Uzou Avọ Ikpegbezeza
‘Wha Wo Uyoyou Ogaga kẹ Ohwohwo’
1. Eme o re gbe ahwo ọkpokpọ unu eva iwuhrẹ Isẹri Jihova?
AHWO a tẹ kake nya ze iwuhrẹ Isẹri Jihova, uyoyou nọ a be jọ etẹe dhesẹ u re gbe ai unu. A re mu ẹro họ iẹe evaọ usu osasa jegbe odederehọ nọ a rẹ rọ kẹ ai. Erara nọ e ziọ ikokohọ mai a re je mu ẹro họ uyoyou nana re. Ọniyẹrẹ ọ obe awha-usi jọ o kere kpahe okokohọ jọ inọ: ‘Uvumọ ohwo o bi kpo geligeli fiki ibimu hayo idi hi. Ẹwhọ gbe enuodo ọ riẹ hẹ. Ohwo ogele ọ riẹ hẹ. Etunye ọ riẹ hẹ. Uvumọ ohwo ọ be bọwo-eha jẹ l’eka ha. Eme ehwẹ iyoma hayo eme etọtọ eta e riẹ hẹ. Iwiri ivovavovo e rrọ ehru na ha. Ujitho o riẹ hẹ. Uvumọ ohwo nọ o bi gbolo igbogbo fihọ ogege na ọ riẹ hẹ. Oghẹrẹ riẹ u gbunu kẹhẹ.’ Enana kpobi yọ imuẹro uyoyou, utionọ u ‘re ru eware etọtọ hayo gwọlọ ewoma obọ riẹ hẹ.’—1 Ahwo Kọrint 13:4-8.
2. (a) Nọ oke o be nya họ aro na, eme o re dhesẹ oma via evaọ edhesẹ uyoyou mai? (b) Evaọ aruorokele Kristi, didi oghẹrẹ uyoyou u fo nọ ma rẹ gwọlọ dhesẹ?
2 Uyoyou inievo họ okwakwa nọ a re ro vuhu uvi Oleleikristi. ( Jọn 13:35) Nọ ma be rro evaọ abọ-ẹzi na, ma re wuhrẹ epanọ ma re ro dhesẹ uyoyou vọvọ viere. Pọl ukọ na ọ lẹ nọ uyoyou ibe Ileleikristi riẹ “u he dhe ẹruẹruọ.” (Ahwo Filipai 1:9) Jọn ukọ na o dhesẹ nọ uyoyou mai o rẹ jọ onọ a rẹ rọ lahiẹ oma kẹ amọfa. O kere nọ: “Fiki onana ma re ro vuhu uyoyou, epanọ [Ọmọ Ọghẹnẹ] o ro fi uzuazọ riẹ họ otọ kẹ omai; u te omai te epanọ ma ro fi uzuazọ mai họ otọ kẹ imoni na.” (1 Jọn 3:16; Jọn 15:12, 13) Kọ ma ti ghine si obọ no uzuazọ mai fiki inievo mai? Dede nọ iyero buobu e rẹ gwọlọ oyena ha, ẹvẹ ma be daoma te re ma fi obọ họ kẹ ai enẹna, o tẹ make rrọ nọ o rẹ jọ bẹbẹ k’omai?
3. (a) Evaọ idhere vẹ ma sai ro dhesẹ uyoyou mai vọvọ viere? (b) Fikieme u je wuzou re ma wo uyoyou udidi kẹ ohwohwo enẹna?
3 Ro kugbe iruẹru mai nọ i re dhesẹ ẹzi ọ omolahiẹ kẹ amọfa, u wuzou re ma wo uvi iroro esasa kẹ inievo mai. Ẹme Ọghẹnẹ ọ ta udu họ omai awọ nọ: “Whai ohwo ọ rehọ uyoyou oniọvo you ohwo.” (Ahwo Rom 12:10) Mai kpobi a wo oghẹrẹ oma utioye na kẹ ahwo jọ. Kọ ma sai wuhrẹ re ma ku amọfa kugbe usu na? Nọ ekuhọ eyero anwae na o bi si kẹle na, u wuzou re ma he gbe si kẹle inievo Ileleikristi mai viere. Ebaibol na ọ ta nọ: “Urere eware kpobi o kẹlino. . . . Onọ omae rọ aro whai ohwo ọ rọ uyoyou nọ o rẹ hiẹ hẹ you ohwo, epanọ uyoyou u re rurẹ eware iyoma ibuobu.”—1 Pita 4:7, 8.
