oria rai je se do via no Uzi+ Jihova Ọghẹnẹ rai ze evaọ abọvo abane okpẹdẹ na;* yọ evaọ abọvo abane ọfa a tẹ jẹ feva je guzou kpotọ kẹ Jihova Ọghẹnẹ rai.

4 Jeshua, Benae, Kadmiẹl, Shẹbanaya, Bunai, Shẹrẹbaya,+ Benae, gbe Kẹnenae a dikihẹ agbada-ẹmeọta okpehru+ ahwo Livae na, a tẹ rọ urru oruarua bo se Jihova Ọghẹnẹ rai. 5 Kẹsena ahwo Livae na Jeshua, Kadmiẹl, Benae, Hashabnaya, Shẹrẹbaya, Hodaya, Shẹbanaya, gbe Pẹtahaya a tẹ ta nọ: “Wha kpama dikihẹ re wha jiri Jihova Ọghẹnẹ rai bẹdẹ bẹdẹ.*+ Jọ a jiri odẹ oruaro ra nọ u kpehru vi orro* gbe ujiro kpobi.

6 “Whẹ ọvo họ Jihova;+ whẹ ọ ma idhiwu, ẹhẹ, odhiwu idhiwu na gbe eware kpobi nọ e rrọ eva rai,* otọakpọ na gbe eware kpobi nọ e rrọ eva riẹ, ebade na gbe eware kpobi nọ e rrọ eva rai. Yọ whọ be sẹro rai kpobi nọ u ru nọ e rọ rrọ, yọ ogbaẹmo obọ idhiwu na o bi guzou kpotọ kẹ owhẹ. 7 Whẹ họ Jihova Ọghẹnẹ uzẹme na, ọnọ ọ salọ Abram+ jẹ rehọ iẹe no Ọr+ ọrọ ahwo Kaldia jẹ kẹe odẹ na Abraham.+ 8 Whọ ruẹ nọ o wo udu ẹmeoyo kẹ owhẹ,+ fikiere whọ tẹ re ọvọ kugbei inọ whọ te kẹe ẹkwotọ ahwo Kenan, ahwo Hit, ahwo Amọ, ahwo Pẹriz, ahwo Jibus, gbe ahwo Gẹgash, jẹ rehọ iẹe kẹ emọ* riẹ;+ yọ who koko eyaa ra, keme who kiẹrẹe.

9 “Fikiere whọ ruẹ oja-oriọ esẹ-esẹ mai evaọ obọ Ijipti,+ yọ who yo oviẹ rai evaọ Abade Ọwawae na. 10 Kẹsena who te ru eware eka gbe iruo igbunu wọso Fẹro gbe idibo riẹ kpobi gbe ahwo ẹkwotọ riẹ kpobi,+ keme whọ riẹ nọ a rọ omorro gboja+ kẹ ae. Who ru odẹ kẹ omara nọ o gbẹ rrọ rite inẹnẹ na.+ 11 Whọ hẹriẹ abade na evaọ aro rai, a tẹ rọ otọ oyaya fa abade na vrẹ,+ who te gbolo enọ i je le ai na fihọ ame odidi wọhọ utho nọ a gbolo fihọ ame nọ ọ be vohẹ.+ 12 Whọ rehọ ukulu ẹgho* su ai evaọ oke uvo, jẹ rehọ ukulu erae* su ai evaọ aso, re u lo fihọ edhere nọ u fo nọ a rẹ nya rọkẹ ae.+ 13 Who te nwrotọ ziọ Ugbehru Saena+ jẹ ta ẹme kẹ ae no obọ idhiwu ze+ jẹ kẹ ae iziẹibro ikiẹrẹe, izi uzẹme,* emamọ ijaje gbe izi.+ 14 Whọ vuẹ rai kpahe Ẹdijala ọrẹri ra,+ yọ whọ kẹ rai izi, ijaje, gbe uzi ẹkwoma odibo ra Mosis. 15 Whọ kẹ rai ebrẹdi no obọ odhiwu ze okenọ ohọo u je kpe ai,+ jẹ rehọ ame no ugbehru-utho ze kẹ ae okenọ uruame u je kpe ai,+ whọ tẹ ta kẹ ae nọ a ruọ eva re a rehọ ẹkwotọ nọ who duwu iyei* nọ whọ te kẹ ae.

16 “Rekọ ae omarai, esẹ-esẹ mai, a dhesẹ omorro+ a te ru uzou gaga,*+ yọ a jẹ gaviezọ kẹ ijaje ra ha. 17 A rọwo gaviezọ họ,+ yọ a kareghẹhọ eware igbunu nọ whọ jọ udevie rai ru hu, rekọ a te ru uzou gaga* jẹ rọ osu mu re a zihe kpohọ igbo nọ a jọ evaọ obọ Ijipti.+ Rekọ whẹ yọ Ọghẹnẹ nọ ọ ruẹrẹ oma kpahe nọ ọ rẹ rọvrẹ,* nọ o wo ọdawẹ* avọ ohrọ-oriọ, nọ ọ rẹ kaki mu ofu hu jẹ vọ avọ uyoyou nọ o rẹ hiẹ hẹ,*+ yọ whọ nyasiọ ae ba ha.+ 18 Makọ okenọ a ru ẹmema ọmọ-eruẹ igoru* nọ a jẹ ta nọ, ‘Ọna họ Ọghẹnẹ ra nọ o su owhẹ no eva Ijipti ze,’+ je ru eware iyoma ilogbo nọ i dhesẹ orivo, 19 makọ evaọ oke yena, fiki ohrọ-oriọ ulogbo ra, whọ nyasiọ ae ba udhude na ha.+ Ukulu ẹgho* na o nyasiọ ae ba ha re o siọ ae ba esu evaọ edhere na evaọ oke uvo, yọ ukulu erae* na o seba elo fihọ edhere nọ u fo nọ a rẹ nya evaọ aso ho.+ 20 Whọ kẹ rai ẹzi owoma ra re ọ kẹ ae otoriẹ udidi,+ yọ whọ siọ emana ra ba ẹrọkẹ ae he,+ whọ tẹ jẹ kẹ ae ame okenọ uruame u je kpe ai.+ 21 Ikpe udhuvẹ whọ kẹ rai emu evaọ udhude na.+ Oware ovo o kare rai hi. Iwu rai e bẹre he,+ yọ awọ rai o fu hu.

