Ẹbọ Isiuru nọ Usi Uvie ọrọ Avọ 36 na O Kpare
1 Kọ whọ ghale Usi Uvie ọrọ Avọ 36 nọ a ghale k’owhẹ na reno? O nọ onọ ẹruoke jọ nọ ahwo kpobi a re roro kpahe: “Odu-Ikpe Ọkpokpọ Na—Eme Obaro na O Kru kẹ Owhẹ?” Nọ ukpe ọ 2000 na u je sikẹle, irẹro oware nọ odu-ikpe ọkpokpọ na ọ te wha ze i wo ohẹriẹ gaga. Usi Uvie ọrọ Avọ 36 o ta kpahe irẹro eyena jọ jẹ kareghẹhọ omai nnọ iyero akpọ na e kẹ uvi iroro kẹ ẹruore he. Odu-ikpe ọvo nọ ọ te wha udhedhẹ gbe omofọwẹ nọ ahwo buobu a gwọlọ na ze họ Esuo Odu-Ikpe Kristi Jesu na. Evaifihọ mai kpahe imuẹro ọ Uvie riẹ na o w’omai nọ ma rọ vaha Usi Uvie ọrọ Avọ 36 na kẹ ohwo kpobi nọ ma sae rehọ iẹe kẹ.
2 Owọjẹ kẹ Usi Uvie: Ẹghale Usi Uvie nọ e vrẹ no e ghinẹ k’omai ajọwha evaọ iruo mai. Kpahe Usi Uvie ọrọ Avọ 35, uwou-ogha obọ Canada u kere nọ: “Iwhowho-uvie gbe ekobaro na e tha usi ovravra obọdẹ nana uke avọ ọwhọ evaọ usiuwoma ota na, yọ a reawere eware ọbọga buobu.” Ababọ avro who dhesẹ ọwhọ otiọye na kẹ ẹghale ọ Usi Uvie ọrọ Avọ 36 na no.
3 A m’omaa nọ usi ovravra ọ Usi Uvie onana u ti kuhọ evaọ November 17, 2000. Kọ a ru ẹkwotọ nọ a ghale kẹ ukoko rai na reno? O gbẹ rrọ ere he, ekpako na a sae te ta kẹ owhai re wha ru usi ovravra na haro rite urere ọ November.
4 Kọ rite oke onana ẹvẹ ahwo a kpahefihọ ẹghale Usi Uvie ọrọ Avọ 36 na no evaọ oborai? Umutho ahwo jọ a ti kere eme fihọ ẹmẹwẹ-obe ayare na rọ yare ibroshọ Gwọlọ na gbe/hayo obe uwuhrẹ Ebaibol. Dede na, o sae jọ nọ ahwo buobu evaọ udevie enọ i dhesẹ isiuru kpahe uzoẹme ọ odu-ikpe na evaọ oke ọsosuọ na a te j’owọ họ bẹsenọ omọvo Isẹri Jihova jọ o re zihe bru ai. A re zihe bru ahwo kpobi nọ a dhesẹ isiuru. Okevẹ o te mai woma nọ a re ro ru onana? Ezihe na ọ rẹ jọ ababọ oke oraha.
5 Muẹrohọ eware enana nọ e via no ezihe bru ahwo nọ a fi Usi Uvie ọrọ Avọ 35 na họ ada kẹ. Ọkobaro jọ evaọ Ireland o fi Usi Uvie họ ada kẹ ohwo jọ nọ o wo ehọtẹle. Ovuẹ na u si aye na urru gaga o te zizie oniọvo-ọmọtẹ na re o zihe bru ei. Edẹ ivẹ e vrẹ no oniọvo-ọmọtẹ na o te zihe, uwuhrẹ Ebaibol u te muhọ. Evaọ Denmark, a nyasiọ Usi Uvie jọ ba uwou jọ nọ a jọ di uvumọ ohwo họ uwou hu. Evaọ ẹdẹ ọvo ọyena aye nọ ọ be rria uwou yena o te vi ẹmẹwẹ-obe ayare na se uwou-ogha na, uwou-ogha na u te vi ei bru ukoko nọ o kẹle aye na. Taure oka na u te ti re, inievo-emetẹ ivẹ e tẹ nya, a te ru ọruẹrẹfihọ kẹ obe uwuhrẹ, aye na o te kpohọ ewuhrẹ ukoko ọsosuọ riẹ evaọ obọ Ọgwa Uvie na!
