Yeri Uzuazọ Nọ U Wo Uvi Ẹjiroro
“Jọ koware koware nọ o be wẹ u jiri ỌNOWO na!”—OLEZI 150:6.
1. Dhesẹ oghẹrẹ nọ ọmoha jọ ọ jẹ rọ gwọlọ yeri uzuazọ nọ u wo ẹjiroro.
“M E WUHRẸ kpahe imu fikinọ mẹ gwọlọ fi obọ họ kẹ ahwo. Me je roro re inọ okpodẹ edọkita gbe igho nọ me ti wo e te wha evawere se omẹ,” ere Seung Jin nọ a yọrọ evaọ obọ Korea ọ ta.a O fibae nọ: “Rekọ, nọ me ti vuhumu inọ obọ nọ edọkita ọ rẹ sai fihọ kẹ ahwo u tulo ho, oma o tẹ lọhọ omẹ. Me te mu iruo nọ a rẹ jọ ma jẹ drọ eware họ eruo, rekọ evawere nọ onana o wha se ahwo u te oware ovo ho, o tẹ jọ omẹ oma wọhọ ẹsenọ me bi ru onana kẹ erere omobọ mẹ ọvo. Kẹsena me te nwene kpohọ iruo iticha, u kri hi mẹ tẹ ruẹ nọ eriariẹ uzou ọvo mẹ rẹ sai wuhrẹ ahwo, orọnikọ ithubro nọ e rẹ lẹliẹ ai wo uvi evawere he.” Ẹhẹ, Seung Jin ọ jẹ gwọlọ yeri uzuazọ nọ u wo uvi ẹjiroro wọhọ epanọ ahwo buobu a be gwọlọ na.
2. (a) Eme u dhesẹ re ohwo o wo ẹjiroro evaọ uzuazọ? (b) Ẹvẹ ma rọ riẹ nọ Ọmemama na o wo ẹjiroro nọ ọ rọ ma omai?
2 Re ohwo o wo uvi ẹjiroro evaọ uzuazọ họ re ọ riẹ oware nọ ọ jẹ rrọ akpọ, ugogo utee nọ o wo hayo oware nọ ọ gwọlọ le tobọ. Kọ ahwo-akpọ a sai gine wo uvi ẹjiroro otiọye? Ee! Iroro, areghẹ, gbe obruoziẹ-iroro nọ ma wo na o kẹ imuẹro inọ u wo emamọ ẹjiroro nọ Ọmemama na ọ rọ ma omai. Fikiere, ugogo edhere nọ ma sai ro duku ẹjiroro uzuazọ je ru ei gba họ re ma yeri uzuazọ nọ o rọwokugbe ẹjiroro Ọnọ ọ ma omai.
3. Eme ẹjiroro Ọghẹnẹ kẹ ahwo-akpọ u wo obọ kugbe?
3 Ebaibol i dhesẹ nọ ẹjiroro Ọghẹnẹ kẹ omai u wo obọ kugbe eware buobu. Wọhọ oriruo, edhere igbunu nọ a rọ ma omai u gine dhesẹ nọ Ọghẹnẹ o wo uyoyou nọ o kare oriobọ. (Olezi 40:5; 139:14) Fikiere, re ma yeri uzuazọ rọwokugbe ẹjiroro Ọghẹnẹ u dhesẹ nọ ma re you amọfa jẹ kare oriobọ wọhọ Ọghẹnẹ omariẹ. (1 Jọn 4:7-11) O tẹ jẹ gwọlọ nọ ma re koko izi Ọghẹnẹ, onọ u re fi obọ họ k’omai yeri uzuazọ nọ o rọwokugbe ẹjiroro riẹ.—Ọtausiwoma Na 12:13; 1 Jọn 5:3.
4. (a) Eme o gwọlọ re ohwo o wo uvi ẹjiroro evaọ uzuazọ? (b) Ẹjiroro vẹ ọ mai woma nọ ohwo ọ rẹ sai wo?
