Yeri Uzuazọ Nọ O Rọwokugbe Ẹjiroro Ọghẹnẹ Nẹnẹ

“[Kristi o] whu kẹ ahwo kpobi re enọ egbẹrọ uzuazọ egbẹ jọ kẹ oma obọ rai ofaha.”—2 AHWO KỌRINT 5:15.

1. Gbiku oware nọ imishọnare jọ ọ rọ ẹro ruẹ evaọ odibọgba riẹ.

“OMOTO mai họ omoto ọsosuọ nọ ọ rrọ ọrọ isoja ha nọ ọ kaki te iwhre Afrika yena nọ ẹmo omoma na o kuhọ no,” ere imishọnare jọ nọ a re se Aaron ọ ta.a O fibae nọ: “Eva etoke jọ soso, ukoko osese nọ o jọ etẹe u je wo evuẹ no oria ofa ze he, ma tẹ nya re ma fi obọ họ kẹ inievo na. U te no emuore, iwu, gbe ebe nọ a re ro wuhrẹ Ebaibol no, ma wha ividio na Jehovah’s Witnesses—The Organization Behind the Name lele oma.b Ahwo buobu a nyaze ti rri ividio na evaọ ọguore iwhre na—uwou ebiesa nọ ẹkpẹti ividio gbe etẹlivisiọno e jọ—fikiere ma te dhesẹ iẹe isiava. Isiava nọ ma dhesẹ ividio na, ma jọ usu ahwo na wo emọ-uwuhrẹ Ebaibol buobu. O rrọ vevẹ inọ omodawọ mai o jọ uvrẹvru hu.”

2. (a) Fikieme Ileleikristi a rọ gbaemu inọ a rẹ rọ uzuazọ rai ru iruo Ọghẹnẹ? (b) Kọ enọ vẹ ma be te ta ẹme kpahe?

² Fikieme Aaron avọ ibe etausiuwoma riẹ a ro fi oma họ iruo egaga itieye na? Fikinọ a wo edẹro kẹ idhe ẹtanigbo Jesu, a rehọ uzuazọ rai mudhe kẹ Ọghẹnẹ no yọ a gwọlọ rehọ iẹe ru iruo rọwokugbe ẹjiroro Riẹ. Wọhọ ahwo nana, Ileleikristi kpobi nọ e roma mudhe kẹ Ọghẹnẹ no a gba riẹ mu inọ a gbẹ “jọ kẹ oma obọ rai ofaha,” rekọ a rẹ dawo utho ẹgba rai kpobi evaọ iruo “usiuwoma na.” (2 Ahwo Kọrint 5:15; 1 Ahwo Kọrint 9:23) A riẹ inọ okenọ uyerakpọ nana u ti kuhọ, igho gbe orro akpọ na kpobi i ti wo obufihọ họ. Fikiere a gwọlọ rehọ uzuazọ gbe utho omakpokpọ nọ a wo ro ru iruo rọwokugbe ẹjiroro Ọghẹnẹ. (Ọtausiwoma Na 12:1) Ẹvẹ ma sai ro ru onana? Diẹse ma sai jo duku ẹgba gbe udu nọ ma sai ro ru ere? Kọ uvẹ-ọghọ sa-sa vẹ i rovie fihọ kẹ omai?

Owojẹ Unọjọ Utọjọ nọ U re Fi Obọ Họ

3. Owojẹ sa-sa vẹ o gwọlọ evaọ eruo oreva Ọghẹnẹ?

³ Rọkẹ Ileleikristi uzẹme, oreva Ọghẹnẹ yọ oware nọ a re ru evaọ edẹ uzuazọ rai kpobi. Ugogo idhere jọ nọ onana u re ro muhọ họ, odẹ nọ a re fihotọ evaọ Isukulu Odibọgba Esuo-Ọghẹnẹ na, Ebaibol nọ a re se kẹdẹ kẹdẹ, usiuwoma nọ a rẹ ta, gbe utee ame-ọhọ nọ a re le. Nọ ma bi wo ẹnyaharo na, yọ ma bi roro kpahe ẹme Pọl ukọ na inọ: “He dhe iruo enana erueruo, rehọ uvẹ ra kpobi kẹ ae, re ahwo kpobi a ruẹ ẹnyaharo ra.” (1 Timoti 4:15) Ẹnyaharo otiọye na o rẹ jọ orọ omorro ho, rekọ odhesẹvia ọtamuo mai re ma ru oreva Ọghẹnẹ ababọ oriobọ. Ma tẹ salọ oghẹrẹ uzuazọ utiọnana u re dhesẹ nọ ma gwọlọ inọ Ọghẹnẹ ọ kpọ oware kpobi nọ ma gwọlọ ru evaọ uzuazọ mai, yọ ọye ọ rẹ mae riẹ omai kpọ.—Olezi 32:8.

