Fiobọhọ Kẹ Ai Wo Otoriẹ
1 Pita ukọ na o vuhumu nọ eware jọ nọ a kere fihọ Ebaibol na “e rẹ bẹ ẹriẹ.” (2 Pita 3:16) Ere o rọ ahwo buobu oma kpahe obe Eviavia na. Ghele, otoriẹ riẹ a ru riei vevẹ no evaọ obe na Revelation—Its Grand Climax At Hand! Ẹvẹ ma sai ro fiobọhọ kẹ enọ i wo isiuru re a sae rehiẹe ru emamọ iruo?
2 Otẹrọnọ whọ t’ẹme kpahe Eviavia 1:3 evaọ iweze ọsosuọ ra, ẹjiroro ọnana ọ sae wọ isiuru ekpokpọ:
◼ “Oke ọsosuọ ma t’ẹme kpahe oghẹrẹ nọ otoriẹ obe Eviavia o sae rọ wha evawere ze. Ghele, evawere utioye na u re mu nyaze gheghe he. O tẹ make kawo eware ivẹ o gwọlọ mi omai: Ma re wuhrẹ Ebaibol na hrọ, ma ve je ru lele oware nọ ma wuhrẹ.” Se jẹ t’ẹme kpahe Jemis 1:25. Rovie kpohọ edhe-ẹme 9 evaọ ẹwẹre-obe 8, jẹ riobọ họ oghẹrẹ nọ otoriẹ obe Eviavia o sai ro fiobọhọ k’omai wuhrẹ epanọ ma sai ro wo evawere evaọ aparadase akpọ ọkpokpọ na.
3 Otẹrọnọ whọ t’ẹme kpahe Jọn 17:3 evaọ oke ọsosuọ nọ who te etẹe, whọ sai fi ẹgba họ ẹgwọlọ ewo eriariẹ Ebaibol buobu whọ vẹ ta nọ:
◼ “Evaọ ẹnyaze ọsosuọ mẹ, ma se Jọn 17:3 inọ ewo eriariẹ kpahe Ọghẹnẹ o rẹ sai su kpohọ uzuazọ ebẹdẹ bẹdẹ. Rekọ whọ gwọlọ rria bẹdẹ bẹdẹ evaọ oghẹrẹ akpọ nọ ma be rria nẹnẹ na? [Kuvẹ kẹ uyo.] Ahwo buobu a gwọlọ ere he. Fiki onana, ma rẹ sae ghọghọ nọ ma te yo oware nọ Ọghẹnẹ ọ ya eyaa riẹ.” Rovie kpohọ edhe-ẹme 6 evaọ ẹwẹre-obe 303, se Eviavia 21:4, je dhesẹ oghẹrẹ nọ akpọ na ọ te jọ okenọ “eware anwae evrẹ no.” Vuẹe nnọ whọ te wariẹ zihe tha re wha gbẹ t’ẹme na haro.
4 Whọ tẹ rehọ uwoho nọ o rọ ẹwẹre-obe 302 ro dhesẹ nọ Uvie Ọghẹnẹ o te rehọ uye t’oba, whọ sae wariẹ rovie obe na kpohọ ẹwẹre-obe ọyena whọ vẹ ta nọ:
◼ “Oke ọsosuọ mẹ t’ẹme kpahe eghale nọ a dhesẹ fihọ etenẹ na nọ ahwo a te reawere rai evaọ otọ esuo Uvie Ọghẹnẹ. Eme who roro nọ ma re ru hrọ otẹrọnọ ma gwọlọ rria otọ Uvie oyena? [Kuvẹ kẹ uyo.] Ahwo jọ evaọ etoke Ebaibol a fi oriruo obọdẹ h’otọ nọ u fo nọ ma rẹ r’aro kele.” Se Iruẹru 17:11, re whọ t’udu hiẹe awọ oware nọ u je fo re a ‘riwi Ikereakere na kẹdẹ kẹdẹ.’ Dhesẹ nọ Isẹri Jihova a bi fiobọhọ kẹ ahwo oruọzewọ nọ e rọ okegbe na re a wuhrẹ Ẹme Ọghẹnẹ je wo otoriẹ riẹ viere.
5 Otẹrọnọ whọ nyase omobe-ovẹvẹ na “Kọ Akpọ Ọnana Ọ Te Zọ?” ba kẹ ọnọ o wo uwou nọ o w’uvẹ ẹmeọta vẹre he, whọ sae rehọ edhere ọnana ruiruo:
◼ “Kẹle na nọ me te etenẹ, obọ ra o jọ iruo gaga. Mẹ nyase omobe-ovẹvẹ jọ ba k’owhẹ nọ o n’onọ kpahe ẹzọ akpọ na no oke ogaga onana. Ẹdẹ ọyena ma se Eviavia 21:4, nọ a kere fihọ obe onana, Revelation—Its Grand Climax At Hand! [Sei no edhe-ẹme 6 evaọ ẹwẹre-obe 303.] Uwoho nana [evaọ ẹwẹre-obe 302] o k’owhẹ eriwo oghẹrẹ nọ o te jọ okenọ ‘Ọghẹnẹ o ti ririe irui kpobi no aro mai.’ Obe onana o k’omai imuẹro nnọ eyaa enana i ti rugba evaọ obaro kẹle. Otẹrọnọ whọ gwọlọ sei, ọ te jọ ọra evaọ azọhọ ₦240.”
6 Otẹrọnọ whọ nya ku ohwo nọ o wo isiuru, evaọ ekuhọ ẹme na whọ rẹ rẹriẹ ova riẹ kpohọ obe na Eriariẹ Nọ I Re Su Kpohọ Uzuazọ Ebẹdẹ Bẹdẹ whọ vẹ rehiẹe mu uwuhrẹ họ. Ababọ avro, whọ te ruẹ oghọghọ buobu evaọ obọfihọ “otoriẹ rọ kẹ enọ e riẹ ovuovo ho.”—Ol. 119:130.