4 O tẹ jẹ rrọ ẹjiroro Ọghẹnẹ inọ ahwo-akpọ a rẹ rria dhedhẹ kugbe ohwohwo jekugbe emama efa kpobi. (Emuhọ 1:26; 2:15) Rekọ eme ma re ru re ma sai wo udhedhẹ, evawere, gbe ufuoma? Wọhọ epanọ o gwọlọ nọ ọsẹgboni ọ rẹ jọ kugbe ọmọ re udu o ruẹse ki ei vi, re o je wo evawere na, ere ma gwọlọ emamọ usu kugbe Ọsẹ obọ odhiwu mai re ma sai duku uvi ẹjiroro uzuazọ. (Ahwo Hibru 12:9) Ọghẹnẹ o ru rie lọhọ re ma wo usu utiọye kugbei ẹkwoma uvẹ nọ o rovie fihọ re ma sikẹle iẹe gbe ẹkwoma elẹ mai nọ ọ be gaviezọ kẹ. (Jemis 4:8; 1 Jọn 5:14, 15) Ma te bi “lele Ọghẹnẹ nya” evaọ ẹrọwọ jẹ rrọ egbẹnyusu riẹ, ma rẹ te wha oghọghọ gbe ajiri se Ọsẹ obọ odhiwu mai. (Emuhọ 6:9; Itẹ 23:15, 16; Jemis 2:23) Onana họ ẹjiroro nọ ọ mai woma nọ ohwo ọ rẹ sai wo. Ọso-ilezi na o kere nọ: “Jọ koware koware nọ o be wẹ u jiri ỌNOWO na!”—Olezi 150:6.
Eme Who bi Le Evaọ Uzuazọ?
5. Fikieme o jẹ rrọ oware ufofe re ma rọ ilale ekwakwa akpọ karo?
5 Abọjọ ẹjiroro Ọghẹnẹ k’omai họ re ma rẹrote oma mai gbe iviuwou mai. Onana o kẹre te erugba ẹgwọlọ abọ-iwo gbe ọrọ abọ-ẹzi. Rekọ o gwọlọ owowa nọ ma te bi ru onana, re okọ mai gbe iruẹru efa nọ e rrọ omai oja e gbẹ rehọ oke eware abọ-ẹzi nọ e mai wuzou ho. (Matiu 4:4; 6:33) U yoma kẹhẹ inọ ahwo buobu a be rehọ enwenọ uzuazọ rai kpobi le ekwakwa akpọ. Rekọ o kare areghẹ re ma roro nọ ekwakwa eyero-akpọ e rẹ sai ru ẹgwọlọ mai kpobi gba. Ọkiẹriwo jọ nọ a ru kpahe edafe kẹlena evaọ obọ Asia, u dhesẹ nọ “ibuobu rai a wo idhọvẹ gbe uduama dede nọ a be reawere evevọwẹ gbe okpodẹ nọ efe rai ọ be wha se ai.”—Ọtausiuwoma Na 5:11.
6. Didi ohrẹ Jesu ọ kẹ kpahe ilale efe?
6 Jesu ọ ta ẹme kpahe “eviẹhọ efe.” (Mak 4:19) Ẹvẹ efe ọ rẹ rọ viẹ ohwo họ? Ohwo ọ rẹ sai rri rie nọ oye o te kẹe evawere, rekọ o rrọ ere he. Solomọn Ovie na ọ ta nọ: “Ohwo nọ o you ugho ugho o rẹ dae ẹro ho.” (Ọtausiwoma Na 5:10) Kọ o lọhọ re ohwo o le ekwakwa efe jẹ sae rọ eva riẹ kpobi gọ Ọghẹnẹ okiovo na? Ijo, o lọhọ họ. Jesu o ru rie vẹ inọ: “Ohwo ọvo ọsai ru iruo kẹ ilori ivẹ hẹ; kiyọ o re you ọjọ o mukpahe ọjọ, hayo o re kru ọvo ọjẹ ọdekọ fiẹ. Wha sai ru iruo kẹ Ọghẹnẹ gbe efe he.” Jesu ọ ta udu họ ilele riẹ awọ inọ a koko efe họ akpọ na ha, rekọ a ‘koko efe họ obọ odhiwu,’ koyehọ re a wo emamọ odẹ evaọ aro Ọghẹnẹ, ọnọ ‘ọ riẹ eware nọ i kiọkọ kẹ omai no re ma tẹ te yare iẹe.’—Matiu 6:8, 19-25.
7. Ẹvẹ ma sae ro kru “uvi uzuazọ” na ga?
