Ẹgwọlọ Uvi Ohrẹ

Eme me re ru re mẹ ruẹ nnọ me wo omokpokpọ ẹsikpobi?

Eme me re ru re uviuwou mẹ u wo evawere ziezi?

Eme me re ru nọ a gbẹ rọ kaki si omẹ no iruo ho?

KỌ WHỌ nọ oghẹrẹ enọ itieye na no ẹdẹjọ? Kọ whọ ruẹ emamọ iyo nọ i gine fi obọ họ kẹ owhẹ? Kukpe kukpe, ahwo a bi kere oware wọhọ ebe 2,000 enọ a be rọ kẹ ohrẹ kpahe eware nana gbe efa nọ i wuzou. Evaọ orẹwho Britain ọvo, ahwo a be raha edọla (koyehọ, igho ahwo America) ima 150 kukpe kukpe rọ dẹ ebe nọ e rẹ kẹ ohrẹ kpahe epanọ a re ro thihakọ ebẹbẹ uzuazọ. Evaọ obọ America, igho nọ a be raha rọ dẹ ebe itieye na kukpe kukpe i bu te ole edọla ima 600. Onana u dhesẹ nnọ orọnikọ whẹ ọvo ọ be gwọlọ emamọ ohrẹ nọ a re ro thihakọ ebẹbẹ uzuazọ họ.

Kpahe ohrẹ nọ o rrọ ebe buobu nana, ohwo jọ nọ o re kere ebe ọ ta nọ: “Ebe ekpokpọ buobu e be wariẹ eme nọ ahwo jọ a kere vrẹ no gheghe.” Evaọ uzẹme, ehrẹ buobu nọ e rrọ ebe nana i bi dhesẹ areghẹ nọ a kere fihọ obe jọ nọ o rrọ usu ebe nọ e mai kri no evaọ akpọ na. Obe nana họ obe nọ o mae jọ akpọ na bu. A fa oma riẹ kpobi hayo abọ riẹ jọ fihọ oware wọhọ evẹrẹ 2,400 no. Evaọ akpọ na kpobi, enọ a rehọ ijini kere no i bu vi ima-idu ene gbe ubro no. Obe nana họ Ebaibol na.

Ebaibol na e ta vevẹ inọ: “Ọghẹnẹ o gie ẹwolo ku ikereakere na kpobi, re e jọ erere rọ kẹ ewuhrẹ gbe ozọ-usio, avọ ọkpọvio gbe odhesẹkẹ eva ẹrẹreokie.” (2 Timoti 3:16) Uzẹme, orọnikọ ẹjiroro epanọ a rẹ rọ rehọ iẹe ku ebẹbẹ họ a ro kere Ebaibol na ha. Ugogo ẹjiroro nọ a ro kere iei họ re u dhesẹ oreva Ọghẹnẹ via kẹ ahwo-akpọ. O make rrọ ere na, Ebaibol na e ta eme buobu kpahe epanọ ma re ro thihakọ ebẹbẹ nọ e wariẹ omai kpobi họ na, yọ o yeyaa inọ enọ i lele ọkpọvio riẹ a ti wo erere kẹ oma rai. (Aizaya 48:17, 18) Ma te fi ohrẹ riẹ họ iruo, u re fi obọ họ, makọ ẹvẹrẹ hayo uyẹ kpobi nọ ohwo o no ze, te enọ e riẹ ebe hayo enọ i kpohọ isukulu hu. Kọ who gbe se uzoẹme nọ o rrọ aro na, re who ku ei họ kẹ oma ra sọ areghẹ ọ rrọ oware nọ Ebaibol na e ta kpahe omokpokpọ, uviuwou, gbe iruo?