Nya Lele Isiuru Evaọ Usi Uvie Na
1 Evaọ eka jọ nọ e vrẹ no na, ma be reawere uvẹ ẹghale Usi Uvie ọrọ Avọ 35 na, onọ uzoẹme riẹ o rọ “Kọ Ẹdẹjọ Ọ te Jọ nọ Ahwo Kpobi A Ti Ro You Ohwohwo?” Iwhowho-uvie evaọ oria kpobi a be daoma re a rehọ Usi Uvie onana nyate ahwo nọ i wo isiuru kpobi oma. (Mat. 10:11) Dede nọ a m’oma nnọ usi ovravra na u re kuhọ evaọ Ẹdoka, November 16, otẹrọnọ ekwotọ efa e riẹ nọ a re gbe kpohọ, ekpako na a rẹ sae ta kẹ owhẹ re whọ gbẹ ruabọhọ ẹvaha Usi Uvie ọrọ Avọ 35 na otẹrọnọ enọ a vi se ukoko na i gbe kiọkọ.
2 Usi Uvie onana o kpare isiuru ahwo buobu no. A ruẹ nnọ ahwo-akpọ a ku uyoyou ọsosuọ rai fiẹ no fikiere a te bi roro kpahe oware nọ obaro o te jọ. (2 Tim. 3:3) Ma gwọlọ nya lele isiuru nọ ma bọ no.
3 Usi Uvie na O Ruẹ Iyẹrẹ No: Evaọ Usi Uvie nọ a vravra evaọ etoke 1995, aye jọ nọ o jọ u t’obọ ọ tẹ ziọ iwuhrẹ eva Ọgwa Uvie na keme ọ gbẹ gwọlọ wuhrẹ kpahe oware nọ Isẹri Jihova a rọwo. Evaọ ewuhrẹ na ọ tẹ jẹ uwuhrẹ Ebaibol rehọ yọ no oke oyena ze uwuhrẹ u ri voi hi. U kri hi, o te kere se ichọche nọ ọ jọ vẹre inọ, ọ gbẹ rọ họ!
4 Obọnana, ahwo udhusoi buobu evaọ ẹkwotọ na a se ovuẹ nọ o rọ Usi Uvie ọrọ Avọ 35 na no. Rekọ ẹvẹ a rri rie fihọ? Oware nọ a se o tẹ make were ai, ibuobu a te j’owọ họ ajokpanọ omọvo Isẹri Jihova jọ ọ wariẹ weze bru ai. Kọ whọ be m’oma re who zihe? Ọdawẹ nọ ma re wo kẹ erivẹ mai o rẹ w’omai re ma ru ere. A rẹ wariẹ weze bru ahwo nọ i dhesẹ isiuru fihọ Usi Uvie na kpobi.
5 Eme Whọ rẹ Ta nọ Who te Zihe? Whọ rẹ sae kpahe ẹme fihọ epanọ ovuẹ nọ o rọ Usi Uvie na u kiehọ te whọ vẹ jẹ nọ onọ jọ nọ u re duobọ te iroro. Gaviezọ ziezi nọ ọnọ o w’uwou na ọ be ta ẹkẹ udu riẹ re whọ ruẹse riẹ oware nọ o rọ iroro riẹ. Who ve si ẹjiroro kpohọ oria jọ nọ u fo evaọ ibroshọ Gwọlọ na, onọ a fodẹ evaọ Usi Uvie na. Otẹrọnọ ọ kẹ emamọ uyo, daoma re who mu uwuhrẹ Ebaibol họ ovavo.