Okenọ Ebẹbẹ E tẹ Lahwe
4. (a) Fikieme ebẹbẹ e jẹ sae jọ udevie enọ e rrọ ukoko na? (b) Dede nọ oma o rẹ wọ omai ẹsikpobi re ma ru ere he, didi ewoma o re noi ze otẹrọnọ ma fi ohrẹ Ebaibol họ iruo?
4 Evaọ uzẹme, nọ ma gba ha na, ẹsejọ ma re ru eware nọ e rẹ dha amọfa eva. Inievo mai e sai ru omai thọ re evaọ idhere sa-sa. (1 Jọn 1:8) Whọ tẹ ruẹ oma ra evaọ uyero utioye na, eme who re ru? Ikereakere na e kẹ ọkpọvio nọ o fo. Rekọ ohrẹ nọ e kẹ o sae rọwo kugbe oware nọ mai wọhọ ahwo nọ e gba ha a rẹ gwọlọ ru hu. (Ahwo Rom 7:21-23) Ghele na, ma tẹ be dao oma fi ohrẹ nọ Ebaibol ọ kẹ họ iruo, o rẹ kẹ imuẹro inọ ma ghinẹ gwọlọ ru Jihova eva were. Ere oruo o sai je ru uyoyou mai kẹ amọfa di vi ere.
5. Ohwo jọ o te ru omai eva dha, fikieme ma gbe ru kele he?
5 Okenọ a te ru ahwo eva dha, a sae gwọlọ idhere nọ a re ro ru ọnọ o ru rai thọ na kele. Rekọ oyena u re ru ẹbẹbẹ na yoma vi ere. Otẹrọnọ o gwọlọ orukele, ma re vu ei wa kẹ Ọghẹnẹ. (Itẹ 24:29; Ahwo Rom 12:17-21) Amọfa a rẹ daoma bru ọnọ o ru rai thọ na no uzuazọ rai. Rekọ ma re ru ere kẹ ibe eg’Ọghẹnẹ hẹ, keme ọjẹrehọ egagọ mai, evaọ abọjọ, o rehọ oma hwa eyou inievo mai. (1 Jọn 4:20) Fikiere, Pọl o kere nọ: “Whai ohwo o thi-akọ kẹ ohwo, re ohwo jọ o te wo eguago kpahe ọrivẹ riẹ, jọ ọrọ vrẹe; wọhọ epanọ Ọnowo na ọ rọ vrẹ owhai na ere wha rẹ rọ vrẹ re.” (Ahwo Kọlọsi 3:13) Kọ whọ sai ru ere?
6. (a) Ẹvẹ ma rẹ rọ vrẹ oniọvo mai kpere te? (b) Ovuhumuo eme o re fi obọ họ k’omai kpairoro vrẹ oware nọ a ru omai thọ?
6 Kọ otẹrọnọ ohwo jọ o bi dhe owhẹ erueruthọ rekọ ọ raha izi ilogbo nọ a re ro si ei no ukoko na ha? Rọ kpahe izieraha esese itieye na, Pita ukọ na ọ jiroro nọ a rẹ rọ vrẹ te “asiahrẹ.” Rekọ Jesu ọ ta nọ: ‘Asiahrẹ hẹ, rekọ ri te udhẹse-osa gbe ikpegbihrẹ.’ O te dhesẹ nọ esa nọ amọfa a riọ omai i tulo ho a tẹ rehọ ae wawọ esa nọ ma riọ Ọghẹnẹ. (Matiu 18:21-35) Kẹdẹ kẹdẹ ma re ru Ọghẹnẹ thọ evaọ idhere buobu—ẹsejọ ẹkwoma uruemu oriobọ, ẹkwoma ẹme nọ ma ta hayo roro, hayo oware nọ ma sai ru hu—ababọ ẹriẹ inọ ma bi ruthọ. (Ahwo Rom 3:23) Ghele na, Ọghẹnẹ ọ gbẹ be re omai ohrọ. (Olezi 103:10-14; 130:3, 4) Ọ gwọlọ nọ ma yeri kugbe ohwohwo evaọ oghẹrẹ ovona. (Matiu 6:14, 15; Ahwo Ẹfẹsọs 4:1-3) Ma te ru ere, yọ ma bi dhesẹ oghẹrẹ uyoyou nọ u re ‘koko ofu họ eva ha.’—1 Ahwo Kọrint 13:4, 5; 1 Pita 3:8, 9.
