Kọ Who Wo Ugogo Unu Emagazini nọ I re t’Owhẹ Obọ?
1 Kọ who kpohọ oria omakugbe kẹ usiuwoma ota no ẹdẹjọ whọ jẹ ruẹ nọ emagazini e rrọ ẹkpa usiuwoma ra ha? Kareghẹhọ uko obeva ọ Odibọgba Uvie Mai ọrọ March 1996 (ọrọ Oyibo) nọ u wo uzoẹme ọ “Rehọ Emagazini Mai Ruiruo Vọvọ.” O ta k’omai nnọ ma “vi ugogo unu emagazini jọ,” ta nọ: “Vi ugogo unu ọ emagazini nọ u fo ziezi evaọ obọ oniọvo nọ ọ be rẹrote emagazini na. Evaọ edhere ọnana, whẹ avọ uviuwou ra wha ti wo unu emagazini nọ i re te k’owhai ẹsikpobi.” Kọ who ru onana no?
2 Kọ fikieme whọ gbẹ yare unu emagazini jọ nọ whọ rẹ hai wo ẹsikpobi hi? Who ti wo iroro ọ owha-iruo ulogbo nọ whọ rẹ rọ ghale emagazini na k’oka k’oka, yọ whọ te ruẹ oghọghọ buobu evaọ ere oruo. Otẹrọnọ who wo unu nọ u re t’owhẹ obọ ẹsikpobi no, wariẹ kiẹ riwi sọ unu nọ who bi wo na u re te k’owhẹ evaọ amara soso evaọ odibọgba na. Uzẹme, o gwọlọ re ma dhesẹ ẹmeoyo evaọ unu nọ ma fodẹ nọ ma rẹ rehọ k’oka k’oka na yọ u fo re ma wo iroro owha-iruo evaọ ere oruo. Otẹrọnọ whọ te jariẹ hẹ evaọ etoke thethei, vuẹ ọnọ ọ be sẹro emagazini na sọ whọ gwọlọ nọ o siobọno emagazini ra kẹ ohwo jọ bẹsenọ who ti ziheze.
3 Uko obeva ovona nọ ma t’ẹme no ze evaọ obehru na o tẹ jẹ ta nnọ u fo re ma “m’omaa ọ ẹdẹ emagazini nọ u re dikihẹ.” Kọ whọ sae tha Ẹdẹ Emagazini ẹkpoka na uke? Wọhọ epanọ a dhesẹ eva 1999 Calendar of Jehovah’s Witnesses na, onana o rọ Ẹdẹ-Ọmaha kpobi evaọ ukpe na! Who rri epanọ u w’uzou te vo ho re a ghale Uwou-Eroro Na gbe Awake! Okenọ ma tẹ daoma re ma w’obọ vọvọ evaọ iruo emagazini, yọ ma ‘be rehọ emamọ usi oware uwoma’ se erivẹ mai.—Aiz. 52:7.