J’Owọ Lele Ukoko Jihova
“[Jọ Ọghẹnẹ udhedhẹ na] . . . ọ kua eware ezi kpobi vọ eva rai, re wha ruẹse ru o rọ eva riẹ.”—AHWO HIBRU 13:20, 21.
1. Bro ahwo a rọ akpọ na, kọ bro a kele wọhọ ahwo utu egagọ jọ?
EVAỌ ukpe 1999, unu ahwo akpọ na u te ima-odu ezeza! Obe na The World Almanac u dhesẹ nọ evaọ unu onana oware wọhọ 1,165,000,000 e rrọ egagọ Muslim; 1,030,000,000 e rrọ Roman Kathọlik; 762,000,000 e rrọ egagọ Hindu; 354,000,000 e rrọ egagọ Buddha; 316,000,000 e rrọ Protẹstant; yọ ahwo 214,000,000 e rrọ Ọtọdọks.
2. Eme a rẹ sae ta kpahe uyero egagọ nọ o r’otọ nẹnẹ?
2 Ma te roro kpahe ẹhẹriẹ gbe ozighi nọ e rọ egagọ nẹnẹ, kọ ima enana kpobi a be j’owọ lele oreva Ọghẹnẹ? Ijo, “keme Ọghẹnẹ ọ rọ Ọghẹnẹ ukpokpoma ha rekọ ọrọ udhedhẹ.” (1 Ahwo Kọrint 14:33) Evaọ abọdekọ riẹ, kọ ẹvẹ kpahe eyero-inievo akpọ-soso ọrọ idibo Jihova? (1 Pita 2:17) Omarototọ kiẹ u dhesẹ nọ ‘Ọghẹnẹ udhedhẹ na ọ be kua eware ezi kpobi vọ eva rai nọ a re ro ru oreva riẹ.’—Ahwo Hibru 13:20, 21.
3. Eme ọ jọ Jerusalẹm via evaọ Pẹntikọst 33 C.E., kọ fikieme?
3 Dede na, orọnikọ fiki ubu ahwo nọ a kuomagbe Isẹri Jihova a rẹ rọ reawere aruoriwo Ọghẹnẹ hẹ; yọ orọnikọ ubu ahwo họ oware nọ o rẹ were Ọghẹnẹ hẹ. Orọnikọ fiki epanọ emọ Izrẹl a “bu vi” ahwo edekọ ọ rọ salọ ae he. Evaọ uzẹme, ae “a mae kawo vi” ahwo ọdekọ na. (Iziewariẹ 7:7) Rekọ fikinọ Izrẹl ọ kare ẹrọwọ, evaọ Pẹntikọst 33 C.E., Jihova o te kpeze aruoriwo riẹ se ukoko okpokpọ nọ ilele Jesu Kristi i ru via. A rehọ ẹzi ọfuafo Jihova wholo ai a tẹ jẹ rehọ ọwhọ whowho uzẹme na kpahe Ọghẹnẹ gbe Kristi kẹ amọfa.—Iruẹru 2:41, 42.
Ẹnya Kpohọ Obaro Ẹsikpobi
4. Fikieme whọ jẹ sae ta nọ ukoko Ileleikristi ọsosuọ na o jẹ nyaharo ẹsikpobi?
4 Evaọ ikpe-udhusoi ọsosuọ na, ukoko Ileleikristi na o jẹ nyaharo ẹsikpobi, bi rovie ekwotọ ekpokpọ via, bi ru ilele, je bi wo otoriẹ ẹjiroro Ọghẹnẹ viere. Ileleikristi ọsosuọ na a jẹ j’owọ lele oruvẹ abọ-ẹzi nọ a jẹ kẹ ae ẹkwoma ileta nọ Ọghẹnẹ ọ kẹ ẹgba. Ẹkwoma ọwhọ nọ a je wo no iweze ikọ na gbe amọfa ze, a ru odibọgba rai gbunu. A kere onana fihotọ vevẹ evaọ Ikereakere Griki Ileleikristi na.—Iruẹru 10:21, 22; 13:46, 47; 2 Timoti 1:13; 4:5; Ahwo Hibru 6:1-3; 2 Pita 3:17, 18.