7. Eme ma re ru otẹrọnọ oniọvo jọ o wo oware jọ mukpahe omai?
7 Oke jọ o rẹ jọ nọ ma rẹ ruẹ nọ dede nọ ma wo iroro iyoma kpahe oniọvo mai jọ họ, ọye oma riẹ o wo oware jọ mukpahe omai. Ma rẹ sae kpairoro vrẹ uruemu oniọvo mai na ma vẹ rọ ‘uyoyou ruru ei,’ wọhọ epanọ 1 Pita 4:8 o jiroro na. Hayo ma sae j’owọ re ma t’ẹme kugbei jẹ dao oma ru udhedhẹ.—Matiu 5:23, 24.
8. Otẹrọnọ ibe ọnọ ọ rọwo o bi ru oware jọ nọ o be dh’omai eva, eme a rẹ sai ru kpahe iẹe?
8 O sae jọ nọ ibe ọnọ ọ rọwo o bi ru eware nọ i bi dhe orọnikọ owhẹ ọvo uzou hu rekọ te amọfa te. Kọ o rẹ gbẹ jọ ziezi re whọ t’ẹme kẹe? O sae jọ ere. Whọ tẹ rehọ unu kpotọ ta ẹbẹbẹ na kẹe, onana o sae wha emamọ iyẹrẹ tha. Rekọ whọ rẹ kake nọ oma ra nọ: ‘Kọ oware nọ o bi ru na u ghine mukpahe Ikereakere na? Hayo kọ fikinọ oria nọ a jọ yọrọ je wuhrẹ omẹ u wo ohẹriẹ no oriẹ?’ Yọrọ oma re whọ siọ izi obọ ra ba efihọ jẹ rehọ ae gu amọfa ẹdhọ. ( Jemis 4:11, 12) Jihova ọ rẹ rehọ ababọ ọriẹwẹ jẹ oghẹrẹ ahwo eria kpobi rehọ, yọ o bi thihakọ kẹ ae nọ a be rro evaọ abọ-ẹzi na.
9. (a) Ono o re rri ẹme iruthọ ilogbo evaọ ukoko na? (b) Okevẹ o rẹ rọ jọ owha-iruo ọnọ a ru thọ na re ọ kake j’owọ, kọ avọ ẹjiroro vẹ?
9 Otẹrọnọ ohwo jọ evaọ ukoko na o ru umuomu ulogbo jọ, wọhọ ọfariẹ-ogbe, a rẹ j’owọ kpahe iẹ kpata kpata. Ono ọ rẹ j’owọ kpahe iẹe? Ekpako na. ( Jemis 5:14, 15) Dede na, otẹrọnọ a ru ohwo jọ thọ, ẹsejọhọ evaọ ẹme nọ o kie kpahe eki-ọthuọ hayo ẹmeọta ọthọthọ, ọnọ a ru thọ na ọvo ọ rẹ kake dao oma nya bru ọnọ o ru rie thọ na. (Matiu 18:15) Oyena u gbe ku ẹbẹbẹ na họ họ, u fo re a j’owọ ofa, wọhọ epanọ a dhesẹ eva Matiu 18:16, 17. Uyoyou kẹ oniọvo mai nọ o ruthọ gbe ẹgwọlọ nọ ma re ro ‘woi’ u re fi obọ họ k’omai ru onana evaọ edhere nọ ọ rẹ nya te udu riẹ.—Itẹ 16:23.
10. Okenọ ẹbẹbẹ ọ tẹ roma lahwe, eme o re fi obọ họ k’omai rri ẹme na liọliọ?
10 Okenọ ẹbẹbẹ ọ tẹ r’oma via, te o make rrọ ruaro hayo kakao, ma rẹ sai wo obufihọ otẹrọnọ ma be dao oma wo otoriẹ oghẹrẹ nọ Jihova o rri rie. Ọ rẹ jẹ oghẹrẹ emuemu ọvuọvo rehọ họ, yọ evaọ ẹruoke riẹ, o re voro erahaizi nọ i kurẹriẹ hẹ no ukoko riẹ. Rekọ jọ o thọrọ omai ẹro ho inọ mai kpobi a rẹ raha uzi evaọ idhere esese buobu jẹ gwọlọ uye-oruẹ-krẹkri gbe ohrọ riẹ. Fikiere Jihova o fi oriruo họ otọ nọ ma rẹ rọ aro kele evaọ okenọ amọfa a te ru omai thọ. Ma te dhesẹ ohrọ, yọ ma bi dhesẹ uyoyou riẹ via.—Ahwo Ẹfẹsọs 5:1, 2.