7 Pọl ukọ na ọ kẹ ohrẹ ogaga jọ kpahe ẹme nana nọ o kere se Timoti ibe oruiruo riẹ inọ: “Enọ e jọ akpọ fe, vẹvẹ ai unu re a siọ . . . ẹro ba ẹrọkpahọ efe nọ o muẹro ho, rekọ a rẹro kpahe Ọghẹnẹ ọnọ ọ be rehọ eware kpobi nọ e rẹ kẹ evawere kẹ omai. U fo re a he ru ewoma . . . avọ ọghọ-oruo; Ere oruo a re ro fi otọhotọ uwoma họ kẹ oma rai be hẹrẹ obaro, re uzuazọ nọ o ghine rọ uvi uzuazọ o ruẹse te ae obọ.”—1 Timoti 6:17-19.
Eme Họ “Uvi Uzuazọ” Na?
8. (a) Fikieme ahwo buobu a bi ro le efe gbe okpodẹ? (b) Kọ eme ahwo otiọye na a bi rri mu hu?
8 Rọkẹ ibuobu, a re rri “uvi uzuazọ” wọhọ uzuazọ akpọriọ. Obe-usi ahwo Asia jọ o ta nọ: “Enọ i re riwi ifimu hayo etẹlivisiọno a re siuru eware nọ a be ruẹ, gbe epanọ a sai ro le eware nana tobọ.” Rọkẹ ibuobu, oware nọ a bi le evaọ uzuazọ rai kpobi họ re a fe, re a jẹ riẹ ai odẹ. Ibuobu i bi gbabọkẹ ẹruorote oma rai, evawere uviuwou, iruẹru Ọghẹnẹ ọgọ, jẹ be rehọ etoke udhu rai kpobi le eware nana. Umutho ahwo jọ ọvo a be kareghẹhọ inọ eware nana yọ uwoho “ẹzi akpọ na”—iroro nọ e be kpọ ima ahwo gbidi gbidi evaọ akpọ na jẹ be lẹliẹ ai wọso ẹjiroro nọ Ọghẹnẹ o wo k’omai ahwo-akpọ. (1 Ahwo Kọrint 2:12; Ahwo Ẹfẹsọs 2:2) Agbẹta nọ ahwo buobu nẹnẹ a gbe wo evawere he na!—Itẹ 18:11; 23:4, 5.
9. Eme ahwo-akpọ a rẹ sai ru hu, kọ fikieme?
9 Kọ ẹvẹ kpahe enọ e be daoma gaga re a si ohọwo, ẹyao, gbe okienyẹ no kẹ amọfa re a sai yeri emamọ uzuazọ? Uvi omodawọ rai jegbe iruo ezi rai e be wha ewoma ze ẹsibuobu. Rekọ a make daoma kẹhẹ, a sai nwene uyerakpọ nana kpohọ onọ o kare okienyẹ gbe idhọvẹ hẹ. Fikieme? Keme “akpọ na soso ọ rọ obọ ogaga oyoma na”—Setan—yọ ọ gwọlọ nọ a re nwene iei hi.—1 Jọn 5:19.
10. Oke vẹ enọ i wo ẹrọwọ a te rọ reawere “uvi uzuazọ” na?
10 U re yoma gaga otẹrọnọ ohwo o gbe wo ẹruore ọvo viọ uzuazọ onana ha! Pọl o kere nọ: “Otẹrọnọ ẹruore nọ Kristi ọ kẹ omai ọrọ akpọ nana ọvo, ma rẹ te jọ enọ a rẹ mai weri kẹ vi ahwo kpobi.” Ahwo nọ a roro nọ uzuazọ ofa o gbẹ riẹ vi onana ha, uruemu rai họ, “jo ma da ma re, keme odẹ ma re ti whuẹ.” (1 Ahwo Kọrint 15:19, 32) Rekọ uzuazọ ofa o rrọ obaro, ‘wọhọ epaọ eyaa Ọghẹnẹ, ma be hẹrẹ ihru ekpokpọ avọ akpọ ọkpokpọ enọ ẹrẹreokie ọ te rria.’ (2 Pita 3:13) Evaọ oke yena Ileleikristi a te reawere “uvi uzuazọ” na—uzuazọ ogbagba bẹdẹ bẹdẹ evaọ obọ odhiwu hayo otọakpọ evaọ otọ esuo oyoyou Uvie Ọghẹnẹ!—1 Timoti 6:12.
