Odẹ Kere Fihọ Isukulu Odibọgba Ọghẹnẹ
1 Isukulu Odibọgba Ọghẹnẹ na yọ emamọ okwakwa evaọ ewuhrẹ ima Isẹri Jihova buobu wọhọ egbodibo emamọ usi na. Ibuobu mai a rẹ kareghẹhọ epanọ ma je nuhu avọ ozọ evaọ oke ọsosuọ nọ ma ro kere odẹ fihọ isukulu ọnana, yọ enẹna ma vuhu aghare ẹkẹ-abọ riẹ evaọ ẹnyaharo ẹzi mai wọhọ enọ i re ru ẹme gbe iwuhrẹ Ẹme Ọghẹnẹ. (Wawo Iruẹru 4:13.) Kọ who kere odẹ fihọ emamọ isukulu ọnana no?
2 Ono ọ sae kere odẹ fihiẹe? Ẹwẹ-obe avọ 73 ọrọ obe ọ Organized to Accomplish Our Ministry na ọ kẹ uyo nọ: “Ahwo kpobi nọ a be nyusu kugbe ukoko na kẹse kẹse a sai kere odẹ fihiẹe, kugbe ahwo kpokpọ nọ e be ze ewuhrẹ obọ, thakpinọ a be rria uzuazọ nọ u mukpahe ehri izi Oleleikristi hi.” Ma zizie ahwo kpobi nọ i te—ezae, eyae, gbe emọ—re a nyabru ọsẹro isukulu na re a vuẹe re o kere odẹ rai.
3 Iprogramo Isukulu ọ 1997 Na: Iprogramo Isukulu Odibọgba Ọghẹnẹ ọrọ 1997 na u duobọ te iwuhrẹ Ebaibol eghẹrẹ sa-sa gbe ahwo, gbe ikuigbe ukoko na. Fiba ebabọ ẹgba ẹmeọta gbe ewuhrẹ mai, ma ti wuhrẹ no ekwakwa aghae ẹzi nọ a re duku evaọ oma koka koka na ze. (Itẹ 9:9) Otẹrọnọ ma ruẹrẹ oma họ kẹ isukulu na, nọ u re kugbe isase Ebaibol ẹkpoka na, yọ ma tẹ be jẹ nyaze kẹse kẹse, ma rẹ sae wo erere ẹzi ologbo no iprogramo na ze.
4 Eva 1997 isase Ebaibol buobu kẹ Ẹme Avọ 2 e kpẹre viọ erọ ikpe edekọ. Okenọ a tẹ be ruẹrẹ oma họ kẹ ẹme ọnana, u fo re ọmọ-uwuhrẹ na ọ roma totọ muẹrohọ oke isase riẹ re ọ riẹ unu iminiti nọ ọ rẹ raha kẹ eme emuhọ gbe ekuhọ evaọ iminiti isoi nọ a fihọ kẹ abọ riẹ na. Onana o rẹ kẹ ọmọ-uwuhrẹ na uvẹ nọ ọ jẹ rehọ oke riẹ ruiruo vọvọ jẹ bọ te ẹgba isase riẹ gbe ona ẹmeọta riẹ liọ ziezi.—1 Tim. 4:13.
5 A fi isẹri ise ọnyakuo kugbe ẹruẹrẹhọ na wọhọ odhesẹvia evaọ Ẹme Avọ 3, nọ a rehọ no obe Eriariẹ na ze. Fikiere, oniọvo ọmọtẹ ọ rẹ sae salọ ozihebro, obe uwuhrẹ Ebaibol, hayo isẹri ise ọnyakuo wọhọ ọruẹrẹhọ ẹme riẹ. Dede, a rẹ mae fiẹgba họ ona ewuhrẹ orọnikọ ẹruẹrẹhọ na ha.
6 Otẹ make rọnọ who wo uvẹ ẹme uthubro, oruvẹ Ebaibol, hayo ẹme ọmọ-uwuhrẹ, whọ rẹ sai dhesẹ ovuhumuo kẹ Isukulu Odibọgba Ọghẹnẹ na ẹkwoma oma ruẹrẹhọ gbe ẹruẹrẹ abọ ra ziezi, ẹkwoma eru ẹme na avọ imuẹro gbe ajọwha, ẹkwoma oke nọ whọ rẹ re he, ẹkwoma ezọgaviẹ kẹ gbe efihiruo ohrẹ ọsẹro isukulu na, gbe omodawọ ra ẹsikpobi re who ru ẹme ra gbagba. Enẹ odẹ ra nọ who kere fihọ isukulu na o sae rọ jọ oghale kẹ owhẹ gbe ahwo kpobi nọ e nyaze.