Ruẹrẹ Oma Kpahe kẹ Iruo Emagazini Evaọ April

Wọhọ epanọ a kere fihọ 1996 Calendar mai, Emu Owọwọ Olori na a ti ru ei evaọ April 2 enukpe ọnana. Nọ ehaa ologbo ọnana ọ rọ uduotahọ k’omai na, j’omai kpobi a w’obọ evaọ ẹghale emagazini avọ ajọwha bẹsenọ amara April o re re. Ma tẹ rehọ emagazini ẹruoke ruiruo i ti woma kẹ hẹ! Uwou-Eroro Na ọrọ April 1 ọ te riobọ họ ovuẹ ogbotu okokohọ ubrotọ ukpe n’ukpo, “Jiri Ovie Ebẹdẹ Bẹdẹ Na!” Uwou-Eroro Na ọrọ April 15 ọ te nya lele uzou ẹme ovuẹ ogbotu obọdẹ ọrọ amara April n’ukpo, “Urere Egagọ Erue O Kele No.” Ovuẹ ogbotu obọdẹ ọrọ enukpe ọnana evaọ April 21, “Kare Afuẹwẹ Evaọ Udevie Oge Ọgẹgẹle,” ọ te k’omai ẹgba viere. Oke yena, ma ve ti fiọ Awake! ọrọ April 22 họ ada nọ uzoẹme riẹ ota nọ “Okenọ Emo E gbẹ Te Jọ Họ.”

Wọhọ epanọ ma vravrẹ Usi Uvie na evaọ amara October n’ukpo, ere amara April ọnana ọ te jọ amara obọdẹ kẹ ẹghale emagazini re. Enẹna họ oke nọ ma rẹ rọ moma iruo na. Ahwo buobu a te gwọlọ kere odẹ rai re a jọ ekobaro ubroke. Wọhọ oghẹrẹ nọ ẹgwọlọ ọ rọ te, a sai vi emagazini efa kẹ amara April. A rẹ sai ru oma-iruo kẹ Edẹ Emagazini, o tẹ lọhọ ahwo kpobi a ve w’obọ—evaọ ohiohiẹ, uvo, hayo owọwọ. Jọ omai kpobi a jọ “iru ẹme na.” Wọhọ epanọ a ruẹaro riẹ kpahe Emesaya na evaọ Olezi 69:9, a joma sae ta re nọ: “Keme oriori uwou ra ọ re omẹ no.”—Jem. 1:22; Jọn 2:17.