11. Fikieme omarọkẹ iruo Uvie Ọghẹnẹ o jẹ rrọ iruo nọ e mai woma?
11 Uvie Ọghẹnẹ ọvo o te sai ku ebẹbẹ ohwo-akpọ họ riẹriẹriẹ. Fikiere, re a wha isiuru Uvie na haro họ iruo nọ e mai woma kpaobọ nọ ohwo ọ rẹ sai ru. (Jọn 4:34) Nọ ma bi ru iruo nana, ma be reawere emamọ usu kugbe Ọsẹ obọ odhiwu mai. Ma bi je wo oghọghọ nọ ma be rọ gọ Ọghẹnẹ evaọ usu kugbe inievo abọ-ẹzi mai buobu nọ ma gbe wo ẹjiroro ọvona evaọ uzuazọ.
Omolahiẹ Evaọ Egagọ Ọghẹnẹ
12. Dhesẹ ohẹriẹ nọ o rrọ uzuazọ uyero inẹnẹ gbe “uvi uzuazọ” na.
12 Ebaibol e ta nọ akpọ nana avọ “urusio riẹ e rẹ te vrẹ.” Oware ovo u ti kiọkọ evaọ uyerakpọ Setan he, te orro gbe efe riẹ kpobi, “rekọ ohwo nọ o re ru oreva Ọghẹnẹ ọ rẹ jọ bẹdẹ.” (1 Jọn 2:15-18) Wo ohẹriẹ no efe nọ a rẹ sai fi eva họ họ, orro nọ o rẹ tọ họ, gbe omawere ufofe orọ uyerakpọ nana, “uvi uzuazọ na” o te jọ bẹdẹ bẹdẹ, yọ u te oware nọ ma rẹ lahiẹ oma kẹ.
13. Ẹvẹ ọzae-avọ-aye jọ a rọ gbọ oma rai eware jọ fiki isiuru Uvie na?
13 Roro kpahe ọzae-avọ-aye na, Henry avọ Suzanne. A wo ẹrọwọ ọgaga kpahe eyaa Ọghẹnẹ inọ o ti fi obọ họ kẹ enọ e rehọ Uvie na karo kpobi. (Matiu 6:33) Fikiere a tẹ be rria uwou nọ osa riẹ u kpotọ, re te ai te emetẹ ivẹ rai a sai wo uvẹ nọ a rẹ rọ gọ Ọghẹnẹ ziezi ukpenọ a rẹ raha oke buobu ru iruo nọ a rẹ rọ hwosa uwou ulogbo. (Ahwo Hibru 13:15, 16) O jọ bẹbẹ kẹ ogbẹnyusu rai jọ nọ o wo emamọ eva kpahe ae re o wo otoriẹ oware nọ a rọ jiroro nana. Ọ ta kẹ Suzanne inọ: “Mọye, whọ tẹ gwọlọ rria emamọ uwou whọ rẹ gbọ oma ra eware jọ ọvo.” Henry avọ Suzanne a riẹ nọ egagọ Jihova nọ a rẹ rọ karo oye “o yọrọ eya rọ kẹ uzuazọ onana jegbe rọ kẹ uzuazọ no tha.” (1 Timoti 4:8; Taitọs 2:12) Emetẹ rai e tẹ te jọ etausiuwoma oke-kpobi nọ i wo ajọwha. Ohwo ọvo eva uviuwou rai nọ o bi roro nọ oware jọ o kare riẹ ọ rrọ họ, ikpoye, a wo irere buobu no fikinọ ẹjiroro rai họ re a ru iruo hẹrẹ “uvi uzuazọ” na.—Ahwo Filipai 3:8; 1 Timoti 6:6-8.
Whọ ‘Re Erere Akpọ na Vọvọ Họ’
14. Enwoma vẹ i re te omai nọ ugogo ẹjiroro mai na o tẹ thọrọ omai ẹro?
14 Ma re kie ruọ enwoma ilogbo otẹrọnọ ugogo ẹjiroro mai na o thọrọ omai ẹro, ma te je bi kru “uvi uzuazọ” na jeve jeve. “Iroro efe gbe awere e rọ eyero ọnana” e vẹ te viẹ omai họ. (Luk 8:14) Urusio eware ibuobu gbe “iroro akpọ na” e sae lẹliẹ omai duomahọ uyerakpọ nana thesiwa. (Luk 21:34) U yoma kẹhẹ, ejọ i duoma le no họ urusio efe akpọ na, a te “vru siọ orọwọ na ba a jẹ rehọ inwe buobu duwu eva rai,” a tubẹ raha usu oghaghae nọ a wo kugbe Jihova no. Fikinọ a ‘kru ẹruore uzuazọ ebẹdẹ bẹdẹ na’ jeve jeve, oware nọ u vru mi ai o rro kẹhẹ!—1 Timoti 6:9, 10, 12; Itẹ 28:20.
