Jihova O Bi Yo Oviẹ Mai Kẹ Obufihọ

“Ibiaro ỌNOWO i bi ri ikiẹrẹe, ezọ riẹ i bi yo eviẹ rai.”—OL. 34:15.

1, 2. (a) Ẹvẹ uye nọ o rọ akpọ na nẹnẹ o rrọ ahwo buobu oma? (b) Fikieme onana u gbe ro gbe omai unu hu?

K Ọ WHỌ be ruẹ uye? Otẹrọ ere, orọnikọ whẹ ọvo ho. Ima ahwo buobu a be daoma gaga re a sai thihakọ ebẹbẹ erọ uyerakpọ omuomu nana. Rọkẹ ahwo jọ, o lọhọ tere he re a thihakọ. Oma o rẹ sae jarai wọhọ epanọ o jọ Devidi ọso-ilezi na oma, ọnọ o kere nọ: “Aro o bi omẹ, me te horie oma na kpobi no; fiki omofọwẹ nọ me wo ho. Ubiudu mẹ u bi kie, ogaga mẹ u re no; ude dede, mẹ gbẹ rẹ ruẹ hẹ.”—Ol. 38:8, 10.

² Wọhọ Ileleikristi, uye nọ o rrọ akpọ na u re gbe omai unu hu. Ma riẹ inọ “uye” yọ abọjọ ọrọ oka ọzino Jesu nọ a ruẹaro riẹ na. (Mak 13:8; Mat. 24:3) Otofa ubiẹme Griki nọ a fa “uye” na u dhesẹ edada egaga nọ aye ọ rẹ ruẹ uye riẹ okenọ o te bi yẹ. Oyena o nwani dhesẹ epanọ uye nọ ahwo a be ruẹ evaọ “oke ẹbẹbẹ” nana o ga te.—2 Tim. 3:1.

Jihova Ọ Riẹ Uye nọ O Be Bẹ Omai

3. Eme idibo Ọghẹnẹ a riẹ vevẹ?

³ Idibo Jihova a riẹ vevẹ inọ uye o rẹ se ai oma ba e te he, yọ o wọhọ nọ eware i ti gbe yoma vi enẹ dede. Fiba uye nọ ahwo-akpọ kpobi a be ruẹ, wọhọ idibo Ọghẹnẹ ma riẹriẹ ovao ku ‘ọwegrẹ na, ukumuomu,’ ọnọ ọ be daoma re ọ ruẹ nọ ọ raha usu nọ ma wo kugbe Ọghẹnẹ. (1 Pita 5:8) O lọhọ re ma roro wọhọ Devidi ọnọ ọ ta nọ: “Ojaoriọ o raha eva mẹ no, fikiere me gbe wo ẹruore he, me reẹro ohrọ, rekọ mẹ ruerẹ hẹ; makọ ọnọ ọ rẹ sasa omẹ oma dede.”—Ol. 69:20.

4. Eme o rẹ sasa omai oma nọ uye o tẹ be bẹ omai?

⁴ Kọ Devidi ọ be ta nnọ o wo uvumọ ẹruore he? Ijo. Muẹrohọ eme efa nọ ọ ta evaọ olezi yena: “ỌNOWO o bi yo uru iyogbere, ọ jẹ otu uwouodi fiẹ hẹ.” (Ol. 69:33) Eva ẹsejọ, o rẹ jọ omai oma wọhọ ẹsenọ ma rọ uwou-odi fiki uye nọ ma be ruẹ. O sae wọhọ nọ amọfa a riẹ uye nọ o be bẹ omai hi—yọ ẹsejọhọ a ginẹ riẹ hẹ. Rekọ wọhọ Devidi, ma rẹ sai wo omosasọ nọ ma rọ riẹ inọ Jihova ọ riẹ uye nọ o be bẹ omai.—Ol. 34:15.

5. Imuẹro vẹ Solomọn Ovie na o wo?

⁵ Solomọn ọmọ Devidi o ru onana vẹ eva etoke eromudhe etẹmpol obọ Jerusalẹm. (Se 2 Iruẹru-Ivie 6:29-31.) Ọ lẹ se Jihova inọ o yo olẹ omomọvo nọ ọ rehọ udu-oruọzewọ bru Rie ze fiki “uye riẹ jegbe uweri riẹ.” Eme Ọghẹnẹ o re ru kpahe elẹ omomọvo nọ uye o be bẹ? Solomọn o dhesẹ imuẹro riẹ inọ orọnikọ Ọghẹnẹ o re yo elẹ rai ọvo ho rekọ o re je fiobọhọ kẹ ai. Emejabọ? Keme ọ ginẹ riẹ oware nọ o rọ “iroro emọ ahwo.”

