“Kọ Eme Me re Ru?”
1 Wọhọ uzoge nọ ọ be kẹle ọkpako no, whọ sae nọ inọ, ‘Eme mẹ rẹ rehọ uzuazọ mẹ ru?’ Izoge Ileleikristi a gwọlọ ru iruo rai kẹ Jihova kẹre evaọ odibọgba na. Rekọ ẹvẹ whọ sai ro ru onana evaọ okenọ whọ be wọ owha-iruo ọkpako na, onọ u kugbe ẹruorote ẹgwọlọ abọ-iwo ra na? Re a duku uyo na o lọhọ họ.
2 Izoge jọ e rẹ ruawa evaọ okenọ a te riwi uyero ugho akpọ na gbe eware nọ e rrọ obaro. U re gbe ai unu inọ: ‘Kọ u fo re me kpohọ isukulu haro viere? Kọ u fo re mẹ ruọ iruo ọkobaro na ovavo?’ Re a ruẹse j’iroro egbagba, u fo re ohwo ọ kẹ uyo onọ onana avọ oruọzewọ, ‘Eme họ oware nọ mẹ rọ karo evaọ uzuazọ?’ Ọ rẹ kiẹ ẹjiroro riẹ riwi hrọ.
3 Kọ eme whọ kọ no wọhọ oware nọ o mae r’oja k’owhẹ evaọ etoke uzoge ra? Kọ erere igho nọ a re le o mai siowhẹ urru, manikọ whọ ghinẹ gwọlọ rehọ uzuazọ ra wha isiuru Uvie na haro? Idigri ọ yunivasiti o rẹ kẹ imuẹro ho inọ ohwo ọ rẹ te ruẹ iruo hrọ. Ukpoye na, ahwo buobu a dhugbe wuhrẹ iruo nọ e rẹ nya-eki evaọ obọ ahwo, evaọ isukulu ọ akiruo hayo erọ ọwena, hayo etoke okpẹkpẹe evaọ ekọleji nọ o rẹ rehọ oke gbe uvẹ tere he.
4 Fievahọ Ẹme ọ Jihova: Uzẹme jọ nọ o r’oja nọ a re roro kpahe họ imuẹro nọ i no obọ Jihova Ọghẹnẹ ze inọ ọ rẹ gwọlọ kẹ ahwo nọ a rehọ isiuru Uvie karo evaọ uzuazọ. (Mat. 6:33) Onana yọ eyaa gheghe he. Inievo buobu nọ i kpohọ Isukulu Ewuhrẹ Odibọgba na a wo idigri ekọleji taure a tẹ te riẹ uzẹme na. Rekọ okọ vẹ a wo vẹre? Umutho rai jọ gheghe a je le akiruo nọ a wuhrẹ na. Ibuobu rai i je ruiruo nọ e whoma họ iruo-abọ odibọgba, jẹ rẹrote ẹgwọlọ igho rai ziezi evaọ okenọ a bi ru iruo ọkobaro na. Ẹkwoma erukẹre iruẹru rai evaọ odibọgba na, a bi wo eghale nọ e ghare vi erọ igho kpobi.
5 Evaọ iroro-ejẹ ọ oware nọ who re ru evaọ okenọ who te no ekọleji no, wawo ekwakwa na kpobi jẹ kiẹ ẹjiroro ra vuhumu ziezi. Rọkẹ eriwo ẹrẹrẹ ọrọ erarọ ra, roro oghẹrẹ evuẹ nọ e rrọ Awake! ọ March 8, 1998, ẹwẹ-obe avọ 19-21. Lele ọsẹ gbe oni ra t’ẹme, ekpako ukoko ra, ọsẹro ọnyawariẹ ra, gbe ekobaro nọ e kparobọ no evaọ oria ra. Oyena u ti fiobọhọ k’owhẹ j’iroro areghẹ kpahe oware nọ whọ rẹ rehọ uzuazọ ra ru.—Ọtausi. 12:1, 13.