Jihova O Fo Ejiro Gaga
Emu Owọwọ Olori na nọ A ti Ru Evaọ April 16
1 Irẹro e be ga nọ ma bi sikẹle April 16, 2003 na. Evaọ aso yena ma ti ru ehaa uwhu Jesu, kuomagbe ima buobu erọ ibe egegagọ mai wariẹ akpọ na họ evaọ orro rọkẹ odẹ Jihova. Jihova o fo kẹ ujiro mai fiki ọruẹrẹfihotọ ogbunu ọrọ ẹtanigbo na. Ẹkwoma riẹ, o ti ro ku eghale igbunu ku ahwo-akpọ ẹmeoyo kpobi. Ma rehọ udu mai kpobi kuomagbe ọso-ilezi na bo via inọ: “ỌNOWO, whẹ họ ọnọ ọ mae ro, whọ tẹ jẹ ro te epanọ a re ro jiri owhẹ.”—Ol. 145:3.
2 Onana yọ etoke nọ a re ro roro didi kpahe ewoma Ọghẹnẹ gbe osa uyere nọ ma re Jihova fikinọ o vi “Ọmọvo riẹ ze eva akpọ na, re ma ruẹse rọ fiki riẹ zọ.” (1 Jọn 4:9, 10) Ẹmeoyo nọ ma re ro koko Emu Owọwọ Olori na o rẹ lẹliẹ omai wo ovuhumuo inọ “ỌNOWO na ọ vọ avọ aruoriwo gbe ohrọ . . [jẹ] vọ avọ uyoyou ulogbo.” (Ol. 145:8) Evaọ uzẹme, ẹtanigbo na họ odhesẹvia nọ ọ mae rro ọrọ uyoyou Jihova kẹ ahwo-akpọ kpobi. (Jọn 3:16) Ma te roro kpahe uyoyou Ọghẹnẹ je roro kpahe ekiete Jesu rite urere, o rẹ wọ omai jiri Jihova. Ma ti jiri ei bẹdẹ bẹdẹ fiki uyoyou riẹ nọ u wo oba ha nọ o dhesẹ evaọ uzuazọ ibẹdẹ bẹdẹ nọ o ru lọhọ k’omai.—Ol. 145:1, 2.
3 Fi Obọ Họ kẹ Amọfa Jiri Jihova: Ovuhumuo kẹ okẹ Ọghẹnẹ nọ o mae rro kpaobọ orọ ẹtanigbo na o rẹ wọ omai zizie amọfa re a kuomagbe omai jiri Jihova. A kẹ ọso-ilezi na ẹgba kere nnọ: “A re ti dhesẹ usi ewoma ubuobu ra via, a vẹ te suole ẹrẹreokie ra via vevẹ.” (Ol. 145:7) Ukpe n’ukpo ọvo, Isẹri Jihova wariẹ akpọ na họ a raha euwa nọ i bu vi ima-odu fihọ iruo usiuwoma ota na. Kọ iyẹrẹ vẹ i no omodawọ rai na ze no? Nọ a tẹ ghale iẹe, k’oka k’oka, ahwo nọ a bu vi 5,100 a họ-ame evaọ oka omaromudhe rai kẹ Jihova. Ahwo 15,597,746 nọ a kpohọ Ekareghẹhọ na, enọ ahwo nọ a bu vi ima 9 evaọ usu rai a ri muọ Jihova họ ejiri wọhọ iwhowho-uvie emamọ usi na ha, u dhesẹ nọ ẹruore ologbo kẹ ẹvi obaro ọ riẹ! Wọhọ iwhowho Uvie, ma riwi uvẹ mai orọ ewhowho emamọ usi na gbe ẹkpọ idu amọfa bru Jihova, Ọmọ riẹ, gbe Uvie na ghaghae.