6. Ẹvẹ ma sae rọ whaha awaọruọ, kọ fikieme?

⁶ Epọvo na re, ma rẹ lẹ se Jihova kpahe ‘uye mai gbe uweri mai,’ koyehọ uye nọ o be bẹ omai omomọvo. Joma wo omosasọ inọ Ọghẹnẹ ọ riẹ uye nọ o be bẹ omai jegbe nọ ọ be daezọ mai. Pita ukọ na ọ kẹ imuẹro onana nọ ọ ta nọ: “Fi iroro ejẹ ra kpobi kpahe iẹ keme ọye ọ be sẹro ra.” (1 Pita 5:7) Jihova ọ be daezọ eware nọ e be via kẹ omai. Jesu o fiẹgba họ ọdawẹ nọ Jihova o wo kẹ omai nọ ọ ta nọ: “A be zẹ emevra ivẹ ẹnini hi? Rekọ ọvuọvo rai o re kie otọ emu Ọsẹ rai hi. Makọ egẹ-eto uzou rai kpobi a kele i rai. Fikiere wha dhẹ ozọ họ; wha wo aghae vi emevra buobu.”—Mat. 10:29-31.

Rẹroso Obufihọ Jihova

7. Obufihọ vẹ ma wo imuẹro riẹ?

⁷ U re mu omai ẹro inọ u no Jihova eva ze o te je wo ẹgba nọ o re ro fiobọhọ k’omai okenọ ma tẹ be ruẹ uye. “Ọghẹnẹ họ oria adhẹzọ gbe ogaga mai, ọ rọ obọufihọ mai evaọ oke uye mai kpobi.” (Ol. 34:15-18; 46:1) Oghẹrẹ vẹ Ọghẹnẹ o bi ro fiobọhọ k’omai? Roro kpahe oware nọ 1 Ahwo Kọrint 10:13 o ta: “Ọghẹnẹ avọ ọtẹruo, ọ nọ o re je ẹdawọ nọ ọ ro vi owhẹ o te owhẹ hẹ; rekọ ọ rẹ jọ eva ẹdawọ na ru epanọ owhẹ rẹ rọ va ae abọ, re whọ ruẹse sai thihi-akọ riẹ.” Jihova ọ rẹ sae gbẹ edhere nọ o re ro si omai no okpẹtu, hayo kẹ omai ẹgba nọ ma re ro thihakọ. Onọ o ru kpobi, u mu omai ẹro inọ Jihova o ti fiobọhọ k’omai.

8. Ẹvẹ ma sai ro wo obufihọ Ọghẹnẹ?

⁸ Ẹvẹ ma sai ro wo obufihọ Ọghẹnẹ? Muẹrohọ oware nọ a hrẹ omai nọ ma ru: ‘Fi iroro ejẹ ra kpobi kpahe iẹ.’ Onana u dhesẹ inọ evaọ edhere ẹwoho ma rẹ wọ uye gbe awaọruọ mai kpobi kẹ Jihova re ọ whae kẹ omai. Ma rẹ daoma siọ awa ba ẹruọ ma ve fievahọ iẹe inọ o ti ru ẹgwọlọ mai. (Mat. 6:25-32) Evaifihọ otiọnana o gwọlọ omaurokpotọ, orọnikọ ma rẹ rẹroso ẹgba gbe areghẹ obọmai hi. Ma te hrẹ oma mai kpotọ evaọ “obọ otọ ogaga Ọghẹnẹ,” yọ ma bi dhesẹ inọ ma riẹ nnọ mai ahwo-akpọ gheghe. (Se 1 Pita 5:6.) Onana u ve fiobọhọ k’omai thihakọ oware kpobi nọ Ọghẹnẹ ọ kẹ uvẹ riẹ. Ma rẹ sae gwọlọ inọ uye na u no omai oma ẹsiẹsiẹ, rekọ ma wo imuẹro inọ Jihova ọ riẹ uzedhe oke gbe oghẹrẹ nọ o re ro fiobọhọ k’omai.—Ol. 54:7; Aiz. 41:10.

