Eme A je bi Kpokpo Ahwo Fiki Egagọ Rai?
KỌ WHỌ rọwo nnọ u fo re a kpokpo ahwo fiki egagọ rai? Ẹsejọhọ whọ rẹ ta nnọ ijo—maero otẹrọnọ a be rehọ egagọ rai la ruọ amọfa uzou ho. Dede na, ukpokpoma egagọ u muhọ kri no, yọ o gbẹ riẹ nẹnẹ. Wọhọ oriruo, a mi Isẹri Jihova buobu nọ e rrọ Europe gbe abọfa sa-sa akpọ na ufuoma rai, a tẹ jẹ lahiẹ ae unuẹse buobu evaọ etoke ọ ikpe udhusoi avọ 20 na soso.
Evaọ etoke yena, Isẹri Jihova e ruẹ uye olahiẹ ogaga arokoko evaọ etoke thethei evaọ otọ esuo ọgbahọ ivẹ nọ e jọ Europe. Eme oware nọ o via kẹ ae na u wuhrẹ omai kpahe ukpokpoma egagọ? Kọ eme ma rẹ sai wuhrẹ no oware nọ a ru evaọ okenọ a jẹ ruẹ uye na ze?
“A Rọ e rọ Akpọ na Ha”
Isẹri Jihova a rẹ daoma re a jọ ahwo odhedhẹ, enọ i re koko izi avọ emamọ uruemu. A rẹ wọso egọmeti hayo du ae ẹme he, yọ a rẹ rọ obọ gbe owọ gwọlọ ukpokpoma re a ruẹse jọ enọ i whu fiki ẹrọwọ rai hi. Ileleikristi nana a wobọ kugbe esuo ohrowo ho. Onana o rọwo kugbe eme ọ Jesu nọ ọ ta inọ: “[Ilele mẹ] a rọ e rọ akpọ na ha, wọhọ epanọ mẹ rọ ọ rọ akpọ na ha.” (Jọn 17:16) Egọmeti buobu e riẹ edikihẹ ọ seomaba-edhehọ ọrọ Isẹri na. Rekọ isu ọ esuo-ọgbahọ a wo adhẹwẹ tere kẹ ute Ebaibol na ha inọ Ileleikristi e rẹ jọ erọ akpọ na ha.
A dhesẹ oware nọ o soriẹ vevẹ evaọ ẹgwae nọ a gba eva obọ Yunivasiti ọ Heidelberg, Germany evaọ November 2000. Uzoẹme ẹgwae na họ “Ẹnẹ h’Otọ gbe Ebovia: Isẹri Jihova Evaọ Otọ Esuo-Ewokugbe Orẹwho gbe Esuo-Atanure.” Dr. Clemens Vollnhals ọrọ Hannah-Arendt-Institute for Research Into Totalitarianism (Ukoko ọ Hannah Arendht orọ Otokiẹ Kpahe Esuo-Ọtahobọ) ọ ta nnọ: “Orọnikọ esuo ohrowo ọvo isuẹsu ọtahobọ na e nya ba ha. A gwọlọ nọ ahwo a rẹ rọ oma rai kpobi họ otọ rai.”
Ileleikristi uzẹme a rẹ sae rọ “oma rai kpobi” kẹ egọmeti ohwo akpọ họ, keme a ya eyaa omurokpotọ rai kẹ Jihova Ọghẹnẹ ọvo riẹriẹriẹ no. Isẹri nọ e rrọ otọ esuo-ọtahobọ ọrọ ọgbahọ a ruẹ no inọ ẹgwọlọ Orẹwho na gbe itee ẹrọwọ rai e rọwo kugbe he. Eme họ oware nọ a ru no evaọ okenọ a tẹ rẹriẹ ovao dhe iyero itieye na? No anwọ oke nọ u kpemu ze, Isẹri Jihova a fi ehri-uzi nọ ilele Jesu Kristi a kru na họ iruo no, onọ o ta nọ: “Ma re yo ẹme Ọghẹnẹ vi o rọ ahwo.”—Iruẹru 5:29.
Idu Isẹri buobu a yọrọ ẹrọwọ rai no, a tẹ jẹ whaha oma udhehọ iruẹru nọ i kpomahọ isuẹsu no, ghelọ ukpokpoma nọ o mae ga kpobi dede. Ẹvẹ a sai ro thihakọ? Diẹse a jọ wo ogaga nọ a ro ru ere? Jọ ae ọvo a k’iyo kẹ omobọ rai. Re ma ruẹ oware nọ ohwo kpobi, te Isẹri gbe enọ e rrọ Isẹri hi a rẹ sai wuhrẹ no eware nọ e via kẹ ae na ze.
[Ẹme nọ a fi ẹgba họ nọ ọ rrọ ẹwẹ-obe avọ 4]
Isẹri Jihova evaọ Germany a ruẹ uye olahiẹ ogaga evaọ oke thethei evaọ otọ esuo ọgbahọ ivẹ erọ ikpe-udhusoi avọ 20 na
[Ẹme nọ a fi ẹgba họ nọ ọ rrọ ẹwẹ-obe avọ 4]
“Orọnikọ esuo ohrowo ọvo isuẹsu ọtahobọ na e nya ba ha. A gwọlọ nọ ahwo a rẹ rọ oma rai kpobi họ otọ rai.”—Dr. Clemens Vollnhals
[Uwoho nọ o rrọ ẹwẹ-obe avọ 4]
A mi uviuwou Kusserow ufuoma rai fikinọ a rọwo siobọno ẹrọwọ rai hi
[Uwoho nọ o rrọ ẹwẹ-obe avọ 4]
A kpe Johannes Harms evaọ uwou-odi Nazi fiki ẹrọwọ riẹ