UWOU-EBE ITANẸTE Uwou-Eroro
UWOU-EBE ITANẸTE
Uwou-Eroro
Isoko
Ọ
  • Ẹ
  • ẹ
  • Ọ
  • ọ
  • EBAIBOL
  • EBE GBE EWARE EFA
  • IWUHRẸ
  • es25 ẹwẹ. 37-46
  • Ane

Ọnana o wo ividio ho.

Eva e dha owhẹ hẹ, ividio na ọ rọwo kporo ho.

  • Ane
  • Ẹkiẹriwo Ikereakere na Kẹdẹ Kẹdẹ—2025
  • Izoẹme-Esese
  • Edivẹ-Oka, Ẹdẹ 1 Ane
  • Edesa-Oka, Ẹdẹ avọ 2 Ane
  • Edene-Oka, Ẹdẹ avọ 3 Ane
  • Edisoi-Oka, Ẹdẹ avọ 4 Ane
  • Ẹdẹ-Ọmaha, Ẹdẹ avọ 5 Ane
  • Ẹdoka, Ẹdẹ avọ 6 Ane
  • Ẹdọvo-Oka, Ẹdẹ avọ 7 Ane
  • Edivẹ-Oka, Ẹdẹ avọ 8 Ane
  • Edesa-Oka, Ẹdẹ avọ 9 Ane
  • Edene-Oka, Ẹdẹ avọ 10 Ane
  • Edisoi-Oka, Ẹdẹ avọ 11 Ane
  • ẸDẸ EKAREGHẸHỌ NA
    Nọ Ọre O te Kiediwi No
    Ẹdẹ-Ọmaha, Ẹdẹ avọ 12 Ane
  • Ẹdoka, Ẹdẹ avọ 13 Ane
  • Ẹdọvo-Oka, Ẹdẹ avọ 14 Ane
  • Edivẹ-Oka, Ẹdẹ avọ 15 Ane
  • Edesa-Oka, Ẹdẹ avọ 16 Ane
  • Edene-Oka, Ẹdẹ avọ 17 Ane
  • Edisoi-Oka, Ẹdẹ avọ 18 Ane
  • Ẹdẹ-Ọmaha, Ẹdẹ avọ 19 Ane
  • Ẹdoka, Ẹdẹ avọ 20 Ane
  • Ẹdọvo-Oka, Ẹdẹ avọ 21 Ane
  • Edivẹ-Oka, Ẹdẹ avọ 22 Ane
  • Edesa-Oka, Ẹdẹ avọ 23 Ane
  • Edene-Oka, Ẹdẹ avọ 24 Ane
  • Edisoi-Oka, Ẹdẹ avọ 25 Ane
  • Ẹdẹ-Ọmaha, Ẹdẹ avọ 26 Ane
  • Ẹdoka, Ẹdẹ avọ 27 Ane
  • Ẹdọvo-Oka, Ẹdẹ avọ 28 Ane
  • Edivẹ-Oka, Ẹdẹ avọ 29 Ane
  • Edesa-Oka, Ẹdẹ avọ 30 Ane
Ẹkiẹriwo Ikereakere na Kẹdẹ Kẹdẹ—2025
es25 ẹwẹ. 37-46

Ane

Edivẹ-Oka, Ẹdẹ 1 Ane

Kinọ eme who ru omẹ na? . . . Fikieme whọ rọ viẹ omẹ họ?—Emu. 29:25.

Eware nọ a rẹro rai hi e via kẹ idibo Jihova evaọ oke anwae. Ohwo jọ nọ eware itieye e via kẹ họ Jekọp. Ọsẹ riẹ ọ vuẹ riẹ nọ o kpohọ obonọ Leban ọ be rria re ọ jọ obei wo aye. Ọ vuẹ Jekọp nọ o te ru ere, Jihova ọ te ghale iẹe gaga. Leban yọ omoni rai nọ ọ jẹ gọ Ọghẹnẹ. (Emu. 28:1-4) Jekọp o ru epanọ ọsẹ riẹ ọ ta na. O te no ẹkwotọ Kenan nọ ọ jẹ rria kpohọ obonọ Leban ọ be rria. Leban o wo emetẹ ivẹ. Ọrọ ọkpako Lia, ọrọ ọmaha kọ Reshẹl. Jekọp o you Reshẹl gaga yọ ọ rọwo nọ ọ rẹ gbodibo kẹ ọsẹ riẹ ikpe ihrẹ re ọ sae rehọ iẹe. (Emu. 29:18) Rekọ nọ ikpe na e gba no, eware e nya epanọ o roro ho. Ukpenọ Leban ọ rẹ rehọ Reshẹl kẹe, kọ Lia ọ kẹ riẹ. Jekọp ọ kake riẹ hẹ. Uwhremu na ọ tẹ rehọ Reshẹl kẹe jẹ vuẹe nọ ọ rẹ wariẹ gbodibo kẹe ikpe ihrẹ efa. (Emu. 29:26, 27) Ere ọvo ho, evaọ udhukpe soso nọ Jekọp ọ rọ gbodibo kẹ Leban na, ẹwhẹwhare ọvo Leban ọ jẹ wha ọmayọ na re.—Emu. 31:41, 42. w23.04 15 ¶5

Edesa-Oka, Ẹdẹ avọ 2 Ane

Wha ta eva rai kpobi kẹe.—Ol. 62:8.

Ono ma rẹ sai bo bru re o fiobọhọ kẹ omai riẹ oware nọ ma re ru, hayo re ọ tuduhọ omai awọ? Jihova ma re bo bru. Ọ gwọlọ nọ ma hae lẹ sei. Oyejabọ nọ Ebaibol ọ rọ ta nọ ma “hae lẹ kẹse kẹse.” (1 Tẹs. 5:17) Oke kpobi nọ ma lẹ sei inọ o fiobọhọ kẹ omai evaọ oware kpobi nọ ma gwọlọ ru, o re fiobọhọ kẹ omai. (Itẹ 3:5, 6) Jihova o wou wo umuo ho. Fikiere ọ vuẹ omai hi inọ, ‘Wha tẹ lẹ se omẹ te unuẹse utionana no, wha gbẹ lẹ se omẹ hẹ.’ Jesu ọ riẹ nọ eva e rẹ were Jihova gaga nọ ma tẹ be hae lẹ sei. Taure ọ tẹ te ziọ otọakpọ, ọ jẹ hae ruẹ epanọ Ọsẹ riẹ o bi ro yo olẹ idibo riẹ. Wọhọ oriruo, oke nọ Jihova o yo olẹ Hana, Devidi, Elaejah, gbe idibo riẹ efa, Jesu ọ jọ kugbei. (1 Sam. 1:10, 11, 20; 1 Iv. 19:4-6; Ol. 32:5) Oyejabọ nọ Jesu o ro wuhrẹ ilele riẹ nọ jọ a hae lẹ ẹsikpobi, a vẹ jẹ rọwo nọ Ọghẹnẹ o ti yo olẹ rai.—Mat. 7:7-11. w23.05 2 ¶1, 3

Edene-Oka, Ẹdẹ avọ 3 Ane

Nọ ohwo o te bi nuhu fiki ahwo-akpọ, o re kie ruọ agbefẹ, Rekọ ọnọ ọ rẹroso Jihova a te thọe.—Itẹ 29:25.