22 “Whọ kẹ rai ekwotọ-ivie gbe ahwo, whọ rehọ e rai kẹ ae unọjọ utọjọ,+ fikiere a tẹ rehọ ẹkwotọ Saehọn,+ koyehọ ẹkwotọ ovie Hẹshbọn,+ jegbe ẹkwotọ Ọg+ ovie Beshan. 23 Yọ who ru emọ* rai bu wọhọ isi obọ ehru.*+ Kẹsena whọ tẹ rehọ ae ziọ ẹkwotọ nọ whọ ya eyaa riẹ kẹ esẹ-esẹ rai inọ a ruọ eva riẹ jẹ rehọ iẹe.+ 24 Fikiere emọ rai a tẹ ruọ eva riẹ jẹ rehọ ẹkwotọ na,+ who te fi ahwo Kenan,+ enọ e jẹ rria ẹkwotọ na kparobọ kẹ ae, whọ tẹ rehọ ae kẹ ae, te ivie rai gbe ahwo ẹkwotọ na, re a ru ai epanọ u je rai. 25 A tẹ rehọ ikpewho nọ a di ogba wariẹ họ*+ gbe otọ nọ u re wou eware,+ yọ a rehọ iwou nọ e vọ avọ oghoghẹrẹ eware iwoma kpobi, egọdọ-ame* nọ a tọ fihọ no, egbọ evaene, egbọ olivi,+ gbe ire buobu nọ e rẹ mọ ibi. Fikiere a tẹ re, re eva vọ je fu fihọ, jẹ reawere ewoma ologbo ra.

26 “Ghele na, a tẹ ghẹmeeyo jẹ wọso owhẹ+ je kiukeku Uzi ra.* A kpe eruẹaro ra enọ e jẹ vẹvẹ ae unu re a ruẹsi zihe ae bru owhẹ ze, yọ a ru eware nọ i dhesẹ orivo ọgaga.+ 27 Fiki onana whọ tẹ rehọ ae kẹ ewegrẹ rai,+ enọ i je gboja kẹ ae.+ Rekọ nọ a te bo se owhẹ evaọ oke uye rai who ve yo no obọ idhiwu ze; yọ fiki ohrọ ulogbo ra, whọ vẹ kẹ ae ahwo nọ a re siwi ai no obọ ewegrẹ rai.+

28 “Rekọ nọ a tẹ nwani wo ufuoma no, a vẹ wariẹ ru oware uyoma evaọ aro ra,+ whọ vẹ nyasiọ ae ba kẹ ewegrẹ rai, enọ e rẹ rọ obọ ogaga su ai.*+ Kẹsena a ve zihe ze je bo se owhẹ kẹ obufihọ,+ who ve yo no obọ idhiwu ze je siwi ai unuẹse buobu fiki ohrọ ulogbo ra.+ 29 Dede nọ whọ jẹ vẹvẹ ai unu re who zihe ai ziọ Uzi ra, a dhesẹ omorro yọ a rọwo ho inọ a rẹ gaviezọ kẹ ijaje ra;+ a raha uzi wọso ijaje ra, enọ ohwo o te bi koko ọ vẹ jọ uzuazọ.+ Rekọ a kiukeku owhẹ fiki uzou ogaga rai, je ru uriohọ rai kekeke, a rọwo gaviezọ họ. 30 Who wo odiri kẹ ae+ ikpe buobu whọ tẹ jẹ rọ ẹzi ra vẹvẹ ai unu ẹkwoma eruẹaro ra, rekọ a rọwo gaviezọ họ. Ukuhọ riẹ who te siobọno ai kẹ ahwo erẹwho na.+ 31 Yọ fiki ohrọ ulogbo ra, who kpe rai muotọ họ yọ whọ nyasiọ ae ba ha,+ keme whẹ yọ Ọghẹnẹ nọ o wo ọdawẹ* avọ ohrọ-oriọ.+

32 “Yọ enẹna, O Ọghẹnẹ mai, Ọghẹnẹ nọ ọ rrọ ruaro, ọnọ o wo ogaga, nọ o re mu ọwhewhe, ọnọ o koko ọvọ riẹ je dhesẹ uyoyou nọ o rẹ hiẹ hẹ,+ who gbolaro kẹ uye nọ u te omai hi, te ivie mai, ikpahwo-esuo mai,+ izerẹ mai,+ eruẹaro mai,+ esẹ-esẹ mai, gbe ahwo ra kpobi anwọ edẹ ivie Asiria+ ze rite inẹnẹ na. 33 Who kiẹrẹe evaọ eware kpobi nọ e via kẹ omai na, keme who ru eme ra gba; rekọ mai họ enọ i ru umuomu.+ 34 Yọ ivie mai, ikpahwo-esuo mai, izerẹ mai, gbe esẹ-esẹ mai, a koko Uzi ra ha yọ a daezọ ijaje ra hayo ekareghẹhọ* ra ha enọ whọ rọ vẹvẹ ae unu. 35 Makọ okenọ a jọ evaọ uvie rai jẹ reawere ewoma obuobu ra nọ who je ru kẹ ai, nọ a jọ otọ okẹkẹe nọ u re wou eware nọ whọ kẹ rai, a gọ owhẹ hẹ+ yọ a kurẹriẹ no iruemu iyoma rai hi. 36 Whaọ oye ma rrọ nẹnẹ na, erigbo,+ ẹhẹ, erigbo evaọ ẹkwotọ nọ whọ kẹ esẹ-esẹ mai re a re ibi riẹ gbe eware iwoma riẹ. 37 Ekakọ ibuobu riẹ i zihe ruọ erọ ivie nọ whọ kuvẹ nọ a su omai fiki izieraha mai.+ A bi su ugboma mai gbe erao mai epanọ u je rai, ma tẹ rrọ uye ulogbo.

