Asa

“Igodẹ” nọ Jesu ọ fodẹ evaọ ọtadhesẹ nọ ọ rrọ Matiu 25:31-36 i dikihẹ kẹ ahwo nọ a kiẹrẹe, koyehọ utu igodẹ efa nọ e te jariẹ evaọ edẹ urere na. Ahwo nana a wo ẹruore obọ otọakpọ obonẹ. A bi fiobọhọ kẹ Ileleikristi nọ a rọ ẹzi wholo nọ i kiọkọ otọakpọ na, koyehọ inievo Jesu ta usi uwoma na je wuhrẹ ahwo evaọ akpọ na soso. Iruo nana yọ okolo iruo ho. (Mat. 24:14; 28:19, 20) Kukpe kukpe, ekpoka jọ taure oke na u te ti te, inievo nọ e rrọ utu igodẹ efa na a re lele enọ a rọ ẹzi wholo na zizie ahwo ziọ Emu Owọwọ na evaọ akpọ na soso. Onana yọ edhere jọ nọ a bi ro fiobọhọ kẹ ae. Inievo nọ e rrọ utu igodẹ efa na evaọ akpọ na soso a rẹ jẹ ruẹrẹ eware kpahe kẹ Emu Owọwọ na re a sae jọ ukoko kpobi ru ei. Eva e be were ae gaga inọ a be rọ enẹ fiobọhọ kẹ inievo Jesu. A riẹ nọ oware kpobi nọ a bi ru ro fiobọhọ kẹ inievo Jesu, yọ Jesu omariẹ a bi ru ei kẹ na.—Mat. 25:37-40. w22.01 22 ¶11-12

Jesu o wo emamọ uruemu, yọ ọ jẹ hae riẹ amọfa ru ziezi. Wọhọ oriruo, ọ re ohrọ ohwo jọ nọ ọ jẹ mọ oti, aye jọ nọ o je hwẹ azẹ, gbe ahwo nọ ahwo a whu ku. Ma tẹ be rọ aro kele Jesu re ohrọ amọfa je fiobọhọ kẹ ae, yọ Jihova ma be rọ aro kele na. (Mak 1:40, 41; 5:25-34; Jọn 11:33-35) Ma tẹ be rọ aro kele Jihova, usu mai kugbei o te kpekpe ziezi. Ma te bi lele ithihi Jesu, eware akpọ omuomu nana e te sai reghe omai hi. Evaọ aso urere taure Jesu o te ti whu, ọ ta nọ: “Me fi akpọ na kparobọ no.” (Jọn 16:33) Otọ ẹme riẹ na họ, ọ kuvẹ hẹ re ilale akpọ gbe isiuru akpọ na i si iroro riẹ no oware nọ ọ rọ fiki riẹ ziọ otọakpọ, koyehọ re ọ wha orro se Jihova. Kọ mai omamai? Eware buobu e rrọ akpọ na nọ e rẹ sai reghe iroro mai. Rekọ ma tẹ rọ aro kele Jesu tẹrovi epanọ ma re ro ru oreva Jihova, ma rẹ sai “fi akpọ na kparobọ” re.—1 Jọn 5:5. w21.04 3-4 ¶7-8

Pọl ukọ na ọ riẹ kpahe eyaa nọ Jesu ọ ya inọ “ohwo kpobi nọ o fi ẹrọwọ họ iẹe [o ti] wo uzuazọ ebẹdẹ bẹdẹ.” (Jọn 3:16; Rom 6:23) Pọl ọ jọ usu ahwo nọ a fi ẹrọwọ họ idhe ẹtanigbo na. Ọ riẹ nọ makọ ahwo nọ a raha uzi ulogbo dede a te kurẹriẹ, Jihova ọ te rọvrẹ rai. (Ol. 86:5) Oware ofa nọ o lẹliẹ Pọl riẹ nọ Ọghẹnẹ o you rie họ, o vi Ọmọ riẹ ze ti whu kẹe. Rri emamọ ẹme nọ ọ ta evaọ obe Ahwo Galesha 2:20. Pọl ọ ta nọ: “Ọmọ Ọghẹnẹ . . . o you omẹ, o te siobọno omariẹ fiki mẹ.” Pọl o si omariẹ no usu ahwo nọ Ọghẹnẹ o you hu. O roro ẹdẹvo ho inọ, ‘Jihova ọ sai you idibo riẹ nọ i kiọkọ, rekọ ọ sai you omẹ hẹ.’ Pọl ọ ta kẹ inievo obọ Rom inọ: “Nọ ma gbẹ jọ erahaizi, Kristi o whu kẹ omai.” (Rom 5:8) Oware ovo o rẹ whae ze nọ Ọghẹnẹ ọ rẹ rọ siọ omai ba eyou hu. U mu Pọl ẹro nọ Ọghẹnẹ o you omai gaga. Ọ tẹ jẹ riẹ nọ Jihova o thihakọ kẹ orẹwho Izrẹl oke lelehie. w21.04 22 ¶8-10

Who te bi wuhrẹ ohwo Ebaibol, fiobọhọ kẹe re o you Jihova. Ẹvẹ whọ sai ro ru ere? Nọ wha bi wuhrẹ na, rẹro da eria nọ whọ sae jọ fiobọhọ kẹe roro kpahe iruemu Jihova. Ru re ọ riẹ nọ Jihova yọ Ọghẹnẹ nọ eva e rẹ were gaga, yọ o re fiobọhọ kẹ ahwo nọ a you rie. (1 Tim. 1:11; Hib. 11:6) Fiobọhọ kẹe vuhumu inọ o te bi ru eware nọ o bi wuhrẹ na, o ti wo irere buobu. U te no ere no, ru re ọ riẹ nọ fikinọ Jihova o you rie o bi ro wuhrẹ iẹe eware nana. (Aiz. 48:17, 18) O ti you Jihova ziezi, ọye ọvo ọ vẹ te rọ iroro obọriẹ siobọno ekpehre uruemu je ru oware nọ o rẹ were Ọghẹnẹ. Re ohwo nọ a bi wuhrẹ Ebaibol kugbe ọ sai te ame-ọhọ, o re siobọno eware jọ. O sae tubẹ gwọlọ nọ o siobọno eyero riẹ jọ. Enọ i wo egbẹnyusu nọ i bi koko izi Jihova ha a re siomano ae. Ahwo uviuwou ejọ a sae siọ ae fikinọ a mukpahe Isẹri Jihova. Jesu ọ ta nọ ohwo kpobi nọ ọ kpairoro vrẹ eware yena je lele iei, u ti kiekpei hi. O ti wo amọfa buobu nọ a te jọ wọhọ ahwo uviuwou obọriẹ evaọ ukoko na.—Mak 10:29, 30. w21.06 4-5 ¶8-9