Ozerẹ okpehru na Jehoyada ọ jẹ dhozọ Jihova. Jehoyada o ru oware nọ u dhesẹ nọ o gine wo udu okenọ ọmọtẹ Jezibẹl nọ a re se Atalaya o je kpe ahwo nọ e jọ uyẹ ovie kpobi no re ọ sae jọ ovie evaọ Juda. O kpe ahwo buobu nọ e jọ uyẹ ovie te emọ-iruọmọ obọriẹ re ọ sae jọ ovie. (2 Irv. 22:10, 11) Okenọ a je kpe emọ na, obọ u te ọjọ họ. Ọmọ yena họ Jehoash. Aye Jehoyada nọ a re se Jehoshabiyat ọ wọ riẹ dhẹ. Ọye avọ ọzae riẹ a te si ei no jẹ yọrọ iẹe. Enẹ a ro ru nọ Atalaya ọ gbẹ sai ro kpe ahwo kpobi nọ e jọ orua uvie Devidi no ho. Jehoyada o je ru oware nọ Jihova ọ gwọlọ. Ọ jẹ dhozọ Atalaya ha. Nọ Jehoash o te ikpe ihrẹ no, Jehoyada o te je ru oware ofa nọ u dhesẹ nọ ọ gwọlọ ru oware nọ Jihova ọ gwọlọ. Ọ tẹ ma oma jọ. Ọ riẹ nọ ọ tẹ sai ru oware nọ ọ ma omaa riẹ na, Jehoash nọ o no uyẹ Devidi ze kọ ọye ọ te jọ ovie. Rekọ nọ eware e gbẹ nya epanọ ọ gwọlọ họ, a sai kpei no. Jihova o fiobọhọ kẹe nọ ọ sai ro ru oware nọ ọ ma omaa riẹ na. w23.06 17 ¶12-13

Edisoi-Oka, Ẹdẹ avọ 4 Ane

Riẹ nọ Ọnọ Ọ Mai Kpehru na họ Osu uvie ahwo-akpọ gbe nọ ọ rẹ rehọ iẹe kẹ ohwo kpobi nọ u je rie.—Dan. 4:25.

Ẹme otiọye na o sae lẹliẹ Nebukadneza ovie na roro nọ Daniẹl ọ be gba ẹgwae epanọ a re ro si ei no ọkwa no, yọ ọ sai kpe Daniẹl no dede. Rekọ ozọ u mu Daniẹl he. Ọ vuẹ riẹ oware nọ ewezẹ na i dhesẹ. Eme ma sae ta nọ o lẹliẹ Daniẹl gudu nọ ọ sae rọ gọ Jihova bọo ẹdẹ uwhu riẹ? Ẹsejọhọ okenọ ọ jọ ọmaha, ọ ruẹ nọ ọsẹgboni riẹ a jẹ gọ Jihova ziezi. (Izie. 6:6-9) Orọnikọ Izi Ikpe na hayo emeware efa jọ nọ Ọghẹnẹ ọ ta ọvo Daniẹl ọ riẹ hẹ. Rekọ ọ riẹ izi na kokodo, te oghẹrẹ erao nọ Ọghẹnẹ ọ ta nọ ahwo Izrẹl a rẹ re gbe enọ a rẹ re he. (Izerẹ 11:4-8; Dan. 1:8, 11-13) Daniẹl ọ tẹ jẹ riẹ iku ahwo Ọghẹnẹ gaga. Ọ riẹ nọ uye o bẹ ahwo Izrẹl fikinọ a koko izi Ọghẹnẹ hẹ. (Dan. 9:10, 11) Eware nọ e via kẹ Daniẹl e lẹliẹ e riẹ ruẹ nọ Jihova avọ ikọ-odhiwu riẹ nọ i wo ẹgba gaga na a rrọ kugbei.—Dan. 2:19-24; 10:12, 18, 19. w23.08 3 ¶5-6

Ẹdẹ-Ọmaha, Ẹdẹ avọ 5 Ane

Ohwo nọ ọ riẹ umuo nọ ọ rẹ nya ba o wo areghẹ.—Itẹ 11:2.

Rebeka yọ aye nọ o wo areghẹ gaga. Ọ tẹ ruẹ oware jọ nọ u fo nọ o re ru, o re ru ei. O re ru meti meti hi. (Emu. 24:58; 27:5-17) O make rrọ ere na, ọ jẹ hae romakpotọ kẹ ọzae riẹ jẹ kẹe adhẹẹ. (Emu. 24:17, 18, 65) Whẹ oniọvo-ọmọtẹ nọ ọ gbẹ rrọ uzoge, hae romakpotọ kẹ ahwo nọ Jihova o ro mu wọhọ epanọ Rebeka o je ru na. Who te ru ere, te ahwo uwou ra te inievo na a te rọ aro kele owhẹ fiki emamọ uruemu ra. Oleleikristi kpobi ọ rẹ daoma riẹ oria nọ o re ru ba. Ẹsta yọ aye nọ ọ jẹ gọ Ọghẹnẹ, yọ ọ riẹ oria nọ o re ru ba. Fikiere o je ru eware nọ a kẹ riẹ udu inọ o ru hu hu. Ẹsta ọ gaviezọ kẹ ohrẹ nọ omoni riẹ nọ a re se Mọdekae ọ kẹ riẹ, yọ o lele ohrẹ na. (Ẹsta 2:10, 20, 22) Whọ tẹ be hae nyabru ahwo nọ a riẹ vi owhẹ re a kẹ owhẹ ohrẹ je bi ru oware nọ a vuẹ owhẹ, u re dhesẹ nọ whọ gwọlọ nya vrẹ usi hi. (Tait. 2:3-5) Oware ofa jọ o riẹ nọ Ẹsta o ru nọ u dhesẹ nọ ọ riẹ oria nọ o re ru ba. Ebaibol ọ ta nọ Ẹsta “o wo erru evaọ ugboma je siuru gaga.” Rekọ Ẹsta o je dhesẹ oma ha fikinọ o wo erru gaga.—Ẹsta 2:7, 15. w23.12 19-20 ¶6-8

Ẹdoka, Ẹdẹ avọ 6 Ane

Ọghẹnẹ ọ rro vi udu mai jẹ riẹ eware kpobi.—1 Jọn 3:20.

Udu nọ u re brukpe ohwo vrẹta yọ owha ogbẹgbẹdẹ nọ u fo nọ a re gbolo kufiẹ. Nọ ma tẹ raha uzi, nọ ma jẹ ta uzioraha na via je kurẹriẹ no, yọ ma be kẹnoma kẹ oware nọ o rẹ lẹliẹ omai wariẹ raha uzi na, joma riẹ nọ Jihova ọ rọvrẹ omai no. (Iruẹru 3:19) Jihova ọ gwọlọ nọ udu o rẹ gbẹ wariẹ brukpe omai hi nọ ma te ru eware yena kpobi no. Ọ riẹ nọ udu u te bi gbe brukpe ohwo, ẹgba nọ o re ro ru oreva riẹ o rẹ gbẹ jariẹ oma ha. (Ol. 31:10) Nọ ma te bi gbe roro kpahe oware uyoma nọ ma ru, ohrẹ uzuazọ na o sae bẹ omai no. (2 Kọr. 2:7) Nọ udu u te bi brukpe owhẹ, hae kareghẹhọ nọ Jihova o wo “erọvrẹ gaga.” (Ol. 130:4) Ohwo ọ tẹ raha uzi nọ o je gine kurẹriẹ no eva ze no, Jihova ọ rẹ rọvrẹ riẹ. Yọ Jihova ọ fodẹ oware nọ o re ru nọ ọ tẹ rọvrẹ idibo riẹ nọ e raha uzi no. Ọ ta nọ: “Mẹ gbẹ te kareghẹhọ uzioraha rai ofa ha.” (Jeri. 31:34) Ẹme yena o dhesẹ nọ Jihova ọ tẹ rọvrẹ ohwo no, ọ rẹ gbẹ kẹ ohwo na uye fiki uzi nọ ọ raha na ha. Otẹrọnọ a mi owhẹ iruo jọ nọ who je ru evaọ ukoko na vẹre fiki oware nọ who ru, jọ o kẹ owhẹ uye ga hrọ họ. Jihova ọ kpairoro vrẹ oware nọ who ru na no, fikiere daoma kpairoro vrẹ riẹ re. w23.08 30-31 ¶14-15

Ẹdọvo-Oka, Ẹdẹ avọ 7 Ane

Wha dikihẹ ga, wha no ẹta ha.—1 Kọr. 15:58.