6 Eme jọ nọ whọ rẹ sae ta ena okenọ who te bi zihe bru ahwo nọ i dhesẹ isiuru fihọ “Usi Uvie” ọrọ Avọ 35 na:
◼ “Whọ sae kareghẹhọ nnọ mẹ wha omobe jọ s’owhẹ kẹle. Ovuẹ riẹ u duobọ te eme nọ e r’oja nọ e be hẹriẹ ahwo-akpọ nẹnẹ—ababọ uyoyou kẹ amọfa.” Si iroro kpohọ imuẹro nọ a kẹ eva ẹwẹ-obe avọ 2 ọrọ Usi Uvie na evaọ otọ uzoẹme na “Uyoyou Ọrivẹ U Kiekpo No.” Whọ vẹ nọ inọ: “Kọ who roro nọ o rọ ẹjiroro Ọghẹnẹ re ahwo-akpọ a rria enẹ?” Kuvẹ kẹ uyo. Rovie kpohọ uwuhrẹ avọ 5 evaọ ibroshọ Gwọlọ na, whọ vẹ daoma mu uwuhrẹ Ebaibol họ.
◼ “Okenọ ma kake ruẹ oma, mẹ nyasiọ omobe jọ ba k’owhẹ nọ uzoẹme riẹ o rọ ‘Kọ Ẹdẹjọ Ọ te Jọ nọ Ahwo Kpobi A Ti Ro You Ohwohwo?’ Kọ who roro nọ oghẹrẹ akpọ otiọye na o lọhọ?” Kuvẹ kẹ uyo. Rovie kpohọ uwuhrẹ avọ 6 evaọ ibroshọ Gwọlọ na, who ve je se edhe avọ 6. Who ve se eyaa Ọghẹnẹ eva Maeka 4:3, 4. O tẹ wọhọ nọ ọnọ o w’uwou na o wo isiuru, fi ibroshọ na họ ada jẹ fodẹ ewuhrẹ obe na.
◼ “Okiẹdẹ nọ ma ruoma, mẹ nyasiọ omobe jọ ba k’owhẹ nọ uzoẹme riẹ o rọ ‘Kọ Ẹdẹjọ Ọ te Jọ nọ Ahwo Kpobi A Ti Ro You Ohwohwo?’ O fodẹ obe uwuhrẹ Ebaibol ọvọvẹ. Me zihe ze re me dhesẹ obe jọ k’owhẹ nọ ma re ro ru uwuhrẹ. [Dhesẹ obe Eriariẹ na.] Obe onana u dhesẹ vevẹ okenọ ahwo kpobi a ti ro you ohwohwo, o tẹ jẹ kiyo enọ efa nọ who bi roro kpahe: Fikieme ma jẹ be rro kpako je whu? Fikieme Ọghẹnẹ ọ jẹ k’uvẹ kẹ uye-oruẹ? Eme ọ rẹ via kẹ iyoyou mai nọ i whu no?” Whọ vẹ nọe nnọ: “Kọ me dhesẹ oghẹrẹ nọ ma re ro ru uwuhrẹ na k’owhẹ?” Ọ tẹ rọwo uwuhrẹ Ebaibol na, mu uwuhrẹ na họ. Rekọ ọ tẹ se uwuhrẹ na, fi obe na họ ada evaọ unuigho riẹ. M’oma nnọ whọ te wariẹ zihe tha.
7 Nọ a tẹ rọ Usi Uvie ọrọ Avọ 35 na nya ẹkwotọ na kpobi duwu no, ma rẹ sai fi obe Eriariẹ na họ ada evaọ ẹdẹ nọ i kiọkọ evaọ amara na. A rẹ sai duku emamọ ẹjiroro nọ a re ro fi obe onana họ ada evaọ ẹwẹ-obe obemu ọ Odibọgba Uvie Mai na ọrọ March, June, gbe November 1996; gbe June 1997.
8 Ẹghale obọdẹ Usi Uvie na o rẹ wọ omai kpobi re ma ru omodawọ mai nyaharo evaọ iruo usiuwoma ota na. Avọ obufihọ Jihova ma fievahọ nnọ usi ovravra onana u ti wo obokparọ, fiobọhọ kẹ ahwo re a ruẹ ẹjiroro Ọghẹnẹ kẹ ahwo-akpọ kpobi re a you ohwohwo. Ajọ Jihova ọ gbẹ ghale emamọ omodawọ mai nọ ma bi lele isiuru evaọ Usi Uvie na.