‘Ẹvẹ A re ro Yo?’
1 Jesu ọ ta avọ ẹgba-ofihọ inọ: “Usiuwoma na a rẹ te kake vuẹ erẹwho kpobi tao.” (Mak 13:10) Ghelọ omodawọ ogaga mai, ima ahwo buobu e gbẹ riẹ nọ a ti se isẹri kẹ hẹ. Egọmeti jọ e whaha iruo mai. Ekwotọ buobu i wo ahwo buobu gbidigbidi nọ i bi dhe ebuebu ọvo. Fikiere ‘ẹvẹ a re ro yo?’—Rom 10:14.
2 Fievahọ Jihova: Ma rẹ kareghẹhọ hrọ inọ Jihova ọ riẹ uyero udu ahwo kpobi. Epanọ uyero ohwo o rrọ kpobi, otẹrọnọ ọ rehọ udu oruọzewọ gwọlọ uzẹme kpahe Ọghẹnẹ, ọ rẹ rue riẹ.—1 Irv. 28:9.
3 Abraham ọ jẹ ruawa kpahe ahwo nọ a jẹ rria Sodọm gbe Gomora. Rekọ Ọghẹnẹ ọ kẹ riẹ imuẹro nnọ ọ te raha Sodọm ho o tẹ make rọnọ imakpe nọ i kiẹrẹe ọvo a jọ eva riẹ ruẹ. (Emu. 18:20, 23, 25 32) Jihova ọ re raha ikiẹrẹe kugbe irumuomu ẹdẹọvo ho, wọhọ epanọ esiwo Lọt avọ emetẹ riẹ o dhesẹ via na.—2 Pita 2:6-9.
4 Elaeja o je roro nnọ ọye ọvo họ ohwo nọ ọ be gọ Ọghẹnẹ uzẹme na. Rekọ Jihova ọ kẹ riẹ imuẹro nnọ ere o rrọ vievie he gbe nnọ iruo nọ o muhọ na o ti ru ai re. (1 Iv. 19:14-18) Kọ ẹvẹ kpahe uyero edẹ mai na?
5 Jọ Owhreze Iruo Ọghẹnẹ: Ma riẹ epanọ ma ti gbe ru iruo isẹri-ise na kẹre te he. Jihova họ ọnọ o wo iruo nana yọ ọ be rehọ enjẹle riẹ kpọ iruo na. (Evia. 14:6, 7) Ọye o re dhesẹ epanọ a re se isẹri na kẹ erẹwho na kpobi kẹre te. Jihova ọ tẹ gwọlọ, ọ rẹ sai ru re a vaha ovuẹ Uvie na kẹre evaọ idhere nọ ma sai roro enẹna ha re ahwo buobu a sai “yo ẹme usiuwoma na, a vẹ rọwo.” (Iruẹru 15:7) Oware nọ Jihova o ti ru o te rọwokugbe oghẹrẹ ohwo nọ ọ rrọ—Ọghẹnẹ oyoyou, owareghẹ, gbe ọnọ o kiẹrẹe.
6 O rrọ uvẹ-ọghọ mai re ma ruiruo rọwokugbe oreva Jihova, be dao utho ẹgba mai re ma kẹ ahwo kpobi uvẹ nọ a re ro yo emamọ usi na.—1 Kọr. 9:16.