Evaọ oke nọ ẹyao COVID-19 ọ rọ jotọ na, Isẹri Jihova nọ i ru oware nọ ukoko Jihova o vuẹ omai evaọ oke yena a ru oware nọ u fo. A daezọ erue nọ ahwo a jẹ ta ha. Ahwo nọ a gaviezọ kẹ eme atanọ atanọ oke yena a jọ awawa. (Mat. 24:45) Jọ “eware nọ e mae roja” e thọrọ omai ẹro ho. (Fil. 1:9, 10) Eware buobu e riẹ nẹnẹ na nọ e rẹ lẹliẹ omai raha oke mai kufiẹ, i ve si iroro mai no eware nọ e rẹ ginẹ kẹ omai erere. Eware itieye jọ họ, epanọ ma rẹ rọ re eva vọ, udi nọ ma rẹ da, eware nọ ma re ru rọ jaja oma, gbe okọ mai. Eware nana e thọ họ, rekọ ma gbe rri otọ mu hu, kọ eye e te mae jọ omai oja. (Luk 21:34, 35) U te no eware yena no, usi ivotu gbe usi ahwo nọ a be họre kẹ eware nọ a gwọlọ nọ egọmeti o ru kẹ ae o da oria kpobi fia. Ma du fi iroro mai họ eware yena ha. O gbẹ rrọ ere he, ma vẹ te jọ abọ ahwo jọ, o tẹ make rọnọ ma be tae via ha. Setan ọ be rọ eware sa-sa gwọlọ ru re ma gbe dikihẹ ga ha, ma vẹ siọ oware nọ o rẹ were Ọghẹnẹ ba eru. w23.07 16-17 ¶12-13

Edivẹ-Oka, Ẹdẹ avọ 8 Ane

Wha hai ru onana rọ kareghẹhọ omẹ.—Luk 22:19.

Idibo Jihova a riẹ nọ ẹdẹ nọ ma re ru Ekareghẹhọ uwhu Jesu na họ ẹdẹ nọ ọ mae rro evaọ ukpe na soso. Oye ọvo họ oware nọ Jesu ọ vuẹ ilele riẹ nọ a hai ru rọ kareghẹhọ iẹe. (Luk 22:19, 20) Yọ ma re je roro kpahe epanọ ma sai ro dhesẹ nọ uwhu Jesu o da omai ẹro fia. (2 Kọr. 5:14, 15) O rẹ jẹ so ẹe ze nọ te omai te inievo ukoko na ma rẹ rọ “tuduhọ ohwohwo awọ.” (Rom 1:12) Yọ ahwo jọ nọ a rrọ ukoko na ha nọ a nyaze, eme nọ a yo gbe oware nọ a ruẹ o rẹ lẹliẹ ejọ kurẹriẹ ze. Emu Owọwọ na yọ oware jọ nọ mai idibo Jihova nọ e rrọ akpọ na soso ma re ru kugbe. Agbẹta nọ Emu Owọwọ na o rọ rrọ omai oja gaga na. w24.01 8 ¶1-3

Isase Ebaibol Ekareghẹhọ: (Eware nọ e via oke uvo: Nisan 9) Luk 19:29-44

Edesa-Oka, Ẹdẹ avọ 9 Ane

Ọghẹnẹ o you akpọ na gaga te epanọ o ro siobọno Ọmọ ọvo riẹ, re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.—Jọn 3:16.

Ma te gine dhizu, ma je roro didi kpahe okpoware nọ Jihova avọ Jesu a ru kẹ omai na, o rẹ lẹliẹ omai riẹ nọ a you omai kpobi na omomọvo. (Gal. 2:20) Jihova o vi Jesu ze fikinọ o you omai. Ọmọ nọ ọ mae kẹle Ọsẹ na kpobi, nọ ọ mai you kpobi, ọye Ọsẹ na o vi ze ti whu kẹ omai na! Jihova ọ kuvẹ re Jesu Ọmọ riẹ na ọ ginẹ ruẹ uye je whu fiki mai. Uyoyou nọ Jihova o you omai, orọnikọ obọ udu riẹ ọvo o rrọ họ, rekọ o bi dhesẹ iẹe via. (Jeri. 31:3) Jihova o you omai jabọ ọ rọ rehọ omai ziọ ukoko riẹ. (Je rri Iziewariẹ 7:7, 8) Ohwo ọvo hayo oware ovo o sai ru nọ Jihova ọ rẹ rọ siọ omai ba eyou ho. (Rom 8:38, 39) Nọ who te rri epanọ Jihova o you owhẹ te, ẹvẹ o be lẹliẹ owhẹ rri Jihova? w24.01 28 ¶10-11

Isase Ebaibol Ekareghẹhọ: (Eware nọ e via oke uvo: Nisan 10) Luk 19:45-48; Matiu 21:18, 19; 21:12, 13

Edene-Oka, Ẹdẹ avọ 10 Ane

Avọ ẹruore nọ ọ kẹ rai . . . emama na omarai re a ti no igbo.—Rom 8:20, 21.

Ẹruore obọ odhiwu nọ Ileleikristi nọ a rọ ẹzi wholo a wo na ọ were rai gaga. Oniọvo jọ nọ a re se Frederick Franz nọ ọ jọ usu inievo nọ a rọ ẹzi wholo ọ ta epanọ o rri ẹruore nọ o wo. Ọ ta nọ: “Oware nọ ma bi rẹro riẹ na o te via. O ti te ahwo idu udhuhrẹ-gbene (144,000) nọ a bi se uthuru okakao na kpobi obọ. O ti tube woma vi epanọ ma roro nọ o te jọ.” Evaọ ukpe 1991 Brọda Franz ọ ta nọ: “Avro ọvuọvo ọ rrọ [omai] udu hu inọ oware nọ ma bi rẹro riẹ na o te via ha. . . . Dede nọ u kri no nọ ma bi ro rẹro riẹ, ẹruore na ọ be tubẹ were omai vi epaọ anwẹdẹ. Ma riẹ nọ oware nọ Ọghẹnẹ o ti ru kẹ omai na okpoware. Fikiere u te oware nọ ma rẹ hẹrẹ. Ẹruore na ọ were omẹ tube vi epaọ anwẹdẹ no dede.” Te ma wo ẹruore inọ ma te rria bẹdẹ bẹdẹ evaọ obọ odhiwu hayo evaọ obọ otọakpọ obonẹ, obọdẹ ẹruore ma wo na. Yọ o rẹ lẹliẹ omai ghọghọ. Ẹruore na ọ sae tubẹ ga vi epanọ o jọ vẹre. w23.12 9 ¶6; 10 ¶8

Isase Ebaibol Ekareghẹhọ: (Eware nọ e via oke uvo: Nisan 11) Luk 20:1-47

Edisoi-Oka, Ẹdẹ avọ 11 Ane

O lọhọ họ re azẹ iruẹ gbe ọrọ ewe o si izieraha no.—Hib. 10:4.