38 “Fiki eware nana kpobi, ma bi ru ọtamuo ọgaga nọ ma bi kere fihotọ,+ onọ ikpahwo-esuo mai, ahwo Livae mai, gbe izerẹ mai a rẹ whobọhọ ẹkwoma oka rai nọ a re fihọ iẹe.”+

10 Enọ e whobọhọ iẹe ẹkwoma oka rai nọ a fihọ iẹe+ họ:

9 U te no ai no kọ ahwo Livae na: Jeshua ọmọzae Azanaya, Binua ọrọ emezae Hẹnadad, Kadmiẹl,+ 10 gbe inievo-emezae rai Shẹbanaya, Hodaya, Kẹlaeta, Pẹleya, Henan, 11 Maeka, Rihọb, Hashabaya, 12 Zakọ, Shẹrẹbaya,+ Shẹbanaya, 13 Hodaya, Benae, gbe Bẹnainu.

14 Enọ i wuzou ahwo na: Perọsh, Pehat-moab,+ Ilam, Zatu, Benae, 15 Bunai, Azgad, Bibae, 16 Adonaejah, Bigvai, Edin, 17 Eta, Hẹzikaya, Azzọ, 18 Hodaya, Heshọm, Bizai, 19 Herẹf, Anatọt, Nibae, 20 Magpeash, Mẹshulam, Hiza, 21 Mẹshezabẹl, Zedọk, Jadua, 22 Pẹlataya, Henan, Anaya, 23 Hoshia, Hananaya, Hashọb, 24 Halohẹsh, Pilha, Shobẹk, 25 Rihọm, Hashabna, Measaya, 26 Ahaejah, Henan, Enan, 27 Malọk, Herẹm, gbe Benah.

28 Ahwo nọ a kiọkọ—izerẹ na, ahwo Livae, irou-unuẹthẹ* na, eso-ile na, idibo etẹmpol na,* gbe ohwo kpobi nọ ọ hẹriẹ oma riẹ no ahwo erẹwho na re o koko Uzi Ọghẹnẹ uzẹme na,+ kugbe eyae rai, gbe emezae rai, gbe emetẹ rai, ahwo kpobi nọ a wo eriariẹ gbe otoriẹ*— 29 a kuomagbe inievo rai, ahwo ologbo rai, a tẹ bọwo omarai ehao je duwu omarai iyei inọ a re lele Uzi Ọghẹnẹ uzẹme na, onọ ọ kẹ ẹkwoma Mosis odibo Ọghẹnẹ uzẹme na, jegbe nọ a rẹ romatotọ koko izi Jihova Olori mai kpobi, je ru lele oziẹobro riẹ, gbe ijaje riẹ. 30 Ma rẹ rehọ emetẹ mai kẹ ahwo erẹwho na ha, yọ ma rẹ rehọ emetẹ rai kẹ emezae mai hi.+

31 Otẹrọnọ ahwo otọ na a wha eware rai gbe oghoghẹrẹ ibi ekakọ rai ze te zẹ evaọ ẹdẹ Ẹdijala,+ ma te dẹ oware ovo mi ai evaọ Ẹdijala hayo evaọ ẹdẹ ọrẹri hi.+ Yọ ma te jẹ kpairoro vrẹ ivuẹvu ukpe avọ ihrẹ na+ gbe osa kpobi nọ ohwo ọ re.+

32 Ofariẹ, ma te fi owha na họ omamai inọ mai omomọvo ọ te hae kẹ abọvo abasa shẹkẹl* kukpe kukpe rọkẹ iruo uwou* Ọghẹnẹ mai,+ 33 rọkẹ ebrẹdi nọ a re fihọ ehru ohwohwo na,*+ idhe ibi ekakọ ikẹse kẹse na,+ idhe emahọ ikẹse kẹse Edijala na+ gbe ehaa ọvẹre ọkpokpọ na,+ jẹ rọkẹ edẹ ehaa nọ a fihọ na,+ rọkẹ eware ọrẹri na, rọkẹ idhe uzioraha+ nọ a re ro ru omavoro kẹ Izrẹl, jẹ rọkẹ iruo uwou Ọghẹnẹ mai kpobi.

34 U te no ere no, ma tẹ ma ẹta kpahe epanọ izerẹ na, ahwo Livae na, gbe ahwo na evaọ ọvuọ inuwou abọ esẹ mai a rẹ rọ rehọ ire ziọ uwou Ọghẹnẹ mai, evaọ oke nọ a fihọ, no ukpe te ukpe, nọ a re ro koko erae họ agbada-idhe Jihova Ọghẹnẹ mai, wọhọ epanọ a kere fihọ Uzi na.+ 35 U te no ere no, ma te rọ ibi ọsosuọ nọ e ware evaọ otọ mai gbe ibi ọsosuọ nọ e ware evaọ oghẹrẹ ure kpobi nọ o rẹ mọ ibi ziọ uwou Jihova+ kukpe kukpe, 36 te ọmọ ọsosuọ evaọ emezae mai gbe erao mai+ wọhọ epanọ a kere fihọ Uzi na, te ọmọ ọsosuọ ewa erao gbe ithuru mai. Ma te rehọ ae ziọ uwou Ọghẹnẹ mai, ro se izerẹ nọ e be gbodibo evaọ uwou Ọghẹnẹ mai.+ 37 Yọ ma te jẹ rehọ ibi ọsosuọ mai nọ a wuhu yẹ tere he,+ azọhọ mai, ibi oghẹrẹ ure kpobi,+ enwaene ọkpokpọ, gbe ewhri+ se izerẹ na nọ a re fihọ ibriwou nọ a rẹ jọ sẹro eware* evaọ uwou Ọghẹnẹ mai,+ gbe abọvo abakpe nọ ma rehọ no otọ mai ze se ahwo Livae,+ keme ahwo Livae họ enọ i re mi abọvo abakpe evaọ ikpewho kpobi nọ ma bi jo ru iruo ẹwọ.*

