Ewhowho Emamọ Usi na Evaọ Ekwotọ Igbehru

MAI ahwo 18 ma wohọ uwou nọ otọ riẹ o jọ gbegbe. Nọ mai kpobi ma ruọ ọvuọ ẹkporo riẹ nọ a re kiẹzẹ no, ma te je yo edo oso nọ ọ be rọ fihọ idhe uwou na yọ ekpahe i bi kpe omai. Oghẹrẹ nọ uwou na o fariẹ te, u gbe omai unu sọ mai họ ahwo ọsosuọ nọ a tu rria uwou na.

Eme o lẹliẹ omai ahwo 18 ziọ oria nana? Uyo na họ ma gwọlọ ru uwou nọ Jesu o vi omai gba inọ ma whowho emamọ usi na “rite ọnyaba akpọ na.” (Iruẹru 1:8; Mat. 24:14) Ma jọ erẹ usiuwoma ota evaọ ewho igbehru nọ i sioma no evaọ obọ Bolivia.

Uye nọ O Jọ Edhere Bẹ Omai

Ẹbẹbẹ ọsosuọ họ epanọ ma re ro te oria na. A wo uzedhe oke he nọ imoto e rẹ rọ wọ ahwo kpohọ oria yena. Nọ omoto na ọ dhẹ ze, ọ rro te epanọ ma roro ho, fikiere ahwo mai jọ a te dikihẹ. Rekọ ukuhọ riẹ mai kpobi ma te obei.

Oware nọ o jọ omai udu họ epanọ ma rẹ rọ wha emamọ usi na se ahwo nọ e rrọ iwhre igbehru obọ Bolivia. Nọ omoto na o fi omai họ otọ no, ma tẹ wọ ehwa mai, ma tẹ rọ kpahe ohwohwo be gadiẹ igbehru na ruotọ.

Dede nọ iwhre na e rro ho, iwou na i thabọ no ohwohwo gaga, fikiere o rẹ rehọ euwa buobu re ma nya iwhre ọvo duwu. Epanọ ma nya thabọ te kẹhẹ, ma tẹ kpare ovao ma vẹ jẹ ruẹ uwou ọfa evaọ ugbo. Idhere na e whaliẹ te epanọ ma je ro vru dede.

“Eme Wha Gbẹ re Nyaze Anwẹdẹ Hẹ?”

Nọ aye jọ o yo epanọ obonọ ma no ze o thabọ te, oma o were riẹ te epanọ ọ rọ k’omai uvẹ inọ ma rehọ ire riẹ there emu uvo evaọ ikichini riẹ. Nọ ọzae jọ o yo kpahe oware nọ Ebaibol na i wuhrẹ kpahe uyero enọ i whu no, ọ tẹ nọ omai nọ: “Eme wha gbẹ re nyaze anwẹdẹ hẹ?” O wo isiuru te epanọ okenọ ma je no iwhre riẹ, o te su omai haro be nọ omai enọ efa. Ọzae ọfa jọ o ri yo kpahe Isẹri Jihova ẹdọvo ho, yọ o dhesẹ isiuru gaga kpahe ebe mai. O yere omai gaga fiki epanọ ma rọ nyaze ọ tẹ jẹ k’omai usiavẹ uwou owhre jọ nọ ma rẹ sai kiẹzẹ.

Evaọ aso ẹdẹjọ, fiki epanọ otọ u mu ebi gaga, ma riẹ hẹ ma tẹ tehe iwou-owhre mai fihọ ehru emerao ibiebi jọ. O raha oke he i te mu omai họ ẹrowo. O gbẹ rrọ oma nọ o lọhọ omai gaga ha, ma hae kwa kpohọ oria ọfa, rekọ uwhremu na e tẹ se omai ba.

Oke ọsosuọ, oma kpobi o jẹ da omai fiki otọ ogaga nọ ma je kiẹzẹ, rekọ uwhremu na o tẹ te reria omai oma. Yọ ma jẹ tubẹ kareghẹhọ edada ọvuọvo ho nọ ma tẹ rọwo ze evaọ ohiohiẹ jẹ ruẹ epanọ igbehru na i wo erru te evaọ ugbo avọ ekpalekpa-ame nọ i kie fihọ ae. Oria kpobi ọ jẹ hae jọ fọfọ rirẹ, edo nọ who re yo kpobi họ edo ame nọ o bi su evaọ uto jọ gbe edo-ile evra.

Nọ ma tẹ họ no evaọ uto na, ma ve se obe okpẹdẹ, re emu, kẹsena ma ve muhọ ẹnya kpohọ iwhre efa nọ e rrọ ugbo. Onya mai o jọ uvrẹvru hu. Ma nya ku ọkpọkuaye jọ nọ o kie ruọ oviẹ nọ ọ ruẹ inọ odẹ Ọghẹnẹ, Jihova, ọ rrọ evaọ Ebaibol. Eva e were riẹ thesiwa. Enẹna ọ tẹ be lẹ, ọ rẹ sai se odẹ Ọghẹnẹ!