9. Oghẹrẹ owha vẹ Devidi o gbolo kẹ Jihova?

⁹ Kareghẹhọ eme Devidi nọ a kere fihọ Olezi 55:22: “Gbolo owha ra kẹ ỌNOWO na, o re ti fiobọhọ k’owhẹ; ọ rẹ rọwa re okiẹrẹe na o kie he.” Devidi ọ jọ ọkora okenọ o kere eme nana. (Ol. 55:4) Ma riẹ inọ o kere olezi nana okenọ Absalọm ọmọ riẹ ọ gbẹgwae idhere inọ ọ rẹ rehọ ọkwa-ovie riẹ. Ahitofẹl, ọkiroro Devidi nọ ọ mai fievahọ, o wo obọ evaọ ẹgwae omuomu na. Devidi ọ tẹ dhẹ no Jerusalẹm re a siẹe ba ekpe. (2 Sam. 15:12-14) Makọ evaọ udevie ebẹbẹ nana dede, Devidi o gbe fievahọ Ọghẹnẹ ghele, yọ Ọghẹnẹ o gine fiobọhọ kẹe.

10. Eme ma re ru hrọ okenọ ma tẹ be ruẹ uye?

¹⁰ Wọhọ Devidi, o r’oja re ma lẹ se Jihova kpahe oghẹrẹ uye kpobi nọ ma be ruẹ. Joma ta kpahe oware nọ Pọl ukọ na ọ tuduhọ omai awọ nọ ma ru. (Se Ahwo Filipai 4:6, 7.) Eme u re no olẹ utioye ze? “Udhedhẹ Ọghẹnẹ nọ uvi eriariẹ kpobi, ote yọrọ eva gbe iroro [mai] eva Kristi Jesu.”

11. Ẹvẹ “udhedhẹ Ọghẹnẹ” o rẹ rọ thọ udu gbe ẹgba-iroro mai?

¹¹ Kọ olẹ u ti ku ebẹbẹ ra họ? Ẹsejọhọ. Ghele na, ma re vuhumu inọ orọnikọ oghẹrẹ nọ ma gwọlọ ere Jihova o re ro yo elẹ mai ẹsikpobi hi. Rekọ, olẹ u re fiobọhọ k’omai nọ iroro mai e jẹ dọmu, ma gbe roro ga hrọ kpahe uye mai hi. “Udhedhẹ Ọghẹnẹ” o rẹ lẹliẹ udu kie omai vi nọ iroro idhọvẹ e tẹ vọ omai udu. Wọhọ egbaẹmo nọ a ro mu re a thọ okpẹwho no obọ ewegrẹ, ere “udhedhẹ Ọghẹnẹ” o te thọ udu gbe ẹgba-iroro mai. U ti je fiobọhọ k’omai si avro, ozodhẹ, gbe iroro ethọthọ no udu mai, o vẹ jẹ whaha omai nọ ma gbẹ rọ rehọ ugidi jẹ iroro igheghẹ hẹ.—Ol. 145:18.

12. Dhesẹ epanọ ohwo ọ sai ro wo udhedhẹ iroro.

¹² Ẹvẹ ma sai ro wo udhedhẹ iroro nọ ma tẹ be ruẹ uye? Joma rehọ oriruo jọ nọ o rẹ sai tho oghẹrẹ uyero nọ ma rrọ. Ma rehọ iẹe inọ ohwo jọ o bi ruiruo evaọ otọ ohwo nọ o re dhuaro. Ohwo nọ a rehọ iruo na o te gu oware nọ o be kẹe idhọvẹ na kẹ ohwo nọ o wo ekọmpene na, ọnọ ọ rrọ wowou, je wo ororokẹ. Ọnọ o wo ekọmpene na ọ tẹ ta kẹe inọ ọ riẹ oware nọ o be via gbe nnọ o ti si ọga riẹ na no ọkwa nọ ọ rrọ na kẹle. Ẹvẹ oma o rẹ jọ ohwo nọ a rehọ iruo na? Fikinọ u mu rie ẹro inọ ọnọ o wo ekọmpene na o ti gine ru epanọ ọ ta na, onana u re fiobọhọ kẹe gbe thihakọ o tẹ make rọnọ uye o te gbẹ dina bẹe. Epọvo na re, ma riẹ inọ Jihova ọ riẹ uyero mai, yọ ọ tuduhọ omai awọ inọ kẹle na o “ti le ọgba akpọ na no.” (Jọn 12:31) Onana o rrọ omosasọ kẹhẹ!