5. Fikieme ukoko Ọghẹnẹ o jẹ be nyaharo nẹnẹ, kọ fikieme ma jẹ j’owọ lele iei?
5 Wọhọ Ileleikristi ọsosuọ na, Isẹri Jihova inẹnẹ a wo ẹvi no. (Zekaraya 4:8-10) No abọ urere ikpe-udhusoi avọ 19 na ze, imuẹro ivevẹ e riẹ no inọ ẹzi Ọghẹnẹ ọ rọ ukoko riẹ. Fikinọ ma rẹroso, orọnikọ ogaga ohwo-akpọ họ, rekọ ọkpọvio ẹzi ọfuafo na, ma gbẹ be nyaharo evaọ otoriẹ mai orọ Ikereakere na gbe evaọ eruo oreva Ọghẹnẹ. (Zekaraya 4:6) Enẹna nọ ma rọ “edẹ urere” na, o r’oja re ma j’owọ lele ukoko Jihova nọ o be nyaharo na. (2 Timoti 3:1-5) Ere oruo o rẹ lẹliẹ omai ru ẹruore mai kpokpọ je se isẹri kpahe Uvie Ọghẹnẹ nọ a ro mu no taure urere na o tẹ te vẹruọ uyerakpọ ọnana.—Matiu 24:3-14.
6, 7. Eria esa vẹ ma ti roro kpahe nọ ukoko Jihova o jọ nyaharo no?
6 Ma jọ udevie mai wo ahwo nọ a muọ usu họ ẹnya kugbe ukoko Jihova evaọ etoke ikpe 1920, 1930, gbe 1940. Evaọ ikpe emuhọ eyena, ono evaọ usu mai ọ hai roro nọ ma ti wo orro gbe ẹnyaharo ọnana evaọ ukoko na rite inẹnẹ na? Roro kpahe ikpeware nọ ma wo tobọ no evaọ ikuigbe edẹ mai nana! Evaọ uzẹme, o rẹ ghinẹ kẹ erere abọ-ẹzi, re ma roro kpahe oware nọ Jihova o ru no ẹkwoma ahwo riẹ nọ o kokohọ na.
7 Akpọ o gbe Devidi anwae na unu nọ o roro kpahe iruo igbunu Jihova. Ọ ta nọ: ‘Mẹ rẹ gwọlọ dhesẹ ai, rekọ i bu vi ekele.’ (Olezi 40:5) Ma rẹriẹ ovao ku ọnyaba ọvo na re, ma rẹ sai kele iruo ilogbo Jihova buobu nọ i fo ejiro evaọ ẹdẹ mai na ha. Ghele na, joma roro kpahe eria esa nọ ukoko Jihova o jọ nyaharo no: (1) ẹnyaharo oruvẹ abọ-ẹzi, (2) odibọgba nọ a ru nyaharo je ru kẹre, gbe (3) inwene ẹruoke evaọ iruẹru ukoko na.
