Rehọ Uvie na Karo
1 Re a rọ Uvie Ọghẹnẹ karo evaọ uzuazọ jẹ ruabọhọ ere oruo o lọhọ họ evaọ okenọ ma tẹ rẹriẹ ovao dhe ọyawọ uyero-ugho hayo ebẹbẹ efa. Ẹvẹ ma rẹ rọ rehọ Uvie na karo evaọ okenọ ebẹbẹ e tẹ roma via? Kọ ẹvẹ otẹrọnọ a rehọ omai iruo nọ e gwọlọ nọ ma siọ iwuhrẹ ba ẹnya hayo nọ i re kpomahọ iruo usiuwoma ota mai? Kọ oke oyena Uvie na o rẹ jọ oria avivẹ evaọ uzuazọ mai?
2 Ẹrọwọ Ọgaga Ọ r’Oja: Nọ a tẹ dawo ẹrọwọ mai evaọ otọ iyero itieye na, eyaa Jihova gbe imuẹro nọ Jesu ọ kẹ na e rẹ thọrọ omai ẹro vievie he inọ otẹrọnọ ma rehọ Uvie na karo ma re wo uketha Ọghẹnẹ. (Ol. 37:25; Mat. 6:31-34) Ikpomahọ gbe itunyẹ akpọ na e rẹ sai ruru ude mai jẹ whaha omai Uvie na nọ ma re ru fihọ oware nọ o mae r’oja. Ahwo jọ a kẹ uvẹ kẹ irẹro ọ omorro-ọkwa evaọ iruo hayo irẹro ọ erere igho no re e jọ oware nọ o r’oja evaọ uzuazọ. Rekọ, wọhọ Pọl, o gwọlọ nọ ma re vuhu oware nọ o mae ghinẹ r’oja evaọ uzuazọ mu ziezi.—Fil. 3:7, 8.
3 Kọ O Gwọlọ Inwene?: Owhowho-uvie jọ ọ ta nnọ: “Udu mẹ o jọ eki mẹ—oye mẹ mai you kpobi. Me roro nọ mẹ sae gbẹ jọ Osẹri yọ mẹ be rehọ abọ oke mẹ nọ o mai bu kẹ isiuru eki.” Rekọ iroro riẹ e jẹ hae ta kẹe nọ ọ rẹ sae daoma viere evaọ iruo Jihova. U te oke jọ o te siobọno eki nọ ọ jọ ọzadhe kẹ ẹnyaharo abọ-ẹzi riẹ na. Nọ ọ roma riẹ kpobi kẹ iruo Uvie na no, ọ tẹ ta nọ: “Enẹna mẹ riẹ nnọ uzuazọ mẹ u wo obokparọ no evaọ aro Jihova, yọ oye họ oware nọ o mae r’oja.”
4 U fo ujiro inọ, ibuobu i siobọno ute akpọ gbe irẹro erere igho ologbo no, ru uzuazọ rai lọhọ, jẹ ruọ iruo odibọgba oke-kpobi na no. Idibo iruiruo gbe ekpako nọ e rrọ emoha nọ e te rọo ho nọ i bi kpohọ Isukulu Ewuhrẹ Odibọgba na a ru onana no yọ a be reawere obọdẹ uvẹ-ọghọ odibọgba. Be raro kele oriruo obọdẹ ọrọ Pọl, umutho eware ẹgwọlọ iwo e da rae ẹro.—1 Kọr. 11:1; 1 Tim. 6:6-8; Hib. 13:5.
5 Dede nọ ahwo akpọ a rẹ sae rehọ eriwo mai kpahe uzuazọ ro s’omai ẹkoko, ma wo oghale Jihova. (1 Kọr. 1:26-31) Kọ o gbẹ rọ uduotahawọ re ma riẹ nnọ ọ te rehọ omai ruiruo vọvọ te epanọ o rẹ lọhọ te kpobi je fiobọhọ k’omai ruiruo riẹ gbunu? A te gbẹ wariẹ uvẹ nọ ma wo enẹna nọ ma re ro whowho Uvie Ọghẹnẹ nọ a ro mu no na vievie he. Fikiere enẹna họ oke nọ ma rẹ rọ rehọ Uvie na karo evaọ izuazọ mai.