Ọghẹnẹ Ọgọ Avọ Uzẹme
Re Ọghẹnẹ ọ jẹ egagọ rehọ, u re wo ehri no uzẹme ze. (Jọn 4:23) Ebaibol o vuhu egegagọ uzẹme mu wọhọ nnọ a rọ kẹ ‘ukoko Ọghẹnẹ uzuazọ na, odẹẹ gbe ugbẹhẹ uzẹme na.’ (1 Timoti 3:15) Ahwo nọ a ru ukoko Ọghẹnẹ via orọnikọ a rẹ rọwo uzẹme Ẹme Ọghẹnẹ ọvo ho rekọ a rẹ rria lele iei jẹ họre kẹe, dhesẹ iẹe via nya otọakpọ soso wariẹ.—Matiu 24:14; Ahwo Rom 10:9-15.
A RIẸ Isẹri Jihova ziezi kpahe iruo ewuhrẹ Ebaibol rai, onọ a bi ru enẹna evaọ ekwotọ nọ i bu vi 200. A bi se Ebaibol na je wuhrẹ iẹe wọhọ uzẹme na, ababọ ereghẹ-ididi ohwo-akpọ nọ a be rọ gwae. Kọ whọ riẹ kpahe iwuhrẹ Ebaibol rai? Ahwo buobu a be gaviezọ kẹ Isẹri Jihova ha fiki eme iyoma nọ a be ta kpahe ae. Rekọ ma zizie ahwo udu oruọzewọ re a jiroro kẹ oma rai sọ oware nọ Isẹri na a bi wuhrẹ na uzẹme hayo ọrue. A rẹ rehọ atanọ jiroro ilogbo itieye he. Ahwo nọ a kiẹ iwuhrẹ Isẹri Jihova riwi k’omobọ rai no a wo erere buobu no.
Eriariẹ Uzẹme na I re Le Ozodhẹ No
Wọhọ oriruo, roro kpahe epanọ o via kẹ Eugenia. A yọrọ e riẹ evaọ uviuwou nọ o wọ Kathọlik h’uzou. Ọsẹ riẹ ọ jọ omọvo ahwo nọ a ruẹrẹ eware họ kẹ iweze ipopu ziọ Mexico evaọ 1979. Nọ o bi weze bru egbẹnyusu riẹ, Eugenia ọ tẹ nyaku Isẹri Jihova. Avọ obufihọ rai o te muọ eware nọ Ebaibol ọ ta họ ẹkiẹriwi ziezi. Ọ kareghẹhọ nọ: “Eva oke ọsosuọ, ozọ u je mu omẹ. Mẹ ruẹ uzẹme na no! Rekọ onana u te dhesẹ nọ erọwọ mẹ buobu vẹre e thọ. Uviuwou mẹ, egbẹnyusu mẹ, ahwo nọ me you—aikpobi a thọ. Udu u je bru omẹ. Mẹ jẹ nọ oma mẹ epanọ uviuwou mẹ o te rehọ oware okpokpọ nọ me duku no na. Nọ oke o be nyaharo na avọ obufihọ Jihova, ozodhẹ onana u te mu otọ họ ekpohọ. Ẹdẹjọ mẹ tẹ jiroro nọ mẹ rẹ lẹlẹ t’ẹme na kẹ ogbẹnyusu uviuwou mai jọ, profẹsọ ọrọ iwuhrẹ-egagọ. Mẹ ta kẹe kpahe isiuru mẹ re me duku uzẹme na. Kẹsena o te muẹrohọ nọ, ‘Whọ tẹ gwọlọ riẹ uzẹme na, gwọlọ Isẹri Jihova.’ ”
Wọhọ ozọ nọ u je mu Eugenia na, uviuwou riẹ a te lei no uwou. Rekọ Isẹri na a tẹ gbẹ be kẹe obufihọ abọ-ẹzi. Ọ ta nọ: “A k’omẹ ẹgba re me dikihẹ gaga kẹ uzẹme na. Me vuhumu nnọ yọ oware nọ u te ẹhọre kẹ. Odederehọ nọ Isẹri Jihova a k’omẹ u w’uzou gaga. Mẹ ruẹ nọ a jọ ukoko Ileleikristi na you omẹ. Esikẹle ukoko Ọghẹnẹ u fiobọhọ k’omẹ fi ozodhẹ ẹsiọ uviuwou mẹ kparobọ.”
Roro kpahe oriruo ọfa. Sabrina ọ whẹro avọ Ebaibol nọ a jẹ hae jọ uviuwou riẹ wuhrẹ ẹsikpobi. Evaọ uzẹme, a wo oware nọ o wọhọ ‘egagọ uviuwou.’ O ru rie fihọ uruemu re o kpohọ egagọ sa-sa re ọ fere iruthọ rai via. Okenọ omọvo Isẹri Jihova ọ fodẹ uwuhrẹ Ebaibol kẹe, ọ tẹ rọwo vẹrẹ vẹrẹ avọ iroro nọ ọ te ruẹ ẹthọthọ erọwọ rai. Ọ kareghẹhọ nnọ: “Nọ me wuhrẹ vrẹ ukpe ovo no, ozọ u te je mu omẹ nọ me ti ku ‘uzẹme mẹ’ fiẹ. O jọ lọlọhọ k’omẹ re mẹ fere eviẹhọ egagọ buobu nọ me kpohọ no via, rekọ onana o lọhọ vievie he kugbe Isẹri Jihova.”