Uyere Fiki Oruvẹ Abọ-Ẹzi
8. Rọwo kugbe Itẹ 4:18, eme oruvẹ abọ-ẹzi o fiobọhọ k’omai vuhumu no kpahe Uvie na?
8 Rọ kpahe oruvẹ othotha abọ-ẹzi, Itẹ 4:18 o rugba no. O ta nọ: “Edhere enọ i kiẹrẹ ọ wọhọ elo irioke, nọ u re he lo gahọ ri te udevie uvo.” Ẹvẹ ma rẹ kẹ uyere te fiki oruvẹ othotha abọ-ẹzi nọ ma ruẹ no! Eva okokohọ Cedar Point, Ohio, evaọ 1919 na, a fiẹgbahọ Uvie Ọghẹnẹ. Jihova ọ te rehọ Uvie na ru odẹ riẹ fo jẹ kpare esuo riẹ kpehru. Evaọ uzẹme, oruvẹ abọ-ẹzi o fiobọhọ k’omai vuhumu nọ no obe Emuhọ rite obe Eviavia, Ebaibol na o se isẹri kpahe ẹjiroro Jihova re o ru odẹ riẹ fo ẹkwoma Uvie na nọ Ọmọ riẹ o bi su. Etẹe enọ i you ẹrẹreokie kpobi a fi ẹruore ologbo rai họ.—Matiu 12:18, 21.
9, 10. Evaọ etoke ikpe 1920, eme ma wuhrẹ kpahe Uvie na jẹ kpahe ikoko ivẹ nọ e wọso ohwohwo, kọ ẹvẹ onana u ro fiobọhọ no?
9 Eva okokohọ Cedar Point na evaọ 1922, oruẹme nọ ọ kobaro na, J. F. Rutherford, ọ tuduhọ ahwo Ọghẹnẹ awọ nnọ a “whowho, whowho, whowho, Ovie na gbe uvie riẹ.” Evaọ uzoẹme na “Eyẹ Orẹwho Na,” nọ a kporo fihọ Uwou-Eroro Na ọrọ March 1, 1925, a si iroro kpohọ orimuo abọ-ẹzi kpahe eruẹaruẹ nọ e riobọ kpohọ eromuo Uvie Ọghẹnẹ evaọ 1914. A te je vuhu iei mu evaọ etoke ikpe 1920 inọ ikoko ivẹ nọ e wọso ohwohwo e riẹ—orọ Jihova gbe orọ Setan. Ohọre na o gbẹ r’otọ evaọ udevie rai, yọ ma te jọ abọ nọ ọ te kparobọ otẹrọnọ ma j’owọ lele ukoko Jihova.
10 Ẹvẹ oruvẹ abọ-ẹzi otiọye na o ro fiobọhọ k’omai no? Nọ Uvie Ọghẹnẹ gbe Jesu Kristi Ovie na a rọ abọ akpọ na ha na, ma rẹ jọ abọ riẹ gbe he. Ẹkwoma omasino akpọ na, yọ ma bi dhesẹ nọ ma rọ abọ uzẹme na. (Jọn 17:16; 18:37) Nọ ma te muẹrohọ ebẹbẹ idhọvẹ nọ i bi tunyẹ eyero omuomu ọnana, ẹvẹ ma rẹ k’uyere te inọ ma rọ abọ ukoko Setan he! Yọ ẹvẹ o rọ aruoriwo k’omai te nọ ma ro wo omofọwẹ abọ-ẹzi evaọ ukoko Jihova!
11. Odẹ Ikereakere vẹ ahwo Ọghẹnẹ a rehọ evaọ 1931?
11 Eva okokohọ Columbus, Ohio, evaọ 1931, a dhesẹ Aizaya 43:10-12 vevẹ ziezi. Emọ-Uwuhrẹ Ebaibol na a rehọ odẹ oghẹrẹ-sa na Isẹri Jihova. Ẹvẹ uvẹ-ọghọ riẹ o rro te re ma dhesẹ odẹ Ọghẹnẹ kẹ amọfa re a ruẹsi sei re a sae zọ!—Olezi 83:18; Ahwo Rom 10:13.
