Ekpako—Wha Wuhrẹ Amọfa re A Wọ Owha Na

EVAỌ ikoko Isẹri Jihova evaọ akpọ na soso, ẹgwọlọ ọkpakpata ọ riẹ kẹ ezae nọ e rẹ jọ ọkwa ẹruọsa. Igogo ẹjiroro esa jọ e wha ẹgwọlọ ọnana ze.

Orọ ọsosuọ, Jihova o bi ru eyaa riẹ gba inọ “enọ e mae kao kpobi a re ti zihe ruọ orẹwho ulogbo.” (Aizaya 60:22) Fiki aruoriwo riẹ, enwenọ ilele ekpokpọ ima ọvo a họ-ame no wọhọ Isẹri Jihova evaọ ikpe esa nọ i kpemu na. A gwọlọ ezae nọ i te re a fiobọhọ kẹ enana nọ e họ-ame obọ na nyaharo te ẹkpako Oleleikristi.—Ahwo Hibru 6:1.

Orọ avivẹ, ejọ nọ e gọ kri no wọhọ ekpako a siobọno iruo buobu nọ a jẹ jọ ukoko na ru no fiki owho hayo ẹbẹbẹ ẹyao.

Orọ avesa, ekpako ọwhọ Ileleikristi buobu a bi ruiruo enẹna wọhọ ahwo Ogbẹgwae Uruẹme Kugbe Iwou-Imu, Ogbẹgwae Ebabọ Ubrotọ, hayo Ogbẹgwae Ọgwa Okokohọ. Evaọ ẹsejọ, re a sae rẹrote iruo rai ziezi, a re siobọno ewha-iruo jọ evaọ ukoko rai.

Ẹvẹ a rẹ sae rọ nyate ẹgwọlọ ologbo ọrọ ezae efa nọ i te? Ifue na họ ewuhrẹ. Ebaibol na ọ tuduhọ esẹro Ileleikristi awọ re a wuhrẹ “ahwo nọ a fieva họ na, enọ ae omarai a rẹ te rehọ wuhrẹ amọfa re.” (2 Timoti 2:2) Wọhọ epanọ ofeme jọ o ta, eme na “re a wuhrẹ” u dhesẹ “re a wuhrẹ ohwo re ọ ruẹsi fo, te, hayo wo ona.” Joma roro kpahe epanọ ekpako a rẹ sai ro wuhrẹ ezae efa nọ i te.

Wha Lele Oriruo Jihova

Jesu Kristi o ghine ‘fo, te, je wo ona’ evaọ iruo riẹ—yọ u gbunu hu! Jihova Ọghẹnẹ omariẹ o wuhrẹ i rie. Didi eware i ru omaa ewuhrẹ nana w’iruo? Jesu ọ fodẹ eware esa, wọhọ epanọ a kere eva Jọn 5:20 na: “Ọsẹ na [1] o you Ọmọ na, o te [2] dhesẹ eware kpobi nọ ọye oma riẹ o re ruẹ kẹ e; [3] iruo ilogbo nọ ivi enana o re ti dhesẹ kẹe.” (Ẹjẹlẹ ibiẹme na ọmai.) Ẹkiẹriwo eware nana ọvuọvo o te kẹ omai otoriẹ kpahe ẹme ewuhrẹ.

Muẹrohọ nọ Jesu ọ kake ta nọ: “Ọsẹ na o you Ọmọ na.” No emuhọ emama ze, ọgbakugbe ọsasa ọ rrọ udevie Jihova gbe Ọmọ riẹ. Itẹ 8:30 u fielo họ usu oyena inọ: “Whaọ yọ mẹ [Jesu ọ] rọ abotọ [Jihova Ọghẹnẹ], wọhọ osu iruo, mẹ jọ eva-ewerọ kẹ e kẹdẹ kẹdẹ jẹ hae ghọghọ eva aro riẹ kẹse kẹse.” (Ẹjẹlẹ ibiẹme na ọmai.) Avro ọ jọ iroro Jesu hu inọ Jihova o wo “eva-ewerọ” kpahe iẹe. Yọ Jesu ọ ko oghọghọ nọ o wo dhere he okenọ o je ruiruo kugbe Ọsẹ riẹ. Ẹvẹ u re woma te nọ usu osasa o tẹ rọ udevie ekpako Ileleikristi gbe enọ a bi wuhrẹ na!