Ozodhẹ Sabrina u te ru ei siọ uwuhrẹ Ebaibol na ba kugbe Isẹri Jihova. Rekọ ọ tẹ ruẹ nọ oware jọ o kare riẹ evaọ abọ-ẹzi. Ọ tẹ wariẹ mu uwuhrẹ riẹ họ, o te ti dede uzẹme okpokpọ onana rehọ. Sabrina ọ tẹ nyaharo te epanọ ọ rọ gwọlọ ta eware nọ o bi wuhrẹ na kẹ amọfa. Ọ tubẹ yare dede re o lele Isẹri na kpohọ odibọgba n’uwou ruọ uwou rai. Sabrina ọ ta nọ: “Taure a tẹ te rọwo k’omẹ re me lele Isẹri Jihova ta usiuwoma, a nọ omẹ nọ: ‘Kọ whọ ghinẹ gwọlọ jọ omọvo Isẹri Jihova?’ Me te yo nọ: ‘Ijo!’ Ozọ o tẹ wariẹ ruọ omẹ ẹro.” Ukuhọ riẹ, nọ me muọ iwuhrẹ na kpobi họ ẹnya no je muẹrohọ ahwo Ọghẹnẹ gbe oghẹrẹ nọ a bi fi izi Ebaibol họ iruo no, Sabrina ọ tẹ te riẹ nọ ghinọ uzẹme na ona. Ọ tẹ họ-ame, enẹna ọ rọ ọkobaro.
Fikieme O jẹ Hẹrioma Tere?
Ohwo ọ rẹ sae nọ inọ, ‘Fikieme iwuhrẹ Isẹri Jihova e jẹ hẹrioma tere no erọ egagọ efa?’ Ọkiẹriwi ọkpẹkpẹe kpahe eware nọ Isẹri na a rọwo o ti fiobọhọ k’owhẹ ruẹ nọ Ileleikristi oruọzewọ a rọ, emọ-uwuhrẹ osegboja Ebaibol na. Ma gwọlọ nọ who rovie Ebaibol obọ ra kpohọ ikere enana evaọ ẹkiẹriwi ugogo erọwọ rai nọ e rọ obehru na.
Who te muẹrohọ oware nọ Isẹri Jihova a rọwo ziezi gbe epanọ a bi ro koko oware nọ Ebaibol na o wuhrẹ, whọ rẹ sai wo oghale ufuoma nọ uzẹme na o rẹ kẹ. (Jọn 17:17) U du fo nọ whọ dhozọ uzẹme na ha. Kareghẹhọ eyaa Jesu: “Wha rẹ te riẹ uzẹme na, uzẹme na u re ti ru owhai emuyẹ.”—Jọn 8:32.
[Box on page 6]
IGOGO ERỌWỌ ISẸRI JIHOVA JỌ
◯ Jihova họ Ọghẹnẹ erumeru na. Odẹ oma riẹ o roma via bu vi asia 7,000 evaọ ikulu-ebe ọsosuọ erọ Ebaibol na.—Olezi 83:18.
◯ Jesu Kristi yọ Ọmọ Ọghẹnẹ, ọnọ ọ ziọ otọakpọ re ọ rehọ uzuazọ riẹ kẹ fiki ahwo-akpọ. (Jọn 3:16, 17) Isẹri Jihova a bi lele iwuhrẹ Jesu Kristi nọ e rọ Usiuwoma na.
◯ Odẹ Isẹri Jihova u no Aizaya 43:10 ze, onọ o ta nọ: “ ‘Whai họ isẹri mẹ,’ ere ỌNOWO na ọ tae.”
◯ Uvie nọ ahwo a be lẹ kẹ evaọ olẹ “Ọsẹ Mai nọ Ọ rọ Obọ Odhiwu” na yọ egọmeti odhiwu nọ u ti si uye-oruẹ gbe edada no akpọ na jẹ rehọ Aparadase nọ Ebaibol na ọ yaa na ze.—Aizaya 9:6, 7; Daniẹl 2:44; Matiu 6:9, 10; Eviavia 21:3, 4.
◯ Ohwo kpobi nọ o bi ru oreva Ọghẹnẹ o wo uvẹ nọ ọ rẹ rọ reawere eghale Uvie bẹdẹ bẹdẹ.—Jọn 17:3; 1 Jọn 2:17.
◯ Ileleikristi a rẹ ma uruemu rai ẹkwoma oware nọ Ebaibol na ọ ta. A rẹ jọ oruọzewọ, rria uzuazọ ofuafo, okpakpatiẹ, je dhesẹ uyoyou kẹ erivẹ rai.—Matiu 22:39; Jọn 13:35; 1 Ahwo Kọrint 6:9, 10.
[Picture on page 5]
Isẹri Jihova a bi dhesẹ uzẹme Ebaibol na via kẹ ahwo evaọ ekwotọ nọ i bu vi 200