12. Didi oruvẹ abọ-ẹzi kpahe ogbotu obuobu na a kẹ evaọ 1935?
12 Taure etoke ikpe 1930 i te ti te, ahwo Ọghẹnẹ buobu a wo avro kpahe ẹruore uzuazọ obaro rai. Ejọ i wo iroro uzuazọ obọ odhiwu rekọ iwuhrẹ Ebaibol kpahe otọakpọ aparadase na i je si ai urru. Eva okokohọ Washington D.C. na, evaọ 1935, o jọ oghọghọ igbunu re a wuhrẹ nọ otu obuobu na, ọrọ Eviavia uzou avọ 7 na yọ utu enọ i wo ẹruore otọakpọ. No okioye ze, ekokohọ otu obuobu na o rehọ ududu tunye haro gaga no. Kọ ma gbẹ kẹ uyere inọ evuhumu otu obuobu na o gbẹ rọ oware udidi k’omai hi? Uzẹme na inọ ahwo buobu a bi kokohọ no erẹwho, erua, gbe erọ-unu kpobi ze o rẹ wọ omai j’owọ vẹrẹ viere nọ ma be daoma nya mu ukoko Jihova na.
13. Avro ologbo vẹ a ruvẹ evaọ okokohọ St. Louis na eva 1941?
13 A fielo họ avro ologbo nọ o kpomahọ ukoko ohwo-akpọ evaọ okokohọ St. Louis, Missouri na, evaọ 1941. Oye họ esuo ehrugbakpọ. Onana họ avro nọ a ti kuhọ hrọ kẹle na, yọ ẹdẹ ologbo avọ idudu nọ a ti ro ku ei họ na ọ be tha kpata kpata! Ẹme ọfa nọ a rọ lahwe evaọ 1941 họ avro ẹgbakiete, onọ o k’omai uvẹ nọ ma re ro dhesẹ oria nọ mai omomọvo o dikihẹ kpahe ẹme esuo-okpehru Ọghẹnẹ na.
14. Evaọ okokohọ akpọ-soso eva 1950, eme ma wuhrẹ kpahe emọ-ivie nọ a fodẹ evaọ Olezi 45:16 na?
14 Evaọ okokohọ akpọ-soso 1950 evaọ New York City, a r’obọ kotọ dhesẹ emọ-ivie erọ Olezi 45:16 na ziezi. O jọ etoke urirẹ nọ Brọda Frederick Franz ọ ta kpahe uzoẹme nana je ru ei vẹ nnọ emọ-ivie nọ e te jọ akpọ ọkpokpọ na e rọ udevie mai. Eva okokohọ ọyena gbe enọ i lele i rie, ma wo elo abọ-ẹzi buobu no. (Olezi 97:11) Ẹvẹ ma vọ avọ uyere te nọ edhere mai “ọ wọhọ elo irioke, nọ u re he lo gahọ”!
Ẹnyaharo Evaọ Odibọgba Mai
15, 16. (a) Ẹvẹ ma rọ nyaharo evaọ odibọgba mai evaọ etoke ikpe 1920 gbe 1930? (b) Didi ebe i fi ajọwha họ odibọgba Oleleikristi na no evaọ ikpe jọ kẹle na?
15 Edhere avivẹ nọ ukoko Jihova o rọ nyaharo no u w’obọ kugbe ugogo iruo mai na—usiuwoma ota Uvie na gbe ilele i ruo. (Matiu 28:19, 20; Mak 13:10) Re ma sai ru iruo nana gba, ukoko na u dhesẹ k’omai no epanọ u wuzou te re ma ru odibọgba mai kẹre. Evaọ ukpe 1922 a tuduhọ Ileleikristi kpobi awọ re a w’obọ evaọ iruo usiuwoma ota na. Ohwo kpobi ọ rẹ rọ unevaze ru re elo riẹ o lo ọ vẹ rọ ere w’obọ evaọ isẹri-ise kẹ uzẹme na. (Matiu 5:14-16) Evaọ 1927 a j’owọ re a ru Ẹdoka fihọ ẹdẹ iruo usiuwoma ota. Muhọ evaọ February 1940, o gbẹ jọ oware aghẹruẹ hẹ re a ruẹ Isẹri evaọ iyẹrẹ evaọ eria ekiọthuọ nọ a bi fi Uwou-Eroro Na avọ Consolation (onọ a bi se Awake! enẹna) họ ada.
