Ọtamuo nọ O Wuzou Gaga

M E WO ọtamuo jọ nọ o wuzou gaga. Jọ mẹ ta oware nọ o wọ omẹ, oniọmọ nọ ọ rrọ ohwo Spain ru ọtamuo nana.

Udhedhẹ avọ okugbe o jọ uwou ọsẹgboni mẹ hẹ. Uweri o jọ uviuwou mai nọ oniọvo ọmaha mẹ o whu evaọ asidẹnte okenọ ọ jọ ikpe ene. Ofariẹ, ekpehre uruemu ọsẹ mẹ u ru rie jọ bẹbẹ kẹ oni mẹ re o wo evawere evaọ orọo. Rekọ, ghelọ ẹbẹbẹ nana, oni mẹ o wuhrẹ omẹ avọ oniọvo ọkpako mẹ uruemu ezi.

Uwhremu na, oniọvo mẹ o te ti wo aye, me te je wo ọzae. U kri hi, a tẹ jọ obọ ẹsipito ruẹ inọ oni mẹ o wo ẹyao-ọta, onọ o wha uwhu sei. Rekọ o whu siọ emamọ oware jọ ba k’omai.

Ogbẹnyusu riẹ jọ ọ ta ẹme kẹe no Ebaibol ze kpahe ẹruore ẹkparomatha na, oni mẹ ọ tẹ rọwo inọ ohwo na o wuhrẹ Ebaibol kugbei. Evaọ ubrobọ ekuhọ uzuazọ riẹ, ovuẹ Ebaibol nọ o rẹ kẹ ẹruore na u fiobọhọ kẹe wo evawere.

Nọ ma ruẹ epanọ ovuẹ Ebaibol na u kpomahọ oni mẹ te, mẹ avọ oniọvo mẹ ma te muọ Ebaibol họ ewuhrẹ. Amara ọvo o kiọkọ taure me te ti yẹ ọmọ avivẹ mẹ nọ ma se odẹ riẹ Lucía, mẹ tẹ họ-ame wọhọ omọvo Isẹri Jihova.

Ẹdẹ ame-ọhọ mẹ o wuzou k’omẹ gaga. Oware jọ nọ o lẹle e riẹ wuzou kẹ omẹ họ me zihe ruọ odibo Jihova nọ ọ roma mudhe kẹe no re mẹ gọe bẹdẹ bẹdẹ. Oware ofa họ me bi wuhrẹ emọ ivẹ mẹ kpahe orọwọ mẹ.

Rekọ evawere nọ me je wo no ọmọtẹ mẹ nọ mẹ jẹ rọ Ebaibol wuhrẹ ze u te kuhọ. Okenọ Lucía ọ kpako te ikpe ene no, eva e tẹ jẹ hae dae gaga. Nọ a kpohọ ẹsipito unuẹse buobu no, edọkita nọ ọ rẹ rehọ ifoto ẹyao nọ ọ rrọ obeva oma ohwo ọ tẹ ta inọ ẹgbẹ nọ ọ rro te otiowo ọ ta no edhẹ riẹ ze. Edọkita na ọ tẹ ta inọ ẹgbẹ nọ ọ rọ Lucía eva na ọ be rro vẹrẹ gaga. Enẹ ẹyao-ọta nọ o rehọ Lucía siotọ ikpe ihrẹ, nọ ọ jẹ hae rọ jọ ẹsipito edẹ buobu u ro muhọ.

Ẹzi Omolahiẹ kẹ Amọfa

Evaọ etoke ikpe ebẹbẹ nana, ẹsikpobi Lucía ọ jẹ hae gbalọ omẹ jẹ viọlọ omẹ unu rọ tuduhọ omẹ awọ. Oghẹrẹ nọ o ro thihakọ ẹyao na o tẹ jẹ were enọ i je ru iruo evaọ ẹsipito na gaga. Ẹsikpobi o je fiobọhọ kẹ enọso nọ e rọ ẹsipito na wọ emu se emọ efa nọ e be mọ evaọ ẹsipito na. Enọso na a tubẹ kẹ Lucía ewu ọfuafo nọ enọso a re fihọ ro ru iruo gbe ebaje nọ a re ro vuhu iei wọhọ “ọnọ o re fiobọhọ kẹ enọso.”

Ohwo jọ nọ ọ rọ ẹsipito na ru iruo ọ ta inọ: “Lucía o duobọte omẹ udu. Ọ jọ ọmọ nọ ọ rọ jajaja, ọ goma iruo, yọ o jẹ hae were iẹe gaga re ọ drọ eware. Ọ sasa gaga yọ o re je ru wọhọ ọkpako.”

Ẹme Ọghẹnẹ ọ kẹ Lucía ẹgba. (Hib. 4:12) U mu rie ẹro inọ evaọ akpọ ọkpokpọ na, wọhọ epanọ Ebaibol e ya eyaa riẹ na, “uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho.” (Evia. 21:4) Fikinọ o wo isiuru kẹ amọfa, ọ jẹ hae rehọ uvẹ kpobi rọ ta ẹme Ọghẹnẹ kẹ ahwo. Ẹruore ẹkparomatha nọ Lucía o wo u fiobọhọ kẹe kru udu ga jẹ wereva dede nọ ọ riẹ inọ a te sai siwi ẹyao na ha. (Aiz. 25:8) Ọ yọrọ uruemu nana rite ẹdẹ nọ o ro whu.

