‘A Mu Ẹro Họ Otọ Họ’

UNUOVẸVẸ nọ a re rri vo o sae wha okpẹtu ze.

Ahwo ẹwho Darwin, evaọ Australia, a jẹ ruẹrẹ oma kpahe kẹ ehaa evaọ 1974 nọ egba i ro muhọ edo be vẹvẹ unu kpahe ofou-ọwhibo nọ ọ be tha. Rekọ anwọ oware wọhọ ikpe 30 ze na, ofou-ọwhibo ọ re raha eware evaọ Darwin hi. Kọ obọnana o be te wha ọraha ze? Ahwo ẹwho na buobu a se unuovẹvẹ na gboja ha bẹsenọ ofou ọgaga o ro mu iwou họ efou kufiẹ je muọ igbẹhẹ iwou nọ ahwo a si uzou koko họ egele kie. Okiokiọ riẹ, ohwo ọ rẹ jọ ẹwho na ruẹ uvumọ oware nọ u dikihẹ hẹ.

Evaọ Colombia evaọ November 1985, ugbehru jọ o sa erae ze. Oluhu ọroro o te hwẹ ruru ahwo nọ a bu vi 20,000 eva ẹwho ọ Armero. Kọ a vẹvẹ ahwo na unu vẹre? Ugbehru na u nuhu te emerae buobu no. Dede na, fikinọ ugbehru nọ u re nuhu o reria ahwo na oma no, ahwo buobu evaọ Armero a daezọ họ. A ta kẹ ahwo egọmeti inọ okpẹtu ọ be te via kẹle, rekọ a daezọ vẹvẹ ahwo na unu tere he. A jọ irediyo ru owhowhovia ẹsibuobu rọ ta udu họ ahwo na awọ nnọ oware ovo o te via ha. A rehọ ọgba nọ a rẹ rọ jọ ichọche ta ẹme rọ ta udu họ ahwo awọ inọ a nuhu hu. Evaọ owọwọ, ugbehru na o tẹ sa gbidi isiava. Kọ whọ hae nya siọ eyero ra ba re whọ dhẹ? Umutho ahwo jọ ọvo a daoma ru ere bẹsenọ eware e rrọ vabọ.

Ẹsibuobu enọ i wuhrẹ kpahe etọ nọ i re nuhu a rẹ sai dhesẹ uzedhe oria nọ otọ u ti jo nuhu. Rekọ o rẹ bẹbẹ re a ta uzedhe oke nọ otọ na u ti ro nuhu. Evaọ 1999, etọ nọ e jọ akpọ na soso nuhu i kpe ahwo nọ a bu te oware wọhọ 20,000. Ibuobu enọ i whu a roro nọ o sae via kẹ ae he.

Ẹvẹ Whọ be Jẹ Owọ Kpahe Unuovẹvẹ nọ U no Obọ Ọghẹnẹ Ze?

U kri no nọ Ebaibol na i ro dhesẹ eware nọ i ti kpoka họ edẹ urere na. Kpahe edẹ urere na, Ebaibol na e tudu họ omai awọ nnọ ma kareghẹhọ “edẹ Noa.” ‘Taure ẹvo na ọ tẹ te ze,’ ahwo a duoma họ iruẹru uzuazọ, dede nnọ ozighi nọ ọ jọ oria kpobi o jẹ kẹ ae uye. Rọ kpahe unuovẹvẹ nọ Ọghẹnẹ ọ kẹ ẹkwoma odibo riẹ Noa, ahwo na ‘a muẹro họ otọ họ bẹsenọ ẹvo na ọ rọ ze, ọ jẹ rehọ ai kpobi vrẹ.’ (Matiu 24:37-39) Kọ whọ hae kezọ kẹ unuovẹvẹ na? Kọ who bi yoi enẹna?

Kọ o hae jọnọ whọ jẹ rria Sọdọm, kẹle Abade Owhuowhu na, evaọ edẹ Lọt, ọmọ oniọvo Abraham? Otọ nọ o wariẹ ẹwho na họ o jọ wọhọ aparadase. Efe ọ jọ okpẹwho na. O jọ ahwo na oma wọhọ nọ a wo ẹbẹbẹ hẹ. Evaọ edẹ Lọt, “a jẹ re, a jẹ da, a jẹ dẹ, a jẹ [zẹ] a jẹ kọ, a jẹ bọ.” Okegbe nọ a jẹ rria na ọ vọ avọ ọfariẹ-ogbe re. Kọ whọ hae gaviezọ kẹ unuovẹvẹ na okenọ Lọt ọ jẹ ta mukpahe iruemu iyoma na? Kọ whọ hae gaviezọ okenọ ọ jẹ ta nnọ Ọghẹnẹ o ku rie họ no nnọ ọ rẹ te raha okpẹwho Sọdọm na? Hayo kọ whọ hae rehọ iẹe nnọ aro ọ be zae, wọhọ epanọ ezae nọ e jẹ te rehọ emetẹ riẹ a rri unuovẹvẹ na? Kọ ẹsejọhọ whọ hae ruọ edhere re whọ dhẹ no okpẹwho na, rekọ who ve rri emu wọhọ epanọ aye Lọt o ru na? Dede nọ amọfa a se unuovẹvẹ na gboja ha, evaọ ẹdẹ nọ Lọt o ro no Sọdọm, “erae gbe osoitho i te no ehru ze, i te kpe ai kpobi.”—Luk 17:28, 29.

Ahwo buobu evaọ edẹ mai na a bi muẹrohọ otọ họ. Rekọ a rawo iriruo nana họ Ẹme Ọghẹnẹ wọhọ unuovẹvẹ k’omai, re i fi obọ họ kẹ omai HAI RRORO!

[Ẹkpẹti/Uwoho nọ e rrọ ẹwẹ-obe avọ 22]

Kọ Ẹvo Akpọ-Soso O Ghine Ku?

Egbavro buobu a ta nọ Ijo. Rekọ Ebaibol na e ta nọ Ee.

Jesu Kristi omariẹ ọ ta kpahe iẹe, yọ ọ jọ uzuazọ okenọ o via, je rri rie no obọ odhiwu ze.

[Ẹkpẹti/Uwoho nọ e rrọ ẹwẹ-obe avọ 23]

Kọ A Ghinẹ Raha Sọdọm avọ Gomora?

Otokiẹ eware anwae o kẹ imuẹro onana.

Ikuigbe e fodẹ e riẹ.

Jesu Kristi ọ kẹ imuẹro inọ o via, yọ ebe 14 sa-sa erọ Ebaibol na e ta ẹme kpahe iẹe re.