38 Yọ ozerẹ na, ọmọzae Erọn, ọ rẹ jọ kugbe ahwo Livae na hrọ okenọ ahwo Livae na a te bi mi abọvo abakpe na; yọ ahwo Livae na a rẹ rehọ abọvo abakpe ọrọ abọvo abakpe na kẹ uwou Ọghẹnẹ mai,+ yọ a re fi ei họ ibriwou* uwou nọ a rẹ jọ sẹro* eware na. 39 Keme ibriwou nọ a rẹ jọ sẹro eware* na u fo nọ ahwo Izrẹl gbe emezae ahwo Livae a rẹ rehọ azọhọ+ ibi ekakọ na ze, te enwaene ọkpokpọ na, gbe ewhri na,+ yọ etẹe ekwakwa etẹmpol na e rrọ, te izerẹ nọ e be gbodibo na, gbe irou-unuẹthẹ* na, gbe eso-ile na. Ma ti gbabọkẹ uwou Ọghẹnẹ mai hi.+

11 Whaọ isu* ahwo na a jẹ rria Jerusalẹm;+ rekọ ahwo nọ a kiọkọ a tẹ ma ẹta+ re a jọ usu imakpe kpobi rehọ omọvo jọ ze re ọ rria Jerusalẹm, okpẹwho ọrẹri na, re imazii nọ i kiọkọ a rria ikpewho nọ i kiọkọ. 2 Ahwo na a tẹ lẹ ẹro eghale kẹ ezae nọ e fialoma via nọ a rẹ rria Jerusalẹm na.

3 Enana họ enọ i wuzou ubrotọ* na nọ e jẹ rria Jerusalẹm. (Ahwo nọ a kiọkọ evaọ Izrẹl, izerẹ na, ahwo Livae, idibo etẹmpol na,*+ gbe emezae idibo Solomọn,+ a jẹ rria ikpewho Juda efa, omomọvo evaọ otọ riẹ evaọ okpẹwho riẹ.+

4 Ofariẹ, ahwo Juda gbe erọ Bẹnjamin jọ a jẹ rria Jerusalẹm.) Evaọ usu ahwo Juda, Athaya ọmọzae Uzaya ọmọzae Zẹkaraya ọmọzae Amaraya ọmọzae Shẹfataya ọmọzae Mahalalẹl ọrọ emezae Pirẹz,+ 5 gbe Measaya ọmọzae Barọk ọmọzae Kọhoza ọmọzae Hezaya ọmọzae Adaya ọmọzae Joyarib ọmọzae Zẹkaraya ọrọ unuwou Shila. 6 Emezae Pirẹz kpobi nọ e jẹ rria Jerusalẹm a jọ ezae egba ene gbe udhosa-gberee (468) nọ i te ziezi.

7 Enana họ erọ ahwo Bẹnjamin: Salu+ ọmọzae Mẹshulam ọmọzae Joẹd ọmọzae Pedaya ọmọzae Kolaya ọmọzae Measaya ọmọzae Itiẹl ọmọzae Jesheya, 8 u te noi no kọ Gabea gbe Saleyae, egba izii gbe udhegberee (928); 9 yọ Joẹl ọmọzae Zikrae ọ jọ ọsẹro rai, yọ Juda ọmọzae Hasẹnua ọ jọ ethabọ riẹ evaọ ẹruorote okpẹwho na.

10 Evaọ izerẹ na: Jedeya ọmọzae Joyarib, Jekin,+ 11 Seraya ọmọzae Hilkaya ọmọzae Mẹshulam ọmọzae Zedọk ọmọzae Mereyọt ọmọzae Ahaetọb,+ osu evaọ uwou* Ọghẹnẹ uzẹme na, 12 gbe inievo-emezae rai nọ i je ru iruo uwou na, egba eree gbe udhegbivẹ (822); gbe Adaya ọmọzae Jeroham ọmọzae Pẹlalaya ọmọzae Amzae ọmọzae Zẹkaraya ọmọzae Pashọ+ ọmọzae Malkaejah, 13 gbe inievo-emezae riẹ, enọ i wuzou inuwou abọ ọsẹ, egba ivẹ gbe udhuvẹ-gbivẹ (242); gbe Amashsae ọmọzae Azarẹl ọmọzae Azae ọmọzae Mẹshilẹmọt ọmọzae Ima, 14 gbe inievo-emezae rai nọ e jọ ezae nọ i wo ẹgba je wo udu, udhozeza-gberee (128); yọ ọsẹro rai họ Zabdiẹl, ọnọ ọ rrọ ohwo uviuwou nọ a riẹ odẹ.

15 Evaọ ahwo Livae na: Shimaya+ ọmọzae Hashọb ọmọzae Azraekam ọmọzae Hashabaya ọmọzae Bunai, 16 gbe Shabẹtae+ avọ Jozebad,+ enọ e jọ usu enọ i wuzou ahwo Livae, enọ i wuzou iruo otafe uwou Ọghẹnẹ uzẹme na; 17 gbe Matanaya,+ ọmọzae Maeka ọmọzae Zabdae ọmọzae Esaf,+ ọnọ ọ jẹ kpọ ile-esuọ na, nọ ọ jẹ kpọ ile-esuọ ujiro na evaọ oke olẹ,+ gbe Bakbukaya, ọrọ avọ ivẹ evaọ usu inievo-emezae riẹ, gbe Abda ọmọzae Shamua ọmọzae Gelal ọmọzae Jedutọn.+ 18 Ahwo Livae kpobi nọ e jọ okpẹwho ọrẹri na egba ivẹ gbe udhone-gbene (284).