Agbada-idhe nọ a rehọ ekọpa ru ọ jọ otafe uwou-udhu na nọ a jẹ hae jọ dhe idhe kẹ Jihova evaọ oke anwae. (Ọny. 27:1, 2; 40:29) Rekọ idhe nọ a je dhe oke yena e sai ru nọ Ọghẹnẹ ọ rẹ rọ rehọ izieraha ahwo vrẹ rai riẹriẹriẹ hẹ. (Hib. 10:1-3) Idhe nọ a jẹ hae rọ erao dhe ẹsikpobi evaọ uwou-udhu na i dikihẹ kẹ idhe jọ nọ a ti dhe ẹsiẹvo rọ ta ahwo-akpọ no igbo uzioraha riẹriẹriẹ. Jesu ọ riẹ nọ oware nọ Jihova o ro vi ei ziọ otọakpọ họ, re ọ rehọ uzuazọ riẹ dhe idhe rọ ta ahwo-akpọ no igbo. (Mat. 20:28) Oyejabọ ọ rọ họ-ame re o dhesẹ nọ ọ nyaze no re o ru oware nọ Jihova ọ rọ fiki riẹ vi ei ze. (Jọn 6:38; Gal. 1:4) Jesu ọ rọ uzuazọ riẹ dhe idhe “ẹsiẹvo rọkẹ oke kpobi.” Yọ ohwo kpobi nọ o fi ẹrọwọ họ iẹe, a rẹ rehọ izieraha riẹ vrẹ riẹ riẹriẹriẹ.—Hib. 10:5-7, 10. w23.10 26-27 ¶10-11

Isase Ebaibol Ekareghẹhọ: (Eware nọ e via oke uvo: Nisan 12) Luk 22:1-6; Mak 14:1, 2, 10, 11

ẸDẸ EKAREGHẸHỌ NA
Nọ Ọre O te Kiediwi No
Ẹdẹ-Ọmaha, Ẹdẹ avọ 12 Ane

Okẹ nọ Ọghẹnẹ ọ rẹ kẹ họ uzuazọ ebẹdẹ bẹdẹ ẹkwoma Kristi Jesu Olori mai.—Rom 6:23.

U wo oghẹrẹ ọvo nọ mai ọvo ma hae sae rọ ta omobọ mai no igbo uzioraha gbe uwhu hu. (Ol. 49:7, 8) Nọ Jihova o rri eware na, o te siobọno ọmọ ọvo riẹ nọ ọ mai you kpobi na re o whu fiki mai. Jesu omariẹ ọ daoma kẹhẹ! Nọ ma te bi roro kpahe okpoware nana nọ Jihova avọ Jesu a ru kẹ omai na gaga, u ti gbe omai unu ọvo inọ, ‘O kinọ oware nọ a gine ru kẹ omẹ?’ O te da omai ẹro fia. Nọ Adamu ọ raha uzi no, uvẹ uzuazọ ebẹdẹ bẹdẹ u gbe rovie kẹ ọyomariẹ gbe omai emọ riẹ hẹ. Ọghẹnẹ o te vi Jesu ze re ọ rọ oma ogbagba riẹ na whu kẹ omai. Ma vẹ sai wo uzuazọ ebẹdẹ bẹdẹ nọ Adamu o kufiẹ na. Nọ Jesu ọ jọ otọakpọ, “ọ raha uzi ovo ho, yọ a jọ unu riẹ ruẹ eviẹhọ họ.” (1 Pita 2:22) Fikiere nọ Jesu o whu, ọ jọ gbagba ababọ uzioraha. U te ru nọ uwhu riẹ na u ro te oware nọ a sae rọ hwosa kẹ uzuazọ ogbagba nọ Adamu o wo vẹre na.—1 Kọr. 15:45; 1 Tim. 2:6. w24.01 10 ¶5-6

Isase Ebaibol Ekareghẹhọ: (Eware nọ e via oke uvo: Nisan 13) Luk 22:7-13; Mak 14:12-16 (Eware nọ e via nọ ọre o kiediwi no: Nisan 14) Luk 22:14-65

Ẹdoka, Ẹdẹ avọ 13 Ane

Ọ ruọ oria ọrẹri na, orọnikọ avọ azẹ ewe gbe ọrọ emọ iruẹ hẹ, rekọ avọ azẹ obọriẹ, onọ o ru ẹsiẹvo rọkẹ oke kpobi, ọ tẹ wha esiwo ebẹdẹ bẹdẹ se omai.—Hib. 9:12.

Nọ a kpare Jesu ze no, ọ tẹ ruọ eva Ọrẹri Erẹri ọrọ etẹmpol ologbo Jihova. Eware nana kpobi i dhesẹ nọ oghẹrẹ nọ ma be rọ gọ Jihova enẹna fikinọ Jesu o whu kẹ omai, ọ tẹ jẹ rrọ Ozerẹ Okpehru mai na o woma vi orọ ahwo Ju. Azẹ erao ozerẹ okpehru ahwo Izrẹl ọ jẹ hai ro dhe idhe evaọ oria Ọrẹri Erẹri nọ ohwo-akpọ ọ bọ. Rekọ Jesu “ọ ruọ odhiwu dẹẹ,” nọ ọ mae rrọ ọrẹri kpaobọ, nọ Jihova ọ rrọ. Ọ tẹ jọ obei hwosa ẹtanigbo mai “re o si uzioraha no ẹkwoma omariẹ nọ o ro dhe idhe.” (Hib. 9:24-26) Mai kpobi ma sae gọ Jihova evaọ etẹmpol ologbo riẹ, te ma wo ẹruore obọ odhiwu hayo otọakpọ na ma te jọ. w23.10 28 ¶13-14

Isase Ebaibol Ekareghẹhọ: (Eware nọ e via oke uvo: Nisan 14) Luk 22:66-71

Ẹdọvo-Oka, Ẹdẹ avọ 14 Ane

Joma nya kẹle agbara-uvie Ọghẹnẹ nọ o re dhesẹ uwowou ulogbo na jẹ lẹ sei ududu.—Hib. 4:16.

Dai roro kpahe Jesu. Ma be ta ẹme na, Jesu o bi su evaọ obọ odhiwu, ọ tẹ jẹ rrọ Ozerẹ Okpehru nọ o re roro kẹ ohwo. Fiki Jesu jabọ nọ ma be sae rọ “nya kẹle agbara-uvie Ọghẹnẹ nọ o re dhesẹ uwowou ulogbo” na. Ma rẹ lẹ sei re ọ re ohrọ mai, re o je fiobọhọ kẹ omai “evaọ ẹruoke.” (Hib. 4:14, 15) Joma hai roro kpahe oware nọ Jihova avọ Jesu a ru kẹ omai no kẹdẹ kẹdẹ gbe eware nọ a gbe bi ru kẹ omai. Ma tẹ be hai roro kpahe epanọ a you omai te, ma ti kru oma ga ru iruo nọ a kẹ omai jẹ gọ Jihova ziezi. (2 Kọr. 5:14, 15) Ahwo nọ ma rẹ daoma wuhrẹ re a nyaze te gọ Jihova, a vẹ jẹ jọ ilele Jesu, yọ obọdẹ edhere jọ nọ ma re ro dhesẹ edẹro mai. (Mat. 28:19, 20) Nwanọ ere Pọl ukọ na o je ru. Ọ riẹ nọ oreva Jihova họ, re “oghẹrẹ ahwo kpobi a wo esiwo je wo eriariẹ egbagba uzẹme na.”—1 Tim. 2:3, 4. w23.10 22-23 ¶13-14

Isase Ebaibol Ekareghẹhọ: (Eware nọ e via oke uvo: Nisan 15) Matthew 27:62-66

Edivẹ-Oka, Ẹdẹ avọ 15 Ane

Uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha.—Evia. 21:4.

