Efihọ-Ada ọ Obe Eriariẹ Nọ I Re Su Kpohọ Uzuazọ Ebẹdẹ Bẹdẹ Na
1 Eva e rẹ were omai ẹsikpobi kpahe obe na, Eriariẹ Nọ I Re Su Kpohọ Uzuazọ Ebẹdẹ Bẹdẹ. Ahwo udu-oruọzewọ a vuhu obe na mu yọ u fiobọhọ kẹ ahwo buobu wo edikihẹ rai kẹ Jihova jẹ họ-ame no. U dhesẹ uzẹme na evaọ edhere ọliọliọ. A ru obe na re u fiobọhọ kẹ ahwo wo eriariẹ egbagba uzẹme na vẹrẹ vẹrẹ. Evaọ December ma te wariẹ wo uvẹ nọ ma ti ro fi obe onana họ ada evaọ ẹkwotọ mai. Ofariẹ re, ma re zihe bru ahwo nọ a dhesẹ isiuru hrọ. Kọ eme ma sae ta rọ kpare isiuru je fi otọhotọ họ kẹ ozihebro?
2 Odhesẹvia jọ ọ rọ etenẹ nọ ọ rẹ sai si ohwo nọ ẹrọwọ riẹ kpahe Ọghẹnẹ o whrehe no urru:
◼ “Ahwo buobu a rọwo Ọghẹnẹ no emaha ze, rekọ enẹna a ruẹ nnọ ẹrọwọ rai ọ rọ epanọ ọ jọ vẹre he. Kọ eme who roro nọ o sae wha oyena ze? [K’uvẹ kẹ uyo.] Eroro kpahe igbunu ehrugbakpọ na o rẹ bọ ẹrọwọ mai fihọ Ọghẹnẹ. [Se Olezi 19:1.] Ọnọ izi riẹ i bi su emama obọ odhiwu enana ọ k’omai ọkpọvio ọghaghae re. [Se Olezi 19:7-9.] Awọ nana i dhesẹ epanọ o r’oja te re ma rehọ utho ẹgba mai kpobi wuhrẹ kpahe Ọghẹnẹ gbe ẹjiroro riẹ. [Si ẹjiroro kpohọ uwoho nọ o rọ ẹwẹ-obe avọ 4-5 na, je se ẹme nọ o dhesẹ uwoho na.] Whọ tẹ gwọlọ wo erere no obọdẹ eriariẹ enana ze, o te were omẹ re mẹ nya se obe onana ba k’owhẹ evaọ azọhọ ₦55.”
3 Otẹrọnọ whọ t’ẹme kẹ ohwo nọ ọ kare ẹrọwọ fihọ Ọghẹnẹ rekinọ o dhesẹ isiuru jọ, whọ sai rovie obe na kpohọ ọtadhesẹ nọ ọ rọ ẹwẹ-obe avọ 4-5 na who ve muhọ, inọ:
◼ “Nọ mẹ nyaze oke nọ u kpemu, ma rri obọdẹ uwoho okegbe owowoma ọnana. Ẹme nọ o dhesẹ uwoho na o nọ inọ, ‘Eme who re ru hrọ re whọ sae reawere rai?’ Kọ ẹvẹ whọ sae k’uyo oyena? [K’uvẹ kẹ uyo.] Ebaibol na o dhesẹ ovo jọ evaọ ẹgwọlọ na vevẹ. [Se Jọn 17:3.] Eriariẹ e r’oja kẹ ẹrọwọ fihọ Ọghẹnẹ mai. Obọdẹ edhere jọ nọ ma sae rọ riẹ oware nọ u fo nọ ma rẹ riẹ kpahe họ ẹkwoma omarototọ wuhrẹ Ebaibol na.” Rovie kpohọ uzou 1 re whọ fodẹ iroro uduotahawọ jọ nọ e rọ edhe-ẹme 1-5. Dhesẹ vevẹ oghẹrẹ nọ a re ru uwuhrẹ Ebaibol, whọ vẹ ta nọ who ti zihe ze re wha gbẹ t’ẹme na haro.
4 Avọ iroro eware iyoma jọ nọ e via kẹle na, whọ sae ta nọ:
◼ “Ẹsejọhọ who yo kpahe [fodẹ oware na]. Kọ whọ sai roro no ẹdẹjọ sọ Ọghẹnẹ ọ be daezọ okienyẹ gbe uye-oruẹ nọ e be via wariẹ omai họ na hayo enọ e be tubẹ via k’omai na dede? [K’uvẹ kẹ uyo.] Ebaibol o k’omai imuẹro inọ Ọghẹnẹ o you omai jegbe nnọ o ti fiobọhọ k’omai evaọ etoke uye.” Se eria jọ evaọ Olezi 72:12-17. Rovie obe ọ Eriariẹ na kpohọ ẹwẹ-obe avọ 70, whọ vẹ fodẹ nnọ o k’iyo onọ jọ nọ ima ahwo a be hae nọ, Fikieme Ọghẹnẹ ọ jẹ k’uvẹ kẹ uye-oruẹ? Kẹsena whọ vẹ gbẹ ta haro nọ, “Whọ te ruẹ nọ uyo Ebaibol rọkẹ onọ oyena o rọ ọbọga. Mẹ gwọlọ nya se obe onana ba kẹ owhẹ evaọ azọhọ ₦55 re whọ sai se kpahe iẹe kẹ omobọ ra.”