13. U te no olẹ nọ ma rẹ lẹ no, eme ọfa ma re ru?

¹³ Nọ o rrọ ere na, kọ re ma lẹ se Jihova kpahe ebẹbẹ mai ọvo u te? Ijo. O gwọlọ oware ofa mi omai. Ma re ru lele oware nọ ma be lẹ kpahe na. Okenọ Sọl Ovie na o vi ahwo kpobọ uwou Devidi re a kpei, Devidi ọ lẹ nọ: “Siwi omẹ no obọ ewegrẹ mẹ, O Ọghẹnẹ mẹ, thọ omẹ no obọ ahwo nọ a mukpahe omẹ, siwi omẹ no abọ otu umuomu, re whọ thọ omẹ no abọ otu ijihẹ.” (Ol. 59:1, 2) U te no olẹ nọ ọ lẹ no, Devidi o yo ẹme aye riẹ ọ tẹ dhẹ. (1 Sam. 19:11, 12) Epọvo na re, ma rẹ lẹ se Ọghẹnẹ re ọ k’omai areghẹ nọ ma re ro ru oware jọ kpahe ẹbẹbẹ mai.—Jem. 1:5.

Epanọ Ma Sai Ro Wo Ẹgba nọ Ma re Ro Thihakọ

14. Eme u re fiobọhọ k’omai thihakọ nọ ma tẹ rẹriẹ ovao ku okpẹtu?

¹⁴ O sae jọnọ ebẹbẹ nọ e rrọ omai oma i ti kuhọ ẹsiẹsiẹ hẹ. E sae gbẹ jọ rite oke jọ. Otẹrọ ere, eme u ti fiobọhọ k’omai thihakọ? Orọ ọsosuọ, kareghẹhọ inọ ma tẹ ruabọhọ be gọ Jihova ghelọ ebẹbẹ, yọ ma bi dhesẹ uyoyou nọ ma wo kẹe. (Iruẹru 14:22) Kareghẹhọ ota nọ Setan ọ bọwo Job: “Kọ Job ọ be dhozọ Ọghẹnẹ gheghe? Who gbe diogba wariẹ e, gbe uwou riẹ, gbe eware kpobi nọ o woi, evaọ kabọ kabọ? Whọ ghale iruo abọ riẹ, gbe eware kpobi nọ o woi, who te fi ẹvi họ ae evaọ otọ na. Rekọ enẹna riẹ obọ ra ro te eware kpobi nọ o woi, ọ vẹ te jọ iraro ra la owhẹ eka.” (Job 1:9-11) Job o dhesẹ Setan fihọ ọtọrue ẹkwoma ẹgbakiete riẹ nọ o kru. Ma te bi thihakọ ebẹbẹ, ma rẹ sai dhesẹ Setan fihọ ọtọrue re. Akothiho mai ọ vẹ te bọ ẹruore gbe udufihọ mai ga.—Jem. 1:4.

15. Iriruo vẹ e rẹ sae bọ omai ga?

¹⁵ Orọ avivẹ, kareghẹhọ inọ “uye utiona ovo na egbobọ te imoni ra nọ erọ akpọ na soso du.” (1 Pita 5:9) Ẹhẹ, “odawọ ọvuọvo o re bru owhẹ tha ha, ajokpa oghẹrẹ nọ u bi te ahwo kpobi.” (1 Kọr. 10:13) Fikiere, whọ rẹ sai wo ẹgba gbe udu nọ who te bi roro kpahe oriruo amọfa ukpenọ who re roro kpahe ebẹbẹ ra ọvo ẹsikpobi. (1 Tẹs. 1:5-7; Hib. 12:1) Keria totọ re who roro ziezi kpahe oriruo ahwo nọ whọ riẹ enọ i thihakọ no ghele uye edada. Whọ rẹ sae jọ ebe mai se ikuigbe uzuazọ ahwo nọ a ruẹ oghẹrẹ uye nọ whọ be ruẹ na no. Whọ te ruẹ nọ enana e te bọ owhẹ ga.

16. Ẹvẹ Ọghẹnẹ ọ rẹ rọ bọ omai ga okenọ ma tẹ rẹriẹ ovao ku ebẹbẹ sa-sa?

¹⁶ Orọ avesa, kareghẹhọ inọ Jihova họ “Ọsẹ ohrọ kpobi jegbe Ọghẹnẹ omosasọ kpobi; ọnọ o ru omai wo omosasọ eva uye mai, re ma ruẹse sasa enọ erọ eva uye kpobi oma, fiki omosasọ nọ mai oma mai a jọ obọ Ọghẹnẹ wo.” (2 Kọr. 1:3, 4) O wọhọ ẹsenọ Ọghẹnẹ o dikihẹ gba omai be tuduhọ omai awọ jẹ be bọ omai ga, orọnọ fiki uye nọ ma rrọ obọnana ọvo ho rekọ ‘evaọ uye mai kpobi.’ Onana u ve ti fiobọhọ k’omai ‘sasa enọ e rrọ eva uye kpobi oma.’ Pọl ọ rehọ ẹro ruẹ uzẹme ẹme nana.—2 Kọr. 4:8, 9; 11:23-27.