Ma be hai se oria Ebaibol nana kẹ ahwo gaga nọ ma tẹ be ta usi uwoma kpahe oghẹrẹ nọ aparadase ọ te jọ. Eme u re fiobọhọ kẹ omai riẹ nọ eyaa Ọghẹnẹ nọ a kere fihọ obe Eviavia 21:3, 4 na i ti gine rugba? Kọ eme ma sae ta kẹ amọfa re u mu ai ẹro re? Orọnikọ Jihova ọ ya eyaa na no ọvo ọ tẹ nyavrẹ hẹ. Ọ ta oware nọ o rẹ lẹliẹ omai rọwo nọ o ti ru eyaa na gba. Nọ Jihova ọ ya eyaa akpọ ọkpokpọ na no, ọ tẹ ta oware nọ u dhesẹ nọ o ti ru eyaa na gba. Ma jọ Eviavia 21:5, 6 se nọ: “Ọnọ ọ keria agbara-uvie na ọ tẹ ta nọ: ‘Rri! Me bi ru eware kpobi họ ekpokpọ.’ Ọ tẹ jẹ ta nọ: ‘Kere, keme eme nana yọ eme nọ a re fievahọ, e tẹ jẹ rrọ uzẹme.’ Ọ tẹ ta kẹ omẹ nọ: ‘I rugba no! Mẹ họ Alfa gbe Omẹga, emuhọ gbe ekuhọ na.’” w23.11 3 ¶3-5

Isase Ebaibol Ekareghẹhọ: (Eware nọ e via oke uvo: Nisan 16) Luk 24:1-12

Edesa-Oka, Ẹdẹ avọ 16 Ane

Hae tuduhọ ezae nọ e gbẹ maha awọ inọ a wo iroro nọ e gba.—Tait. 2:6.

Oware jọ nọ u re dhesẹ nọ oniọvo-ọmọzae o bi rorote ziezi họ nọ ọ tẹ be sẹ osẹ kpatiẹ je bru eto riẹ kpatiẹ re. Esẹ jọ nọ i kie ze nọ ahwo a be sẹ na, yọ enọ ahwo nọ a be dhozọ Jihova ha, nọ a be rọ ọfariẹ-ogbe họ a wha ze. Iroro ọfariẹ-ogbe nọ e da rai oma fia o be lẹliẹ ae wha iwu nọ e gba mu ai oma. Yọ o soriẹ nọ emezae jọ a bi ro ru eto rai wọhọ emetẹ, hayo ku eware nọ emetẹ i re kuhọ họ. Oniọvo-ọmọzae nọ ọ be daoma re ọ jọ emamọ Oleleikristi ọ rẹ rọ aro kele ahwo otiọye na ha. Rekọ o re lele ẹme nọ Ebaibol ọ ta kpahe osẹ, ọ vẹ jẹ rọ aro kele ahwo nọ a rẹ sẹ omosẹ rai kpatiẹ evaọ ukoko na. Ọ rẹ nọ omariẹ nọ: ‘Kọ osẹ nana ọ te lẹliẹ ahwo rri omẹ inọ mẹ yọ ohwo nọ o re roro oware te ziezi? Kọ a ti roro nọ onọ o were omẹ kpobi mẹ be wha, binikọ me bi roro kpahe oghẹrẹ nọ ahwo a ti rri osẹ mẹ? Kọ osẹ mẹ o be lẹliẹ ahwo kake riẹ nọ mẹ yọ emamọ Oleleikristi?’ (1 Kọr. 10:31-33) Nọ oniọvo-ọmọzae nọ ọ gbẹ maha o te bi roro oware te re o te ti ru ei, eva riẹ e rẹ were inievo ukoko na gbe Ọsẹ obọ odhiwu riẹ. w23.12 26 ¶7

Edene-Oka, Ẹdẹ avọ 17 Ane

Uvie mẹ u wo obọ kugbe akpọ nana ha. Uvie mẹ o hai wo obọ kugbe akpọ nana, idibo mẹ e hae te họre.—Jọn 18:36.

Oke jọ o jariẹ nọ a je kpokpo idibo Jihova nọ e jọ ofẹ nọ “ovie obọze ovatha-ọre” na o je su. (Dan. 11:40) Okenọ a je fi Ẹmo Akpọ Ọsosuọ gbe Ẹmo Akpọ Avivẹ, a fi inievo mai buobu họ uwou-odi fikinọ a rọwo nọ a rẹ jọ abọ isuẹsu ọvo ho. Yọ a rọ fiki oware ovo yena si emọ Isẹri Jihova jọ no isukulu. Rekọ anwọ oke jọ ze na, edhere nọ a rẹ kaki rri mu hu Setan ọ be rọ dawo inievo nọ e rrọ obonọ “ovie obọze ovatha-ọre” na o bi su na. Okenọ a te bi votu, Oleleikristi o gbe rri otọ mu hu, ọ sae ta nọ, ‘A te fi ohwo nana họ ọkwa na, eware i ti woma.’ Nọ ọ tẹ ta ere, dede nọ ọ nyai votu hu, yọ ọ whomahọ abọ jọ no. Fikiere ma rẹ yọroma gaga re ma gbe dhunu họ ẹme isuẹsu hu. Joma jọ obọ udu mai votu kẹ ohwo ọvo gbe he.—Jọn 15:18, 19. w23.08 12 ¶17

Edisoi-Oka, Ẹdẹ avọ 18 Ane

Ujiro u te Jihova, ọnọ ọ be wọ owha mai kẹdẹ kẹdẹ.—Ol. 68:19.

Nọ ma be dhẹ ohrẹ uzuazọ na, ma rẹ “dhẹ evaọ oghẹrẹ nọ [ma] sai ro wo osa na.” (1 Kọr. 9:24) Jesu ọ ta nọ ma gbe rri otọ mu hu, “emuọriọ obuobu gbe udi-oda ubuobu gbe awaọruọ uzuazọ” e sai si omai kpemu. (Luk 21:34) Ẹme yena gbe eme efa nọ Ebaibol ọ ta i ti fiobọhọ kẹ owhẹ muẹrohọ eware nọ u fo nọ who re gbe ru re whọ sae dhẹ ohrẹ na te urere. Ma riẹ nọ evaọ ogaga Jihova, ma te dhẹ ohrẹ na te urere. (Aiz. 40:29-31) Fikiere jọ ohrẹ na o bẹ owhẹ hẹ. Rọ aro kele Pọl ukọ na. Pọl ọ rọ ẹgba riẹ kpobi dhẹ ohrẹ uzuazọ na keme ọ gwọlọ nọ osa na u re tei obọ. (Fil. 3:13, 14) Ohwo ọvo ọ sae dhẹ ohrẹ na kẹ owhẹ hẹ. Rekọ riẹ nọ Jihova ọ te kẹ owhẹ ẹgba dhẹ ohrẹ na te urere. Jihova o ti fiobọhọ kẹ owhẹ re whọ wha eware nọ e roja lele oma je gbolo eware nọ i wiruo ho kufiẹ. Ajọ Jihova o fiobọhọ kẹ owhẹ re whọ sae thihakọ dhẹ ohrẹ na te urere. w23.08 31 ¶16-17

Ẹdẹ-Ọmaha, Ẹdẹ avọ 19 Ane

Rọ ọghọ kẹ ọsẹ ra avọ oni ra.—Ọny. 20:12.

