Ta kẹ Amọfa Kpahe “Elo Akpọ Na”

¹ Jihova ọ rọ ẹkwoma Aizaya ọruẹaro na whowho nọ: “Ahwo nọ a jẹ nya eva ebi a ruẹ elo ologbo, enọ e jẹ ria ukpotọ ebi uwhu, ae elo na o lo kẹ.” (Aiz. 9:2) A ruẹ “elo ologbo” yena evaọ iruo Ọmọ Ọghẹnẹ, Jesu Kristi. Iruo nọ o ru nọ ọ jọ otọakpọ gbe eghale nọ i no idhe ẹtanigbo riẹ ze e kẹ ahwo nọ a jọ ebi abọ-ẹzi omosasọ. Elo otiọye na họ oware nọ ahwo a gwọlọ evaọ oke ebi nana. Emu Owọwọ Olori na ọ kẹ omai obọdẹ uvẹ nọ ma re ro si iroro ahwo kpohọ “elo akpọ na.” (Jọn 8:12) Evaọ ukpe nukpo, ima ahwo buobu a dhesẹ ẹrọwọ ẹkwoma oma nọ a ku gbe omai evaọ ẹmeoyo kẹ ujaje Jesu na: “Wha ru onana roro omẹ.” (Luk 22:19) Nọ Ekareghẹhọ uwhu Kristi ọrọ enukpe nana o be kẹle na, ẹvẹ ma sai ro wobọ evaọ iroro ahwo nọ ma re si kpohọ elo ologbo nọ Jihova o ru re o lo na?—Fil. 2:15.

² Wo Udu Ovuhumuo: Ezi Ekareghẹhọ na o kẹ omai obọdẹ uvẹ nọ ma re ro roro didi kpahe uyoyou udidi nọ Jihova avọ Jesu a dhesẹ nọ a rọ kẹ ahwo-akpọ idhe-ẹtanigbo. (Jọn 3:16; 2 Kọr. 5:14, 15) Ababọ avro, ere oruo o te lẹliẹ ovuhumuo mai kẹ Ekareghẹhọ obọdẹ nana rro haro. Ahwo Ọghẹnẹ kpobi a te gwọlọ fi oke họ nọ a re ro se je roro didi kpahe isase Ebaibol obọdẹ ọrọ ezi Ekareghẹhọ na, wọhọ epanọ a dhesẹ fihọ Ẹkiẹriwo Ikereakere na Kẹdẹ Kẹdẹ na. Eroro kpahe ekwakwa Jihova nọ i wo ibe he na, nọ i dhesẹ oma via ruaro evaọ okẹ ẹtanigbo na, u re ru oma were omai inọ ma wo Jihova wọhọ Ọghẹnẹ mai. Eroro nọ ma re roro kpahe oware no ẹtanigbo na ọ rrọ kẹ omai omomọvo o rẹ lẹliẹ uyoyou mai kẹ Ọghẹnẹ gbe Ọmọ riẹ rro haro jẹ wọ omai dawo ẹgba mai kpobi evaọ eruo oreva Ọghẹnẹ.—Gal. 2:20.

³ Nọ ma te ru ovuhumuo mai kẹ ọruẹrẹfihotọ esiwo nọ Jihova o ru na diwi ziezi, ajọwha mai kẹ Ekareghẹhọ na o ti dhesẹ oma via kẹ emọ-uwuhrẹ Ebaibol mai, izihebro mai, imoni mai, enọ ma gbẹ rrọ ighẹ, ibe emọ-isukulu, ibe-iruiruo mai, gbe amọfa nọ ma zizie kpohọ Ekareghẹhọ obọdẹ nana. (Luk 6:45) Fikiere, daoma ziezi re who zizie ahwo otiọye na kpobi, ẹkwoma obe-uzizie Ekareghẹhọ na nọ whọ rẹ kẹ ae re o jọ oware nọ o rẹ kareghẹhọ ae. Re ahwo jọ a siọ ae ẹro ba evo, ibuobu a ruẹ nọ u re fi obọ họ re a kere edẹ ahwo nọ a be hai zizie kpohọ Ekareghẹhọ na fihọ obe, je fi ahwo ọkpokpọ bae kukpe kukpe. Oma nọ ma re ro totọ ru onana je zizie ahwo nọ a dhesẹ isiuru o rẹ jọ emamọ edhere nọ ma re ro dhesẹ uyere mai kẹ Jihova Ọghẹnẹ “fiki okẹ riẹ nọ a sae ruẹ unu ta ha” na.—2 Kọr. 9:15.