Oware avivẹ nọ Jesu ọ fodẹ họ inọ Ọsẹ na o “dhesẹ eware kpobi nọ ọye oma riẹ o re ruẹ kẹ e.” Eme enana e k’imuẹro eme nọ a ta eva Itẹ 8:30 na, inọ Jesu ọ jọ “abotọ” Jihova okenọ a jẹ ma ehrugbakpọ na. (Emuhọ 1:26) Ekpako a rẹ sai lele obọdẹ oriruo ọyena ẹkwoma iruo nọ a re ru kugbe idibo iruiruo na kpekpekpe, dhesẹ kẹ ae epanọ a rẹ rọ wha iruo rai haro ziezi. Rekọ orọnikọ idibo iruiruo nọ a ro mu obọ ọvo e gwọlọ ewuhrẹ othotha ha. Kọ ẹvẹ kpahe inievo ẹrọwọ edekọ nọ i le ọkwa ẹruọsa evaọ ikpe buobu no rekiyọ a te rehọ ae mu hu? (1 Timoti 3:1) Ekpako na e rẹ rehọ uvi ohrẹ kẹ ezae itieye na re a riẹ oria nọ a re jo ru ẹnyaharo.

Wọhọ oriruo, o sae via inọ odibo oruiruo jọ yọ ohwo nọ a re fievahọ, o re lele oke ziezi, jẹ be rẹrote iruo riẹ ziezi. Ọ sae jẹ jọ emamọ owuhrẹ. Evaọ eria buobu, o bi ru obọdẹ iruo evaọ ukoko na. Rekọ ẹsejọhọ ọ riẹ hẹ inọ ọ rẹ dhuaro evaọ eyeri-kugbe ibe Ileleikristi. U fo re ekpako i dhesẹ “oma-urokpotọ nọ areghẹ ọ rẹ wha tha.” (Jemis 3:13) Kọ o gbẹ jọ oware ẹwo re ọkpako jọ o lele odibo oruiruo na t’ẹme, fodẹ ẹbẹbẹ na vevẹ, kẹ uzedhe iriruo jọ, je dhesẹ eria nọ o re jo ru ẹnyaharo? Otẹrọnọ ọkpako na o ‘gbe uwhei họ ohrẹ riẹ’ ziezi, ọ te jẹ eme riẹ rehọ ziezi. (Ahwo Kọlọsi 4:6) Dede na, odibo oruiruo na o re ru iruo ọkpako na lọhọ viere otẹrọnọ o re rovie eva riẹ je fi ohrẹ nọ a kẹ riẹ na họ iruo.—Olezi 141:5.

Evaọ ikoko jọ, ekpako jọ a rẹ rọ uvi ewuhrẹ othotha kẹ idibo iruiruo. Wọhọ oriruo, a rẹ rehọ idibo iruiruo nọ i te gb’oma nọ a te bi weze bru enọ e be mọ gbe enọ e kpako no. Evaọ edhere ọnana idibo iruiruo na a ve wo ona evaọ iruo ẹruorote na. Dede na, eware buobu e riẹ nọ odibo oruiruo ọ rẹ sai ru re o ru ẹnyaharo abọ-ẹzi riẹ kparo viere.—Rri ẹkpẹti nọ uzoẹme riẹ o rrọ “Oware nọ Idibo Iruiruo E rẹ Sai Ru.”