6 Ẹme nọ Whọ Rẹ Ta Okenọ Who te Zihe: Re a zihe bru ohwo nọ a fi Usi Uvie họ ada kẹ o lọhọ gaga yọ o rrọ abọ odibọgba mai na nọ o rẹ were oma. Nọ who te bi ru ozihebro, o rrọ oware areghẹ re whọ wha Usi Uvie ọrọ Avọ 36 na jọ lele oma, keme o sae jọ nọ ọnọ o wo uwou na o wo ọrobọ riẹ hẹ. Whọ rẹ sae dao iroro-ejẹ enana.
7 Nọ whọ tẹ kareghẹhọ ọnọ o wo uwou na ohwo nọ whọ rrọ no, whọ sae ta nnọ:
◼ “Mẹ nya siọ omobe jọ ba k’owhẹ nọ uzoẹme riẹ o ta nọ ‘Odu-Ikpe Ọkpokpọ Na—Eme Obaro na O Kru kẹ Owhe?’ Kọ o gbẹ jọ uduotahawọ k’owhẹ nọ who se nnọ kẹle na Esuo Odu-Ikpe Kristi Jesu o ti muhọ, nọ o te wha iyero Aparadase ziọ otọakpọ na? [Dhesẹ iwoho Aparadase nọ e rrọ Usi Uvie ọrọ Avọ 36 na.] Evaọ ẹwẹ-obe obọ emu na, a zizie owhẹ re whọ yare ibroshọ na Eme Ọghẹnẹ Ọ Gwọlọ Mi Omai?” Dhesẹ ibroshọ na kẹe, rovie kpohọ uwuhrẹ avọ 5, se onọ ọsosuọ na gbe edhe-ẹme 1 gbe ọrọ avọ 2, jẹ ta kẹ ọnọ o wo uwou na re ọ kpahefihọ iẹe. Se jẹ ta kpahe ikereakere ọvo hayo ivẹ jọ. O tẹ lọhọ, nọ onọ ofa je se edhe-ẹme ọfa, kẹsena who ve ru ọruẹrẹfihotọ ezihe re wha t’ẹme na haro.
8 Nọ obe ofa nọ a ti fihọ ada evaọ November o te jọ ibroshọ “Gwọlọ” hayo obe “Eriariẹ” na, whọ rẹ sae ta inọ:
◼ “Okenọ me weze ze kẹle na, mẹ nya siọ omobe na ‘Odu-Ikpe Ọkpokpọ Na—Eme Obaro na O Kru kẹ Owhẹ?’ ba kẹ owhẹ. U wo uzizie kẹ obe uwuhrẹ Ebaibol ọvọvẹ. Me zihe ze ti dhesẹ obe ewuhrẹ na k’owhẹ. [Dhesẹ ibroshọ Gwọlọ na, je rovie kpohọ uke riẹ; hayo dhesẹ obe Eriariẹ na, re who rovie kpohọ ẹwẹ-obe avọ 188-189.] Odu-Ikpe nọ a jọ Ebaibol na ta kpahe na ọ te wha oghẹrẹ iyero nọ whọ be ruẹ evaọ uwoho nana ze. Re ma te kẹ uzuazọ evaọ Aparadase, o gwọlọ re ma wo eriariẹ egbagba erọ Ọghẹnẹ. Iviena k’omẹ uvẹ re me dhesẹ epanọ ma re ro wuhrẹ Ebaibol na k’owhẹ kpẹkpẹe.”
9 Ẹghale Usi Uvie ọrọ Avọ 36 na o k’omai ọwhọ no re ma ru obọ nọ ma re wo evaọ odibọgba na ga viere, nọ o rẹ wha uvi isẹri-ise ze. Ẹsejọhọ onana o kpare isiuru ahwo buobu no evaọ ẹkwotọ na. Omodawọ mai kpobi re ma bọ isiuru nana o te wha enọ e wọhọ igodẹ nọ ma rẹ rehọ oghọghọ duku ẹkwoma obufihọ Jihova ze.—Mat. 10:11; Iruẹru 13:48, 49, 52.