Okenọ Jesu ọ jọ ikpe ikpegbivẹ, ọye avọ ọsẹgboni riẹ a kpobọ Jerusalẹm. Nọ a je bi kpozi, a te kpo siọ Jesu ba. (Luk 2:46-52) U fo nọ Meri avọ Josẹf a re rri sọ emọ rai kpobi a rrọ kugbe ai nọ a ku ehaa na họ no taure a te ti muhọ ekpo, rekọ a ru ere he. Uwhremu na nọ a jẹ te ruẹ e riẹ no, Meri ọ tẹ be vuẹ Jesu nọ avọ ọsẹ riẹ a gwọlọ e riẹ oma sa no. Jesu ọ hae sae ta kẹ Meri nọ ọye ọ wha riẹ ze he, inọ ae omarai a wha riẹ ze. Rekọ o ru ere he. Jesu ọ rọ unu kpotọ ta ẹme kẹ ae avọ adhẹẹ, o lele i rai si ẹme na ha. Rekọ Josẹf avọ Meri “a wo otoriẹ ẹme nọ ọ jẹ ta kẹ ae na ha.” O make jọ ere na, Jesu “ọ ruabọhọ jẹ romakpotọ kẹ ae.” Ẹsejọ ọsẹgboni ra a sai ru owhẹ thọ hayo o sae jọ nọ a riẹ oghẹrẹ nọ eware e rrọ kẹ owhẹ dẹẹ hẹ. Kọ onana o be whae ze nọ whọ gbẹ rọ gwọlọ yoẹme kẹ ai hi? O tẹ rrọ ere, eme whọ sai ru? Roro kpahe epanọ eva e te were Jihova te nọ who te yoẹme kẹ ai. Ebaibol ọ ta nọ “o rẹ were Olori na” nọ who te bi yoẹme kẹ ọsẹgboni ra. (Kọl. 3:20) Nọ ọsẹgboni ra a gbẹ riẹ oghẹrẹ nọ eware e rrọ kẹ owhẹ hẹ, hayo nọ a te fi izi egaga họ kẹ owhẹ, Jihova ọ rẹ riẹ. Rekọ nọ who te ru oware nọ a vuẹ owhẹ ghele, eva ra e te were iẹe gaga. w23.10 7 ¶5-6

Ẹdoka, Ẹdẹ avọ 20 Ane

[Wha] jọ enọ i wo iroro, jọ wolẹ evaọ kabọ kabọ kugbe ahwo kpobi.—Tait. 3:2.

Ọmọ isukulu mai ọ sae ta nọ oghẹrẹ nọ Isẹri Jihova a re rri ezae nọ i re lele ezae wezẹ gbe eyae nọ i re lele eyae wezẹ u woma ha Ma rẹ sae vuẹe nọ ma riẹ nọ duọ ohwo duọ oghẹrẹ nọ ọ gwọlọ yeri uzuazọ riẹ. (1 Pita 2:17) Nọ ọ jẹ rọ udu kpotọ no, ma vẹ vuẹe oware nọ Ebaibol ọ ta kpahe ẹme na gbe erere nọ ma re wo nọ ma te bi koko izi Ọghẹnẹ. Nọ ohwo ọ tẹ be rọ ẹme jọ lele omai si ikẹ gaga, joma nwani roro nọ ma riẹ oware nọ o be lẹliẹe rri ẹme na ere he. Joma kẹ oriruo jọ. Ma rehọ iẹe nọ ọmọ isukulu ra ọ ta nọ ohwo nọ ọ ta nọ Ọghẹnẹ ọ rrọ kpobi yọ ẹkpa. Kọ oyena o te nwane lẹliẹ owhẹ roro nọ u mu rie ẹro nọ eware kpobi i mu romavia, yọ o se eware buobu kpahe iẹe no? Ẹsejọhọ o roro ẹme na te ziezi re ọ tẹ tae he. Whọ sae kẹe obe jọ nọ ọ sai jo se kpahe ẹme na tao. Hayo whọ sae vuẹe inọ jọ o kpohọ jw.org nyai rri eme nọ a ta kpahe ẹme ẹma a ma eware hayo i mu romavia. Ẹsejọhọ ọ te jọ etẹe ruẹ uzoẹme hayo ividio jọ nọ o were riẹ nọ wha sae ta ẹme kpahe. Whọ tẹ ta ẹme kẹe avọ adhẹẹ, ọ sai nwene iroro. w23.09 17 ¶12-13

Ẹdọvo-Oka, Ẹdẹ avọ 21 Ane

Who woma, O Jihova, yọ whọ ruẹrẹ oma kpahe re whọ rọvrẹ; whọ vọ avọ uyoyou nọ o rẹ hiẹ hẹ kẹ enọ i bi bo se owhẹ kpobi.—Ol. 86:5.

Oware jọ o tẹ make thọ omai obọ, joma riẹ nọ Jihova ọ sae rọvrẹ omai jẹ ghale omai otẹrọnọ ma kurẹriẹ, jẹ be daoma re ma siọ oware na ba eru ẹdẹfa. (Itẹ 28:13) Dede nọ Samsin ọ gba ha, yọ usu Dilaela nọ ọ nya u fi rie họ uye, ọ nwani no ere siọ Jihova ba ẹgọ họ. Jihova omariẹ ọ se riẹ hẹ. Ọ rehọ e riẹ ru okpoware ọfa. Jihova o rri rie inọ o wo ẹrọwọ gaga, o te ru nọ a ro kele iei kugbe ahwo nọ i wo ẹrọwọ gaga nọ a fodẹ evaọ obe Ahwo Hibru izou 11. Eva e were omai gaga inọ Ọsẹ obọ odhiwu mai na o you omai gaga yọ ọ gwọlọ fiobọhọ kẹ omai. Ọ rẹ kẹ omai ẹgba nọ oma o tẹ make lọhọ omai no. Fikiere joma hae lẹ se Jihova nọ: “Kareghẹhọ omẹ re whọ kẹ omẹ ogaga,” wọhọ epanọ Samsin ọ lẹ na.—Ibr. 16:28. w23.09 7 ¶18-19

Edivẹ-Oka, Ẹdẹ avọ 22 Ane

Wha . . . hẹrẹ . . . ẹdẹ Jihova je . . . woi họ iroro ẹsikpobi.—2 Pita 3:12.

Ẹdẹ Jihova nọ ma be hai roro kpahe na o be lẹliẹ omai ta usi uwoma kẹ ahwo kẹse kẹse. Rekọ ẹsejọ nọ ma tẹ rrọ oria jọ, ozọ nọ ma rẹ rọ ta usi uwoma u re mu omai. Binikọ ere he? U wo oke jọ nọ ozọ ahwo u je mu Pita re. Evaọ aso nọ a rọ rehọ Jesu guẹdhọ na, Pita ọ sae ta kẹ ahwo inọ olele Jesu ọ rrọ họ. Ọ tubẹ vro Jesu isiasa soso. (Mat. 26:69-75) Rekọ uwhremu na, udu o jariẹ awọ. O kere nọ: “Wha dhozọ oware nọ a be dhozọ riẹ hẹ, wha ruawa gbe he.” (1 Pita 3:14) Oriruo riẹ o dhesẹ nọ otẹrọnọ ma jẹ dhozọ ahwo vẹre, ma rẹ sae siọ ozọ yena ba. Kọ eme o ti fiobọhọ kẹ omai siọ ozọ ahwo ba ẹdhẹ? Pita ọ ta nọ: “Wha jọ udu rai rọwo inọ Kristi họ Olori, ọ tẹ jẹ rrọ ọrẹri.” (1 Pita 3:15) Ẹme yena o dhesẹ nọ ma rẹ hai roro kpahe ogaga nọ Jesu o wo gbe ọkwa riẹ. w23.09 27-28 ¶6-8

Edesa-Oka, Ẹdẹ avọ 23 Ane

Jọ a tubẹ fodẹ ọfariẹ-ogbe gbe oghẹrẹ egbegbe ọvuọvo hayo uvou-uthei evaọ udevie rai hi.—Ẹf. 5:3.