Oware avesa nọ u ru ewuhrẹ Jesu w’iruo tere họ Jihova o wo iruo obaro họ iroro ro wuhrẹ iẹe. Jesu ọ ta kpahe Ọsẹ na nnọ o ti dhesẹ “iruo ilogbo nọ ivi enana” kẹ Ọmọ na. Eriariẹ nọ Jesu ọ jọ otọakpọ wo u ru rie wo ekwakwa nọ ọ gwọlọ re ọ wha iruo obaro riẹ haro. (Ahwo Hibru 4:15; 5:8, 9) Wọhọ oriruo, dai roro okpiruo nọ Jesu o ti ru kẹle na—ọrọ ẹkpare ze gbe ẹdhọ nọ o ti gu ima-idu ahwo nọ i whu no enẹna!—Jọn 5:21, 22.

Ekpako na i te bi wuhrẹ idibo iruiruo nẹnẹ, u fo re a wo ẹgwọlọ obaro họ iroro. Nọ o rẹ wọhọ nọ ekpako gbe idibo iruiruo nọ e be rẹrote iruo na obọnana i bu te na, kọ ere o te gbẹ jọ otẹrọnọ a rehọ ukoko ofa mu? Kọ a tẹ rọ ikoko efa buobu mu? Evaọ ikpe esa nọ e vrẹ na, a rehọ ikoko ekpokpọ nọ i bu vi 6,000 mu evaọ akpọ-soso. Whọ dai roro unu ekpako gbe idibo iruiruo nọ a gwọlọ re e rẹrote ikoko ekpokpọ eyena!

Ekpako, kọ wha bi lele oriruo Jihova ẹkwoma ewo usu osasa kugbe ezae nọ wha bi wuhrẹ na? Kọ wha bi dhesẹ epanọ a re ruiruo na kẹ ae? Kọ wha bi roro kpahe ẹgwọlọ obaro? Elele oriruo Jihova evaọ ewuhrẹ Jesu o te wha eghale buobu se ahwo.

Ozọ Ẹghale Iruo U Mu Owhẹ Hẹ

Ekpako nọ i te nọ e wọ ewha-iruo buobu n’otọ ze no a rẹ sai dina wo ehoo re a rehọ iruo kẹ amọfa. Ẹsejọhọ a daoma ru ere no evaọ okejọ nọ u kpemu, rekọ emamọ iyẹrẹ i no rie ze he. Fikiere a sai wo uruemu na nọ, ‘Whọ tẹ gwọlọ nọ a riẹ iruo na ru, whẹ ọvo o re ru ei.’ Dede na, kọ uruemu nana o rọwo kugbe oreva Jihova, onọ a jọ Ikereakere na dhesẹ via na, inọ enọ i wo eriariẹ a wuhrẹ enọ i wo tere he?—2 Timoti 2:2.

Irẹro Pọl ukọ na e jọ ifofe evaọ okenọ ogbẹnya erẹ riẹ jọ, Jọn Mak, ọ dhẹ zihe kpo siọ iruo riẹ ba eva Pamfilia. (Iruẹru 15:38, 39) Rekọ, Pọl ọ kẹ ekie ọyena uvẹ re o whaha iẹe amọfa owuhrẹ hẹ. Ọ salọ oniọvo ọmoha ọfa, Timoti, o te wuhrẹ iẹe kẹ iruo imishọnare.a (Iruẹru 16:1-3) Eva Bẹria imishọnare na e nyaku ọkparesuọ ọgaga nọ u ru rie bẹbẹ re Pọl ọ gbẹ jọ etẹe. Fikiere ọ tẹ nya siọ ukoko okpokpọ na ba otọ ẹruọsa Saelas, oniọvo nọ ọ kpako ziezi, gbe Timoti. (Iruẹru 17:13-15) Ababọ avro, Timoti o wuhrẹ eware buobu mi Saelas. Uwhremu na, okenọ Timoti o te epanọ ọ rẹ rọ wọ ewha-iruo efa no, Pọl o te vi ei kpohọ Tẹsalonika re ọ tuduhọ ukoko nọ o rrọ etẹe na awọ.—1 Ahwo Tẹsalonika 3:1-3.