19 Irou-unuẹthẹ* na họ Akọb, Talmọn,+ gbe inievo-emezae rai nọ i je rou inuethẹ na, udhoree gbe ikpegbivẹ (172).

20 Ahwo nọ a kiọkọ evaọ Izrẹl, izerẹ na, gbe ahwo Livae na a jọ ikpewho Juda efa kpobi, omomọvo evaọ otọ riẹ nọ ọ rọ reuku.* 21 Idibo etẹmpol na*+ a jẹ rria Ofẹl,+ yọ Zaeha gbe Gishpa họ enọ i wuzou idibo etẹmpol na.*

22 Ọsẹro ahwo Livae nọ a jọ Jerusalẹm họ Uzzai ọmọzae Benae ọmọzae Hashabaya ọmọzae Matanaya+ ọmọzae Maeka, ọrọ emezae Esaf, eso-ile na; ọye o wuzou iruo uwou Ọghẹnẹ uzẹme na. 23 Keme uzi u no obọ ovie na ze kpahe ae,+ fikiere u wo ọruẹrẹfihotọ nọ a ru kẹ eso-ile na wọhọ epanọ ẹdẹ kpobi ọ gwọlọ. 24 Yọ Pẹtahaya ọmọzae Mẹshezabẹl ọrọ emezae Zira ọmọzae Juda ọ jọ ọkiroro* ovie na evaọ ẹme kpobi nọ o kiekpahe ahwo na.

25 Rọ kpahe eria nọ a jẹ rria gbe etọ rai, ahwo Juda jọ a jẹ rria Kiriat-aba+ gbe ewho esese riẹ,* Daebọn gbe ewho esese riẹ, Jekabziẹl+ gbe iwhre riẹ, 26 Jeshua, Moleda,+ Bẹt-pẹlẹt,+ 27 Heza-shual,+ Biẹ-shiba gbe ewho esese riẹ,* 28 Ziklag,+ Mẹkona gbe ewho esese riẹ,* 29 Ẹn-rimmọn,+ Zora,+ gbe Jamut, 30 Zanoa,+ Adọlam gbe iwhre rai, Lekish+ gbe etọ riẹ, gbe Azika+ gbe ewho esese riẹ.* A jẹ rria* Biẹ-shiba rite Ukiekpotọ Hinọm.+

31 Yọ ahwo Bẹnjamin a jọ Giba,+ Mikmash, Aija, Bẹtẹl+ gbe ewho esese riẹ,* 32 Anatọt,+ Nọb,+ Ananaya, 33 Hezọ, Rema,+ Gitiam, 34 Hedid, Zeboẹm, Nebalat, 35 Lọd, gbe Ono,+ ukiekpotọ ewena na. 36 Yọ a dhe itu ahwo Livae jọ nọ i no Juda ze kpohọ Bẹnjamin.

12 Enana họ izerẹ na gbe ahwo Livae nọ a lele Zerubabẹl+ ọmọzae Shealtiẹl,+ gbe Jeshua:+ Seraya, Jerimaya, Ẹzra, 2 Amaraya, Malọk, Hatọsh, 3 Shẹkenaya, Rihọm, Mẹremọt, 4 Idọ, Ginẹtọe, Abaejah, 5 Mijamin, Meadaya, Bilga, 6 Shimaya, Joyarib, Jedeya, 7 Salu, Emọk, Hilkaya, gbe Jedeya. Enana e jọ enọ i wuzou izerẹ na gbe inievo-emezae rai evaọ edẹ Jeshua.

8 Ahwo Livae na họ Jeshua, Binua, Kadmiẹl,+ Shẹrẹbaya, Juda, gbe Matanaya,+ ọnọ avọ inievo-emezae riẹ a jẹ kpọ ile-esuọ uyere-okẹ na. 9 Yọ Bakbukaya avọ Ọnae inievo-emezae rai a dikihẹ abọdekọ rai bi rou irou.* 10 Jeshua họ ọsẹ Joyakim, Joyakim họ ọsẹ Elayashib, Elayashib+ họ ọsẹ Joyada.+ 11 Joyada họ ọsẹ Jonatan, Jonatan họ ọsẹ Jadua.

12 Evaọ oke Joyakim, enana e jọ izerẹ, enọ i wuzou inuwou abọ ọsẹ: ọrọ Seraya,+ Meraya; ọrọ Jerimaya, Hananaya; 13 ọrọ Ẹzra,+ Mẹshulam; ọrọ Amaraya, Jehohena; 14 ọrọ Malọkae, Jonatan; ọrọ Shẹbanaya, Josẹf; 15 ọrọ Herẹm,+ Adna; ọrọ Mereyọt, Hẹlkai; 16 ọrọ Idọ, Zẹkaraya; ọrọ Ginẹtọn, Mẹshulam; 17 ọrọ Abaejah,+ Zikrae; ọrọ Menayamin, . . . ;* ọrọ Moadaya, Piltae; 18 ọrọ Bilga,+ Shamua; ọrọ Shimaya, Jehonatan; 19 ọrọ Joyarib, Matinae; ọrọ Jedeya,+ Uzzai; 20 ọrọ Saleyae, Kalae; ọrọ Emọk, Iba; 21 ọrọ Hilkaya, Hashabaya; ọrọ Jedeya, Nẹtanẹl.

22 A kere edẹ ahwo nọ i wuzou inuwou abọ ọsẹ erọ ahwo Livae fihotọ evaọ oke Elayashib, Joyada,+ Johenan, gbe Jadua, je kere edẹ izerẹ na re, rite oke esuo Dariọs ohwo Pasia na.