4. Ẹvẹ ma sai ro si ozọ no ẹro?

⁴ Ehoo hayo awaọruọ nọ ọ vrẹ ẹta, o sae jọ ọzadhe kẹ ẹnyaharo mai evaọ egagọ Ọghẹnẹ. (Ọtausiwoma Na 11:4) Fikiere, o gwọlọ nọ ma rẹ kaki si ozọ no ẹro re ma sai wo oghọghọ evaọ odibọgba kẹ Ọghẹnẹ gbe amọfa. Wọhọ oriruo, Erik o je roro epanọ ọ rẹ rọ nyai fi obọ họ kẹ ukoko ẹvẹrẹ ọfa. Rekọ, awaọruọ riẹ họ: ‘Kọ a te whẹtiẹ omẹ họ oma? Kọ mẹ te sai wo emamọ usu kugbe inievo na? Kọ a ti you omẹ?’ Ọ ta nọ: “Rekọ nọ me ti vuhumu uwhremuna inọ u fo re me roro kpahe inievo na vi oma mẹ, mẹ tẹ gbaemu inọ mẹ rẹ siọ awaọruọ ba re me ru utho nọ mẹ sai ru ro fi obọ họ kẹ ai. Kẹsena nọ mẹ lẹ kẹ obufihọ no, mẹ tẹ nya. Enẹna, mẹ be reawere odibọgba mẹ.” (Ahwo Rom 4:20) Ẹhẹ, epanọ ma rehọ oma mai gbodibo kẹ Ọghẹnẹ gbe amọfa te, ere ma ti wo oghọghọ gbe evevọwẹ te.

5. Fikieme o jẹ gwọlọ inọ ma rẹ ma uzuazọ mai te re ma sai le utee nọ o rọwokugbe ẹjiroro Ọghẹnẹ? Kẹ oriruo.

⁵ Re ma sai yeri uzuazọ nọ o rọwokugbe ẹjiroro Ọghẹnẹ, o gwọlọ re inọ ma rẹ ma uzuazọ mai te. Ma rẹ rọ areghẹ whaha esa eriọ nọ e rẹ sai fi omai họ erigbo evaọ uyerakpọ nana je ru nọ ma gbe ro wo uvẹ kẹ iruo Ọghẹnẹ te ẹgwọlọ họ. Ebaibol e kareghẹhọ omai inọ: “Ọnọ o re momo ọ rẹ jọ ọrigbo kẹ ọnọ o momo mi.” (Itẹ 22:7) Ma te fi eva họ Jihova jẹ rọ eware abọ-ẹzi karo, u ti fi obọ họ k’omai tẹrovi eware nọ i w’uzou. Wọhọ oriruo, Guoming avọ inievo-emetẹ ivẹ riẹ a be rria kugbe oni rai eva oria nọ iwou e jẹ rrọ ghaghae, o tẹ jẹ rrọ bẹbẹ re a ruẹ emamọ iruo. Dede nọ aikpobi a wo iruo ho, ugho nọ a bi mu raha ha gbe ewha-iruo nọ a ghale fihọ omoma rai u bi fi obọ họ kẹ ai ru eware nọ a gwọlọ. Guoming ọ ta nọ: “Ẹsejọ ejọ evaọ usu mai a re wo iruo ho. Ghele na, ma be sae ruabọhọ odibọgba oke-kpobi na jẹ be rẹrote oni mai. Eva e be were omai inọ oni mai ọ gwọlọ nọ ma siọ eware abọ-ẹzi ba re ma sai ru ikpeware jọ kẹe he.”—2 Ahwo Kọrint 12:14; Ahwo Hibru 13:5.