Pọl ukọ na ọ ta nọ usi uwoma ota mai na o wọhọ iruo ọwhẹrẹ nọ ọ rẹ kọ ibi. Ẹme riẹ na o dhesẹ nọ ma tẹ kọ no, yọ u re no ho. Ọ ta kẹ Ileleikristi obọ Kọrint nọ: “Ẹkọ mẹ kọ, Apọlọs o te ku ame ku . . . Whai yọ udhu Ọghẹnẹ nọ ọ be kọ jẹ rẹrote.” (1 Kọr. 3:6-9) Mai yọ ahwo nọ a bi ru iruo evaọ “udhu Ọghẹnẹ.” Orọnikọ ẹkọ ọvo ma rẹ kọ họ, koyehọ re ma hae ta usi uwoma ọvo. Ma re je wuhrẹ ahwo, rọ ere ku ame ku eware nọ ma kọ, ma ve je muẹrohọ epanọ e be rro te. Dede na, ma riẹ nọ Ọghẹnẹ họ ọnọ o re ru ibi na rro. Eva e be were omai gaga inọ Jesu ọ ta nọ ma ta usi uwoma kẹ ahwo je wuhrẹ ae ẹme Ọghẹnẹ. Iruo nana nọ ma bi ru na e be lẹliẹ eva were omai gaga. Pọl ukọ na nọ o fiobọhọ kẹ ahwo buobu zihe ruọ ilele Jesu evaọ obọ Tẹsalonika ọ ta nọ: “Eme họ ẹruore mai hayo oghọghọ mai hayo etu-uvie evawere mai evaọ aro Olori mai Jesu evaọ oke ọzino riẹ? Kọ ogbẹrọnọ owhai? Evaọ uzẹme, whai họ oruaro gbe oghọghọ mai.”—1 Tẹs. 2:19, 20; Iruẹru 17:1-4. w21.07 3 ¶5; 7 ¶17

Jihova o se omai omomọvo ziọ ukoko riẹ. (Jọn 6:44) Dai roro kpahe onana. Jihova o muẹrohọ owhẹ evaọ usu ahwo nọ a rrọ akpọ na soso, o te se owhẹ keme ọ jọ udu ra ruẹ nọ who ti you rie. (1 Irv. 28:9) Jihova ọ riẹ oghẹrẹ ohwo nọ whọ rrọ ziezi yọ o you owhẹ gaga. Onana u woma kẹhẹ! Whọ rrọ ghaghae kẹ Jihova gaga, yọ ere inievo ukoko na kpobi a rrọ kẹe re. Wọhọ oriruo, Jesu ọ ta nọ Jihova ọ wọhọ othuru-igodẹ. Nọ ogodẹ ọvo o te vru no udevie igodẹ udhusoi nọ othuru-igodẹ o wo, eme o re ru? Ọ rẹ “nyasiọ udhone gbe ikpegbizii na ba obọ igbehru, ọ vẹ nyae gwọlọ ọnọ o ghoro vrẹ na.” Ọ tẹ ruẹ ogodẹ na no, eva e rẹ dhae kẹe he inọ o vru keleme. Ukpoye ẹghọghọ ọ rẹ ghọghọ. Eme ma be ta na? Oniọvo kpobi evaọ ukoko na ọ rrọ ghaghae kẹ Jihova. Jesu ọ ta nọ: “O rẹ were Ọsẹ mẹ nọ ọ rrọ obọ odhiwu hu re makọ ọvo dede evaọ usu esese nana o whu.”—Mat. 18:12-14. w21.06 20 ¶1-2

Ma tẹ be hai roro kpahe uyoyou Ọghẹnẹ nọ o rẹ hiẹ hẹ nọ o wo kẹ omai, o rẹ lẹliẹ omai you rie viere je ru epanọ usu mai kugbei o rẹ rọ kpekpe ziezi. (Rom 8:38, 39) Ma te gwọlọ nọ ma rẹ rọ aro kele Jesu. (1 Pita 2:21) Edẹ jọ taure oke Emu Owọwọ na u te ti te, ma be hai se kpahe eware nọ Jesu o ru evaọ oka urere taure o te ti whu, uwhu riẹ, gbe ẹkparomatha riẹ. Yọ ovuẹ ogbotu nọ a rẹ kẹ evaọ Emu Owọwọ na u re fiobọhọ kẹ omai roro kpahe eware nọ Jesu o ru nọ u dhesẹ nọ o you omai gaga. (Ẹf. 5:2; 1 Jọn 3:16) Nọ ma bi se kpahe uye nọ o bẹ Jesu fiki mai je bi roro kpahe iẹe na, ma te gbaemu nọ ma “rẹ ruabọhọ nya wọhọ epanọ [ọyomariẹ] ọ nya.” (1 Jọn 2:6) Ma te gbaemu nọ ma te hai gbe ru oware nọ o rẹ lẹliẹ Jihova you omai. (Jud 20, 21) Ma tẹ be hae daoma yoẹme kẹ Ọghẹnẹ, ru oware nọ o rẹ wha ujiro se odẹ riẹ gbe oware nọ o rẹ lẹliẹ eva mai were iẹe ẹsikpobi, kiyọ eware nọ o re gbe ro you omai ma bi ru na. (Itẹ 27:11; Mat. 6:9; 1 Jọn 5:3) Ma tẹ be hai kpohọ Emu Owọwọ na, o rẹ lẹliẹ omai gbaemu nọ ma re ru eware nọ e rẹ were Jihova kẹdẹ kẹdẹ. O vẹ te wọhọ ẹsenọ ma be ta kẹ Jihova nọ, ‘Mẹ gwọlọ nọ who re you omẹ bẹdẹ bẹdẹ!’ w22.01 23 ¶17; 25 ¶18-19

Jihova ọ kẹ omai uvẹ nọ ma sai ro ru oware nọ ma gwọlọ. Ohwo-akpọ ọ sae ta nọ enẹ gbe enẹ mẹ gwọlọ rọ uzuazọ mẹ ru. Rekọ eva mai e rẹ were Jihova gaga nọ ma tẹ ta nọ ọye ma rẹ gọ evaọ edẹ uzuazọ mai kpobi. (Ol. 84:11; Itẹ 27:11) U te no ere no, emamọ eware efa buobu e riẹ nọ ma rẹ sae rọ uvẹ nọ Jihova ọ kẹ omai na ru. Jesu ọ jẹ hae rọ uvẹ nọ ọ hai ti ro ru eware kẹ omariẹ ro ru eware iwoma kẹ amọfa, yọ ma sae rọ aro kele iei. U wo ẹdẹ jọ nọ oma o rrọ Jesu avọ ikọ riẹ gaga no, a te kpohọ oria jọ nọ u siomano re a serihọ. Rekọ a sai serihọ họ. Ahwo jọ a zurie bru ae ze, yọ a gwọlọ nọ Jesu o wuhrẹ ae. Eva e dha Jesu hu. Ukpoye, ohrọ ahwo na o re riẹ. Kọ eme o ru? “O te mu ae eware buobu họ ewuhrẹ.” (Mak 6:30-34) Ma tẹ be hae rọ oke gbe ẹgba nọ ma hai ti ro ru eware kẹ omamai fiobọhọ kẹ amọfa wọhọ epanọ Jesu o ru, o rẹ wha orro se Ọsẹ obọ odhiwu mai.—Mat. 5:14-16. w21.08 3 ¶7-8