15. Edhere vẹ uviuwou jọ u ro wo erere fikinọ a ‘riọ erere akpọ na vọvọ họ’?
15 Pọl ọ hrẹ “enọ e be riọ erere akpọ na [re a jọ] wọhọ ẹsenọ a be riọ erere riẹ vọvọ họ.” (1 Ahwo Kọrint 7:31, NW ) Ọzae-avọ-aye jọ nọ a re se Keith avọ Bonnie a se ẹme nana te udu. Keith ọ ta nọ: “Kiọkọ omojọ me nwrotọ no Isukulu nọ a re jo wuhrẹ kpahe ibiakọ me ro zihe ruọ omọvo Isẹri Jihova.” O fibae nọ: “Kẹsena mẹ tẹ rẹriẹ ova ku iroro-ejẹ. Mẹ riẹ nnọ me te mu ahwo buobu họ esiwi me ti wo igho buobu, rekọ o te whae ze nọ me gbe ti ro wo uvẹ ziezi kẹ Ọghẹnẹ ọgọ họ. Fikiere me te ru re mẹ hai siwi umutho ahwo jọ ọvo re mẹ ruẹsi wo oke ziezi kẹ egagọ Ọghẹnẹ gbe omosasọ uviuwou mai nọ ma yẹ emetẹ isoi fihọ uwhremu na. Dede nọ ugho o jẹ hẹ sai te omai re kiọkọ họ, ma wuhrẹ epanọ ma gbe ro mu ugho raha ha, yọ ẹsikpobi ma jẹ hai wo umutho eware nọ ma gwọlọ. Uzuazọ uviuwou mai o jọ wowoma avọ evawere. Uwhremuna mai kpobi ma te mu iruo usiuwoma ota oke-kpobi họ. Enẹna emetẹ mai i wo ezae no, yọ aimasa a yẹ emọ no. Iviuwou rai i wo evawere re, keme a gbẹ be rọ oreva Jihova karo.”
Rọ Ẹjiroro Ọghẹnẹ Karo Evaọ Uzuazọ Ra
16, 17. Iriruo ahwo vẹ nọ i wo eriariẹ hayo ona obọdẹ Ebaibol ọ ta ẹme kpahe, rekọ eme a be rọ kareghẹhọ ai nẹnẹ?
16 Ebaibol e ta kpahe iriruo ahwo nọ a yeri uzuazọ lele ẹjiroro Ọghẹnẹ gbe enọ i ru ere he. Eware nọ ma wuhrẹ no iriruo nana ze i re fi obọ họ kẹ ahwo erẹwho kpobi, te emaha te ekpako, makọ oghẹrẹ uyero nọ a rrọ kẹhẹ. (Ahwo Rom 15:4; 1 Ahwo Kọrint 10:6, 11) Nimrọd ọ bọ ikpewho, rekọ o ru onana wọso ẹjiroro Jihova. (Emuhọ 10:8, 9) Dede na, amọfa jọ a fi emamọ oriruo hotọ. Wọhọ oriruo, dede nọ Mosis ọ jọ ọkwa okpohwo evaọ Ijipti, o ru ọkwa yena nọ ọ rẹ jọ wọhọ ugogo ẹjiroro riẹ evaọ uzuazọ họ. Ikpoye, o rri usu riẹ kugbe Ọghẹnẹ wọhọ uvẹ-ọghọ jẹ wọhọ “efe ologbo viọ efe obọ Ijipti.” (Ahwo Hibru 11:26) Wọhọ ọbo-imu, ẹsejọhọ Luk o fi obọ họ siwi Pọl gbe amọfa. Rekọ usiuwoma na nọ o whowho gbe ebe jọ erọ Ebaibol na nọ o kere họ ewoma nọ ọ mae rro kpaobọ nọ o ru kẹ amọfa. A riẹ Pọl odẹ wọhọ ọriẹ-izi hi, rekọ ọtausiuwoma ajọwha, “ukọ rọ kẹ otu Egedhọ.”—Ahwo Rom 11:13.