16 A kporo omobe na Model Study evaọ 1937, onọ u dhesẹ ẹgwọlọ nọ a re ro ru izihebro re a sae rọ uzẹme Ebaibol na wuhrẹ amọfa. Evaọ ikpe nọ i lele i rie, a te fiẹgbahọ uwuhrẹ Ebaibol gaga. A fi ajọwha họ abọ odibọgba ọnana ẹkwoma obe na “Let God Be True” evaọ 1946 gbe obe na Uzẹme nọ U re Suohwo Kpo Uzuazọ Ebẹdẹbẹdẹ evaọ 1968. Obe nọ ma bi ro ruiruo obọnana họ Eriariẹ Nọ I Re Su Kpohọ Uzuazọ Ebẹdẹ Bẹdẹ. Re a wuhrẹ ebe itieye na kugbe ahwo yọ uvi otọhotọ Ikereakere rọkẹ ilele i ruo.
Ẹnya Lele Inwene Evaọ Iruẹru Ukoko
17. Evaọ ẹnya lele Aizaya 60:17, ẹvẹ ukoko Jihova o rọ nyaharo no?
17 Edhere avesa nọ ukoko Jihova o jọ nyaharo no họ inwene evaọ iruẹru ukoko na. Wọhọ epanọ a kere eva Aizaya 60:17, Jihova ọ yaa nọ: “Mẹ rẹ te rehọ oro fihọ ẹta ekpọna kẹ owhai, mẹ vẹ jẹ te rehọ Siliva fihọ ẹta itehru [kẹ] owhai; jẹ rehọ ekpọna fihọ ẹta ire, gbe itehru fihọ ẹta itho; me re ti ru enọ e rrọ isu rai re a wo udhedhẹ, gbe ilori rai re a jọ ahwo okiẹrẹe.” Evaọ ẹnya lele eruẹaruẹ nana, a j’owọ no re a rẹro te iruo usiuwoma ota Uvie na gbe ẹruorote uthuru na ziezi.
18, 19. Didi inwene evaọ iruẹru ukoko e roma via no anwọ ikpe jọ ze?
18 Evaọ 1919 a rehọ osu-iruo mu evaọ ukoko kpobi nọ o yare oma-ukokohọ rọkẹ usiuwoma ota na. Onana u fi ọwhọ họ iruo usiuwoma ota mai. Eromuo ekpako gbe idibo iruiruo ẹkwoma ivotu u serihọ evaọ 1932, u te kpoka họ enwene mai ro no idhere esuo ahwo-akpọ. Oware ulogbo ofa o via evaọ 1938 evaọ okenọ a muọ idibo kpobi họ eromuo evaọ ukoko na nya lele ọruẹrẹfihotọ eromuo Ọghẹnẹ nọ o jọ evaọ ukoko Ileleikristi ọsosuọ na kpekpekpe. (Iruẹru 14:23; 1 Timoti 4:14) Evaọ 1972 a rehọ esẹro gbe idibo iruiruo mu re a ruiruo, wọhọ ezae nọ a romu evaọ udevie Ileleikristi ọsosuọ na. Viukpenọ ọzae ọvo ọ rẹ jọ ọsẹro evaọ ukoko, Ahwo Filipai 1:1 gbe ikereakere efa i dhesẹ nọ ahwo itieyena nọ a be nyate itee Ikereakere na rọkẹ esẹro a re ru ugboma ekpako via.—Iruẹru 20:28; Ahwo Ẹfẹsọs 4:11, 12.