6. Oriruo vẹ o dhesẹ epanọ ma sai ro nwene uzuazọ mai rọwokugbe ẹjiroro Ọghẹnẹ?

⁶ Otẹrọnọ who du oma kpobi họ eware efa no wọhọ okọ hayo ilale efa, o te gwọlọ inwene ilogbo re whọ tẹ sae rehọ ẹjiroro Ọghẹnẹ karo. Enwene otiọye na ọ rẹ nwane lọhọ asohẹrioke he, yọ who te zoruẹ evaọ omodawọ ọsosuọ ra o nwani dhesẹ nọ who kie no ho. Roro kpahe Koichi ọnọ o wo ẹbẹbẹ ọrọ oke nọ a rẹ raha thesiwa kẹ aruọzaha oma-ojaja. Koichi o wuhrẹ Ebaibol na eva oke emaha, rekọ eva ikpe buobu, aroza ividio e tẹ kọ ruọ ẹe uzou. Ẹdẹjọ Koichi ọ tẹ ta kẹ oma riẹ nọ: ‘Eme me re ruo na? Ikpe 30 mẹ vrẹ no na yọ me rri mu ugogo oware ovo họ eruo evaọ uzuazọ mẹ hẹ!’ Koichi ọ tẹ wariẹ mu uwuhrẹ Ebaibol riẹ họ jẹ jẹ obufihọ ukoko na rehọ. Dede nọ ọ sai nwene kpregede he, o fi oma hotọ họ. Ẹkwoma olẹ gbe obufihọ amọfa, o te ti fi ẹbẹbẹ na kparobọ. (Luk 11:9) Enẹna Koichi yọ odibo oruiruo nọ ọ be gọ Ọghẹnẹ avọ evawere.

Daoma Jọ Owowa

7. Fikieme u je fo re ma jọ owowa eva iruo Ọghẹnẹ?

⁷ Uzuazọ nọ ma re yeri rọwokugbe ẹjiroro Ọghẹnẹ yọ oware nọ u fo nọ ma rẹ rọ udu mai kpobi ru. O rrọ oware nọ ma rẹ jọ sienẹ h’emu hayo moyẹlẹ vievie he. (Ahwo Hibru 6:11, 12) Dede na, orọnikọ Jihova ọ gwọlọ nọ ma ru oma kpobi whọlọ no eva egagọ riẹ hẹ. Omaurokpotọ nọ ma re ro vuhumu inọ ẹgba mai ọvo u re te omai ru iruo Ọghẹnẹ hẹ, o rẹ wha orro sei je dhesẹ nọ ma rrọ owowa. (1 Pita 4:11) Jihova ọ yeyaa inọ ọ te k’omai ẹgba nọ ma re ro ru oreva riẹ, rekọ orọnọ onana u dhesẹ nọ ma rẹ duọ oma họ vrẹta ha. (2 Ahwo Kọrint 4:7) Re egagọ Ọghẹnẹ e siọ omai oma ba ẹwhọlọ kuotọ, ma rẹ rehọ ẹgba mai ru iruo avọ areghẹ.

8. Eme ọ via kẹ ọmọtẹ Oleleikristi jọ nọ ọ jẹ daoma ru utho ẹgba riẹ kpobi kẹ Jihova jẹ rọ kẹ akpọ na, kọ didi enwene o ru?

⁸ Wọhọ oriruo, ikpe ivẹ soso Ji Hye, ọmọtẹ Oleleikristi jọ nọ ọ be rria obọ ovatha-ọre Asia o je ru iruo nọ a rẹ jọ wo uvẹ hẹ yọ ọ rrọ ọkobaro. Ọ ta nọ: “Mẹ jẹ daoma re me ru utho ẹgba mẹ kpobi kẹ Jihova jẹ rọkẹ akpọ na, euwa isoi ọvo mẹ jẹ wezẹ eva aso. Uwhremuna, me gbe je wo ẹgba ọvo kẹ eware abọ-ẹzi hi, me gbe je wo oghọghọ ziezi evaọ odibọgba mẹ hẹ.” Ji Hye ọ tẹ gwọlọ iruo nọ e rẹ rehọ oke ohwo kpobi hi re ọ sae rehọ ‘eva, ẹwẹ, iroro, gbe ẹgba riẹ kpobi’ gọ Jihova. (Mak 12:30) Ọ ta nọ: “Dede nọ ahwo uviuwou mẹ a jẹ tuduhọ omẹ awọ re me le ekwakwa efe, mẹ dao oma kpobi re mẹ rehọ ẹjiroro Ọghẹnẹ karo.” O fibae nọ: “Me gbe bi wo ugho nọ u re te omẹ dẹ eware nọ e roja, wọhọ emamọ iwu. Mẹ tẹ be jẹ wezẹ doma ziezi enẹna. Me bi wo oghọghọ no odibọgba mẹ ze, mẹ tẹ jẹ rrọ gaga enẹna evaọ abọ-ẹzi. O rrọ ere keme mẹ gbẹ be rẹriẹ ova ku isiuru akpọ na te epanọ o jọ vẹre he.”—Ọtausiwoma Na 4:6; Matiu 6:24, 28-30.

