Wo Erere No Isukulu Odibọgba Ọghẹnẹ Ọrọ 1996 na Ze—Abọ 3
1 Pọl ukọ na ọ gwọlọ nọ inievo na a lẹ fiki riẹ re ọ sae wo ẹgba nọ ọ rẹ rọ ta emamọ usi na avọ aruọga. (Ẹf. 6:18-20) Ma gwọlọ nọ ma rẹ kọ ẹgba otiọye na. Re ma sai wo ẹgba ọyena, ma wo ovuhumuo obọfihọ nọ Isukulu Odibọgba Ọghẹnẹ na ọ rehọ kẹ, nọ a jọ tudu họ enọ i te nọ e be ze ewuhrẹ nọ a kere odẹ rai fihọ.
2 Wọhọ emọ-ewuhrẹ, ma re wo uthubro nọ u kie kpahe omobọ ohwo re u fiobọhọ k’omai nyaharo evaọ ẹgba ẹmeọta gbe ewuhrẹ mai. (Itẹ 9:9) Ma rẹ sai wo erere re nọ ma tẹ be gaviezọ kẹ uthubro nọ a be rọ kẹ emọ-uwuhrẹ efa, rehọ oware nọ ma wuhrẹ ruiruo kẹ omobọ mai. Ma tẹ be ruẹrẹ oma kpahe kẹ ẹme, u fo re ma roma kpotọ se oria nọ a rehọ ẹme na noze re u mu omai ẹro f’otọ ẹme na gbagba. Igogo eme na gbe ikereakere nọ ma bi fihọ iruo i re kiehọ uzoẹme na gbagba. Otẹrọnọ ẹme na o kpomahọ omọfa, u fo re a dhei ẹtẹta taure a te ti ru ẹme na evaọ isukulu na. Nọ ma bi ru ẹnyaharo na, ma rẹ daoma re ma tae wọhọ ẹme obọ mai, kere igogo eme na fihọ omobe ukpenọ ma re se eme na ọvuọvo no obe tha.
3 Ahwo kpobi nọ a wo ẹme evaọ isukulu na a rẹ kake nyaze, kẹ ọsẹro isukulu omobe ọ Ẹme Uthubro rai, jẹ keria kẹle obaro ọgwa na. Inievo emetẹ a rẹ kake jẹ ọsẹro isukulu na riẹ ẹruẹrẹhọ ẹkeria ẹme rai gbe sọ a ti dikihẹ hayo a te keria evaọ abọ rai. Iruoru-kugbe evaọ edhere ọnana u re ru ọruẹrẹfihotọ na kpatiẹ je fiobọhọ kẹ enọ e be rẹro te ukpehru-ẹmeọta na ruẹrẹ eware kpobi họ re oke ute ti te.
4 Oma Oruẹrẹhọ kẹ Ẹme Avọ 2: Ẹjiroro Isase Ebaibol na ọvo jọ họ re u fiobọhọ kẹ ọmọ-uwuhrẹ na re ọ riẹ ese ziezi. Ẹvẹ a sai ro wo onana t’obọ ziezi? Ẹme na nọ a re dhe ẹwẹwariẹ se via họ edhere nọ ọ mai woma nọ a sae rọ riẹe. Re a wuhrẹ otofa gbe ẹriẹ se ẹme nọ u vẹro ho ziezi, ọmọ-uwuhrẹ na ọ rẹ rehọ obe-ofeme rọ kiẹ eme na. Onana o gwọlọ nọ whọ rẹ riẹ otofa eka ibieme edo nọ e rọ obe-ofeme na.
5 New World Translation na ọ kẹ obọfihọ epanọ a re se edẹ ahwo gbe eme nọ a rẹ kake nyaku hu nọ erọ Ebaibol na. O ru onana ẹkwoma eme na nọ ọ hẹriẹ ẹkuẹko je kpoka họ eme edo. (Rri “All Scripture Is Inspired of God and Beneficial,” ewẹ-ebe 325-326, edhe-eme 27, 28.) Wọhọ ọkpọvio, ubiẹme nọ o rọ obemu oka edo na oye a rẹ mai fi ẹgba họ. Otẹrọnọ ubiẹme edo oye u ku ẹme nọ a kpoka họ na, ẹme na o re ji thethei evaọ isase. Otẹrọnọ ubiẹme nọ u wo edo ho oye uku riei họ, ubiẹme edo evaọ ẹme na o rẹ jọ kpẹkpẹ. (Wawo Saʹlu kugbe Salʹlu.) Re u fiobọhọ kẹ ai ruẹrẹ oma kpahe kẹ ẹme isase Ebaibol rai, inievo jọ a rẹ gaviezọ kẹ ekasẹte Ukoko-Ulogbo na.
6 Esẹ gbe ini a sai fiobọhọ kẹ emaha rai re a ruẹrẹ oma kpahe kẹ ẹme isase rai. Onana o sai kugbe ezọgaviẹ okenọ ọmọ na o bi wuhrẹ ẹme na who ve fiobọhọ kẹe evaọ oria nọ ọ jẹ gwọlọ ẹnyaharo. Oke nọ a kẹ na o kuvẹ kẹ ẹme erovie via ọkpẹkpẹ gbe ekuhọ nọ u fo nọ a rẹ sae ro ru igogo eme na via. Enẹ ọmọ-uwuhrẹ na ọ sae rọ bọ ẹgba ẹmeọta wọhọ ẹme obọ riẹ.
7 Ọnọ ọ so ilezi na ọ rehọ olẹ yare nọ: “ỌNOWO, rovie igbenu mẹ, re unu mẹ u dhesẹ ejiro ra via.” (Ol. 51:15) Jọ abọ nọ ma bi wo evaọ Isukulu Odibọgba Ọghẹnẹ na u fiobọhọ k’omai ru oghẹrẹ ẹgwọlọ ọvo ọnana gba.