Ẹdẹ ọyena me ro ru ọtamuo nọ o wuzou gaga na. Lucía ọ gbẹ jẹ sai rovie aro ho. Ọsẹ riẹ o kru obọ riẹ jọ me te kru obọ ọdekọ. Mẹ tẹ ta kẹe nọ: “Whọ ruawa ha, mẹ be nya siọ owhẹ ba ha. Thakpi se ẹwẹ ẹrera. A tẹ kpare owhẹ ze no, oma ra o te ga. Whọ te gbẹ ruẹ uye edada ha, yọ mẹ te jọ kugbe owhẹ.”

Enẹna me re ru eyaa mẹ na gba. Mẹ riẹ inọ etoke ohẹrẹ na o te lọhọ họ. Rekọ mẹ riẹ re inọ me te fi eva họ Jihova avọ ithihakọ jẹ yọrọ ẹgbakiete mẹ, mẹ te rue riẹ nọ a tẹ kpariẹ no uwhu ze.

Oriruo nọ Lucía O Fihotọ

Oriruo emamọ udu nọ Lucía o wo gbe obufihọ ukoko na, u duobọte ọzae mẹ nọ ọ jọ omọvo Isẹri Jihova ha. Evaọ ẹdẹ nọ Lucía o ro whu, ọzae mẹ ọ ta kẹ omẹ inọ o ti nwene iroro riẹ. Ekpoka jọ e vrẹ no, ọ tẹ ta kẹ ọkpako jọ evaọ ukoko na inọ ọ gwọlọ re a wuhrẹ Ebaibol kugbei. U kri hi ọzae mẹ o te mu iwuhrẹ na kpobi họ ẹnya. Avọ obufihọ Jihova ọ tẹ siọ ivovavovo ba, oware nọ ọ be sai si obọ no anwẹdẹ hẹ.

Uweri nọ uwhu Lucía o wha se omẹ u ri no omẹ oma riẹriẹriẹ hẹ, ghele na me yeri Jihova kẹ oriruo nọ Lucía o fihotọ. Mẹ avọ ọzae mẹ ma rẹ rọ ẹruore ẹkparomatha na tuduhọ ohwohwo awọ, tubẹ jọ udu mai roro kpahe okenọ ma te wariẹ ruẹ Lucía—ovao osasa riẹ, gbe ibiegba riẹ nọ e rẹ nẹ ro nọ ọ tẹ be hwẹ.

Uwhu ọmọtẹ mẹ na o te je duobọte ohwo jọ evaọ okegbe mai gaga. Evaọ ohiohiẹ Ẹdẹ-Ọmaha jọ nọ oso ọ jẹ rọ, aye jọ nọ ọmọ riẹ o kpohọ isukulu evona nọ Lucía ọ nya ọ tẹ ziọ uwou mai. Ẹyao nọ o kpe Lucía na o kpe emọ ivẹ riẹ no, ọmọ avivẹ nọ ẹyao na o kpe na ọ jọ ikpe 11. Nọ o yo oware nọ o via kẹ Lucía, ọ tẹ gwọlọ oria nọ ma be rria o je weze bru omai ze. Ọ gwọlọ riẹ epanọ mẹ be sai ro thihakọ uwhu Lucía na ọ tẹ jẹ jiroro inọ u fo re ma koko utu jọ nọ ma rẹ jọ sasa iniemọ efa nọ oware utiona o via kẹ oma.

Mẹ tẹ ta kẹe vevẹ inọ eyaa jọ evaọ Ebaibol na o kẹ omẹ uvi omosasọ no, omosasọ nọ u vi onọ ohwo-akpọ ọ rẹ kẹ. Ovao riẹ o tẹ sasa nọ me se eme Jesu nọ a kere fihọ Jọn 5:28, 29 kẹe. Ọ tẹ ta inọ me wuhrẹ Ebaibol kugbei yọ u kri hi o te mu “udhedhẹ Ọghẹnẹ nọ uvi eriariẹ kpobi” na họ e wo. (Fil. 4:7) Ẹsibuobu nọ ma te bi wuhrẹ Ebaibol kugbe, ma re dhizu ma ve roro epanọ o te jọ omai oma evaọ akpọ ọkpokpọ na nọ ma ti dede enọ ma you nọ i whu no rehọ evaọ ẹkparomatha na.

Ẹhẹ, Lucía ọ rria tọ họ, rekọ o fi emamọ oriruo h’otọ. Ẹrọwọ riẹ u fiobọhọ ku uviuwou mai gbe be gọ Ọghẹnẹ, o tẹ jẹ lẹliẹ ọtamuo mẹ ga viere no re me dikihẹ ga evaọ ẹrọwọ na. Ababọ avro, mai kpobi nọ ahwo nọ ma you a whu ku nọ a te kpare ze a wo ọtamuo nọ o wuzou gaga.

[Uwoho nọ e rrọ ẹwẹ-obe avọ 20]

Oghẹrẹ nọ Lucía ọ drọ Aparadase