Ẹme Ọghẹnẹ Ọ rẹ Kẹ Ọkpọvio
1 Ma be rria akpọ nọ ebẹbẹ e da fia yọ ifue e re kakao gaga. Ohọwo u bi kpe ima ahwo buobu. Ahwo buobu a be lọ imu egaga. Iviuwou nọ e be vahabọ i bi vihọ. Ẹnwaobro-udevie-inievo gbe ozighi uviuwou e be via evaọ usi kẹse kẹse. A be rehọ ẹmẹrera nua ofou nọ ma bi se rehọ gbe ame nọ ma be da. Enẹna, ibuobu mai i kie ruọ abọ ugbarugba no.
2 Eme nọ ma kake ta na e mae w’uzou enẹna vi epanọ e jọ evaọ umutho ikpe nọ i kpemu. U fo re ahwo a riẹ nọ Ẹme Ọghẹnẹ ọ rẹ kẹ ọkpọvio je dhesẹ ifue kẹ ebẹbẹ kpobi nọ i bi kpokpo ai. Ma te daoma fiobọhọ kẹ ahwo evaọ December ẹkwoma efihọ ada ọ obe na The Greatest Man Who Ever Lived hayo Obe Ikuigbe Ebaibol Mẹ. Dede, re a nwane nyase obe ba kẹ ohwo o kẹ imuẹro nọ ọ te jẹ ọkpọvio Ọghẹnẹ rehọ họ. Ma re ru ozihebro hrọ avọ ute emuhọ uwuhrẹ Ebaibol. Ma wo imuẹro obufihọ otẹrọnọ ma ru omodawọ utioye na. (Mat. 28:19, 20) Enana yọ idhesẹvia jọ:
3 Otẹrọnọ whọ nyaku ohwo nọ ọ kpako no, whọ rẹ sae dawo onana:
◼ “J’omẹ nọ onọ jọ: Okenọ whọ maha vienẹ, ẹvẹ ahwo nọ e jẹ rria okegbe na a je ru ohwohwo? [Kuvẹ kẹ uyo.] Eware i nwene gaga no enẹna, o gbẹ rọ ere? Eme who roro nọ o wha enwene na ze? [Kuvẹ kẹ uyo.] Ma be ghinẹ ruẹ erugba eruaruẹ jọ evaọ Ebaibol na. [Se 2 Timoti 3:1-5.] U te no edhesẹ gbagba oghẹrẹ nọ akpọ na ọ rọ nẹnẹ no, Ebaibol na ọ yeyaa akpọ nọ ọ mai woma evaọ obaro kẹle na. Fiki oyena ma jẹ be tudu họ ohwo kpobi awọ re o se Ebaibol na.” Dhesẹ obe ọ Greatest Man na jẹ riobọ kpohọ uzou 111, nọ u dhesẹ eruaruẹ ọfa nọ ma ruẹ nọ o rugba no. Fi obe na họ ada eva unu ọ azọhọ riẹ.
4 Okenọ who te zihe bru ọkpako nọ who fi obe ọ “Greatest Man” na họ ada kẹ, whọ rẹ sae ta nọ:
◼ “Okenọ ma kake t’ẹme kugbe, ma rọwo nọ evaọ idhere buobu uyerakpọ ọgbọna u ro nwene thọ gaga no nọ a tẹ wawo iẹe kugbe epanọ uzuazọ o jọ evaọ umutho ikpe jọ nọ e vrẹ no. Ghele, mẹ gwọlọ dhesẹ k’owhẹ nọ Ebaibol na ọ kẹ ẹruore akpọ nọ ọ mae woma evaọ obaro. [Se Eviavia 21:3, 4.] Nọ ma riẹ nọ onana yọ Ẹme Ọghẹnẹ na u re fo re o tudu họ omai awọ rri kpohọ oware ọfa nọ Ebaibol na ọ ta.” Rovie obe ọ Greatest Man na kpohọ uzou avọ 133 je se edhe-eme 5-6. Fodẹ obe uwuhrẹ Ebaibol ọvọvẹ kẹe.