23 A kere edẹ ahwo Livae nọ i wuzou inuwou abọ ọsẹ fihọ obe ikuigbe oke yena, rite oke Johenan ọmọzae Elayashib. 24 Enọ i wuzou ahwo Livae na họ Hashabaya, Shẹrẹbaya, gbe Jeshua+ ọmọzae Kadmiẹl,+ yọ inievo-emezae rai a dikihẹ abọdekọ rai re a kẹ ujiro jẹ kẹ uyere wọhọ epanọ Devidi+ ohwo Ọghẹnẹ uzẹme na ọ ta, utu iroiro jọ o kẹle utu iroiro odekọ. 25 Matanaya,+ Bakbukaya, Obedaya, Mẹshulam, Talmọn, gbe Akọb+ a jọ iroiro, irou-unuẹthẹ*+ nọ i je rou ibriwou nọ a rẹ jọ sẹro eware nọ e kẹle inuethẹ na. 26 Enana i je ru iruo evaọ oke Joyakim ọmọzae Jeshua+ ọmọzae Jozedak gbe evaọ oke Nehemaya ọba na gbe Ẹzra+ ozerẹ gbe okere-obe na.

27 Evaọ oke eromudhe igbẹhẹ Jerusalẹm, a tẹ gwọlọ ahwo Livae na via jẹ rehọ ae ziọ Jerusalẹm no eria kpobi nọ a jẹ rria ze re a ru ehaa eromudhe na avọ oghọghọ, avọ ile uyere-okẹ,+ avọ igogo, ekpata-ifi, gbe ekpata. 28 Emezae eso-ile* na a te kokohọ no ubrotọ na* ze, no eria kpobi nọ e wariẹ Jerusalẹm họ ze, no iwhre ahwo Nẹtofa ze,+ 29 no Bẹt-gilgal ze,+ je no etọ Giba+ gbe Azmevẹt ze,+ keme eso-ile na a fa iwhre kẹ omarai wariẹ Jerusalẹm kpobi họ. 30 Izerẹ na gbe ahwo Livae na a ru omarai fo, a ru ahwo na fo,+ inuethẹ na,+ gbe ugbẹhẹ na.+

31 Kẹsena mẹ tẹ rehọ isu* Juda kpohọ ehru ugbẹhẹ na. Ofariẹ, mẹ tẹ ruẹrẹ itu ilogbo ivẹ ikuaya uyere-okẹ họ gbe uje nọ u re lele ai, utu jọ o tẹ nya kpohọ obọze evaọ ehru ugbẹhẹ na kpohọ ofẹ Unuẹthẹ Ẹre Enwo na.+ 32 Yọ Hoshaya avọ abọvo isu Juda na a rrọ emu rai bi lele ai, 33 gbe Azaraya, Ẹzra, Mẹshulam, 34 Juda, Bẹnjamin, Shimaya, gbe Jerimaya. 35 Yọ emezae izerẹ na jọ a je lele ai avọ egba:+ Zẹkaraya ọmọzae Jonatan ọmọzae Shimaya ọmọzae Matanaya ọmọzae Maekaya ọmọzae Zakọ ọmọzae Esaf,+ 36 gbe inievo-emezae riẹ Shimaya, Azarẹl, Milalae, Gilalae, Meyae, Nẹtanẹl, Juda, gbe Hanenae, avọ ekwakwa ikporakporo Devidi+ ohwo Ọghẹnẹ uzẹme na; yọ Ẹzra+ okere-obe na ọ jọ aro kẹ ae. 37 Evaọ Unuẹthẹ Eyeri-Ame na,+ a tẹ nya ovavo kpobọ ehru nya Oria-Ẹgadiẹ+ Okpẹwho Devidi+ na vrẹ be nya oria nọ a rẹ rọ gadiẹ kpehru orọ ugbẹhẹ na, nọ u kpehru vi Uwou Devidi na jẹ rọ ere kpobọ Unuẹthẹ Ame na+ evaọ ofẹ ovatha-ọre.

38 Utu ikuaya uyere-okẹ nọ u kiọkọ na o tẹ nya ofẹ odekọ,* me te lele ai avọ abọvo ahwo na evaọ ehru ugbẹhẹ na nya ehru Uwou Ukpehru Ovini na+ vrẹ kpohọ Ugbẹhẹ Okẹkẹe na+ 39 jẹ nya ehru Unuẹthẹ Ifremu vrẹ+ kpohọ Unuẹthẹ Okpẹwho Anwae na+ je kpohọ Unuẹthẹ Iyei na,+ Uwou Ukpehru Hananẹl,+ Uwou Ukpehru Miya, je kpohọ Unuẹthẹ Igodẹ na;+ a tẹ te daji evaọ Unuẹthẹ Iroiro na.

40 Ukuhọ riẹ, itu ivẹ ikuaya uyere-okẹ na a te dikihẹ aro uwou Ọghẹnẹ uzẹme na; ere omẹ re gbe abọvo ethabọ isu nọ e jọ kugbe omẹ na, 41 gbe izerẹ na Elayakim, Measaya, Menayamin, Maekaya, Ẹlio-inae, Zẹkaraya, gbe Hananaya, avọ egba, 42 gbe Measaya, Shimaya, Ẹlieza, Uzzai, Jehohena, Malkaejah, Ilam, gbe Izẹ. Eso-ile na a so ile do via gaga, yọ Izrahaya ọ jọ osu rai.