9. Ẹvẹ omodawọ mai u re kpomahọ ahwo nọ ma nyae ta usiuwoma kẹ?

⁹ Ahwo kpobi a sae jọ etausiuwoma oke-kpobi hi. Who te bi lele owho, ẹyao, gbe ebẹbẹ efa muabọ, riẹ nọ ẹrọwọ ra gbe utho nọ whọ sae rehọ eva ra kpobi ru o rẹ da Jihova ẹro. (Luk 21:2, 3) Ajọ ohwo ọvo evaọ usu mai o rri oghẹrẹ nọ omodawọ mai o rẹ sai kpomahọ amọfa vo ho, o tẹ make rọnọ u tulo ho. Wọhọ oriruo, ma rehọ iẹe nọ ohwo ọvo o dhesẹ isiuru kẹ ovuẹ Uvie na ha evaọ umutho iwou nọ ma sae nyate. Rekọ nọ ma tẹ nyavrẹ no, makọ evaọ oria nọ ohwo ọvo ọ jọ rovie ẹthẹ k’omai hi, ahwo na a rẹ sae rehọ euwa hayo edẹ buobu ta ẹme kpahe omai! O rrọ irẹro mai hi inọ ohwo kpobi nọ o yo emamọ usi na o ti kurẹriẹ, rekọ ejọ i ti kurẹriẹ. (Matiu 13:19-23) Ẹsejọhọ amọfa a te jowọ evaọ obaro nọ uzuazọ hayo uyerakpọ rai u te nwene. Oghẹrẹ kpobi nọ o rrọ, ma te bi ru utho ẹgba mai kpobi evaọ odibọgba na yọ iruo Ọghẹnẹ ma bi ru. Mai yọ “otu nọ i bi ru iruo kẹ Ọghẹnẹ.”—1 Ahwo Kọrint 3:9.

10. Uvẹ iruo sa-sa vẹ i rovie fihọ kẹ ahwo kpobi eva ukoko na?

¹⁰ Ofariẹ, mai kpobi ma rẹ sai fi obọ họ kẹ ahwo uviuwou mai gbe inievo abọ-ẹzi mai. (Ahwo Galesha 6:10) Amọfa a rẹ sai wo erere no emamọ oriruo gbe iruo iwoma mai ze. (Ọtausiwoma Na 11:1, 6) Nọ ekpako gbe idibo iruiruo a tẹ be rọ osegboja ruiruo rai, a re fiba omakpokpọ abọ-ẹzi orọ inievo nọ e rrọ ukoko na, jẹ lẹliẹ ai wo ẹnyaharo eva iruo Uvie na. Ma wo imuẹro inọ ma tẹ rrọ “owhreze iruo Ọnowo na,” iruo mai e te jọ “ivrẹvru hu.”—1 Ahwo Kọrint 15:58.

Ru Uzuazọ Uyero nọ O Rọwokugbe Ẹjiroro Ọghẹnẹ họ Utee Ra

11. U te no iruẹru ukoko nọ ma rrọ no, uvẹ iruo odibọgba efa vẹ u rovie fihọ k’omai?

¹¹ Mai Ileleikristi, uzuazọ o be were omai, yọ ma gwọlọ jọ oware kpobi nọ ma bi ru kẹ Ọghẹnẹ oruaro. (1 Ahwo Kọrint 10:31) Ma rẹ sae ruẹ uvẹ-ọghọ iruẹru sa-sa nọ i rovie fihọ k’omai nọ e rẹ wha eghale ze nọ ma tẹ be ta usiuwoma Uvie na je wuhrẹ ahwo re a ru eware kpobi nọ Jesu ọ ta. (Matiu 24:14; 28:19, 20) U te no iruẹru ukoko nọ ma rrọ no, uvẹ ofa nọ u rovie fihọ k’omai họ, ekpohọ oria nọ a mae jọ gwọlọ iwhowho-uvie, o sae jọ ẹkwotọ ọfa, orẹwho ofa hayo oria nọ a jọ gwọlọ obufihọ evaọ ẹvẹrẹ ọfa. Ekpako gbe idibo iruiruo nọ e re rọo ho nọ i te, a rẹ sai zizie ai kpohọ Isukulu Ewuhrẹ Odibọgba na, kẹsena a ve vi ai nyai fi obọ họ kẹ ikoko nọ i wo ẹgwọlọ kẹ Ileleikristi nọ e kpako evaọ abọ-ẹzi, te eva orẹwho rai hayo orẹwho ofa. A sai zizie imava-orọo nọ i te, enọ e rrọ odibọgba oke-kpobi re a kpohọ isukulu Giliad, a ve vi ai nyai fi obọ họ kẹ amọfa evaọ erẹwho efa. Yọ ẹsikpobi a be gwọlọ iruiruo unevaze nọ i re ru iruo sa-sa eva Ebẹtẹle, ebabọ gbe ẹruorote iwou Ebẹtẹle avọ eria ewuhrẹ.