Jihova ọ gwọlọ nọ emama riẹ kpobi e jọ epọvo na ha. Ma te rri eware nọ ọ ma na kpobi, te omai ahwo-akpọ, ma rẹ ruẹ nọ ẹme yena ọ gba kerọ ọka. Wọhọ oriruo, mai kpobi na ma rrọ oghẹrẹ ovo ho. Fikiere, Jihova ọ rẹ rọ owhẹ kele omọfa ha. Ọ riẹ owhẹ lafi. (1 Sam. 16:7) Ọ riẹ eware nọ whọ rẹ sai ru, gbe enọ whọ rẹ sai ru hu, ọ tẹ jẹ riẹ oghẹrẹ nọ a rọ yọrọ owhẹ notọ ze. Yọ oware nọ ọ riẹ nọ whọ rẹ sai ru hu, ọ rẹ ta nọ who ru ei hi. U fo nọ ma rẹ rọ aro kele Jihova rri omamai wọhọ epanọ o bi rri omai. Ma te ru ere, ma ti wo “iroro nọ e gba,” keme ma ti rri omamai kpehru gahrọ họ, yọ ma ti rri omamai nọ ma fioka ha ha. (Rom 12:3) Uzẹme riẹ họ, o thọ họ re ma muẹrohọ oniọvo nọ ọ be riẹ ru ziezi re ma ruẹsi wuhrẹ mi ei. Wọhọ oriruo, ma sai muẹrohọ oniọvo jọ nọ ọ riẹ usi uwoma ẹta ziezi. (Hib. 13:7) Ma sae rọ aro kele oniọvo otiọye, ma vẹ te riẹ epanọ a rẹ ta usi uwoma ziezi re. (Fil. 3:17) Nọ ohwo ọ tẹ be rọ aro kele ohwo, u wo ohẹriẹ no ẹsenọ ọ tẹ be rọ omariẹ wawo ohwo na. w21.07 20 ¶1-2

Whọ tẹ be hae romatotọ rri erao, ekakọ, gbe isi obehru na, u re mu owhẹ ẹro ziezi inọ Ọghẹnẹ ọ ma eware, yọ ẹrọwọ ra ọ te ga re. (Ol. 19:1) Nọ who te bi rri eware nana ẹsikpobi, u ti mu owhẹ ẹro ziezi inọ Jihova họ ọnọ ọ ma rai. Who te bi rri emama Ọghẹnẹ, hai muẹrohọ eware nọ i dhesẹ kpahe Ọghẹnẹ nọ ọ ma rai na. (Rom 1:20) Wọhọ oriruo, ọre na o re lo kẹ omai yọ erri riẹ o re fiobọhọ kẹ eware nọ e rrọ uzuazọ. Rekọ u wo erri ọgaga jọ nọ o re noi ze nọ o kiehọ ohwo-akpọ oma ha. Whaọ erri yena o bi te omai oma ha. Kọ eme ọ wha riẹ ze? Otọakpọ na o wo oghẹrẹ ẹgho jọ nọ ọ be za erri ọgaga yena dhe. Erri ọgaga nọ o bi no ọre na ze na ọ tẹ be ga, ẹgho nọ ọ be zae dhe na o ve bi wo okpa re. Kọ oware nana u bi mu via? Vievie! Ọghẹnẹ nọ ọ ma ehrugbakpọ na nọ o wo areghẹ gaga na ọye o bi ru ei na, yọ o you omai gaga. w21.08 17 ¶9-10

Nọ ahwo a tẹ make họ-ame no, ma re gbe you rai jẹ kẹ ae adhẹẹ. (1 Jọn 4:20) Ẹvẹ ma sai ro ru ere? Ma re fievahọ ohwo nọ ọ họ-ame no, orọnọ ma re viẹro ku ei hi. Wọhọ oriruo, o te ru oware jọ yọ ma riẹ ẹjiroro nọ o ro ru oware na ha, ma re viẹro ku ei hi inọ ekpehre ẹjiroro jọ o ro ru ei. Ukpoye, ma re bru ọghọ họ iẹe oma, ma ve je rri rie inọ ọ rro vi omai. (Rom 12:10; Fil. 2:3) Ma rẹ daoma jọ wowou jẹ re ohrọ ahwo kpobi. Ma tẹ ginẹ gwọlọ jọ ahwo uviuwou Jihova bẹdẹ bẹdẹ, ma rẹ daoma koko izi Ọghẹnẹ ẹsikpobi. Wọhọ oriruo, Jesu ọ ta nọ ma jọ wowou re ma jẹ re ohrọ ahwo kpobi, makọ te ewegrẹ mai dede. (Luk 6:32-36) Uzẹme riẹ họ, ẹsejọ o rẹ lọhọ tere he re ma ru ere. O tẹ make rrọ ere, ma rẹ daoma wo oghẹrẹ iroro nọ Jesu o wo, jẹ rọ aro kele iei. Nọ ma tẹ be daoma yoẹme kẹ Jihova jẹ rọ aro kele Jesu yọ ma bi dhesẹ kẹ Ọsẹ obọ odhiwu mai nọ ma gwọlọ jọ ahwo uviuwou riẹ bẹdẹ bẹdẹ. w21.08 6 ¶14-15

Hae rẹroso Jihova. Jihova ọ ta nọ ma tẹ rẹroso ẹe, jẹ dao ẹgba mai kpobi evaọ egagọ riẹ, ọ te ghale omai ziezi. Iku ahwo buobu nọ a daoma gaga evaọ egagọ Jihova e vọ Ebaibol na. Ibuobu rai a ru oware jọ nọ u dhesẹ nọ a ginẹ rẹroso Jihova, taure Jihova ọ tẹ te ghale ae. Wọhọ oriruo, Abraham ọ kwa no ẹwho nọ ọ jẹ rria taure Jihova ọ tẹ te ghale iẹe, “dede nọ ọ riẹ obonọ o je kpohọ họ.” (Hib. 11:8) Jekọp o lele ukọ-odhiwu muabọ taure Jihova ọ tẹ te ghale iẹe. (Emu. 32:24-30) Yọ oke nọ orẹwho Izrẹl a ti ru re a ruọ Ẹkwotọ Eyaa na, izerẹ na a rọ ithihi te ame ethẹ Jọdan na no taure Jihova o te ti ru ethẹ na kpọ kẹ ae nọ a rọ fae vrẹ. (Jos. 3:14-16) Idibo Jihova buobu e riẹ evaọ oke mai na nọ e rẹroso Jihova, onọ u ru nọ a rọ daoma viere evaọ iruo Uvie na. Iku rai i ti fiobọhọ kẹ owhẹ re. w21.08 29-30 ¶12-14

