“Hẹ Kẹ Uyere”
1 A wuhrẹ ibuobu mai evaọ oke emaha re ma ta nọ “ivie” gbe “do” okenọ ohwo o te dhesẹ ọghọ hayo uwowou k’omai. Pọl ọ k’omai ohrẹ re ma “hẹ kẹ uyere,” yọ ma rẹ mae yere Jihova. (Kọl. 3:15, 16) Rekọ ẹvẹ ma sai ro dhesẹ uyere kẹ Ọnọma Oride mai? Kọ obọdẹ ẹjiroro vẹ ma wo nọ ma rẹ rọ kẹe uyere?
2 Pọl ukọ na o kere nọ: “Uyere u te Ọghẹnẹ, ọnọ o ru nọ ma jẹ kpare obọ fiki Ọnowo mai Jesu Kristi!” (1 Kọr. 15:57) Evaọ oke ehaa Ekareghẹhọ k’ukpe k’ukpe, a rẹ kareghẹhọ omai kpahe uyoyou nọ u w’oba ha nọ Ọghẹnẹ gbe Kristi a dhesẹ evaọ ẹwhaze ẹtanigbo na nọ o k’omai ẹruore uzuazọ ebẹdẹ bẹdẹ. (Jọn 3:16) Nọ unwenọ ohwo kpobi ohwo riẹ jọ nọ o you o whu seba no na, ẹvẹ ma rẹ kẹ uyere te kẹ eyaa Jesu ọrọ ẹkparomatha na! Uyere o rẹ vọ idu mai kpọhọ hwẹ nọ ma te roro kpahe irẹro ẹzọ no urere eyero ọnana ababọ uwhu. (Jọn 11:25, 26) O re bẹbẹ re a duku eme nọ a re ro dhesẹ uyere kẹ eghale igbunu nọ ma te gbẹ ruẹ evaọ obọ Jihova evaọ Aparadase otọakpọ nọ ọ be tha na. (Evia. 21:4) Ẹjiroro efa vẹ i woma vi enana nọ ohwo ọ rẹ rọ ‘kẹ Ọghẹnẹ uyere’?
3 Epanọ A rẹ rọ Kẹ Ọghẹnẹ Uyere: U fo ẹsikpobi re ma dhesẹ uyere mai evaọ olẹ kẹ Jihova fiki ewoma riẹ. (Ol. 136:1-3) Oma o rẹ wọ omai re, re ma dhesẹ uyere mai kẹe evaọ emamọ idhere efa. Wọhọ oriruo, ma rẹ ghinẹ jariẹ evaọ Ẹdoka, March 23, kẹ Ekareghẹhọ uwhu Kristi. Re i fiobọhọ nyate ẹgwọlọ ukoko na gbe orọ iruo akpọ-soso, ma rẹ rọ evawere rehọ ‘ekuakua eghaghae mai kẹ Jihova adhẹẹ.’ (Itẹ 3:9) Ma re fiobọhọ kẹ ekpako na ziezi je ruiruo kugbe ai, ma vẹ rehọ ere dhesẹ uyere mai kẹ Jihova fiki obufihọ nọ ọ kẹ no ẹkwoma rai ze. (1 Tẹs. 5:12, 13) Kẹdẹ kẹdẹ, ma rẹ daoma yọrọ uruemu nọ u kiete nọ o rẹ kẹ odẹ Ọghẹnẹ orro. (1 Pita 2:12) Edhesẹ uyere mai enana kpobi e rẹ were Jihova.—1 Tẹs. 5:18.
4 Edhesẹ Uyere Mai nọ O Mai Woma: Ẹwẹ mai kpobi nọ ma re ro w’abọ evaọ iruo ewhowho-Uvie na, adhẹẹ rọkẹ odẹ Jihova, uyere kẹ evaọ olẹ, jẹ thothọ uzẹme na avọ omurokpotọ e rọ udevie idhesẹ nọ e mai woma ọrọ uyere nọ u no udu mai ze nọ ma re ru kẹ Ọnọma omai kẹ eware kpobi nọ o ru fiki mai. Eva e rẹ were Jihova re ọ ruẹ nọ ma be kẹe iruo efuafo evaọ obufihọ oreva riẹ “re ahwo kpobi a wo usiwo.” (1 Tim. 2:3, 4) Oyejabọ nọ iwhowho-uvie buobu nọ e sae ruẹrẹ oma họ kẹe a be rọ k’uyo kẹ use nọ o rehọ oma via evaọ Odibọgba Uvie Mai ọrọ February re a fi obe họ wọhọ ekobaro ubroke evaọ etoke amara ọvo jọ hayo bu vi ere evaọ emerae ọ March, April, gbe May. Efiba omodawọ evaọ odibọgba na yọ emamọ edhere nọ ma rẹ rọ ‘kẹ Ọghẹnẹ uyere.’ Kọ whọ te sai kuomagbe otu ekobaro na evaọ April? gbe evaọ May?
5 A k’omai ẹruore imuẹro no ọrọ ẹria ebẹdẹ bẹdẹ. Okenọ ma tẹ ruẹ nọ o rugba no, ma ti wo ẹjiroro efa kẹdẹ kẹdẹ nọ ma te gbẹ rọ kẹ Jihova uyere avọ oghọghọ.—Ol. 79:13.