19 Evaọ 1975 a rehọ ọruẹrẹfihotọ mu onọ egbẹgwae Ugboma Esuo orọ Isẹri Jihova o rẹ rọ rẹro te iruo akpọ-soso erọ ukoko Ọghẹnẹ. A rehọ Egbẹgwae Uwou-Ogha mu re a rẹro te iruo na evaọ ekwotọ sa-sa rai. No okioye ze, a rẹriẹ aro ku erulọhọ iruo na no evaọ oria nọ u w’uzou na gbe iwou-ogha ọ Watch Tower Society na re a ruẹse ‘rẹriẹ ovao ku eware nọ e mai wuzou.’ (Ahwo Filipai 1:9, 10) Ewha-iruo nọ e rọ uzou ithuru-igodẹ esese Kristi e kẹre te ẹjọ obaro evaọ iruo usiuwoma ota na, ewuhrẹ evaọ ukoko na, gbe emamọ ẹruorote uthuru Ọghẹnẹ.—1 Timoti 4:16; Ahwo Hibru 13:7, 17; 1 Pita 5:2, 3.
Isuẹsu Ajọwha Jesu
20. Ẹnya lele ukoko Jihova o gwọlọ nọ ma re vuhu eme mu kpahe ọkwa Jesu?
20 Ẹnya lele ukoko Jihova nọ o be nyaharo na o gwọlọ nọ ma re vuhu ọkwa nọ Ọghẹnẹ ọ kẹ Jesu Kristi wọhọ ‘uzou ukoko na’ mu. (Ahwo Ẹfẹsọs 5:22, 23) U fo nọ ma re muẹrohọ Aizaya 55:4 re, oria nọ a jọ ta k’omai nọ: “Ri, [mẹ Jihova] me ru rie osẹri rọ kẹ ahwo kpobi osu gbe oletu rọ kẹ ahwo kpobi.” Jesu ọ ghinẹ riẹ epanọ a re su. Ọ tẹ jẹ riẹ igodẹ riẹ gbe iruẹru rai. Evaọ uzẹme, okenọ ọ kiẹ ikoko ihrẹ nọ e jọ Esia Minor na riwi, isiasoi ọ t’ẹme na nọ: “Mẹ riẹ iruo ra.” (Eviavia 2:2, 19; 3:1, 8, 15) Jesu ọ riẹ ẹgwọlọ mai re, wọhọ epanọ Ọsẹ riẹ, Jihova, ọ riẹ. Taure ọ tẹ te kẹ Olẹ Oriruo na, Jesu ọ ta nọ: “Ọsẹ rai ọ riẹ eware nọ ikiọkọ kẹ owhai no re wha tẹ tẹ be yare ie.”—Matiu 6:8-13.
21. Ẹvẹ isuẹsu Jesu i bi ro dhesẹ omavia evaọ ukoko Ileleikristi na?
21 Ẹvẹ isuẹsu Jesu i bi ro dhesẹ oma via? Edhere jọ họ ẹkwoma esẹro Ileleikristi, ‘ekẹ ahwo’ na. (Ahwo Ẹfẹsọs 4:8) Eviavia 1:16 o dhesẹ esẹro nọ a wholo na wọhọ nnọ a rọ obọze Kristi, evaọ otọ ekpakpọ riẹ. Nẹnẹ na, Jesu ọ be kpọ ọruẹrẹfihotọ ọrọ eromuo ekpako na, makọ ẹruore obọ odhiwu hayo ọrọ otọakpọ ezae eyena a wo. Wọhọ epanọ a ru rie vẹ evaọ uzoẹme nọ o vrẹ na, ẹzi ọfuafo a be rọ rehọ ae mu rọwo kugbe itee Ikereakere na. (1 Timoti 3:1-7; Taitọs 1:5-9) Evaọ ikpe-udhusoi ọsosuọ na, ẹko ekpako jọ evaọ Jerusalẹm a ru ugboma esuo na via nọ o rẹ rẹrote ikoko na gbe iruẹru usiuwoma ota Uvie na kpobi. Oriruo ọvona a bi lele evaọ ukoko Jihova nẹnẹ re.