Whai inievo nọ e kpako no, wha riẹ oghẹrẹ nọ a jẹ hai ru eware evaọ ukoko na vẹre, rekọ wha be daoma nwene lele oghẹrẹ nọ ukoko na o rrọ enẹna. Whai inievo nọ e kpako no nọ i kurẹriẹ ze obọ, wha sai fiobọhọ kẹ izoge na re. Eva e te were izoge na gaga nọ wha te gbiku uzuazọ rai kẹ ae gbe eware nọ wha wuhrẹ no. Wha tẹ be hai gbiku itienana ro wuhrẹ izoge na, yọ wha bi ru lele ẹme Jesu nọ ọ ta nọ “wha hae kẹ okẹ.” Jihova ọ te ghale owhai ziezi. (Luk 6:38) Whai inievo nọ e kpako no, wha tẹ be hai se izoge na gboma, u ti fiobọhọ kẹ owhai, yọ u ti fiobọhọ kẹ ae re. (Rom 1:12) Inievo nọ e kpako no na a wo obọdẹ oware jọ nọ izoge na a wo ho. Izoge na omarai a wo obọdẹ oware jọ nọ inievo nọ e kpako no na a wo gbe he. Inievo nọ e kpako no a wo areghẹ gaga fiki eware buobu nọ a rọ ẹro ruẹ no evaọ uzuazọ, izoge na a te wo ẹgba jẹ rrọ gragragra. Nọ inievo nọ e kpako no avọ izoge na a tẹ be hai bi kẹle ohwohwo je fiobọhọ kẹ ohwohwo, ukoko na soso u re wo erere yọ o rẹ jẹ wha ujiro se Jihova, Ọsẹ oyoyou mai na. w21.09 8 ¶3; 13 ¶17-18

Fikieme oghẹrẹ nọ Jesu o ro whu o rọ jọ ezoruẹ kẹ ahwo buobu? Fikinọ a kare Jesu fihọ ure-oja kpe, ahwo a rri rie fihọ ogbulegbu viukpọ Mesaya na. (Izie. 21:22, 23) Ahwo Ju nọ a rọwo lele Jesu hu na a tubẹ kareghẹhọ nọ a kpei ekueku hu. Eware kpobi nọ a gu fihọ iẹe uzou na, o ru ọvuọvo ho. Ahwo nọ a rọ Jesu guẹdhọ na a ru oware ovo nọ u gbore uvioziẹ hẹ. Ugidi ogbẹgwae okọto ahwo Ju na a ro kokohọ, yọ a tube lele izi nọ ae ọvo a fihọ họ nọ a jẹ rọ Jesu guẹdhọ na. (Luk 22:54; Jọn 18:24) Ibruoziẹ na a rọ eva efuafo gaviezọ họ re a yo oware nọ a ta nọ Jesu o ru, ukpoye kọ ae ọvo a jẹ tubẹ gwọlọ “oware ọrue nọ a re gu fihọ Jesu uzou re a ruẹsi kpei.” (Mat. 26:59; Mak 14:55-64) Nọ Jesu ọ kparoma no, ibruoziẹ imuomu yena a tẹ rọ “ewẹ isiliva buobu” kẹ isoja Rom nọ i je rou uki riẹ re a ruẹsi gu ọrue inọ ilele riẹ ae a nyaze te lẹlẹ wọ ori riẹ vrẹ.—Mat. 28:11-15. w21.05 11 ¶12-13

Anwọ ikpe buobu ze na, Jihova ọ hae sae raha akpọ na no. Rekọ o ru ere he. Ukpoye o bi thihakọ, yọ ithihakọ riẹ na o wha irere buobu ze no. A yẹ omai emọ Adamu avọ Ivi kpobi avọ uzioraha. Ma gba ha, ghele na, Jihova o you omai yọ ọ be rẹrote omai. U te no ere no, ọ ta nọ ọ te raha akpọ omuomu nana no. (1 Jọn 4:19) Whaọ Jihova o fi ẹdẹ họ no nọ o ti ro si uye kpobi notọ kẹ ahwo-akpọ. Ma rẹ daoma thihakọ ebẹbẹ nọ i bi te omai nẹnẹ na keme ma riẹ nọ Jihova o you omai yọ o ti ru oware jọ kpahe ae. Jihova o thihakọ eware buobu no. Jesu ọ rọ aro kele Ọsẹ riẹ thihakọ eware buobu no re. Oke nọ ọ jọ otọakpọ, a la riẹ eka, a kpomovuọ họ iẹe oma, a te je kpei evaọ ure-oja. O thihakọ eware nana kpobi fiki mai. (Hib. 12:2, 3) Jihova ọye Jesu ọ rọ aro kele nọ ọ sai ro thihakọ eware nana kpobi. Epọvo na re, ma te roro te eware nọ Jihova o thihakọ rai no, u re fiobọhọ kẹ omai thihakọ ebẹbẹ nọ i bi te omai. w21.07 12-13 ¶15-17

Kẹdẹ kẹdẹ ma bi ru Ọsẹ obọ odhiwu mai na thọ. Ghele na ọ be rọvrẹ omai. (Ol. 103:10-14) Ilele Jesu a jẹ hai ru eware nọ e rẹ kẹe uye ẹsejọ. Ghele na ọ jẹ rọvrẹ rai. Ọ tubẹ rọ uzuazọ riẹ dheidhe re Jihova ọ sae rọ izieraha mai vrẹ omai. (1 Jọn 2:1, 2) Ma tẹ be “rọvrẹ ohwohwo riẹriẹriẹ,” o rẹ lẹliẹ omai you ohwohwo ziezi. (Ẹf. 4:32) Ma riẹ nọ o rẹ jọ bẹbẹ ẹsejọ re ma rọvrẹ inievo mai. Rekọ u fo re ma daoma hae rọvrẹ. Oniọvo-ọmọtẹ jọ ọ ta nọ uzoẹme na “Wha Hae Rọ Vrẹ Ohwohwo” nọ o se evaọ Uwou-Eroro jọ u fiobọhọ kẹe gaga. O kere nọ: “[Uzoẹme na] o ta nọ, whọ tẹ rọvrẹ amọfa, orọnikọ u dhesẹ nọ emamọ oware ohwo na o ru hu. Yọ u dhesẹ nọ oware na o da owhẹ hẹ hẹ. Rekọ u dhesẹ nọ who si oware na no eva no. U re gbe kpokpo owhẹ udu hu.” Ma tẹ be hae rọvrẹ inievo mai, yọ ma bi dhesẹ nọ ma you rai, ma tẹ be jẹ rọ aro kele Ọsẹ mai Jihova. w21.09 23-24 ¶15-16