⁴ Ru Ẹkabọ Ra Kẹre Evaọ Odibọgba Na: Kọ whọ sae jọ odibọgba na ru ẹkabọ ra kẹre evaọ March gbe April? Oma nọ ma rẹ dawo re ma ta kpahe “elo oruaro usiuwoma Kristi” na kẹ amọfa o te ginẹ wha eghale Ọghẹnẹ ze. Wọhọ Ehri elo abọ-ẹzi, Jihova o jie uzi nọ: “Elo o lo no eva ebi via.” (2 Kọr. 4:4-6) Ekpako ukoko na e tẹ ruẹ nọ u ti fi obọ họ, a ti ru ọruẹrẹfihotọ omakugbe kẹ usiuwoma ota eva oke ofa sa-sa gbe oria nọ a je kuomagbe, a vẹ jẹ kobaro evaọ uketha nọ a rẹ kẹ iwhowho-uvie nọ e gwọlọ kri evaọ usiuwoma ota. Onana o sae kẹre te usiuwoma ota iyẹrẹ evaọ ohiohiẹ hayo ọruẹrẹfihotọ nọ a rẹ rọ ta usiuwoma no uwou ruọ uwou evaọ akọ owọwọ, nọ ahwo buobu a rẹ mae jọ uwou. Wọhọ oware nọ u re fi obọ họ kẹ owhẹ ru odibọgba ra kẹre, fi utee euwa jọ họ, re whọ daoma nya tei. Rọkẹ ahwo buobu, onọ o mai woma nọ a rẹ kẹ Jihova o kẹre te ọkobaro obufihọ nọ a re ru.—Kọl. 3:23, 24.

⁵ Kọ Whọ Sai Ru Ọkobaro Obufihọ? U te anwọ ikpe ihrẹ no nọ a ro ru utee euwa ọkobaro obufihọ kpotọ na. Onana u ru rie lọhọ kẹ ahwo buobu no re a reawere eghale nọ i re no iruo ọkobaro obufihọ ze. Kọ whọ dawo riẹ no? Ahwo jọ a ru rie fihọ uruemu rai re a hai ru ei kukpe kukpe. Evaọ ikoko buobu, iwhowho-uvie buobu a rẹ rehọ ọkobaro obufihọ evaọ oke ovona, yọ o rẹ jọ abọ jọ iruẹru ukoko na evaọ ukpe na soso nọ o rẹ kẹ evawere gbe irere. Kọ whọ sai ru uvẹ fihọ kẹ amara jọ nọ who re ro ru ọkobaro obufihọ evaọ ezi Ekareghẹhọ na? Amara Ane ọ sae jọ obọdẹ amara kẹ otujọ, nọ o wo urere-oka isoi na.

⁶ Kọ ukoko ra u ti wo iweze ọsẹro okogho evaọ amara Asa gbe Ane? O tẹ rrọ ere yọ obọdẹ uvẹ oghale ofa jọ u rovie fihọ kẹ owhẹ. Wọhọ epanọ a whowho i rie no vẹre, evaọ etoke ukpe iruo 2006, ahwo kpobi nọ a bi ru ọkobaro obufihọ evaọ amara nọ ọsẹro okogho ọ rọ rrọ kugbe ai a ti zizie ai re a jọ abọ ọsosuọ ẹgwae nọ ọsẹro okogho na ọ te gba kugbe ekobaro na evaọ oka yena. Ababọ avro, uduotahawọ abọ-ẹzi nọ a te jọ ẹgwae nana kẹ u ti fi obọ họ kẹ ekobaro obufihọ buobu nọ a jẹ te nyate utee ọkobaro oke-kpobi. Ofariẹ re, evaọ amara Asa, ma ti wo omaweromẹ obọ ufihọ kẹ ahwo re a ze elo abọ-ẹzi na ẹkwoma eroruiruo obe okpokpọ na Eme Ebaibol na O Gine Wuhrẹ? Kọ who gbe ru ei fihọ utee ra re whọ rọ obe okpokpọ na to obe-uwuhrẹ Ebaibol họ?