J’Owọ Lele Iei!
22. Didi obufihọ Ugboma Esuo na o rẹ kẹ?
22 A mu isiuru Uvie na evaọ otọakpọ họ obọ ‘ọrigbo nọ o wo ẹrọwọ avọ areghẹ na,’ ọnọ Ugboma Esuo ọ Isẹri Jihova o rọ ohwo ẹro riẹ na. (Matiu 24:45-47) Oware ọsosuọ nọ o rrọ ọdawẹ kẹ Ugboma Esuo na họ re ọ ruẹrẹ uthubro gbe ọkpọvio abọ-ẹzi họ rọkẹ ukoko Ileleikristi na. (Iruẹru 6:1-6) Ghele na, okenọ eware okpẹtu e tẹ via kẹ ibe egegagọ, Ugboma Esuo na o rẹ ta kẹ ogbẹgwae uzi ọvo jọ hayo ivẹ re a dhogbo nya re a wariẹ bọ hayo ruẹrẹ iwou gbe Egwa Uvie nọ e raha. Otẹrọnọ ukpokpoma u te Ileleikristi jọ oma, a rẹ j’owọ re a bọ ae ga evaọ abọ-ẹzi. Yọ ‘evaọ ezi ẹbẹbẹ,’ a re ru omodawọ kpobi re iruo usiuwoma ota na e nyaharo.—2 Timoti 4:1, 2.
23, 24. Makọ oware nọ o via kẹ ahwo riẹ kpobi, eme Jihova ọ rẹ kẹ ẹsikpobi, kọ eme ọ rẹ jọ ọtamuo mai?
23 Makọ oware kpobi nọ o rẹ via kẹ ahwo riẹ, Jihova ọ rẹ kẹ emu abọ-ẹzi gbe ọkpọvio nọ a gwọlọ ẹsikpobi. Ọghẹnẹ ọ be jẹ rehọ otoriẹ gbe orimuo kẹ inievo nọ i te re a ruẹrẹ oma họ kẹ ẹnyaharo gbe inwene efa evaọ ọruẹrẹfihotọ uvie na. (Iziewariẹ 34:9; Ahwo Ẹfẹsọs 1:16, 17) Evaọ ẹsikpobi, Jihova ọ rẹ k’omai oware nọ ma gwọlọ re ma ru iruo mai ọrọ ilele-iruo na gbaunu je ru odibọgba akpọ-soso mai vọvọ.—2 Timoti 4:5.
24 Ma wo evaifihọ evọvọ inọ Jihova o ti vu ahwo ẹrọwọ riẹ wa ha; o ti siwi ae vrẹ ‘uye ulogbo’ nọ o be tha na. (Eviavia 7:9-14; Olezi 94:14; 2 Pita 2:9) Ma wo ẹjiroro kpobi nọ ma rẹ rọ yọrọ evaifihọ ọsosuọ mai na te urere. (Ahwo Hibru 3:14) Fikiere, joma gbaemu re ma j’owọ lele ukoko Jihova.
Ẹvẹ Whọ te k’Uyo?
• Fikieme ma sae rọ ta nọ ukoko Jihova o gbẹ be nyaharo?
• Didi imuẹro e riẹ inọ ahwo Ọghẹnẹ a be reawere ẹvi oruvẹ abọ-ẹzi?
• Ẹvẹ odibọgba Oleleikristi na o ro wo ẹnyaharo no?
• Didi inwene ẹruoke evaọ iruẹru ukoko a ru no evaọ udevie idibo Jihova?
[Uwoho nọ o rrọ ẹwẹ-obe avọ 8]
Wọhọ Devidi, ma rẹ sai kele iruo igbunu Jihova kpobi hi
[Uwoho nọ o rrọ ẹwẹ-obe avọ 9]
Uthuru Ọghẹnẹ u wo erere no inwene ẹruoke erọ iruẹru ukoko na ze no