Idẹn—Kọ Etẹe A Ma Ohwo Ọsosuọ Fihọ?
DAE rehọ iẹe nọ whọ rrọ ọgbọ owowoma jọ. Oria kpobi o rrọ rirẹ. Who bi yo edo egba imoto hayo eware itieye na efa nọ e rẹ wha edo họ ẹwho ho. Ọgbọ na ọ rrọ kẹkẹe reghe reghe, yọ ozighi ọ riẹ hẹ. Mai tube woma na, oware ovo u bi ru owhẹ ruawa ha. Whọ be mọ họ, who wo edada ọvuọvo ho, oware ọvuọvo ọ be kẹ owhẹ uye evaọ oma ha. Oma ra o rrọ sasasa, yọ eware nọ whọ be ruẹ e be were owhẹ oma ọvo.
Who te bi rri wariẹ ọvo. Nọ who rri abọ jọ, whọ tẹ ruẹ idodo iwowoma nọ i wo ọvuọ ekọlọ riẹ. Kẹsena whọ tẹ kparo ruẹ eyeri-ame nọ ame riẹ ọ rrọ fuafo tẹtẹtẹ. Whọ tẹ jẹ ruẹ oghẹrẹ ire sa-sa nọ ebe rai e rrọ bọbọbọ, gbe ẹbe nọ ọ gbọ fihọ eria kpobi. Ọre o bi lo mu ebe jọ, yọ efa edhedhẹ ire na o ruru i rai. Ofou o bi fou ku owhẹ yẹrẹ yẹrẹ, yọ emamọ ore idodo nọ ofou na o bi fou ze a rẹ ruẹ unu gbiku riẹ hẹ. Who te bi yo edo ebe ire nọ ofou na o bi fou, gbe edo ame nọ ọ be fa itho. Who te bi je yo edo evra nọ e be so ile gbe edo emera nọ i bi tu. Kọ oria nana nọ ma ta kpahe na ọ were owhẹ? Kọ whọ gbẹ hae gwọlọ rria oria utiona?
Evaọ eria buobu evaọ akpọ na, ahwo a rọwo nọ oria uwowoma utioye a ma ohwo ọsosuọ fihọ. Anwọ ikpe buobu ze na, ahwo egagọ sa-sa, wọhọ egagọ ahwo Ju, enọ i re kpohọ ichọche, gbe egagọ ahwo Muslim a re wuhrẹ nọ Ọghẹnẹ ọ ma Adamu avọ Ivi fihọ ọgbọ Idẹn. Ebaibol na ọ ta nọ Adamu avọ Ivi a je yeri uzuazọ rai avọ evawere evaọ oke ọsosuọ, oware ovo o jẹ kẹ ae uye he. A jẹ rria dhedhẹ kugbe ohwohwo. Ozọ erao na u je mu ai hi. A te je wo usu okpekpe kugbe Ọghẹnẹ. Ọghẹnẹ ọ ma rai fihọ oria uwowoma nana re a rriae bẹdẹ bẹdẹ.—Emuhọ 2:15-24.
Ahwo Hindu omarai a re wuhrẹ nọ evaọ oke anwae, ahwo a jẹ rria aparadase. Ahwo egagọ Buddha a rọwo nọ oke nọ isu ilogbo rai nọ a re se Buddha a re ro su họ oke nọ ẹbẹbẹ ọvuọvo ọ rrọ akpọ na ha, nọ ahwo a tẹ rrọ aparadase. Yọ egagọ sa-sa evaọ Africa a rẹ zọhọ esia nọ e wọhọ iku Adamu avọ Ivi na.
Uzẹme riẹ họ, ahwo buobu evaọ eria sa-sa akpọ na a rẹ jọ egagọ rai ta kpahe oke nọ aparadase ọ rọ jọ akpọ na. Ahwo a te je wo iku nọ a re gbe, nọ a rẹ jọ ta kpahe oke nọ ẹbẹbẹ ọvo ọ jọ akpọ na ha. Okere-obe jọ ọ ta nọ: “Ahwo buobu evaọ etoke sa-sa a rọwo nọ aparadase ọ jọ otọakpọ na evaọ oke krẹkri nọ u kpemu. Oke yena ahwo a jọ gbagba, a wo ufuoma, udhedhẹ, evawere, a jẹ ruẹ re, a wo ẹbẹbẹ ọvuọvo ho, a jẹ ruawa ha, a jẹ họre kuoma gbe he. . . . Eware nana nọ ahwo buobu a rọwo na o be lẹliẹ ai roro nọ dodokọ aparadase ọ rẹ wariẹ jọ akpọ na. Yọ a be gwọlọ epa kpobi nọ ọ sae rọ wariẹ zihe ze.”
Kọ o sae jọ nọ iku nana kpobi gbe eware nana nọ ahwo a bi wuhrẹ na oria ọvo i no ze? Kọ o sae jọ nọ “eware nana nọ ahwo buobu a rọwo na” yọ eware nọ e ginẹ jọ akpọ na ẹdẹ jọ? Kọ ọgbọ Idẹn ọ ginẹ jariẹ evaọ oke krẹkri nọ u kpemu? Kọ Adamu avọ Ivi yọ ahwo nọ a ginẹ rria otọakpọ na?
Egba-avro a rẹ ta nọ o via ere vievie he. Ahwo buobu a re roro nọ a rovie aro vi epanọ a sae rọ rọwo iku itieye. A rẹ ta nọ iku yena yọ iku esia gheghe. Mai tube gbunu na, orọnikọ egba-eriariẹ ọvo ae a wo avro nana ha. Makọ isu egagọ buobu a be ta nọ ọgbọ Idẹn ọ jọ oria ọvo ẹdẹvo ho. A rẹ ta nọ iku yena yọ iku esia, ohare, ọtadhesẹ, hayo iku nọ a bi ro wuhrẹ oware ofa.
Etadhesẹ e ginẹ rrọ Ebaibol na. Etadhesẹ Jesu nọ ahwo a riẹ gaga na e rrọ Ebaibol na re. Rekọ iku ọgbọ Idẹn nọ e rrọ eva Ebaibol na orọnikọ ọtadhesẹ vievie he. Oware nọ o via dẹẹ. Kọ otẹrọnọ iku Adamu avọ Ivi na uzẹme he, ẹvẹ ma sai ro fievahọ eware nọ i kiọkọ nọ e rrọ Ebaibol na? Joma ta kpahe eware jọ nọ e be hae lẹliẹ ahwo jọ vro eware nọ Ebaibol na ọ ta kpahe ọgbọ Idẹn na, re ma rri sọ eware nana i te eware nọ a rẹ ginẹ rọ fiki rai vro iku na. Kẹsena ma vẹ te ruẹ epanọ u ro wuzou gaga re mai kpobi ma riẹ iku nana totọ.