17. Ẹvẹ Ebaibol e sai ro fiobọhọ k’omai thihakọ ebẹbẹ uzuazọ?

¹⁷ Orọ avene, ma wo Ebaibol na, onọ o rrọ “erere rọ kẹ ewuhrẹ gbe ozọ-usio, avọ ọkpọvio gbe odhesẹkẹ eva ẹrẹreokie. Re ohwo Ọghẹnẹ na ọ ruẹse gba kiete, ọ vẹ jẹ thomavẹre kẹ iruo iwoma i ruo kpobi.” (2 Tim. 3:16, 17) Orọnikọ Ebaibol na i re ru omai “gba kiete” je fiobọhọ k’omai “thomavẹre kẹ iruo iwoma i ruo kpobi” ọvo ho. Rekọ i re je fiobọhọ k’omai thihakọ ebẹbẹ uzuazọ. I re je ru omai “gba kiete” jẹ “thomavẹre.” Otofa ubiẹme Griki ọsosuọ nọ a fa “thomavẹre” na họ “ruẹrẹ oma kpahe.” O sae jọnọ evaọ oke anwae a jẹ hae rehọ ẹme nana dhesẹ okọ nọ a koko eware kpobi họ eva no hayo ẹjini nọ ọ rẹ sai ru oware kpobi nọ a ku rie kẹ. Epọvo na re, Jihova ọ rehọ ẹkwoma Ebaibol na k’omai oware nọ ma gwọlọ kpobi re ma sai thihakọ ebẹbẹ kpobi nọ ma nya ku. Fikiere, ma rẹ sae ta nọ, “Otẹrọnọ Ọghẹnẹ ọ kuvẹ riẹ, o ti fiobọhọ k’omẹ thihakọ riẹ.”

Esiwo no Ebẹbẹ Mai Kpobi

18. Oware ofa vẹ u ti fiobọhọ k’omai thihakọ?

¹⁸ Orọ avisoi, hae kareghẹhọ ẹsikpobi inọ kẹle na Jihova o ti si ebẹbẹ kpobi no kẹ ahwo-akpọ. (Ol. 34:19; 37:9-11; 2 Pita 2:9) Evaọ oke yena, orọnikọ ebẹbẹ nọ i bi te omai enẹna ọvo Ọghẹnẹ o ti sino ho rekọ ọ te jẹ k’omai uzuazọ ebẹdẹ bẹdẹ, otujọ evaọ obọ odhiwu kugbe Jesu, efa kọ evaọ otọakpọ aparadase.

19. Eme o re fiobọhọ k’omai thihakọ?

¹⁹ Re oke yena o te ti te, ma gbe bi thihakọ ebẹbẹ erọ akpọ omuomu nana. Ma be rọ ọwhọ hẹrẹ okenọ ebẹbẹ nana kpobi i ti ro kuhọ. (Ol. 55:6-8) Joma kareghẹhọ inọ ithihakọ mai i re dhesẹ Ẹdhọ fihọ ọtọrue. Jọ elẹ mai e kẹ omai ẹgba re ma je wo ọbọga nọ ma be ruẹ inọ inievo mai efa a be ruẹ uye nọ ma be ruẹ re. Joma gbe fi eme nọ e rrọ Ebaibol họ iruo re ma ruẹse gba kiete jẹ thomavẹre ziezi. Whọ kuvẹ hẹ re eva nọ who fihọ ẹruọsa oyoyou orọ “Ọghẹnẹ omosasọ kpobi” na o kiekpo. Kareghẹhọ inọ “Ibiaro ỌNOWO i bi ri ikiẹrẹe, ezọ riẹ i bi yo eviẹ rai.”—Ol. 34:15.

Kọ Whọ Sae k’Uyo?

• Ẹvẹ Devidi o rri uye nọ u te rie?

• Imuẹro vẹ Solomọn Ovie na o dhesẹ via?

• Eme o rẹ sai fiobọhọ k’omai thihakọ oware nọ Jihova ọ kuvẹ riẹ?

[Uwoho nọ e rrọ ẹwẹ-obe avọ 13]

U mu Solomọn ẹro inọ Jihova o ti fiobọhọ kẹ ahwo Riẹ nọ uye o be bẹ

[Uwoho nọ e rrọ ẹwẹ-obe avọ 15]

Devidi o gbolo ohwa riẹ kẹ Jihova evaọ olẹ o te je ru lele oware nọ ọ lẹ kpahe