Ma rẹ daoma gaga re ma gbe ru “iruo ifofe nọ e rrọ iruo ebi” hi. (Ẹf. 5:11) Ohwo ọ tẹ be hai rri eware nọ i wobọ kugbe ọfariẹ-ogbe hayo eware etọtọ efa, be gaviezọ kẹ eware itieye na, hayo ta eme itieye na, o rẹ vẹrẹ wo umuo ho re ohwo otiọye na ọ raha uzi Ọghẹnẹ. O via ere kẹ ahwo buobu no. (Emu. 3:6; Jem. 1:14, 15) Ahwo nọ a be gọ Ọghẹnẹ hẹ a bi ru re ma roro nọ ọfariẹ-ogbe gbe eware etọtọ efa nọ Jihova ọ be vuẹ omai nọ ma kẹnoma kẹ na, oware ovo o jarae thọ họ. (2 Pita 2:19) Ẹta jọ nọ Ẹdhọ o bi ro kru ahwo gaga họ, o re ru re ahwo a reghe no, re a gbẹ riẹ ohẹriẹ nọ o rrọ oware uwoma gbe oware uyoma ha. (Aiz. 5:20; 2 Kọr. 4:4) Oyejabọ nọ a be rọ jọ ifimu gbe itanẹte dhesẹ eware nọ e rẹ dha Jihova eva wọhọ ẹsenọ e rrọ emamọ eware. Setan ọ be gwọlọ viẹ omai họ re ma roro nọ eware etọtọ nọ Jihova o mukpahe na, uye u re no ai ze he.—Ẹf. 5:6. w24.03 22 ¶8-10

Edene-Oka, Ẹdẹ avọ 24 Ane

Ezae nana i bi ru iruo ọrẹri, onọ o rrọ oriruo gbe uwoho eware obọ odhiwu.—Hib. 8:5.

A ru uwou-udhu na evaọ oghẹrẹ nọ a sae rọ ghae no jẹ whẹe họ nọ ahwo Izrẹl a te bi no oria jọ kpohọ oria ofa. Enwenọ ikpe egba isoi (500) soso ahwo Izrẹl a jẹ jariẹ gọ Ọghẹnẹ taure a tẹ te bọ etẹmpol fihọ Jerusalẹm uwhremu na. (Ọny. 25:8, 9; Ik. 9:22) A jẹ hai se uwou-udhu na “uwou-udhu omakugbe.” Obei ahwo Izrẹl a jẹ hae nyae jọ gọ Ọghẹnẹ je dhe idhe kẹe. (Ọny. 29:43-46) Rekọ uwou-udhu yena u dikihẹ kẹ oria ofa jọ nọ o mai woma. Uwou-udhu nọ ahwo Izrẹl a jẹ jọ gọ Ọghẹnẹ na yọ “uwoho eware obọ odhiwu.” Yọ o dikihẹ kẹ etẹmpol ologbo Jihova. Pọl ukọ na ọ ta nọ “uwou-udhu nana o rrọ oware oriruo kẹ oke nana.” (Hib. 9:9) Koyehọ okenọ Pọl o ro kere ẹme yena, yọ etẹmpol ologbo Jihova na ọ riẹ no nọ Ileleikristi a be jọ gọ Ọghẹnẹ. Anwọ ukpe 29 C.E. etẹmpol na ọ rọ riẹ. Ukpe yena Jesu ọ rọ họ-ame. Jesu o te zihe ruọ “ozerẹ okpehru ologbo” nọ o bi ru iruo evaọ etẹmpol ologbo Jihova na.—Hib. 4:14; Iruẹru 10:37, 38. w23.10 25-26 ¶6-7

Edisoi-Oka, Ẹdẹ avọ 25 Ane

Wha ru re ahwo kpobi a ruẹ nọ wha wo iroro.—Fil. 4:5.

Re ma sae gbẹ gọ Jihova, ma re nwene oghẹrẹ nọ ma bi ru eware. Ma te ru ere, koyehọ ma wọhọ ure nọ o be jẹlẹ rri ofẹ nọ ofou o bi fou rri. Yọ, oniọvo jọ o gbe rri oware jọ oghẹrẹ nọ who rri rie he, hayo o ru oware jọ oghẹrẹ nọ who re ru ei hi, jọ o kẹ owhẹ uye he. Mai idibo Jihova ma gwọlọ jọ ahwo nọ a re si eware kekeke he. Ma gwọlọ jọ ahwo nọ i wo omaurokpotọ gbe ohrọ-oriọ re. Ebaibol ọ ta nọ Jihova họ “Utho na” keme ohwo ọvo ọ sai si ei no ọkwa riẹ hẹ, yọ oware ovo o rẹ whaha iẹe oware nọ ọ gwọlọ ru hu. (Izie. 32:4) O make rrọ ere na, o re si eware kekeke he. Jihova ọ jiroro oware nọ ọ gwọlọ ru no anwẹdẹ. Rekọ fikinọ ahwo-akpọ a yoẹme he, eware e gbẹ nya epanọ ọ gwọlọ họ. Ghele na ọ be rehọ oghẹrẹ ofa ru oware nọ ọ jiroro riẹ na. Jihova ọ ma omai evaọ uwoho riẹ. Oyena u dhesẹ nọ ma te wo ẹbẹbẹ, ma sai nwene oghẹrẹ nọ ma je ru eware. Ẹbẹbẹ kpobi nọ ma wo kẹhẹ, ehrẹ nọ Jihova ọ kẹ omai evaọ Ebaibol na e sai fiobọhọ kẹ omai jẹ emamọ iroro. Eware nọ Jihova o ru no gbe ehrẹ nọ ọ kẹ omai i dhesẹ nọ o re si eware kekeke he, dede nọ a se rie “Utho na.” w23.07 20 ¶1-3

Ẹdẹ-Ọmaha, Ẹdẹ avọ 26 Ane

Okenọ awaọruọ ọ da omẹ oma fia, whọ sasa omẹ oma je ru udu te omẹ otọ.—Ol. 94:19.

Jihova ọ jọ Ebaibol ta nọ ọ wọhọ oni nọ o you emọ riẹ gaga. (Aiz. 66:12, 13) Oni nọ ọmọ ọ rrọ obọ, ọ rẹ rọ ọmọ riẹ zaro ho, ọ rẹ nabe rẹrotei. Yọ ọmọ na ọ tẹ gwọlọ oware jọ, oni na o re ru ei kẹe re eva e sae were iẹe. Ere ọvona re, nọ oware jọ o tẹ be kẹ omai uye, ma rẹ riẹ nọ Jihova o ti fiobọhọ kẹ omai keme o you omai. Ma tẹ maki ru ei thọ, ọ rẹ nwani gbolo omai kufiẹ hẹ. (Ol. 103:8) Ahwo Izrẹl a jẹ hai ru oware nọ o rẹ dha Jihova eva unuẹse buobu. Avọ ere ghele na, nọ a kurẹriẹ, Jihova o dhesẹ nọ o wo uyoyou nọ o rẹ hiẹ hẹ kẹ ae. Ọ ta kẹ ae nọ: “Whọ rrọ ghaghae evaọ ẹro mẹ, mẹ kẹ owhẹ ọghọ, me te je you owhẹ.” (Aiz. 43:4, 5) Epọvo na Jihova ọ gbẹ rrọ rite inẹnẹ na. Ma tẹ make raha uzi ulogbo jọ, ma te gine kurẹriẹ je bi ru oware nọ o rẹ were iẹe, o re se omai gboma. Ọ ta nọ, “ọ te rọvrẹ evaọ edhere ologbo.” (Aiz. 55:7) Ebaibol ọ ta nọ Jihova ọ tẹ rọvrẹ owhẹ no, who re wo “ezi omosasọ” nọ o “no obọ Jihova omariẹ ze.”—Iruẹru 3:19. w24.01 27 ¶4-5

Ẹdoka, Ẹdẹ avọ 27 Ane

Obọ Jihova Ọghẹnẹ mẹ o jọ ehru mẹ.—Ẹzra 7:28.

