Eme Who bi Ru Kpahe Ababọ-Osegboja?
1 Ababọ-osegboja họ ababọ ọwhọ hayo iroro, ababọ isiuru hayo ororokẹ. O rọ uruemu jọ nọ o mai bu jẹ rọ bẹbẹ nọ ma be rẹriẹ aro ku evaọ odibọgba mai. Kọ ẹvẹ who bi ru kpahe iẹe? O lẹliẹ owhẹ rolobọ no evaọ odibọgba ra? Kọ ẹvẹ whọ sai ro fiei kparobọ re whọ sae rehọ ovuẹ Uvie na nya te ahwo oma?
2 Orọ ọsosuọ, riẹ oware nọ o soriẹ ze nọ ahwo nọ a rọ ẹkwotọ ra a je bi dhesẹ ababọ-osegboja. Kọ fikinọ isu egọmeti gbe erọ egagọ a be sai ru ẹgwọlọ rai kẹ ai hi? Kọ a w’iroro nọ uvumọ ifue e rọ kẹ ebẹbẹ nọ e rẹriẹ ova dhe ai hi? Kọ a wo avro kpahe eyaa oware jọ nọ o mai woma? Kọ a wo ababọ unevaze re a roro kpahe eme ẹzi ajokpanọ a rẹ nwane ruẹ irere rai tao?
3 Dhesẹ Ẹruore Uvie na Vevẹ: Ẹbẹbẹ ọvuọvo ọ riẹ hẹ ọnọ Uvie na u ti kuhọ họ. Fikiere okenọ o tẹ lọhọ, u fo nọ ma rẹ t’ẹme kpahe eyaa Uvie na, fodẹ ugogo eme Ikereakere na, o gbẹ make lọhọ hayo w’iruo re a dhesẹ oria ikere Ebaibol jọ họ. (Hib. 4:12) Rekọ, ẹvẹ ma sae rọ t’ẹme na te umuo oyena?
4 U fo re ahwo a wo otoriẹ ẹjiroro iweze mai. U fo re a vuhumu nọ uyoyou ọrivẹ o wọ omai nya gbe ororokẹ rọkẹ ahwo okogho na. Ma rẹ sae nọ enọ obọdẹ-iroro wọhọ, “Eme who roro nọ o rọ ifue kẹ [ẹbẹbẹ nọ o bi kpomahọ okogho na]?” Otẹrọnọ edhere jọ o w’iruo ho, dao edhere ọfa.
5 Evaọ ẹkwotọ edafe jọ nọ ahwo a je wo orivo kẹ ovuẹ Uvie na, iwhowho-uvie a be daoma re a gwọlọ ẹme-emuhọ nọ ọ rẹ kpare isiuru. Nọ a je fi obe ọ Eriariẹ na họ ada, imava-orọo jọ a tẹ dao ẹme-emuhọ ọnana: “Kọ who roro nọ emamọ ewuhrẹ isukulu ọ r’oja kẹ obokparọ evaọ akpọ inẹnẹ na? Kọ whọ rọwo nọ obọdẹ ewuhrẹ o re kugbe eriariẹ Ebaibol na?” Evaọ uvo jọ a te fi ebe esa họ ada, ọjọ rọkẹ aye nọ ọ ta uwhremu na nnọ o se obe Eriariẹ na kpobi re no, ọ tẹ rọwo ewuhrẹ Ebaibol.
6 Okenọ whọ tẹ rẹriẹ ova dhe ababọ-osegboja, dao edhere sa-sa, nọ enọ iroro, jẹ gwọlọ ẹgba Ẹme Ọghẹnẹ. Whọ sae rọ ere fiobọhọ kẹ amọfa re a dede ẹruore igbunu Uvie mai na rehọ.