12, 13. (a) Ẹvẹ whọ sae rọ jiroro abọ iruo Uvie na nọ whọ rẹ jọ wobọ? (b) Kẹ oriruo epanọ ona nọ a wuhrẹ evaọ iruo jọ u re ro w’iruo eva abọfa.

¹² Kọ abọ vẹ iruẹru uvie na whọ gwọlọ? Wọhọ odibo Jihova nọ ọ roma mudhe no, rọ ẹro so iẹe avọ ukoko riẹ kẹ ọkpọvio. “Emamọ ẹzi” riẹ o ti fi obọ họ kẹ owhẹ jiroro nọ e gba. (Nehemaya 9:20) Uvẹ iruo jọ u re su kpohọ ofa, yọ whọ rẹ sae rehọ ona nọ who wuhrẹ evaọ abọjọ odibọgba na ru iruo evaọ abọfa evaọ obaro.

¹³ Wọhọ oriruo, Dennis avọ aye riẹ Jenny a re kuomagbe iruo ebabọ Egwa Uvie ẹsikpobi. Nọ ofou-ọwhibo jọ ọ raha eware evaọ ofẹ ẹkpẹlobọ ovatha-ọre America, a kuomagbe ahwo nọ e fialoma ze re a dhogbo. Dennis ọ ta nọ: “Ona nọ ma wuhrẹ evaọ iruo ebabọ Egwa Uvie nọ ma ro fi obọ họ kẹ inievo mai o wha oghọghọ ulogbo se omai. Edẹro nọ inievo nọ ma fi obọ họ kẹ a dhesẹ o tẹ jẹ sasa udu mai. Itu efa nọ e rẹ dhogbo a rẹ kaki wo obokparọ utiona evaọ iruo aruẹrẹ rai hi. Isẹri Jihova a ruẹrẹ hayo wariẹ bọ iwou nọ i bu te 5,300 gbe Egwa Uvie buobu no. Ibuobu nọ i muẹrohọ onana a bi dhesẹ isiuru kẹ ovuẹ mai gaga enẹna.”

14. Nọ whọ tẹ gwọlọ ruọ odibọgba oke-kpobi na, eme who re ru?

¹⁴ Kọ whọ sai yeri uzuazọ ra rọwokugbe ẹjiroro Ọghẹnẹ ẹkwoma iruo odibọgba oke-kpobi na nọ who re ru? Who te ru ere, who ti wo eghale buobu. Rekọ, uyero ra o gbẹ kẹ uvẹ re who ru ere obọnana ha, ẹsejọhọ whọ sai ru inwene jọ nọ uvẹ yena o sae rọ lọhọ. Lẹ wọhọ epanọ Nehemaya o ru okenọ ọ jẹ gwọlọ mu iruo jọ nọ i w’uzou gaga họ inọ: “O Ọnowo, . . . ru odibo ra wo obokparọ.” (Nehemaya 1:11) Kẹsena, avọ eva nọ who fihọ “ọnọ o re yo elẹ” na, whọ vẹ jowọ lele olẹ ra. (Olezi 65:2) Re Jihova ọ tẹ ghale omodawọ nọ whọ gwọlọ rọ gọe vi epaọ ọsosuọ, whọ rẹ kake jowọ. Nọ whọ tẹ nwane jiroro na no inọ who re mu odibọgba oke-kpobi họ, who siuke kpemu hu. Nọ oke o be nyaharo na, who ti wo eriariẹ viere, oghọghọ ra u ve ti vihọ.

Uzuazọ nọ O rẹ Ginẹ Kẹ Evevọwẹ

15. (a) Erere vẹ ma rẹ sai wo nọ ma tẹ ta ẹme kugbe idibo Ọghẹnẹ nọ i kri no je se ikuigbe rai? (b) Dhunu te ikuigbe uzuazọ oniọvo jọ nọ o k’owhẹ uduotahawọ.