43 Evaọ ẹdẹ yena a dhe idhe ilogbo jẹ ghọghọ,+ keme Ọghẹnẹ uzẹme na o ru nọ a rọ ghọghọ oghọghọ ulogbo. Eyae na avọ emaha na a ghọghọ re,+ o tẹ whae ze nọ a jẹ rọ jọ ugbothabọ yo edo oghọghọ Jerusalẹm.+

44 Evaọ ẹdẹ yena a rọ ezae mu nọ e rẹ rẹrote iwou nọ a rẹ jọ sẹro*+ eware na nọ a re fi eware nọ a zọhọ ze fihọ,+ te ibi ọsosuọ,+ gbe abọvo abakpe na.+ A re koko eware nọ a rehọ no idhu ikpewho na ze fihọ ae eva, enọ Uzi na+ o ta nọ a rẹ kẹ izerẹ na gbe ahwo Livae,+ keme oghọghọ o jọ evaọ Juda fiki izerẹ na gbe ahwo Livae na nọ a jẹ gbodibo. 45 A te mu iruo nọ Ọghẹnẹ rai ọ kẹ rai họ eru gbe owha-iruo erufuọ, wọhọ epanọ eso-ile na gbe irou-unuẹthẹ* na a je ru, lele oware nọ Devidi avọ ọmọzae riẹ Solomọn a ta. 46 Keme evaọ oke krẹkri nọ u kpemu evaọ edẹ Devidi avọ Esaf, u wo ahwo nọ a jọ isu* eso-ile na gbe ile ujiro gbe uyere-okẹ rọkẹ Ọghẹnẹ.+ 47 Yọ evaọ oke Zerubabẹl+ gbe evaọ oke Nehemaya, ahwo Izrẹl kpobi a jẹ hae rọ eware se eso-ile na+ gbe irou-unuẹthẹ* na,+ wọhọ epaọ ẹgwọlọ okpẹdẹ na. Yọ a jẹ hai fi onọ a rẹ rọ kẹ ahwo Livae na họ akotọ re,+ yọ ahwo Livae na a je fi onọ a rẹ rọ kẹ ahwo uyẹ Erọn họ akotọ.

13 Evaọ ẹdẹ yena a se obe Mosis na do via kẹ ahwo na,+ a tẹ ruẹ nọ a kere fihọ iẹe nọ ohwo Ammọn hayo ohwo Moab+ ọvuọvo ọ rẹ ruọ ukoko Ọghẹnẹ uzẹme na vievie he,+ 2 keme a kẹ ahwo Izrẹl ebrẹdi gbe ame he, ukpoye a rehọ Belam re ọ bọwo ae ehao.+ Rekọ Ọghẹnẹ mai o te zihe ehao na ruọ oghale.+ 3 Nọ a nwani yo Uzi na, a te mu ahwo erẹwho efa* kpobi họ esino udevie ahwo Izrẹl.+

4 Whaọ re oke nana u te ti te, ozerẹ nọ o wuzou ibriwou nọ a rẹ jọ sẹro eware* evaọ uwou* Ọghẹnẹ mai+ họ Elayashib,+ ọnọ avọ Tobaya+ a gbẹ rrọ egọ. 5 Ọ kẹ riẹ ubruwou ulogbo nọ a rẹ jọ sẹro eware,* oria nọ a jẹ hai fi ibi ekakọ nọ a re ro dhe idhe họ, te frankinsẹns, gbe ekwakwa iruo etẹmpol avọ abọvo abakpe ọrọ ibi ekakọ, enwaene ọkpokpọ na, gbe ewhri,+ enọ u fo nọ a rẹ kẹ ahwo Livae na,+ eso-ile na, gbe irou-unuẹthẹ* na, jegbe eware nọ a zọhọ ze kẹ izerẹ na.+

6 Evaọ oke nana kpobi mẹ jọ Jerusalẹm hu, keme me zihe bru ovie na evaọ ukpe avọ ọgbagbivẹ+ ọrọ Atazazis ovie+ Babilọn; nọ oke o be nyaharo na me te mi ovie na uvẹ inọ ọ kẹ omẹ oke jọ. 7 Kẹsena mẹ tẹ ziọ Jerusalẹm, me te muẹrohọ ekpehre oware nọ Elayashib+ o ru fiki Tobaya,+ ọ kẹ riẹ ubruwou jọ nọ a rẹ jọ sẹro eware evaọ ighẹ uwou Ọghẹnẹ uzẹme na. 8 Onana u ru eva dha omẹ gaga, fikiere me te gbolo ekwakwa uwou Tobaya kpobi no ubruwou nọ a rẹ jọ sẹro eware* na fihọ otafe. 9 Kẹsena me te vi ahwo, a te ru ibriwou nọ a rẹ jọ sẹro eware* na fo; mẹ tẹ wariẹ kwa ekwakwa uwou Ọghẹnẹ uzẹme na zihe fihọ iẹe,+ te ibi ekakọ nọ a re ro dhe idhe gbe frankinsẹns na.+

10 Mẹ tẹ jẹ ruẹ nọ eware nọ u fo nọ a rẹ kẹ ahwo Livae na,+ a be rehọ ai kẹ ae he,+ o tẹ whae ze nọ ahwo Livae gbe eso-ile nọ i je ru iruo na a rọ nyasiọ iruo na ba kpohọ ọvuọ udhu riẹ.+ 11 Fikiere mẹ tẹ whọku ethabọ isu na+ jẹ ta nọ: “Fikieme a ro gbabọkẹ uwou Ọghẹnẹ uzẹme na?”+ Kẹsena me te koko ai họ je zihe ai kpohọ ọvuọ iruo riẹ. 12 Ahwo Juda kpobi a tẹ rọ abọvo abakpe+ ọrọ ibi ekakọ, enwaene ọkpokpọ na, gbe ewhri ziọ ibriwou nọ a rẹ jọ sẹro eware na.+ 13 Kẹsena me te fi Shẹlẹmaya ozerẹ na, Zedọk okere-obe na, gbe Pedaya ohwo Livae na họ re a rẹrote ibriwou nọ a rẹ jọ sẹro eware na, yọ Henan ọmọzae Zakọ ọmọzae Matanaya ọ jọ ethabọ rai, keme a rri ezae nana fihọ ahwo nọ a re fievahọ. O jọ owha-iruo rai re a  hae ghale emu na kẹ imoni rai.