Gwọlọ Idhere nọ Whọ rẹ rọ ‘Whoma họ Ahwo’
11. Fikieme Pọl ọ jẹ ta udu họ ahwo Kọrint awọ re a ‘whoma họ ahwo’?
11 Pọl ọ raha emerae buobu jẹ bọ ukoko Kọrint, evaọ Grisi, ga. O ruiruo gaga ro fi obọ họ kẹ inievo na evaọ etẹe, yọ o you rai. Rekọ ibuobu rai e kare iroro esasa kpahe iẹe. A je si aro gaga. Ọ ta udu họ ae awọ re a ‘whoma họ ahwo’ evaọ uyoyou udhesẹ. (2 Ahwo Kọrint 6:11-13; 12:15) U re woma re mai kpobi a roro kpahe epanọ ma bi ro dhesẹ uyoyou kẹ amọfa jẹ gwọlọ idhere nọ ma rẹ rọ whoma họ ahwo.—1 Jọn 3:14.
12. Ẹvẹ ma sae rọ rro evaọ uyoyou mai kẹ ahwo kpobi evaọ ukoko na?
12 Kọ ejọ e rrọ ukoko na nọ o rrọ bẹbẹ k’omai re ma si kẹle? Otẹrọnọ ma rẹ sae j’owọ re ma ruru oruthọ rai—wọhọ epanọ ma gwọlọ nọ a ru k’omai na—onana o rẹ sai fi obọ họ ru oyerikugbe evaọ udevie mai jọ sasa. Iroro mai kpahe ai e rẹ sai wo enwene ma te muẹrohọ ekwakwa iwoma rai jẹ ta ẹro vi enana. Onana u re ti ghine ru uyoyou mai kẹ ae rro.—Luk 6:32, 33, 36.
13. Ẹvẹ ma sae rọ whoma họ amọfa evaọ edhesẹ uyoyou kẹ enọ e rrọ ukoko mai?
13 Uzẹme, eware nọ ma re ru kẹ amọfa i wo umuo. Ma rẹ sai yere ahwo kpobi eva k’uwuhrẹ k’uwuhrẹ kpobi hi. Okenọ ma te bi zizie egbẹnyusu ziọ emuọriọ, o rẹ sae lọhọ họ re ma zizie ohwo kpobi. Rekọ ma gbẹ sae whoma họ ahwo ẹkwoma iminiti jọ nọ ma rẹ raha rọ riẹ ohwo jọ evaọ ukoko mai vi ere? Kọ ẹsejọ ma sae zizie ohwo jọ nọ ma riẹ ziezi hi re o ruiruo kugbe omai evaọ usiuwoma ota?
14. Ma tẹ rrọ udevie Ileleikristi nọ ma riẹ hẹ, ẹvẹ ma sai ro dhesẹ uyoyou udidi kẹ ohwohwo?
14 Ikokohọ Ileleikristi e rrọ emamọ uvẹ nọ ma rẹ rọ whoma họ ahwo evaọ uyoyou mai. Idu ahwo buobu e rẹ sae jariẹ. Ma rẹ sai weze bru ai kpobi hi, rekọ ma rẹ sae kpọ oma mai evaọ edhere nọ o dhesẹ nọ ma fi ewoma rai họ aro ọmai. Yọ ma rẹ sai dhesẹ isiuru kẹ amọfa evaọ oke eriosehọ ẹkwoma ẹnya bru enọ e wariẹ omai họ na. Ẹdẹjọ enọ e be rria otọakpọ na kpobi a rẹ te jọ inievo emezae gbe emetẹ, nọ i ku oma gbe evaọ egagọ Ọghẹnẹ uzẹme gbe Ọsẹ ahwo kpobi na. Ẹvẹ oghọghọ riẹ o te rro te re ma riẹ ohwohwo! Uyoyou ogaga o rẹ w’omai gwọlọ ru ere. Kọ eme who gbe muhọ enẹna ha?
Eme Ọkiẹkpemu
• Ebẹbẹ e tẹ r’oma via evaọ udevie Ileleikristi, ẹvẹ a re ro ku ai họ, kọ fikieme?
• Nọ ma be rro evaọ abọ-ẹzi na, idhere vẹ uyoyou mai o sae rọ rro re?
• Ẹvẹ o sae rọ lọhọ re ma dhesẹ uyoyou ogaga kẹ amọfa u te no umutho egbẹnyusu ekpekpe jọ ọvo no?
[Uwoho nọ o rrọ ẹwẹ-obe avọ 148]
A re dhesẹ uyoyou Ileleikristi evaọ idhere buobu, wọhọ eva iwuhrẹ ukoko