¹⁵ Eme who re rẹro nọ u ti no ẹrria lele ẹjiroro Ọghẹnẹ ze? Nọ mi idibo Jihova nọ i kri no, maero enọ e raha ikpe buobu no evaọ odibọgba oke-kpobi na. Uzuazọ u gbe woma vi onọ a be reawere riẹ hẹ! (Itẹ 10:22) A te vuẹ owhẹ inọ Jihova ọ re siọ ae obọ ba efihọ kẹ ẹdọvo ho, makọ evaọ otọ iyero ebẹbẹ, ọ tubẹ kẹ ai bu vi eware nọ e gine rrọ oja no. (Ahwo Filipai 4:11-13) No 1955 rite 1961, a kere ikuigbe uzuazọ idibo Ọghẹnẹ buobu nọ i wo ẹrọwọ fihọ Uwou-Eroro Na no evaọ otọ uzoẹme na “Pursuing My Purpose in Life” (Ele Utee Mẹ Evaọ Uzuazọ). No anwọ oke yena ze, a kere ikuigbe uzuazọ amọfa buobu no re. Ikuigbe nana i bi dhesẹ ẹzi oghọghọ avọ ajọwha nọ o rẹ kareghẹhọ omai iriruo nọ e rrọ obe Iruẹru Ikọ eva Ebaibol na. Ikuigbe itieye na nọ who re se e te wọ owhẹ ta nọ, ‘Oghẹrẹ uzuazọ utiona mẹ gwọlọ yeri!’

16. Eme ọ rẹ lẹliẹ uzuazọ Oleleikristi wo otofa gbe evawere?

¹⁶ Aaron nọ ma kake ta ẹme te na, ọ kareghẹhọ inọ: “Mẹ jọ Afrika ruẹ izoge buobu nọ e jẹ nya kpenẹ avọ enẹ be gwọlọ uvi oware nọ a re ru evaọ uzuazọ. Ibuobu a ruẹ ovo dhobọ họ. Rekọ etẹe ọvona ma jọ yeri uzuazọ nọ o rọwokugbe ẹjiroro Ọghẹnẹ ẹkwoma emamọ usi Uvie na nọ ma wha haro jẹ reawere uzuazọ nọ o vọ avọ iruo je wo otofa. Ma rọ ibiaro mai ruẹ uzẹme ẹme na inọ ẹkẹ oghale o mae rrọ vi emio.”—Iruẹru 20:35.

17. Fikieme ma je yeri uzuazọ mai rọwokugbe ẹjiroro Ọghẹnẹ enẹna?

¹⁷ Kọ ẹvẹ whẹ omara? Ẹvẹ who bi yeri uzuazọ ra? Who gbe wo ugogo utee abọ-ẹzi ọvo ho, eware efa e te d’owhẹ rehọ no. Fikieme whọ jẹ raha uzuazọ oghaghae ra kẹ eware akpọ Setan nọ e wọhọ idodo gheghe? Nọ “uye obẹbẹ” na u ti du lahwe kẹlena, ekwakwa efe gbe ekwa akpọ na i ti zihe ruọ eware ifofe. Usu mai kugbe Jihova ọvo oye o te jọ oware nọ u muẹme. Eva e te were omai gaga inọ ma gbodibo kẹ Ọghẹnẹ gbe amọfa je yeri uzuazọ nọ o rọwokugbe ẹjiroro Ọghẹnẹ.—Matiu 24:21; Eviavia 7:14, 15.

[Oruvẹ-obotọ]

Kọ Whọ Sae k’Iyo Enọ Nana Vevẹ?

• Ẹvẹ Jihova o bi rri odibọgba mai?

• Ẹvẹ omaa nọ ma re wo gbe owowa nọ ma rẹ jọ u re ro fi obọ họ k’omai gbodibo kẹ Ọghẹnẹ gbe amọfa?

• Uvẹ odibọgba sa-sa vẹ i rovie fihọ k’omai?

• Ẹvẹ ma sai ro yeri uzuazọ nọ u gine wo ẹjiroro enẹna?

[Iwoho nọ e rrọ ẹwẹ-obe avọ 23]

O gwọlọ owowa re ma sae rọ utho ẹgba nọ ma wo kpobi gọ Jihova

[Iwoho nọ e rrọ ẹwẹ-obe avọ 24]

Egagọ efuafo i wo abọ buobu