Uzẹme na kpahe Ọghẹnẹ gbe eware nọ o ti ru o were Jesu gaga. O yeri uzuazọ riẹ lele uzẹme na, o te je fiobọhọ kẹ ahwo riẹ uzẹme na. (Jọn 18:37) Ileleikristi uzẹme a re dhesẹ nọ uzẹme na o be were ae gaga re. (Jọn 4:23) Pita ukọ na omariẹ o tube se ukoko Ileleikristi na “edhere uzẹme na.” (2 Pita 2:2) Fikinọ uzẹme na o jẹ were Ileleikristi ọsosuọ na gaga, a siọ iwuhrẹ egagọ, iruemu ẹwho, gbe iwuhrẹ ahwo nọ e rọwokugbe uzẹme na ha. (Kọl. 2:8) Epọvo na re, Ileleikristi uzẹme a rẹ daoma re a ruẹ nọ eware nọ a bi wuhrẹ i no Ebaibol ze, yọ a re je ru lele eware nọ a bi wuhrẹ na. A vẹ rọ ere dhesẹ nọ a be “nya evaọ uzẹme na.” (3 Jọn 3, 4) Isẹri Jihova a rẹ ta nọ a wo otoriẹ oware kpobi nọ Ebaibol na ọ ta totọ họ. U wo oke jọ nọ a fotọ iwuhrẹ Ebaibol jọ thọ no, yọ oghẹrẹ nọ a rọ ruẹrẹ eware họ evaọ ukoko na o thọ no re evaọ oke jọ. Rekọ a nwene eware nana uwhremu na nọ a rri otọ mu no. w21.10 21-22 ¶11-12

Nwane wọhọ epanọ igbẹhẹ nọ e wariẹ ikpewho oke anwae họ e jẹ hae thọ ahwo nọ a rrọ eva riẹ na, ere ọvona Jihova o bi ru eware buobu rọ thọ omai fiki uyoyou riẹ nọ o rẹ hiẹ hẹ. O tẹ wọhọ ugbẹhẹ nọ o wariẹ omai họ. Ọ be thọ omai no eware nọ e rẹ sae raha usu okpekpe nọ ma wo kugbei. Uyoyou nọ o rẹ hiẹ hẹ nọ Jihova o wo kẹ omai na u bi je ru nọ o bi ro si omai kẹle oma. (Jeri. 31:3) Devidi ọso-ilezi na ọ ta oghẹrẹ ẹme ọfa ro dhesẹ epanọ Jihova ọ be rọ thọ idibo riẹ. O kere no: “Ọghẹnẹ họ oria adhẹzọ mẹ nọ o foma, Ọghẹnẹ nọ o dhesẹ uyoyou nọ o rẹ hiẹ hẹ kẹ omẹ.” Devidi ọ ta kpahe Jihova re nọ: “Ọye o bi dhesẹ uyoyou nọ o rẹ hiẹ hẹ kẹ omẹ, ọ tẹ jẹ rrọ oria omofọwẹ mẹ, oria adhẹzọ mẹ nọ o foma gbe osiwi mẹ, ojese mẹ gbe Ọnọ mẹ dhẹ ruọ otọ riẹ.” (Ol. 59:17; 144:2) Eme ọ lẹliẹ Devidi fodẹ oria adhẹzọ gbe oria omofọwẹ, kpakiyọ ọ be ta kpahe uyoyou Jihova nọ o rẹ hiẹ hẹ? O rrọ ere keme oria kpobi nọ idibo Jihova a rrọ kẹhẹ evaọ otọakpọ na, ọ rẹ thọ ae re usu nọ a wo kugbei o gbẹ raha ha fiki uyoyou riẹ nọ o rẹ hiẹ hẹ. w21.11 6 ¶14-15

Ẹdẹ jọ nọ Jesu avọ ilele riẹ a je bi abade vrẹ, ofou ọwhibo ọgaga o te je fou. Jesu ọ tẹ rọ uvẹ yena wuhrẹ ae epanọ u ro fo re a wo ẹrọwọ ọgaga. (Mat. 8:23-26) Nọ ofou na o muhọ je bi fou ame ruọ okọ na yọ Jesu ọ be wezẹ ọvo. Ozọ u mu ilele na gaga, a tẹ rọwo Jesu no owezẹ ze jẹ ta kẹe nọ o siwi ae. Rekọ ọ tẹ rọ unu kpotọ ta kẹ ae nọ: “Fikieme ozọ u bi ro mu owhai ga tere, whai enọ i wo ẹrọwọ ọkakao?” Kọ ẹbẹbẹ jọ nọ ọ wọhọ “ofou ọwhibo ọgaga” ọ rrọ otọ kẹ owhẹ? O sae jọ nọ eware e rrọ owhẹ oma gaga fiki owhe nọ ọ raha eware hayo fiki eware itieye na efa. Hayo o sae jọ nọ whọ be mọ gaga, yọ ẹyao na o wha riẹ ze nọ eva e gbẹ be rọ were owhẹ vievie he hayo nọ whọ gbẹ rọ riẹ oware nọ who re ru hu. Oware utionana o sae lẹliẹ owhẹ ruawa, rekọ whọ ruawa gahrọ họ. Fievahọ Jihova. Hae lẹ sei kẹse kẹse. Hai je roro kpahe eware nọ Jihova o ru kẹ owhẹ no evaọ oke jọ, u ti ru ẹrọwọ ra ga ziezi. (Ol. 77:11) Riẹ nọ Jihova ọ te nyasiọ owhẹ ba vievie he. w21.11 22 ¶7, 10

Fikinọ ahwo jọ a rẹ tọlọ eware ahwo ho, a re roro nọ a bi tho uji hi. Rekọ eware ahwo nọ a rẹ tọlọ ọvo họ uji-utho ho. Wọhọ oriruo, ohwo nọ ọ be zẹ eware ọ tẹ be rehọ iskeli nọ i woma ha hayo eware ewhariọ efa rọ wawọ eware kẹ ahwo, yọ uji o bi tho na. Obe Iruo-Izerẹ 19 :13 u dhesẹ nọ uruemu iwhayo yọ uji-utho re. O ta nọ: “Who re fi ọrivẹ ra iwhayo vievie he.” Uzi avọ eree na o ta nọ uji-utho o thọ. Rekọ eme nọ e rrọ obe Iruo-Izerẹ na i re fiobọhọ kẹ omai riẹ epanọ ma re ro ru oware nọ ma wuhrẹ no uzi yena ze. U re woma re ma rri uji-utho gbe iwhayo oghẹrẹ nọ Jihova o rri rie. Ma sae nọ omamai nọ: ‘Wọhọ epanọ o rrọ Iruo-Izerẹ 19:11-13 na, kọ uruemu uji-utho jọ o rrọ omẹ obọ nọ u fo nọ me re siobọno? Kọ mẹ be jọ ekiọthuọ mẹ hayo iruo mẹ ru eware ewhariọ jọ nọ u fo nọ me re siobọno?’ w21.12 9-10 ¶6-8