Usu nọ o jọ udevie Pọl gbe Timoti orọnikọ ukpikpimẹ hẹ. Ọgbakugbe ọsasa ọ jọ udevie rai. Okenọ o je kere se ukoko nọ o jọ Kọrint, Pọl ọ ta kpahe Timoti, ọnọ ọ jiroro nọ o re vi kpohọ obei, wọhọ “ọmọ oyoyou avọ orọwọ [riẹ] evaọ Ọnowo na.” O fibae nọ: ‘Timoti ọ te kareghẹhọ owhai idhere mẹ evaọ Kristi Jesu.’ (1 Ahwo Kọrint 4:17) Timoti ọ j’owọ kẹ ewuhrẹ nọ o wo mi Pọl, o te ziezi kẹ ẹwhaharo iruo riẹ. Emoha buobu a zihe ruọ uvi idibo iruiruo, ekpako, makọ esẹro ọnyawariẹ no keme a wo erere no uwuhrẹ nọ a wo mi ekpako ọdawẹ nọ i wo uvi isiuru kpahe ae ze, wọhọ epanọ Pọl o wo kẹ Timoti na.

Ekpako, Wha Wuhrẹ Amọfa!

Ababọ orithọ, eruẹaruẹ nọ e rrọ Aizaya 60:22 i bi rugba nẹnẹ. Jihova o bi ru “enọ e mae kao kpobi . . . zihe ruọ orẹwho ulogbo.” Re orẹwho oyena o gbẹ jọ “ulogbo,” a re koko iei họ ziezi hrọ. Whai ekpako, eme wha gbe roro kpahe idhere nọ a rẹ rọ rehọ uwuhrẹ ofa kẹ ezae nọ e roma kẹ je te kẹ uwuhrẹ otiọye na ha? Jọ u mu owhai ẹro inọ odibo oruiruo kpobi ọ riẹ kpahe inwene nọ o re ru re ọ ruẹse nyaharo. Yọ whai inievo emezae nọ e họ-ame no, wha rehọ obufihọ kpobi nọ a k’owhai ruiruo ziezi. Rehọ uvẹ nọ u t’owhai obọ ro ru ẹgba ra, eriariẹ, gbe otoriẹ ra rro haro. Jihova ọ te ghinẹ ghale omaa obufihọ uyoyou oyena.—Aizaya 61:5.

[Oruvẹ-obotọ]

[Ẹkpẹti nọ o rrọ ẹwẹ-obe avọ 16]

Oware nọ Idibo Iruiruo E rẹ Sai Ru

Nọ ekpako i re wuhrẹ idibo iruiruo na, eware buobu e riẹ nọ idibo iruiruo e rẹ sai ru re a nyaharo viere evaọ abọ-ẹzi.

—Idibo iruiruo a re wo ọwhọ jẹ jọ enọ a re fievahọ evaọ ẹwhaharo iruo rai. A re je wo oke nọ a re ro wuhrẹ omobọ rai ziezi. Ẹnyaharo ọ rọ oma hwa uwuhrẹ gbe efihiruo eware nọ ma wuhrẹ gaga.

—Odibo oruiruo ọ tẹ ruẹrẹ oma kpahe re o ru ẹme eva uwuhrẹ Ileleikristi, ọ rẹ raha oke he re ọ nọ ọkpako nọ o te kẹ obufihọ kpahe epanọ o re ru ẹme na.

—Odibo oruiruo ọ sae jẹ nọ ọkpako re o muẹrohọ epanọ ọ be kẹ ovuẹ nọ u no Ebaibol ze re ọ jẹ kẹe ohrẹ nọ a rẹ rọ nyaharo.

Idibo iruiruo a rẹ gwọlọ, jẹrehọ, je fi ohrẹ nọ u no obọ ekpako na ze h’iruo. Evaọ edhere ọnana, ‘ahwo kpobi a vẹ te ruẹ’ ẹnyaharo rai.—1 Timoti 4:15.