Ọkpọkuọzae jọ ọ ta inọ kpakọ ọ re thọrọ Ọghẹnẹ ẹro ho, ọ tẹ va ruọ ole be so inọ ikọ-odhiwu i vi omai ze. Ọzae ọfa jọ, ọnọ ẹyao o kru fihọ uwou, ọ ta k’omai inọ uvumọ ohwo evaọ iwhre riẹ ọ be daezọ weze bru rie he. U gbe rie unu inọ ugbobọ La Paz ma no ze. U gbe ọzae ọfa unu inọ Isẹri Jihova a re weze bru ahwo evaọ iwou rai, kpakiyọ ichọche efa igogo a re ro se ahwo.

A jọ iwhre na kpobi wo ikpẹ ẹlẹtriki hi, fikiere oke u te bi siaro họ yọ ahwo a ruọ ehwa no, a vẹ kpama nọ otọ u te vẹ no. Fikiere, re ma ruẹsi di ahwo họ uwou, ma re muọ usiuwoma họ ẹta evaọ ighọjọ ezeza ohiohiẹ. Ogbẹrọ ere he, ahwo buobu a re kpohọ ẹwọ no. Uwhremu na, o jẹ ruọ otujọ nọ i mu iruo họ no re a d’obọ ji re a gaviezọ kẹ ẹme Ọghẹnẹ, onọ o jẹ lẹliẹ iruẹ nọ a re ro ruiruo evaọ idhu rai s’oma họ omojọ. Ahwo buobu nọ ma dihọ iwou a jẹ rehọ eviẹ arao hwa otọ k’omai keria, a ve se uviuwou rai kpobi keria re a gaviezọ. Ewhẹrẹ jọ a rehọ evawere rọ ekpa eka ru unevaze fiki ebe nọ ma fihọ ada kẹ ae.

“Mẹ Thọrọ Owhai Ẹro Ho”

Re ahwo a nyaharo evaọ eriariẹ Ebaibol, orọnikọ ẹsiẹvo ọvo a re weze bru rai hi. Ahwo buobu a lẹ omai re ma zihe ze ti wuhrẹ ai. Fiki onana, ma kpohọ ofẹ Bolivia nana unuẹse buobu no.

Evaọ erẹ nana jọ nọ ma nya kẹle, eva e were ọkpọkuaye jọ inọ ma zihe ze, ọ tẹ ta nọ: “Wha wọhọ emọ k’omẹ. Mẹ thọrọ owhai ẹro ho.” Ọzae jọ o yere omai kẹ iruo mai o te zizie omai inọ oke ọfa nọ ma nyaze, uwou riẹ ma ti wohọ. Erere ologbo jọ nọ o no omodawọ mai ze họ, aye jọ nọ ma ta usiuwoma kẹ ọ kwa kpohọ ẹwho ologbo jọ no, yọ ọ rrọ obei ta usiuwoma enẹna.

Evaọ ẹdẹ urere ọrọ erẹ ọsosuọ mai na, ekrasi nọ ma re kuhọ istovu ro there ẹbẹ i te re no, yọ emu mai e whoma re no. Ma te whu ire, koko erae họ, ma te there emu mai nọ o kiọkọ, ma re emu no ma tẹ ruọ edhere muhọ ekpo. Oria nọ ma rrọ na o thabọ gaga no oria nọ ma te jọ ruọ omoto. Oke u siaro họ no ma te te etẹe.

Okenọ Ma Je Kpo

Okenọ ma je kpo ebẹbẹ e jariẹ keme omoto na ọ raha. Ma tẹ te ruọ omoto ologbo jọ nọ ahwo a keke oma họ. Onana u te rovie uvẹ fihọ nọ ma rọ ta usiuwoma kẹ enọ ma gbẹ jọ omoto na keme u je gbe ai unu kpahe oware nọ o wọ omai kpohọ obei. Dede nọ a rẹ sasa oma tere he, a re dede ahwo rehọ.

O rehọ omai euwa izii evaọ omoto na re ma te te uwou—bi nuhu kpakpakpa fiki ekpahe. Rekọ oke nọ ma raha evaọ omoto na o jọ uvrẹvru hu. Okenọ ma jọ edhere ma ta kẹ aye jọ nọ ọ be rria okpẹwho jọ epanọ a re ro wuhrẹ Ebaibol kugbei.

O rrọ oware ọghọ re ma whowho emamọ usi na kẹ ahwo nọ e rrọ eria itieye na nọ i sioma no. Ma ta usiuwoma evaọ iwhre ene gbe eko buobu. Ẹme nọ ma jẹ hae kareghẹhọ họ: “Ẹvẹ awọ ọnọ ọ wha usi uwoma na o woma te eva obọ ehru igbehru, ọye nọ ọ be vuẹ ovuẹ udhedhẹ, ọnọ ọ be rehọ emamọ usi uwoma ze, ọnọ ọ be vuẹ ovuẹ usiwo!”—Aiz. 52:7; Rom 10:15.

[Uwoho nọ e rrọ ẹwẹ-obe avọ 17]

Ma wọ owọ usiuwoma ota no