Epanọ Whọ Sai ro Ru Uwuhrẹ Ebaibol Ra Woma Ziezi jẹ Reawere Riẹ

Joshua nọ o bi se obe Uzi na; igbẹhẹ Jẹriko nọ i kporo kuotọ yọ ubruwou Rehab u gbe dikihẹ; Joshua nọ ọ kpare abọ kpehru be lẹ se Jihova

JOSHUA ọ rẹriẹ ovao dhe ẹbẹbẹ ologbo jọ. Ọye o ti su orẹwho Izrẹl ruọ Ẹkwotọ Eyaa na avọ ezadhe ilogbo nọ ọ te rẹriẹ ovao dhe. Ghele na, Jihova ọ kẹ riẹ imuẹro nọ ọ te kparobọ, ọ tẹ tuduhọ ei awọ inọ: ‘Thakpinọ wo udu, avọ oma ukruga. Koko uzi mẹ. Sei te aso te uvo, re whọ romatotọ ru epanọ a kere fihọ eva riẹ na. Re edhere ra o kiehọ kẹ owhẹ wowoma, kẹsena who ve ti wo emamọ obokparọ.’—Jos. 1:7, 8

Evaọ ‘oke obẹbẹ nana nọ o be bẹ eyeri’ na, ma be rẹriẹ ovao dhe ebẹbẹ ilogbo re. (2 Tim. 3:1) Wọhọ Joshua, eware e sae riẹ nya kẹ omai nọ ma te lele ohrẹ nọ Jihova ọ kẹ riẹ na. Ma re se Ebaibol na kẹse kẹse, ma vẹ romatotọ fi ehrẹ riẹ họ iruo nọ edawọ i te te omai.

Rekọ, mai ibuobu ma sae ta nọ obe-use o rẹ were omai tere he, yọ o lọhọ kẹ omai re ma wuhrẹ oware he. Ghele na, nọ orọnọ u wuzou gaga re ma wuhrẹ Ebaibol na, kiẹ ẹkpẹti na “Dawo Eware Nana,” re whọ ruẹ emamọ eware jọ nọ e rẹ sai ru uwuhrẹ Ebaibol ra woma ziezi whọ vẹ reawere riẹ.

Ọso-ilezi na ọ so nọ: “He su omẹ họ eva edhere izi ra, keme e were omẹ hrọ.” (Ol. 119:35) Nọ who te bi wuhrẹ Ẹme Ọghẹnẹ, who re wo evawere gaga. Whọ te ruẹ eware aghae buobu nọ whọ be kiẹ kodo evaọ Ẹme Ọghẹnẹ na.

Dede nọ who ti su orẹwho jọ wọhọ epanọ Joshua o ru na ha, who wo ebẹbẹ nọ whọ be rẹriẹ ovao dhe. Fikiere, wọhọ Joshua, wuhrẹ je ru lele eware nọ a kere re e kẹ owhẹ erere na. Who te ru ere, eware i ti woma kẹ owhẹ re, yọ who ti ru eware avọ areghẹ.

DAWO EWARE NANA

Lẹ taure who te ti mu uwuhrẹ na họ. Eme nọ e rrọ Ebaibol na yọ iroro Ọghẹnẹ erumeru na nọ o kere fihọ otọ nọ e rẹ kẹ owhẹ erere. Fikiere, okenọ who te bi se Ebaibol na, yare iẹe re o fiobọhọ kẹ owhẹ wo otoriẹ riẹ, re whọ kareghẹhọ, je fi ei họ iruo evaọ uzuazọ ra.—Ẹzra 7:10.
Nọ omara enọ nọ who bi se Ebaibol na hayo ebe ukoko na. ‘Eme oria nana u wuhrẹ omẹ kpahe Jihova? Ẹvẹ onana o rọ rọwokugbe ovuẹ nọ o rrọ Ebaibol na? Ẹvẹ mẹ sae rọ rehọ eme nana fiobọhọ kẹ amọfa?’
Roro didi kpahe oware nọ who bi wuhrẹ na. Dobọji evaọ isase na, re whọ nọ omara nọ: ‘Ẹvẹ ẹme nana ọ rrọ omẹ oma? Fikieme o rọ rrọ omẹ oma ere? Ẹvẹ u ro kiekpahe eware nọ e via kẹ omẹ no, oghẹrẹ nọ eware e rrọ kẹ omẹ obọnana, hayo eware nọ e sae via evaọ obaro? Ẹvẹ mẹ sai ro fi ehri-izi Ebaibol nana gbe ohrẹ nana họ iruo evaọ uzuazọ mẹ?’ (Job 23:5; Ol. 49:3) Daoma sọ whọ sae ta oware nọ o lẹliẹ Jihova ta kẹ ahwo riẹ nọ a whaha oghẹrẹ iruemu jọ hayo oware nọ o rẹ sai noi ze nọ ma gbe ru oware nọ ọ ta ha.—Izie. 32:28, 29.
Jọ iroro ra ruẹ oware nọ who bi se na. Nọ who te bi se iku hayo oware nọ a dhesẹ, jọ iroro ra ruẹ oware na. Wọhọ oriruo, kọ whọ sae jọ iroro ra ruẹ epanọ inievo Josẹf a be rọ zẹe kẹ ahwo Ishmẹl? (Emu. 37:18-28) Eme whọ be ruẹ, didi edo gbe ore who bi yo? Fi omara họ ẹta ahwo nọ who bi se kpahe na. Eme a bi roro, kọ ẹvẹ o rrọ e rai oma? Oghẹrẹ eroro otiọye u re ru oware nọ who bi wuhrẹ vẹ owhẹ ẹro je wo otofa.
Rehọ ebe gbe eware efa ruiruo. Ukoko na u ru eware sa-sa no nọ whọ sai ro ru ekiakiẹ ra ziezi. Daoma riẹ ebe gbe eware efa nọ e riẹ evaọ ẹvẹrẹ ra, te enọ e rrọ itanẹte gbe enọ a printi. Whọ dhomovuọ họ re whọ ta kẹ amọfa nọ a fiobọhọ kẹ owhẹ riẹ epanọ a rẹ rehọ ai ru ekiakiẹ ziezi. Wọhọ oriruo, Watch Tower Publications Index hayo Obe Ekiakiẹ Rọkẹ Isẹri Jihova na i re fiobọhọ kẹ owhẹ ruẹ eware nọ a kere no kpahe izoẹme buobu, gbe oghẹrẹ nọ a fa otọ eria Ebaibol sa-sa. Rehọ eria eme-ofiba New World Translation of the Holy Scriptures na ruiruo otẹrọnọ o rrọ ẹvẹrẹ nọ whọ riẹ. Whọ rẹ jarai ruẹ emapo, iku nọ a ruẹrẹhọ othotha epanọ e rọ via, eware nọ a rẹ rọ wawọ ẹgbẹdẹ, uthethei, hayo ekodo, gbe eware efa.
Koko igogo eme na họ. Koko igogo eme nọ e rrọ oria nọ who se na họ re u fiobọhọ kẹ owhẹ kareghẹhọ oware nọ who se na. Mai tube woma na, ta oware nọ who wuhrẹ kẹ amọfa. Kọ who wuhrẹ oware jọ nọ whọ sai ro ruiruo evaọ usiuwoma? Who te bi ru enẹ, igogo eme na e te jọ owhẹ iroro, whọ vẹ te jẹ sae rehọ oware nọ who wuhrẹ fiobọhọ kẹ amọfa.