Ẹkpẹti Onọ

◼ Eme ma re wo họ iroro nọ ma te bi kere ileta se ahwo nọ ma dihọ uwou hu?

Fiki eware sa-sa nọ e rẹ suẹe ze, evaọ eria jọ ma be rueriẹ bẹbẹ gaga re ma duku ahwo nọ ma te weze kpohọ iwou rai. Iwhowho-uvie jọ a ruẹ ileta kere no wọhọ edhere nọ u wo iruo nọ a re ro te ai oma. Nọ onana o rẹ sae wha emamọ iyẹrẹ jọ ze na, ẹgwọlọ ọ riẹ re ma roro kpahe ekareghẹhọ jọ nọ e rẹ sai fiobọhọ k’omai whaha ebẹbẹ jọ.

Whọ rehọ adrẹse Ukoko-Ulogbo kere iei hi. Onana u re dhesẹ thọthọ inọ ọfisi mai a jo vi ileta na se ohwo na, nọ o rẹ wha ebẹbẹ nọ i fioka ha gbe igho-raha efa ze ẹsejọ.

Jọ u mu owhẹ ẹro nọ whọ riẹ adrẹse ohwo na gbagba gbe unuigho estampo na.

Who kere nọ “Ahwo nọ e be rria uwou na” fihọ ẹnvẹlopu na ha; kere odẹ oma ohwo na ọvo.

Whọ nyase ileta na ba unuẹthẹ hẹ evaọ okenọ ohwo ọvo ọ rọ uwou hu.

Ileta ekpẹkpẹe e rẹ mai woma. Fi obe-ovẹvẹ họ ẹnvẹlopu na viukpenọ who re kere ovuẹ othethei.

Ileta nọ a taipo e rẹ mae lọhọ ese jẹ mai siuru.

A re kele ileta wọhọ ozihebro ho ajokpanọ whọ kaki se isẹri kẹ ohwo na no vẹre.

Otẹrẹnọ who bi kere se ohwo nọ o dhesẹ isiuru no vẹre, whọ rẹ sai kere adrẹse gbe inọmba ifonu ra re ọ sae gwọlọ owhẹ ruẹ. Fodẹ ọruẹrẹfihotọ ewuhrẹ Ebaibol mai kẹe.

Ziziei kpohọ iwuhrẹ ukoko na. Kẹe adrẹse gbe oke nọ a re ro ru iwuhrẹ na.

Whọ gbẹ ruabọhọ ileta vi se ahwo nọ a dihọ uwou hu hu otẹrọnọ ẹkuotọ na o zihe ruọ ọrọ amọfa no; owhowho-uvie nọ ọ rọ ẹkuotọ na o wo owha-iruo eruo ẹkuotọ ọyena.