Kpẹwẹ Jihova “Kẹdẹ Kẹdẹ”
1 Eyaa nọ Devidi Ovie na ọ yaa kẹ Jihova e rọ Olezi 145:2: “Kẹdẹ kẹdẹ mẹ rẹ kpẹwẹ owhẹ, me ve jiri odẹ ra bẹdẹ bẹdẹ.” Ma wo oware nọ o soriẹ nọ ma rọ kpẹwẹ je jiri Ọsẹ ob’odhiwu mai re! Rekọ ẹvẹ ma sae rọ raro kele oriruo Devidi evaọ ẹkpare kpehru ọ osu-ọ-atanure Jihova “kẹdẹ kẹdẹ”?
2 Rehọ Ovuhumuo Jihova vọ Idu Mai: Ewuhrẹ Ẹme Ọghẹnẹ kẹse kẹse u re ru edẹro mai kodo kẹ oware nọ Jihova o ru no, onọ o bi ru, gbe onọ o ti ru k’omai evaọ obaro. Nọ ma be rro haro evaọ ovuhumuo kẹ iruo igbunu riẹ na, ma te ruẹ omobọ mai nọ ewoma riẹ ọ be d’omai oma fia. (Ol. 145:7) Ma ve ti jiri Jihova avọ ajọwha evaọ oke kpobi nọ u fo.
3 Jiri Jihova Evaọ Ẹmeọta Ekẹdẹ Kẹdẹ: Okenọ ma be t’ẹme kugbe erivẹ, ibe isukulu, ibe iruiruo, gbe amọfa nọ ma nyaku evaọ ẹsikpobi, ma sae gwọlọ uvẹ nọ ma rẹ rọ ghale ẹruore mai kugbe ai. Ọrivẹ ọ sae t’ẹme kpahe emuemu nọ ọ rọ okogho na; ibe isukulu ọ sae ruawa kpahe ogbẹlọ imu hayo ọfariẹ-ogbe; ibe oruiruo ọ sae fodẹ iroro kpahe ẹme-avro esuo jọ. Ma rẹ sae riobọ kpohọ izi gbe eyaa Ẹme Ọghẹnẹ nọ u dhesẹ emamọ owọ nọ a rẹ jẹ enẹna gbe ifue ebẹbẹ nọ e te jọ evaọ uwhremu na. Eme itieye na e ta evaọ “ẹruoke” o sae jọ oghale!—Itẹ 15:23.
4 Ta Ẹme Kpahe Jihova Oke-Kpobi: Ohwo nọ o wo ovuhumuo kokodo kẹ Jihova ọ rẹ gwọlọ ghale emamọ usi na kugbe amọfa buobu evaọ oghẹrẹ nọ ọ sae lọhọ te kpobi. (Ol. 40:8-10) Kpahe onana ma rẹ nọ omobọ mai nikọ, ‘Me bi ru te epanọ me wo uvẹ te kpobi?’ Ibuobu a ruẹ no nọ avọ inwene nọ i w’iroro, a zihe ruọ ekobaro oke kpobi no. Otẹrọnọ eyero obọnana o k’uvẹ kẹ oyena ha, kọ ma sae fi obe họ wọhọ ekobaro ubroke? Nọ ehaa Ekareghẹhọ nọ o be tha na orọ ezi nọ a jo ruiruo buobu na, emera ọ March gbe April e te jọ emamọ oke nọ a re ro ru iruo mai haro ẹkwoma iruo ọkobaro ubroke nọ ma re ru.
5 Fiobọhọ kẹ Ahwo Kpokpọ re A Kuomagbe Omai Evaọ Ẹkpẹwẹ Jihova: Eru ehaa Ekareghẹhọ uwhu Jesu na o rẹ kareghẹhọ omai oware nọ o soriẹ nọ ma jẹ kẹ Jihova uyere je jiri odẹ Riẹ. Onana yọ oke obọdẹ nọ ma rẹ rọ tudu họ emọ-uwuhrẹ Ebaibol mai re a kuomagbe omai evaọ ẹta kpahe ọkwa-ovie Jihova evaọ ẹgbede. Kpakpa ae re a kareghẹhọ avọ olẹ oware nọ a kere fihọ edhe-ẹme 7-9 evaọ ewẹ-obe 173-175 evaọ obe na Eriariẹ Nọ I Re Su Kpohọ Uzuazọ Ebẹdẹ Bẹdẹ. Otẹrọnọ a te, oware ovo o rẹ whaha ae usiuwoma ota ha a gbẹ rẹ te maki wo ẹghẹ usiuwoma ota dede he. Iwhowho-uvie nọ i te e riẹ nọ i re dhesẹ epanọ a re ru iruo ewhowho-Uvie na rọ kẹ ae. Otẹrọnọ ahwo kpokpọ na a sae kru ẹro ga re a ta emamọ usi na, a rẹ sai wo evaifihọ nọ Jihova o ti fiọbọhọ kẹ ae.—Iruẹru 4:31; 1 Tẹs. 2:2.
6 Ma rẹ wha irere ibẹdẹ bẹdẹ se omobọ mai gbe amọfa nọ ma tẹ be gwọlọ kpẹwẹ Jihova kẹdẹ kẹdẹ.