Nọ whọ tẹ be lẹ, daoma roro kpahe eware jọ nọ e thọ owhẹ obọ evaọ okpẹdoke na, kẹsena whọ vẹ lẹ Jihova re ọ rọvrẹ owhẹ. Otẹrọnọ uzioraha ulogbo, whọ rẹ jẹ nyabru ekpako na re a fiobọhọ kẹ owhẹ. A te gaviezọ kẹ owhẹ, jẹ rọ Ebaibol kẹ owhẹ ohrẹ. Yọ edhere owowolẹ a ti ro ru ei. A te lẹ Jihova re ọ rọvrẹ owhẹ fiki ẹtanigbo Jesu na. Kẹsena usu ra avọ Jihova o vẹ te wariẹ kpekpe ziezi. (Jem. 5:14-16) U ti woma re whọ hai roro didi kpahe ẹtanigbo na. Ẹsejọhọ o rẹ da owhẹ nọ who te roro kpahe oja nọ a gbe kẹ Ọmọ Ọghẹnẹ. Whọ tẹ be hai roro didi kpahe ẹtanigbo Jesu na, u ti ru nọ who ti ro you Jesu avọ Ọsẹ riẹ vi epaọ anwẹdẹ. Kukpe kukpe ma re kpohọ Ekareghẹhọ uwhu Jesu, jẹ rọ ajọwha zizie ahwo re a kuomagbe omai. Ma rẹ rọ enẹ dhesẹ nọ ẹtanigbo na ọ ginẹ da omai ẹro ziezi. Jihova o ru kẹhẹ nọ ọ rọ ta nọ ma wuhrẹ amọfa kpahe Ọmọ riẹ! w21.04 18-19 ¶13-16

Ẹdẹ jọ, Jesu o kpobọ ugbehru nyae lẹ, ọ rọ aso na soso lẹ se Ọghẹnẹ. Nọ oke o ke no, ogbotu ahwo buobu a tẹ nyabru ei ziọ oria nọ ọ jọ na. Ma riẹ nọ oma o rrọ Jesu gaga no oke yena. Rekọ nọ ọ ruẹ ogbotu na, ohrọ rai o tẹ re iẹe. Ibuobu rai iyogbe, yọ ejọ e be mọ. O te siwi enọ e be mọ na. Rekọ oye ọvo ho, ọ kẹ ovuẹ jọ nọ o bọ ahwo nọ a jọ etẹe kpobi ga ziezi. Ovuẹ yena a re se Ovuẹ Obọ Ugbehru na. (Luk 6:12-20) Makọ oke ofa nọ Jesu ọ rọ gwọlọ nọ ọye ọvo ọ rẹ jọ oria, ọ rehọ oke yena fiobọhọ kẹ ahwo. Ma riẹ nọ o te kẹ Jesu uye gaga nọ o yo nọ a bru uzou ogbẹnyusu riẹ Jọn Ọhọahwo-Ame na no. Ebaibol ọ ta nọ: “Nọ Jesu o yo [inọ Jọn o whu no], ọ tẹ ruọ okọ no etẹe kpohọ oria nọ u siomano re ọye ọvo ọ jọ oria.” (Mat. 14:10-13) Rekọ ogbotu ahwo a tubẹ kake rehọ iẹe te etẹe no be hẹrẹ iẹe. (Mak 6:31-33) Ọ ruẹ nọ ohọo ẹme Ọghẹnẹ u bi kpe ai gaga. Fikiere o te mu ai họ ewuhrẹ.—Luk 9:10, 11. w22.02 21 ¶4, 6

Eme ma re ru nọ ma tẹ ruẹ nọ ma ru oniọvo jọ thọ? Ma rẹ lẹ se Jihova. Ma sae lẹ nọ jọ o fiobọhọ kẹ omai re ma sae ruẹrẹhọ kugbe oniọvo na. Ma rẹ jẹ rọ oke jọ kiẹ omamai riwi re. Ma sae nọ omamai nọ: ‘Kọ mẹ te sae ta kẹ oniọvo na nọ me ruthọ, wounu kẹe, je ru oghẹrẹ kpobi nọ udhedhẹ o rẹ rọ wariẹ jọ udevie mai? Ẹvẹ Jihova avọ Jesu a ti rri omẹ nọ mẹ tẹ ginẹ daoma ru oghẹrẹ kpobi nọ udhedhẹ o rẹ rọ wariẹ jọ udevie mẹ avọ oniọvo na?’ Nọ ma tẹ ginẹ kẹ uyo nọ u fo evaọ enọ nana, u ti ru nọ ma ti ro ru oware nọ Jesu ọ ta, jẹ nyabru oniọvo na avọ omaurokpotọ. Ma vẹ te rọ ere ku ẹme na họ dhedhẹ. Ma tẹ nyabru oniọvo mai re ma ruẹrẹhọ kugbei, u fo nọ omaurokpotọ ma re ro lele iei ta ẹme. (Ẹf. 4:2, 3) Oware nọ o rẹ jọ omai oja kpobi kọ epanọ ofu riẹ o re ro kpotọ. Ma rẹ kareghẹhọ nọ ma te ku ẹme na họ dhedhẹ oye o mai wuzou orọnikọ epanọ a rẹ rọ riẹ ohwo nọ o ruthọ gbe ohwo nọ ọ riẹ ru hu.—1 Kọr. 6:7. w21.12 25-26 ¶13-16

O da Jesu gaga keme ọ riẹ nọ ahwo Jerusalẹm a rọ uruemu rai dhesẹ via no vẹre inọ a te gaviezọ kẹ usi uwoma Uvie na ha. O te whae ze nọ a te rọ raha Jerusalẹm no, yọ ohwo Ju kpobi nọ a kpe he, a ti mu ei kpohọ igbo. (Luk 21:20-24) Nwanọ ere o via. Ahwo buobu a rọwo gaviezọ kẹ Jesu hu. Kọ ahwo a be hae rọwo yo usi uwoma evaọ oborai? Otẹrọnọ ahwo a rẹ gwọlọ yo usi uwoma ha evaọ oria ra ghelọ epanọ whọ be daoma te kẹhẹ, eme oviẹ nọ Jesu ọ viẹ fiki Jerusalẹm na o rẹ sai wuhrẹ owhẹ? Jihova ọ rẹ re ohrọ ahwo gaga. Oviẹ nọ Jesu ọ viẹ na o kareghẹhọ omai nọ Jihova ọ rẹ ginẹ re ohrọ ahwo gaga. “Ọ gwọlọ nọ a raha ohwo ọvo ho rekọ ọ gwọlọ nọ ahwo kpobi a wo uvẹ nọ a re ro kurẹriẹ.” (2 Pita 3:9) Ma tẹ be dawo ẹgba mai kpobi re ma ta usi uwoma kẹ erivẹ mai je bi ru epanọ usi uwoma na o rẹ rọ ruọ ae oma, yọ ma bi dhesẹ nọ ma you rai.—Mat. 22:39. w22.01 16 ¶10-12