5 Otẹrọnọ who bi lele ọmoha t’ẹme, whọ rẹ sae ta nọ:
◼ “Mẹ gwọlọ nọ owhẹ onọ: Wọhọ ọmoha, kọ who roro nọ whọ rẹ sae rẹro ewoma kpahe obaro? Ẹvẹ obaro na ọ rọ k’owhẹ? [Kuvẹ kẹ uyo.] Avọ evawere, emamọ ẹjiroro ọ riẹ nọ ma re ro wo irẹro kpahe obaro. [Se Olezi 37:10, 11.] Ma kporo obe onana, The Greatest Man Who Ever Lived, re u fiobọhọ kẹ ahwo wuhrẹ kpahe Jesu jẹ gaviezọ kẹe. Otẹrọnọ whọ gwọlọ se obe nana, o te were omẹ re mẹ nyase ọjọ ba k’owhẹ evaọ azọhọ ₦240.”
6 Okenọ who te zihe nyae ruẹ ọmoha nọ ọ rehọ obe ọ “Greatest Man” na, whọ rẹ sae muhọ whọ vẹ ta nọ:
◼ “Me wo ovuhumuo ẹme nọ whọ ta kpahe epanọ who bi roro kpahe obaro. Kareghẹhọ nọ me dhesẹ oria Ebaibol jọ nọ o yeyaa k’omai kpahe evawere gbe ufuoma obaro k’owhẹ. Oria ọfa ọna. [Se Eviavia 21:3, 4.] Obe nọ mẹ nya seba k’owhẹ na o kẹ imuẹro inọ esuo Jesu ọ te wha eghale se ohwo-akpọ. Muẹrohọ oware nọ ọ ta evaọ edhe-ẹme avọ 5 ọrọ uzou avọ 133. [Sei.] Otẹrọnọ whọ gwọlọ, o te were omẹ re me wuhrẹ Ebaibol na kugbe owhẹ ọvọvẹ.” Otẹrọnọ ọ gwọlọ wuhrẹ, ru ọruẹrẹfihotọ re who zihe.
7 Ohwo nọ ọ riẹ oria nọ o re dh’uzou họ kẹ ọkpọvio re o yeri kugbe ebẹbẹ uzuazọ họ ọ rẹ sae gaviezọ kẹ onana:
◼ “Ma be rria evaọ oke nọ unwenọ ohwo kpobi ọ rẹriẹ ova dhe ebẹbẹ ilogbo. Ahwo buobu a be nyabru ek’iroro sa-sa kẹ ọkpọvio. Diẹse who roro nọ ma rẹ sae jọ ruẹ emamọ uthubro nọ o rẹ ghinẹ k’omai erere? [Kuvẹ kẹ uyo.] Ebaibol na ọ ta uzẹme nọ u wuzou nọ o gwọlọ nọ mai kpobi a re vuhumu.” Se Jerimaya 10:23. Rovie obe ọ Greatest Man na kpohọ emuhọ je se edhe-ẹme ọsosuọ eva otọ uzoẹme-osese urere na. “Obe nana u ti fiobọhọ k’owhẹ vuhu epanọ, evaọ otọ Uvie Ọghẹnẹ, a ti ro si ebẹbẹ mai kpobi no. Kọ whọ gwọlọ sei?” Who ve fi obe na họ ada evaọ unu ọ azọhọ riẹ.
8 Otẹrọnọ evaọ iweze ọsosuọ whọ t’ẹme kpahe ẹgwọlọ ohwo kẹ ọkpọvio, whọ rẹ sae gbẹ t’ẹme na haro evaọ ozihebro na inọ:
◼ “Okenọ ma kaki zere oma, ma rọwo nọ ma gwọlọ ọkpọvio no obọ Ọghẹnẹ ze otẹrọnọ ma re thihakọ ebẹbẹ uzuazọ avọ obokparọ. Kpahe oyena, me roro nọ eme ọ ekuhọ nọ a ta evaọ obe nọ mẹ nya seba k’owhẹ na o te were owhẹ. [Se uzou avọ 35, edhe-ẹme avọ 8 gbe 11, ọrọ obe ọ Greatest Man na.] O were omẹ nọ mẹ rẹ k’owhẹ obe uwuhrẹ Ebaibol ọvọvẹ, yọ mẹ ruẹrẹ oma họ no re me dhesiẹe k’owhẹ obọnana.”
9 Otẹrọnọ whọ be rehọ Obe Ikuigbe Ebaibol Mẹ ruiruo, whọ rẹ sae ruẹrẹ idhesẹvia obọ ra họ who ve riwi enọ a dhesẹ fihọ obehru na wọhọ oriruo. Jihova ọ te ghale omodawọ mai nọ ma bi ro fiobọhọ kẹ ekpako gbe emaha na re a wo ovuhumuo aghare Ẹme Ọghẹnẹ gbe ọkpọvio riẹ evaọ uzuazọ mai.—Ol. 119:105.