14 Kareghẹhọ omẹ,+ O, Ọghẹnẹ mẹ, fiki onana, yọ who voro iruo mẹ no ho erọ uyoyou nọ o rẹ hiẹ hẹ nọ me ru kẹ uwou Ọghẹnẹ mẹ gbe iruẹru* riẹ.+

15 Evaọ edẹ yena mẹ jọ Juda ruẹ ahwo nọ a bi thihi ibi-evaene evaọ egọdọ udi-uruo evaọ Ẹdijala,+ nọ e be wọ ibi ekakọ ze ekueko fihọ ehru eketekete, jẹ be wha enwaene, ibi evaene, ifigi, gbe oghẹrẹ ewha kpobi ziọ Jerusalẹm evaọ ẹdẹ Ẹdijala.+ Fikiere mẹ tẹ vẹvẹ ai unu nọ a gbẹ zẹ eware evaọ ẹdẹ yena ha.* 16 Yọ ahwo Taya nọ a be rria okpẹwho na a jẹ wha iyei gbe oghẹrẹ eware kpobi ze, be zẹ ae kẹ ahwo Juda jẹ zẹ ae evaọ Jerusalẹm evaọ Ẹdijala.+ 17 Fikiere mẹ tẹ whọku ikpahwo Juda na jẹ ta kẹ ae nọ: “Nọ oware uyoma vẹ na wha bi ru na, bi tube zue ẹdẹ Ẹdijala na? 18 Kọ ogbẹrọnọ oware onana esẹ-esẹ rai a ru nọ o wha riẹ ze nọ Ọghẹnẹ mai ọ rọ rehọ uye nana kpobi te omai gbe okpẹwho nana? Whaọ, wha bi fiba ofu ọgaga riẹ kpahe Izrẹl ẹkwoma Ẹdijala na nọ wha bi zue na.”+

19 Fikiere nọ ọre na o muhọ ekiediwi no* taure Ẹdijala o te ti muhọ, me te jie uzi nọ a kare ethẹ Jerusalẹm. Mẹ tẹ jẹ ta nọ a re rovie ai hi bẹsenọ Ẹdijala o re kuhọ no, me te je fi idibo obọmẹ jọ họ inuethẹ na re a gbẹ wọ uvumọ owha ruọ eva ha evaọ ẹdẹ Ẹdijala na. 20 Fikiere ethueki na gbe enọ e jẹ zẹ oghẹrẹ eware kpobi a tẹ jọ otafe Jerusalẹm asohẹrioke ẹsiẹvo hayo isiava. 21 Kẹsena mẹ tẹ vẹvẹ ae unu jẹ ta kẹ ae nọ: “Fikieme wha be rọ jọ aro ugbẹhẹ na asohẹrioke? Wha tẹ gbẹ wariẹ dawo iẹe, mẹ te rọ ogaga le owhai.” No umuo ẹdẹ yena vrẹ, a gbẹ nyaze evaọ Ẹdijala ofa ha.

22 Mẹ tẹ ta kẹ ahwo Livae na nọ a hai ru omarai fo ẹsikpobi a vẹ hae nyaze ti rou inuethẹ na re a ru ẹdẹ Ẹdijala na ọrẹri.+ Evaọ onana re, kareghẹhọ iruo iwoma mẹ, O Ọghẹnẹ mẹ, re whọ re ohrọ mẹ fiki uyoyou ulogbo ra nọ o rẹ hiẹ hẹ.+

23 Evaọ edẹ yena mẹ tẹ jẹ ruẹ ahwo Ju nọ a rehọ eyae+ ahwo Ashdọd,+ Ammọn, gbe Moab.*+ 24 Abọvo emọ* rai a be ta ẹvẹrẹ Ashdọd, yọ abọvo ọfa a be ta ẹvẹrẹ amọfa sa-sa, rekọ ọvuọvo rai ọ riẹ ẹvẹrẹ ahwo Ju ẹta ha. 25 Fikiere mẹ tẹ whọku ai jẹ bọwo ae ehao jẹ tehe ezae na jọ,+ sawo eto rai jẹ gba ae họ rọ odẹ Ọghẹnẹ duwu iyei nọ: “Wha siobọno emetẹ rai kẹ emezae rai hi, yọ wha rọwo rehọ emetẹ rai ọvuọvo kẹ emezae rai hayo whai omarai hi.+ 26 Kọ ogbẹrọnọ fiki enana Solomọn ovie Izrẹl ọ rọ raha uzi? Epanọ erẹwho na i bu te na, ovie ọvuọvo ọ jọ nọ ọ wọhọ e riẹ hẹ;+ yọ Ọghẹnẹ riẹ o you rie,+ fikioye Ọghẹnẹ ọ jẹ rehọ iẹe mu ovie Izrẹl soso. Rekọ eyae erẹwho efa nọ ọ rehọ i ru rie raha uzi.+ 27 Kinọ oware nọ ezọ i re yo inọ wha bi ru umuomu ulogbo nana, be raha uzi Ọghẹnẹ mai ẹkwoma eyae erẹwho efa nọ wha be rehọ?”+

28 Ọmọzae Joyada+ jọ nọ ọ rrọ ọmọzae Elayashib+ ozerẹ okpehru na ọ rehọ ọmọtẹ Sanbalat+ ohwo Bẹt-horọn na. Fikiere me te lei vrẹ.

29 Kareghẹhọ ae, O Ọghẹnẹ mẹ, keme a gbe ọkwa-ozerẹ na gbe ọvọ ọkwa-ozerẹ na+ gbe ahwo Livae na ku.+

30 Me te ru ai fo no ogbekuo erẹwho efa kpobi, mẹ tẹ rọ iruo kẹ izerẹ na gbe ahwo Livae na, duọ ohwo duọ ọvuọ iruo riẹ,+ 31 je ru ọruẹrẹfihotọ nọ a rẹ hae rọ rehọ ire ze+ evaọ oke nọ a fihọ gbe ibi ọsosuọ nọ e ware.

Kareghẹhọ omẹ rọkẹ iruo iwoma* mẹ, O Ọghẹnẹ mẹ.+