⁷ Nọ who bi roro kpahe utee euwa 50 orọ ọkobaro obufihọ na, ma omaa nọ o te lẹliẹ owhẹ wha elo uzẹme na haro evaọ oware wọhọ euwa 12 koka koka. Rehọ iẹe jiroro kugbe ahwo nọ a ru ere no, jegbe amọfa re. Onana o sae kẹ ae ajọwha nọ a je ku oma gbe owhẹ. Avọ emamọ omaa, iwhowho-uvie nọ e họ-ame no, te emaha te ekpako, a ruẹ no inọ o nwane bẹ ga hrọ họ re a nyate emamọ utee nana. Lẹ kpahe iẹe. Nọ o tẹ lọhọ, ma omaa ra, whọ te reawere ọkobaro obufihọ ra!—Mal. 3:10.

⁸ Iviuwou buobu a ruẹ no inọ ahwo uviuwou na kpobi a tẹ kẹ uketha o rẹ sai ru ei lọhọ kẹ omọvo jọ evaọ uviuwou na re ọ nyate utee nana. Uviuwou jọ o jiroro nnọ imasoi nọ e jọ uviuwou na soso họ-ame no na a re fi obe họ kẹ ọkobaro obufihọ. Emọ ivẹ efa nọ e re họ-ame he a tẹ daoma gaga re a ru bu vi epanọ a bi ru vẹre evaọ odibọgba rai. Ẹvẹ uviuwou na u ro wo erere no omodawọ ogaga rai ze? A kere nọ: “O jọ amara evawere gaga, yọ ma ruẹ nọ onana o bọ okugbe uviuwou na ga. Ma yere Jihova kẹ oghale riẹ!”

⁹ Kọ iruẹru obọdẹ mai evaọ amara Asa gbe Ane e te jọ avọ ajọwha nọ i ti si omai kẹle Ọsẹ obọ odhiwu mai? O roma wha epanọ ma dawo oma te re ma ru uyoyou mai kẹ Ọghẹnẹ gbe Ọmọ riẹ diwi ziezi je ru odibọgba mai kẹre. Jọ ọtamuo mai ọ jọ wọhọ ọrọ ọso-ilezi na, ọnọ ọ so nọ: “Mẹ rẹ te rehọ unu mẹ rehọ uyere ulogbo bru ỌNOWO na tha; me re ti jiri ei eva udevie ogbotu na.” (Ol. 109:30) Jihova ọ te ghale iruẹru ajọwha mai eva ezi Ekareghẹhọ nana. Fikiere, joma ru elo ologbo lo via re amọfa buobu a no ebi ze re a “wo elo uzuazọ.”—Jọn 8:12.

[Study Questions]

1. Elo ologbo vẹ a ruẹaro riẹ evaọ Ẹme Ọghẹnẹ, kọ eme o re si iroro kpohọ elo nana evaọ edhere obọdẹ?

2. Ẹvẹ ma sai ro ru ovuhumuo mai kẹ idhe ẹtanigbo na rro haro, kọ eme o re no oyena ze?

3. Ẹvẹ ma sai ro dhesẹ ovuhumuo mai kẹ Ekareghẹhọ na?

4. Eme ọ rẹ sai fi obọ họ kẹ omai ru odibọgba mai kẹre evaọ March gbe April?

5. Ẹvẹ ahwo buobu a bi ro wo erere no utee euwa ọkobaro obufihọ nọ a ru kpotọ na ze?

6. Eruẹrẹfihotọ vẹ nọ e rẹ kẹ evawere a ruẹrẹ họ kẹ omai?

7, 8. (a) Eme ọ rẹ sai fi obọ họ kẹ omai ma omaa ọkobaro obufihọ? (b) Ẹvẹ o sai ro fi obọ họ nọ uviuwou u te wo ọrọwokugbe ọvo, kọ ẹvẹ uviuwou na soso u re ro wo erere?

9. Ẹvẹ ma sai ro ru elo mai lo via evaọ ezi Ekareghẹhọ na?