Ẹrọwọ ra ọ te ga ziezi nọ who te bi roro didi kpahe eware nọ Jihova o ru kẹ idibo riẹ no evaọ oke nọ u kpemu gbe eware nọ o ru kẹ owhẹ omara na no. Rekọ mai wuzou, who ti you Jihova vi epaọ anwẹdẹ kpobi. Who te you Jihova, who ti koko izi riẹ, kpairoro vrẹ eware jọ fiki riẹ je thihakọ edawọ kpobi nọ i te owhẹ. Uyoyou o rẹ mae lẹliẹ ohwo ru eware nana. (Mat. 22:37-39; 1 Kọr. 13:4, 7; 1 Jọn 5:3) A rẹ ruẹ oware nọ u woma tei hi nọ ohwo ọ tẹ rrọ ogbẹnyusu ọkpekpe Jihova. (Ol. 63:1-7) Hae kareghẹhọ nọ olẹ, uwuhrẹ omobọ mai gbe eware nọ ma wuhrẹ nọ ma re roro kpahe didi yọ eware jọ nọ ma re ru evaọ egagọ mai. Wọhọ Jesu, hae gwọlọ oria nọ edo ọ rrọ họ re whọ jọ etẹe lẹ se Jihova. Who te kpohọ ewuhrẹ hayo bi ru uwuhrẹ omobọ ra, hae whaha eware nọ i re si iroro ra no uwuhrẹ na. Lẹ se Jihova re iroro ra e gbẹ dhẹ kpenẹ avọ enẹ hẹ. Whọ tẹ be rọ oke ra ruiruo evaọ edhere nọ ọ mai woma, whọ te rria bẹdẹ bẹdẹ evaọ akpọ ọkpokpọ nọ Jihova ọ ya eyaa riẹ na.—Mak 4:24. w22.01 31 ¶18-20

Eware nọ ma bi roro eye ma rẹ gwọlọ ru. Oyejabọ nọ Jesu ọ rọ ta nọ, ma whaha oghẹrẹ iroro kpobi nọ e rẹ lẹliẹ omai ru oware nọ Jihova o mukpahe. (Mat. 5:21, 22, 28, 29) Mai kpobi ma gwọlọ nọ eva mai e were Jihova Ọsẹ obọ odhiwu mai na, o gbẹ rrọ ere? Nọ o rrọ ere na, ekpehre iroro e tẹ ruọ omai udu, joma jọ okioke yena si ei no udu. Jesu ọ ta nọ: “Eware kpobi nọ i bi no unu na ze, obọ udu na i bi no ze.” (Mat. 15:18) Uzẹme riẹ họ, ẹme nọ ma be ta u re ru nọ a rẹ rọ riẹ oware nọ o rrọ omai eva. Fikiere nọ omara nọ: ‘Kọ mẹ be hae ta uzẹme, o tẹ make rọnọ uzẹme na o te wha uye se omẹ? Mẹ nọ o wo aye hayo ọzae no, kọ mẹ be hae whaha ẹme hayo uruemu nọ u re dhesẹ nọ mẹ be rọ oma lẹliẹ omọfa? Kọ mẹ be hae kẹnoma kẹ eme ọfariẹ lelele? Ohwo ọ tẹ ta ẹme nọ ọ dha omẹ eva, kọ mẹ be hae rọ unu kpotọ ta ẹme kẹe?’ Whọ tẹ rọ enọ nana kiẹ omara riwi ziezi, u ti fiobọhọ kẹ owhẹ. Whọ tẹ siọ ikpehre eme wọhọ ekela, ọrue-ọta, gbe eme ọfariẹ ba, o te gbẹ bẹ owhẹ hẹ re whọ ba uruemu anwae na no oma. w22.03 5 ¶12-14

Ahwo nọ a rẹ ta kẹ inievo efa nọ jọ a kẹ ae ohrẹ a rẹ nyaharo ziezi evaọ ukoko na vẹrẹ vi enọ e rẹ hẹrẹ bẹsenọ amọfa a rẹ kẹ ae ohrẹ. Nọ o rrọ ere na, hae rọ iroro obọra ta kẹ amọfa nọ jọ a kẹ owhẹ ohrẹ. U re wo ẹsejọ nọ ma rẹ ta kẹ inievo efa nọ jọ a kẹ omai ohrẹ. Joma kẹ iriruo jọ. (1) Oniọvo-ọmọtẹ jọ ọ ta kẹ oniọvo-ọmọtẹ ọfa inọ jọ o kuomagbei re a gbẹ nyai wuhrẹ Ebaibol kugbe ọmọ-uwuhrẹ riẹ jọ. Nọ o ru uwuhrẹ na no, ọ tẹ ta kẹ oniọvo na inọ jọ ọ vuẹe oghẹrẹ nọ ọ sae rọ riẹ ohwo wuhrẹ viere ẹdẹfa. (2) Oniọvo-ọmọtẹ jọ nọ o ri wo ọzae he ọ gwọlọ dẹ ewu. Ọ tẹ be nọ oniọvo-ọmọtẹ ọfa nọ o kruga ziezi evaọ ukoko na sọ ewu nọ ọ gwọlọ dẹ na o gine kiehọ. (3) Oniọvo-ọmọzae jọ ọ gwọlọ kẹ ovuẹ ogbotu ọsosuọ riẹ. Ọ tẹ be vuẹ oniọvo-ọmọzae ọfa nọ o ru ẹme reria no inọ jọ ọ gaviezọ ziezi nọ o ti ru ẹme na re ọ vuẹe oware nọ ọ rẹ sai ru oke ofa re ẹme riẹ o gbe woma ziezi. Makọ oniọvo nọ ọ kẹ ovuẹ ikpe buobu no, ọ sae nọ mi inievo efa nọ i wo onaa ẹme ziezi re a kẹe ohrẹ nọ u re fiobọhọ ru ẹme riẹ woma vi epanọ o jọ.—Itẹ 19:20. w22.02 13 ¶15-17