17 A rẹ mae kake kareghẹhọ Devidi wọhọ ‘ohwo nọ o kiehọ Ọghẹnẹ oma,’ orọnikọ ọgbaẹmo hayo ọgba-ile nọ ọ jọ họ. (1 Samuẹle 13:14) Ma riẹ Daniẹl fikinọ ọ jẹ gọ Jihova wọhọ ọruẹaro omurokpotọ, orọnikọ fiki iruo egọmeti Babilọn nọ ọ jọ họ; ma riẹ Ẹsta fikinọ ọ jọ oriruo aruọwha gbe ẹrọwọ orọnikọ fiki aye ovie Pasia nọ ọ jọ họ; ma riẹ Pita, Andru, Jemis, gbe Jọn wọhọ ikọ Jesu, orọnikọ ikuori nọ i re kpe iyei gaga ha. Yọ mae rro, ma riẹ Jesu nọ ọ rrọ oriruo ologbo mai na wọhọ “Kristi,” orọnikọ “ọwena” ha. (Mak 6:3; Matiu 16:16) Ahwo nana kpobi a riẹ vevẹ inọ makọ ona, ekwakwa nọ a wo, hayo ọkwa nọ a rrọ, oware nọ o mai w’uzou họ re a rọ uzuazọ rai gọ Ọghẹnẹ, orọnikọ re a riẹ ai odẹ evaọ akiruo rai hi. A riẹ inọ ẹjiroro nọ ọ mai woma nọ a re wo họ re a jọ ahwo nọ a be dhozọ Ọghẹnẹ.
18. Ẹvẹ Oleleikristi ọmoha jọ ọ jiroro nọ o re yeri uzuazọ riẹ, kọ eme o vuhumu?
18 Seung Jin nọ ma jọ obọ emuhọ ta ẹme te na, o vuhu onana mu re. Ọ ta nọ: “Ikpenọ mẹ rehọ ẹgba mẹ kọ okọ imu, drọ eware, hayo ru iruo iticha, mẹ tẹ gbaemu inọ mẹ rẹ rọ uzuazọ mẹ ru oware nọ mẹ rehọ fiki riẹ roma mudhe kẹ Ọghẹnẹ. Obọnana mẹ rrọ oria nọ a mae jọ gwọlọ ahwo nọ a re wuhrẹ ahwo Ebaibol, bi fi obọ họ kẹ ahwo duku edhere nọ o bi su kpohọ uzuazọ ebẹdẹ bẹdẹ. Me je roro vẹre inọ iruo odibọgba oke-kpobi yọ iruo evere. Enẹna iruo i bu omẹ abọ viọ anwẹdẹ nọ mẹ be daoma wo ẹnyaharo evaọ uruemu mẹ gbe ona mẹ re mẹ sai wuhrẹ ahwo ewho sa-sa na. Me vuhumu no inọ re ma yeri uzuazọ lele ẹjiroro Jihova họ edhere uzuazọ nọ o mai woma.”
19. Ẹvẹ ma sai ro duku uvi ẹjiroro evaọ uzuazọ?
19 Wọhọ Ileleikristi, ma wo eriariẹ nọ e rẹ kẹ uzuazọ gbe ẹruore esiwo. (Jọn 17:3) Fikiere, a jọ ma ‘mi aruoriwo Ọghẹnẹ kufiẹ hẹ.’ (2 Ahwo Kọrint 6:1) Ikpoye, joma rehọ edẹ gbe ikpe uzuazọ oghaghae mai na jiri Jihova. Jọ ma wuhrẹ amọfa eriariẹ nọ e rẹ kẹ evawere enẹna je su kpohọ uzuazọ ebẹdẹ bẹdẹ. Ma te ru enẹ, ẹme Jesu inọ: “Ẹkẹ oghale o mae rọ vi emio” na o te jọ oma mai rugba. (Iruẹru 20:35) Enẹ ma sai ro duku uvi ẹjiroro evaọ uzuazọ.
[Oruvẹ-obotọ]
a A nwene edẹ na jọ no.
Kọ Whọ Sae k’Iyo Enọ Nana Vevẹ?
• Ẹjiroro vẹ ọ mai woma nọ ma re wo evaọ uzuazọ?
• Fikieme o rọ rrọ oware ufofe re ma yeri uzuazọ mai kpobi kẹ ekwakwa akpọ?
• Eme họ “uvi uzuazọ” nọ Ọghẹnẹ ọ yeyaa riẹ na?
• Ẹvẹ ma re ro yeri uzuazọ mai rọwokugbe ẹjiroro Ọghẹnẹ?
[Iwoho nọ e rrọ ẹwẹ-obe avọ 18]
U fo re Ileleikristi a lahiẹ oma rai kẹ egagọ Jihova