4 Obọdẹ edhere jọ nọ ma rẹ rọ ta udu họ amọfa awọ re a rọ ọghọ kẹ Jihova họ ẹkwoma ezizie nọ ma re zizie ai re a kuomagbe omai ru ehaa Emu Owọwọ Olori na. Kọ who kere ahwo kpobi nọ whọ gwọlọ zizie gbe amọfa nọ whọ gwọlọ kareghẹhọ ẹdẹ gbe auwa na fihọ otọ no? Kọ who zizie ahwo kpobi nọ who kere fihọ otọ no? Otẹrọnọ who ri ru ere he, ru ere avọ osegboja evaọ oke nọ u kiọkọ na. Fi obọ họ kẹ ai wo otoriẹ ẹjiroro ọ ehaa na. Evaọ obọ ehaa na, ruẹrẹ oma kpahe re who yere erara. Ru ae oma sasa, dhesẹ ai kẹ amọfa, je jiri ai kẹ ẹnyaze rai.
5 Ekpohọ Ekareghẹhọ na o rẹ sae kẹ ahwo ọkpokpọ ọwhọ nọ a re ro ru ẹnyaharo abọ-ẹzi. Ọmọ-uwuhrẹ Ebaibol jọ nọ ọ be ruẹ uye ẹyao ọ iguegue fiki okpoware jọ nọ o via vrẹ no, onọ u ru rie bẹbẹ kẹe re o kpohọ eria ẹgbede, ọ ziọ Ekareghẹhọ na. Oke nọ a nọe oware nọ o roro kpahe ekareghẹhọ na, ọ ta nnọ: “O jọ aso nọ ọ mae vọ avọ adhẹẹ, yọ mẹ jọ etẹe.” Anwọ oke yena ze, o muọ iwuhrẹ họ ẹnya no.
6 Nọ A te Ru Ehaa Ekareghẹhọ na No: Eme a rẹ sai ru ro fi obọ họ kẹ ahwo nana nọ a wo isiuru na re a jọ enọ e rẹ kẹ Jihova ujiro? Ekpako na i ti muẹrohọ ahwo ọkpokpọ nọ a kpohọ ehaa Ekareghẹhọ na je ru eruẹrẹfihotọ re iwhowho-uvie nọ i te ziezi a weze bru ai ababọ oke oraha re a kiẹ obọdẹ eware nọ a wuhrẹ je muẹrohọ na kugbe ai. Ejọ e sae gwọlọ nnọ a re wo obe-uwuhrẹ Ebaibol. A re je zizie ai re a kpohọ iwuhrẹ ukoko ẹkpoka na kpobi, keme ẹnya ikẹse kẹse o rẹ sai ru eriariẹ Ebaibol rai vi haro.
7 Ma bi ru ọruẹrẹfihọ re a ta udu họ enọ e rrọ ẹdhigodo gbe enọ e siọ iruo uvie ba no awọ re a kpohọ iwuhrẹ kẹse kẹse. Otẹrọnọ ekpako ukoko e ta kẹ owhẹ nnọ whọ kẹ ohwo jọ nọ ọ siọ iruo uvie ba no uketha re ọ wariẹ mu usiuwoma họ ẹta, jọ u no owhẹ eva ze re who fi obọ họ. Ọdawẹ otiọye nọ ma re dhesẹ kẹ inievo mai, o rọwokugbe uduotahawọ Pọl na: “Fikiere re, nọ uvẹ o gbẹrọ na, joma ru iruo ezi kẹ ahwo kpobi, onọ o mae ro kọ rọ kẹ otu nọ ọrọ ẹgba orọwọ na.”—Gal. 6:10.
8 Jọ mai kpobi ma dawo oma gaga re ma jọ Ekareghẹhọ na evaọ April 16. Ma gwọlọ nnọ ehaa efuafo nana nọ a re ro jiri Jihova na i vo omai hi. Ẹhẹ, wha joma jiri Jihova kẹ iruo ilogbo riẹ enẹna gbe bẹdẹ bẹdẹ!—Ol. 145:21.