Jihova o you omai yọ ọ be rẹrote omai wọhọ epanọ o you Jesu jẹ rẹrotei evaọ oke nọ ọ ziọ otọakpọ ti ru iruo ilogbo nọ ọ kẹ riẹ na. (Jọn 5:20) O fiobọhọ kẹ Jesu kru ẹrọwọ riẹ. Ọ tuduhọ iẹe awọ oke nọ ọ jẹ ruawa. Ọ tẹ jẹ kẹe emu gbe eware efa. Yọ Jihova ọ jẹ hai jiri Ọmọ riẹ na jẹ ta kẹe nọ o you rie. (Mat. 3:16, 17) Jesu ọ riẹ nọ Ọsẹ obọ odhiwu riẹ o you rie, yọ ọ te nyasiọ iẹe ba vievie he. Fikiere udu o jariẹ awọ. Jihova o ru eware buobu kẹ omai no nọ i dhesẹ nọ o gine you omai. Roro kpahe onana: Jihova o si omai kẹle oma, ọ tẹ jẹ kẹ omai inievo buobu nọ i bi ru eva were omai jẹ tuduhọ omai awọ. (Jọn 6:44) Jihova ọ tẹ be jẹ rehọ ẹme riẹ kuọ omai kẹse kẹse wọhọ emu, nọ u bi ru ẹrọwọ mai ga. O te bi je fiobọhọ kẹ omai wo eware nọ e roja kẹ omai kẹdẹ kẹdẹ. (Mat. 6:31, 32) Nọ ma tẹ be hae kareghẹhọ eware nọ Jihova o bi ru kẹ omai nọ u dhesẹ nọ o you omai, o rẹ lẹliẹ omai you rie re. w21.09 22 ¶8-9

Taure Isẹri Jihova a te ti mu owhẹ Ebaibol na họ ewuhrẹ, ẹvẹ uzuazọ ra o jọ? Mai otujọ ma re bo, nọ ma te roro te oghẹrẹ uzuazọ nọ ma je yeri. Ẹsejọhọ oghẹrẹ nọ ahwo nọ a riẹ Ọghẹnẹ hẹ a bi yeri uzuazọ rai ma je yeri uzuazọ mai re. A be daezọ onọ Ọghẹnẹ ọ ta nọ u woma hayo u yoma ha. O tẹ ginẹ rọnọ ere uzuazọ mai o jọ, kiyọ oke yena, ma “wo ẹruore he, yọ [ma] riẹ Ọghẹnẹ hẹ.” (Ẹf. 2:12) Rekọ nọ who gbe je wuhrẹ Ebaibol na, whọ tẹ te riẹ nọ Jihova yọ Ọsẹ obọ odhiwu ra, gbe nọ o you owhẹ gaga. Whọ tẹ jẹ ruẹ nọ re whọ sai ru oware nọ o rẹ were iẹe, jẹ jọ omọvo idibo riẹ, who re nwene eware buobu evaọ uzuazọ ra, te uruemu ra, gbe oghẹrẹ nọ who bi rri eware. Whọ tẹ jẹ ruẹ nọ whọ rẹ daoma koko izi riẹ, je yeri uzuazọ ra oghẹrẹ nọ ọ gwọlọ. (Ẹf. 5:3-5) Nọ orọnọ Jihova ọ ma omai ọ tẹ jẹ rrọ Ọsẹ mai na, o wo udu nọ ọ rẹ rọ vuẹ omai oghẹrẹ nọ u fo nọ ma re yeri uzuazọ mai keme mai yọ ahwo uviuwou riẹ. Yọ ọ gwọlọ nọ taure ohwo ọ tẹ te họ-ame, ọ rẹ “ba uruemu anwae na avọ iruẹru riẹ no oma no.” w22.03 2 ¶1-3

Eva e rẹ were inievo nọ e rrọ usu igodẹ efa na nọ a te kpohọ Emu Owọwọ, dede nọ ae omarai a rẹ re ebrẹdi jẹ da udi na ha. O rẹ lẹliẹ ai roro kpahe ẹruore nọ ae omarai a wo. Ovuẹ ogbotu nọ a rẹ kẹ evaọ oke Emu Owọwọ na o rẹ were ae gaga. A rẹ jariẹ ta ẹme ziezi kpahe obọdẹ eware nọ Jesu avọ ahwo idu udhuhrẹ-gbene (144,000) na a ti ru kẹ ahwo nọ a yoẹme evaọ oke Esuo Odu-Ikpe na. Jesu Kristi avọ ahwo idu udhuhrẹ-gbene na a ti fiobọhọ ru otọakpọ na soso zihe ruọ aparadase je ru nọ ahwo nọ a yoẹme a te rọ jọ gbagba. Eva e rẹ were ima ahwo buobu nọ i wo ẹruore obọ otọakpọ obonẹ nọ a te kpohọ Emu Owọwọ na. A rẹ rọ uvẹ yena roro kpahe oke nọ eruẹaruẹ Ebaibol nọ e ta kpahe akpọ ọkpokpọ na i ti ro rugba. Ejọ rai e rrọ obe Aizaya 35:5, 6; 65:21-23; gbe Eviavia 21:3, 4. Nọ a ti roro kpahe eware nọ te ai te imoni rai a ti ru evaọ akpọ ọkpokpọ na, o te lẹliẹ eva were ae, yọ ẹrọwọ rai ọ te ga. U ti je ru nọ a te rọ gbaemu inọ oware ovo u re ru ae siọ Jihova ba ẹgọ họ.—Mat. 24:13; Gal. 6:9. w22.01 21 ¶5-7

Eme họ ẹtanigbo na? Osa nọ Jesu ọ hwa re ma sai wo oware nọ Adamu o kufiẹ na zihe ze. (1 Kọr. 15:22) Fikieme o rọ gwọlọ nọ a rẹ ta omai no igbo? Whaọ, epanọ u fo nọ a re ru oware a re ru ei. Uzi nọ Jihova o jie kẹ ahwo Izrẹl u dhesẹ nọ uzuazọ a rẹ rọ hwosa uzuazọ. (Ọny. 21:23, 24) Uzuazọ ogbagba oye Adamu o kufiẹ na. Re a sae hwosa oware nọ Adamu o kufiẹ na, Jesu o te siobọno uzuazọ ogbagba riẹ. (Rom 5:17) Onana u ru nọ Jesu ọ rọ rrọ “Ọsẹ Ebẹdẹ Bẹdẹ” rọkẹ ohwo kpobi nọ o fi ẹrọwọ họ ẹtanigbo na. (Aiz. 9:6; Rom 3:23, 24) U no Jesu eva ze inọ ọ rẹ rọ uzuazọ riẹ dhe idhe fiki mai, keme o you Ọsẹ obọ odhiwu riẹ gaga. O te je you omai re. (Jọn 14:31; 15:13) Uyoyou yena o wha riẹ ze nọ ọ rọ gbaemu nọ o re kru ẹrọwọ riẹ te urere je ru oware kpobi nọ Ọsẹ riẹ ọ gwọlọ nọ o ru. Yọ ere Jesu o gine ru. Onana u ti ru nọ ẹjiroro nọ Jihova ọ rọ ma ohwo-akpọ gbe otọakpọ na u ti ro rugba. w21.04 14 ¶2-3