5 Nọ who te zihe re wha gbẹ t’ẹme rai haro kpahe oware nọ Ọghẹnẹ ọ jẹ k’uvẹ kẹ uye-oruẹ, whọ sae ta nọ:
◼ “Oke nọ u kpemu nọ mẹ nyaze, ma t’ẹme kpahe [fodẹ oware kpobi nọ wha t’ẹme kpahe ẹdẹ ọyena]. Onọ na o tẹ roma via kpahe oware nọ o soriẹ nọ Ọghẹnẹ ọ jẹ k’uvẹ kẹ uye-oruẹ kri te ere evaọ akpọ na. Kọ ẹvẹ who roro? [K’uvẹ kẹ uyo.] O rọ uduotahawọ re ma riẹ nọ orọnikọ Ọghẹnẹ họ ọnọ ọ be wha iyero ebẹbẹ itieye na ze he.” Rovie kpohọ ẹwẹ-obe avọ 71-72 evaọ obe Eriariẹ na, whọ vẹ t’ẹme kpahe iroro Ikereakere jọ nọ a t’ẹme kpahe evaọ edhe-ẹme avọ 3-5. Whọ vẹ ta kẹe nnọ who ti zihe ze re who dhesẹ oware nọ ma je wo imuẹro inọ uye-oruẹ nọ Ọghẹnẹ ọ k’uvẹ kẹ na u ti kuhọ kẹle.
6 Nọ whọ tẹ nya ku ọyewọ, whọ sae t’ẹme kpahe uviuwou na:
◼ “Eyewọ buobu a rọwo nnọ ebẹbẹ buobu e rọ omodawọ ẹyẹrọ uzuazọ uviuwou evawere. Eme who muẹrohọ wọhọ ọzadhe ologbo? [K’uvẹ kẹ uyo.] Ibuobu mai a be dao utho ẹgba mai, rekọ ma re wo ovuhumuo kẹ uketha nọ u re fiobọhọ kẹ omai wo iyẹrẹ ezi. Ebaibol na o kẹ obọdẹ ohrẹ. [Se eria jọ evaọ Ahwo Kọlọsi 3:12, 18-21.] Ebaibol na o wo eme efa buobu kpahe ẹme ọnana, wọhọ enọ a dhesẹ fihọ uzou 15 ọ obe onana, uzoẹme riẹ o ta nọ ‘Ebabọ Uviuwou Nọ O Rẹ Kẹ Ọghẹnẹ Orro.’ O fodẹ ithubro nọ a kẹ evaọ Ebaibol na nọ i dhesẹ oghẹrẹ nọ a re ro ru idhọvẹ orọo lọhọ gbe oghẹrẹ nọ a re ro yeri kugbe ebẹbẹ nọ e rẹriẹ aro ku emọ mai. U mu omẹ ẹro nọ okenọ who ti sei o te were owhẹ oma.”
7 Otẹrọnọ who bi zihe bru ọyewọ nọ o wo ọdawẹ kẹ ebẹbẹ uviuwou, whọ sae ta onana:
◼ “Mẹ riẹ nọ whẹ, wọhọ ọyewọ, whọ gwọlọ oware nọ o mai woma kẹ emọ ra. Nọ o rọ bẹbẹ re a ruru ai no oware uyoma kpobi na, who re wuhrẹ ai oghẹrẹ nọ a re ro yeri kugbe ebẹbẹ uzuazọ. Ẹvẹ who roro nọ a rẹ sai ro ru oyena? [K’uvẹ kẹ uyo.] Ovo jọ evaọ eware nọ e mai w’uzou nọ ọyewọ ọ rẹ kẹ emọ riẹ họ ewuhrẹ.” Rovie kpohọ ẹwẹ-obe avọ 145-146 evaọ obe ọ Eriariẹ na, who ve si iroro kpohọ uvi ohrẹ Ebaibol na, who ve fielo họ epanọ u w’uzou te gbe oghẹrẹ nọ ẹnya lele riẹ o sae rọ jọ oghale. Ta kẹe nọ whọ te wariẹ zihe re who dhesẹ oghẹrẹ nọ a rẹ rọ rehọ obe onana ro wuhrẹ eware buobu kpahe ewo uzuazọ uviuwou evawere.
8 Evaọ uzẹme obe onana yọ ọruẹrẹfihọ ogbunu nọ o no obọ Jihova ze re iruo ekokohọ ahwo na evaọ edẹ urere enana e ‘nyaharo vẹrẹ.’ (Aiz. 60:22) Ma tẹ rehọ iẹe ruiruo ziezi, ma sae kẹ eriariẹ nọ i re fiobọhọ kẹ ohwo jọ re o wo uzuazọ ibẹdẹ bẹdẹ.