Obe Eviavia—Usiavẹ Kpohọ Evawere Uzẹme
1 Eme ọ Jọn ukọ na evaọ Eviavia 1:3 yọ emamọ usi k’omai keme ọ vuẹ omai epanọ ma rẹ rọ ruẹ evawere. O kere nọ: “Eva e were ọnọ o se eme aruọruẹ na via, gbe ọnọ o koko eme nọ e riẹe.” [NW ] Obe na Revelation—Its Grand Climax At Hand! u fiobọhọ kẹ ahwo buobu no evaọ eduku evawere buobu. Ma wo omamọ ẹjiroro nọ ma ro fi ei họ ada kẹ amọfa.
2 Whọ sai mu ẹmeọta họ avọ onọ onana:
◼ “Kọ who roro nnọ obe Eviavia Ebaibol na a kere i rie re a riotọ riẹ, hayo kọ o rẹ jọ obe udidi ẹsikpobi? [Kuvẹ kẹ uyo.] Ahwo buobu a wo oghẹrẹ iroro evo na kugbe owhẹ. Muẹrohọ oware nọ Ebaibol ọ ta evaọ Eviavia 1:3. [Sei.] Fikiere a sai wo otoriẹ obe Eviavia, yọ eriariẹ nọ e riẹe e rẹ sae wha evawere s’omai. Ẹvẹ onana o rọ lọhọ?” Kiẹ eme n’erọ edhe-ẹme 2 evaọ ẹwẹre-obe 6 riwi, whọ vẹ ta nọ: “Obe onana o t’ẹme kpahe owọ ọvuọvo ọrọ obe Eviavia. Obe onana u fo ọnọ whọ rẹ raha oke se. O te were omẹ re mẹ nyase obe na ba k’owhẹ avọ azọhọ ₦240.”
3 Nọ ahwo buobu a be ruawa oghẹrẹ nọ a sai ro wo ẹgwọlọ iwo rai na, onana o sae ru isiuru jọ:
◼ “Eme who roro nọ o mae rọ ẹgwọlọ mai? [Kuvẹ kẹ uyo.] Ahwo buobu a riẹ nọ a wo imuẹro nnọ ma gwọlọ ekwakwa ugboma buobu.” Rovie kpohọ ẹwẹre-obe 73 re whọ kiẹ igogo-eme n’erọ etehe nọ o wo uzoẹme “Materialism Versus Wisdom” (Ekwakwa Efe avọ Areghẹ). Who ve fibae ta nọ: “Onana u dhesẹ nọ ahwo a bi fi ẹgba họ eware ekwakwa ga hrọ; ẹgwọlọ ẹzi mai oye o rẹ mae j’omai oja. Eriariẹ uzẹme họ oware nọ ma ghinẹ gwọlọ. Rekọ eriariẹ kpahe eme?” Se Jọn 17:3, je dhesẹ epanọ eriariẹ kpahe Ọghẹnẹ e sai ro su kpohọ uzuazọ ebẹdẹ bẹdẹ. Fi obe na họ ada evaọ unu azọhọ riẹ, jẹ ruẹrẹ kpahe kẹ ezihetha ra re who dhesẹ epanọ obe na u ro rovie evuẹ igbunu kpahe ẹjiroro Ọghẹnẹ nọ o ti ro ru ẹgwọlọ ahwo-akpọ kpobi gba via.
4 Nọ ahwo buobu a be ruawa kpahe uye nọ o rọ akpọ na, whọ sae dawo onana:
◼ “Ohwo kpobi nọ mẹ ta ẹme kugbe ọ be ruawa kpahe obaro. Isu akpọ jọ a roro nọ ma sikẹle oge ọkpokpọ udhedhẹ no. Ẹvẹ who roro kpahe onana? [Kuvẹ kẹ uyo.] Makọ omodawọ ohwo dede, ozighi gbe uye u gbe bi vihọ evaọ akpọ soso. Ebaibol o dhesẹ ifue ebẹbẹ okrẹkri ọvuọvo. [Se 2 Pita 3:13. Rovie kpohọ uwoho nọ o rọ ẹwẹre-obe 302, je dhesẹ oghẹrẹ nọ Uvie Ọghẹnẹ ob’odhiwu ọ te rọ rehọ udhedhẹ gbe omofọwẹ okrẹkri ze akpọ ọnana.] Obe onana u ti fiobọhọ k’owhẹ ruẹ oghẹrẹ nọ whọ sae rọ jọ omọvo ahwo ukoko okpokpọ nana nọ e te reawere uzuazọ ebẹdẹ bẹdẹ evaọ otọ esuo Uvie Ọghẹnẹ.”
5 Otẹrọnọ whọ nyaku ohwo jọ nọ obọ riẹ orọ oware yọ u fo nọ who ru ẹme ra kpẹkpẹe, whọ sae ta enẹ:
◼ “Nọ who wo uvẹ hẹ na, mẹ gwọlọ nyase omobe ovẹvẹ onana [hayo uzoẹme emagazini] nọ uzoẹme riẹ o rọ [salọ omobe-ovẹvẹ hayo uzoẹme nọ u fo] ba k’owhẹ. Mẹ tudu họ owhẹ awọ nọ who sei. Nọ mẹ tẹ nyaze okiọfa, mẹ te nọ owhẹ oware nọ who roro kpahiẹe.”
6 Okenọ who te bi fi ebe mai họ ada, kẹ amọfa uvẹ re a dhesẹ ovuhumuo rai ẹkwoma ẹzọhọ fihọ obe na evaọ edhere nọ u fo. Evuẹ nọ e rọ obe na i ti fiba evawere nọ a ti wo ẹkwoma evuhumu otofa eruẹaruẹ igbunu ọ obe Eviavia na.—Itẹ 3:13.