Jihova ọ sai fiobọhọ kẹ omai re nọ ma te wo ẹbẹbẹ. Ma rehọ iẹe nọ whọ gwọlọ mi ọga iruo ra uvẹ re whọ sai kpohọ okokohọ. Hayo whọ gwọlọ vuẹe nọ whọ te hae nyaze iruo ho evaọ edẹ jọ, inọ whọ rẹ rehọ edẹ yena kpohọ ewuhrẹ. Whọ tẹ gbaudu nyae ta ẹme otiọye na kẹ ọga iruo ra, u re ru nọ whọ rẹ rọ ruẹ oghẹrẹ nọ Jihova o ti ro dhomahọ ẹme na. Ẹsejọ oghẹrẹ nọ Jihova o ti ro ru eware lọhọ kẹ owhẹ u ve je gbe owhẹ unu. Who ve ti fievahọ iẹe viere. Ẹzra ọ romakpotọ lẹ se Jihova re o fiobọhọ kẹe. Ẹzra ọ jẹ hae lẹ se Jihova nọ ọ tẹ ruẹ nọ o te lọhọ tere he re ọ sai ru eware jọ nọ e rrọ otọ kẹe. O gine wo omaurokpotọ. (Ẹzra 8:21-23; 9:3-5) Emamọ oware nana nọ Ẹzra ọ jẹ hai ru na o lẹliẹ amọfa fiobọhọ kẹe jẹ rọ aro kele iei. (Ẹzra 10:1-4) Nọ ma tẹ be ruawa epanọ ma te sae rọ kuọ omamai hayo nọ ma tẹ be ruawa kpahe uviuwou mai fiki ozighi nọ ọ rrọ otọ, joma lẹ se Jihova je fievahọ iẹe. w23.11 18 ¶15-17

Ẹdọvo-Oka, Ẹdẹ avọ 28 Ane

[Abraham o] fi ẹrọwọ họ Jihova, O te kele oyena kẹe wọhọ ẹrẹreokie.—Emu. 15:6.

Orọnikọ nwanọ eware nọ Abraham o ru nọ Jihova o ro rri rie nọ o kiẹrẹe na, eye Jihova ọ ta nọ ma ru hu. Eware efa buobu e riẹ nọ ma re ru nọ u re dhesẹ nọ ma wo ẹrọwọ. Ma re dede ahwo nọ a be nyaze ukoko na obọ rehọ. Uye u te te oniọvo jọ oma, ma re fiobọhọ kẹe. Ma rẹ jẹ rẹrote uviuwou mai je fiobọhọ kẹ imoni mai. Eva mai e rẹ were Ọghẹnẹ nọ ma te bi ru eware yena, yọ ọ te ghale omai. (Rom 15:7; 1 Tim. 5:4, 8; 1 Jọn 3:18) Oware ofa jọ o riẹ nọ o roja gaga nọ ma re ru, nọ u re dhesẹ nọ ma wo ẹrọwọ. Oye họ, usi uwoma nọ ma rẹ rọ ajọwha ta. (1 Tim. 4:16) Ma re je ru eware nọ i dhesẹ nọ ma rọwo nọ Ọghẹnẹ o ti ru eyaa riẹ kpobi gba, ma tẹ jẹ rọwo nọ izi riẹ nọ ma re koko oye o mai woma. Ma te ru ere, Jihova o ti rri omai nọ ma kiẹrẹe, yọ o ti se omai egbẹnyusu riẹ. w23.12 2 ¶3; 6 ¶15

Edivẹ-Oka, Ẹdẹ avọ 29 Ane

Kru oma ga re who dhesẹ nọ whẹ yọ ọzae.—1 Iv. 2:2.

Nọ Devidi ovie na ọ kẹle uwhu no, ẹsiẹe ọ rọ vuẹ Solomọn ọmọ riẹ ẹme nọ ọ rrọ oria ikere inẹnẹ na. (1 Iv. 2:1, 3) U fo nọ inievo-emezae kpobi nọ e rrọ ukoko na a rẹ daoma dhesẹ nọ a te ezae. Re a sai te ezae nọ a rẹ rọ suẹro evaọ ukoko na, a re koko izi Ọghẹnẹ, jẹ daoma ru oware nọ Ebaibol ọ ta ẹsikpobi. (Luk 2:52) Fikieme u ro woma gaga re ọmọzae kpobi evaọ ukoko na ọ daoma te ọzae nọ o dikihẹ gidigba evaọ ukoko na? Ọzae kpobi nọ ọ rrọ Oleleikristi o wo iruo nọ o re ru evaọ uwou riẹ gbe ukoko na. Whai emezae nọ e rrọ ukoko na, ma riẹ nọ u wo eware jọ nọ wha gwọlọ nọ wha ti ru ẹdẹfa. Ẹsejọhọ wha gwọlọ jọ iruo odibọgba oke-kpobi na, jẹ jọ odibo oruiruo. Nọ u je te oria jọ no, wha vẹ jọ ọkpako ukoko. Yọ ẹsejọhọ who bi roro nọ who ti wo aye je yẹ emọ ẹdẹjọ. (Ẹf. 6:4; 1 Tim. 3:1) Re whọ sai ru eware nana, u fo nọ whọ rẹ jọ emamọ oniọvo nọ a rẹ rọ suẹro. w23.12 24 ¶1-2

Edesa-Oka, Ẹdẹ avọ 30 Ane

Oke u ti te he otẹrọnọ mẹ rẹ ta kpahe Gidiọn.—Hib. 11:32.

Jihova ọ rehọ ekpako ukoko mu nẹnẹ re a rẹrote ahwo riẹ nọ o you gaga na. Ekpako na a rehọ iruo nana zaro vievie he. A be daoma gaga re a jọ emamọ “ithuru-igodẹ” nọ e rẹ “ginẹ rẹrote” igodẹ Ọghẹnẹ. (Jeri. 23:4; 1 Pita 5:2) Ma yere Jihova nọ ọ rọ rehọ ezae itiena mu evaọ ukoko kpobi. Ekpako ukoko a sai wuhrẹ eware jọ mi Gidiọn. (Hib. 6:12; 11:32) Ọghẹnẹ ọ rehọ Gidiọn mu re o fiobọhọ kẹ ahwo riẹ jẹ thọ ae no obọ ewegrẹ rai. (Ibr. 2:16; 1 Irv. 17:6) Epọvo na nẹnẹ re, evaọ edẹ urere nana nọ eware i bi jo dhe eyeyoma na, Ọghẹnẹ ọ rehọ ekpako mu re a rẹrote ahwo riẹ. (Iruẹru 20:28; 2 Tim. 3:1) Gidiọn ọ riẹ utho ẹgba riẹ, o wo omaurokpotọ, yọ o yoẹme. O te je thihakọ ru iruo na te urere. Joma rọ aro kele iei. Te ma rrọ ekpako te ma rrọ họ, u fo nọ iruo nọ ekpako a bi ru e rẹ da omai ẹro. Ma vẹ jẹ hai yoẹme kẹ ae.—Hib. 13:17. w23.06 2 ¶1; 3 ¶3

    Ebe Isoko Kpobi (1992-2025)
    Noi No
    Rueva
    • Isoko
    • Vi Ei Se Omọfa
    • Ru Ei Fihọ Oghẹrẹ nọ O Were Owhẹ
    • Copyright © 2025 Watch Tower Bible and Tract Society of Pennsylvania
    • Izi Kpahe Eroruiruo Evuẹ Na
    • Izi Oria Evuẹ Omobọ Ra
    • Esẹtini Oria Evuẹ Omobọ Ra
    • JW.ORG
    • Rueva
    Vi Ei Se Omọfa