Fikieme A Je Bi Ruei?

K’UKPE k’ukpe idu Isẹri Jihova nya akpọ na soso wariẹ a re kokohọ eva ikokohọ. Evaọ obei, a rẹ reawere usu inievo je yo ehrẹ Ebaibol obọdẹ. Ejọ i re ru omodawọ ulogbo re a ruẹse kpohọ ikokohọ enana. Wọhọ oriruo, ukpe n’ukpo, evaọ Malawi ọzae avọ aye jọ nọ e rọ udevie ikpe 60 rai, avọ ọmọzae rai gbe aye riẹ avọ ọmọ, a rọ ẹdhighere dhẹ ikilomita 80 re a kpohọ okokohọ. A no iwhre rai eva ighọjọ ezeza evaọ ohiohiẹ a tẹ rọ euwa 15 dhẹ te oria okokohọ na.

Evaọ Mozambique, utu jọ a dhẹ ẹdhighere edẹ esa re a te oria okokohọ. Aso jọ, nọ a daji oria nọ a te wezẹ, a te yo edo ikpohrokpo nọ e rọ ekẹloma d’enu. Dede nọ a je gbolo ire kpohọ ofẹ nọ erao na e rọ na, ikpohrokpo na e jọ etẹe okioke. Osẹri ọfa nọ o je kpohọ okokohọ ọvo na o te zere okpohrokpo aro dh’aro evaọ edhere na. O te dikihẹ oria ọvo kpoko bẹsenọ okpohrokpo na ọ rọ nyavrẹ. Eva okokohọ na Isẹri enana avọ evawere a gbiku epanọ a ro ‘siwi ai no unu okpohrokpo.’—2 Timoti 4:17.

Isẹri Jihova buobu a bi ru omodawọ ulogbo re a kpohọ ikokohọ hayo tubọ iwuhrẹ ẹkpoka ukoko na kẹ egagọ. Fikieme? Uzoẹme avene gbe ọrọ avisoi obaro na i ti fiobọhọ k’owhẹ wo otoriẹ oware nọ omakokohọ o jẹ r’oja tere.