Rọ Oghọghọ Kuomagbe Jihova gbe Ọmọ Riẹ
A ti Ru Ehaa nọ E Mai w’Uzou Evaọ Ẹgbukpe na Evaọ March 28
1 Ẹkwoma ekoko ehaa Emu Owọwọ Olori na nọ ọre o te kie diwi no evaọ March 28, 2002, ma re dhesẹ okugbe oghọghọ mai kugbe Jihova Ọghẹnẹ gbe Jesu Kristi. Evaọ ehaa obọdẹ yena, okiọkotọ Ileleikristi nọ a wholo na a te reawere obọdẹ “okugbe” nọ a wo kugbe eriuku Uvie efa, kugbe Ọsẹ na, je kugbe Ọmọ riẹ. (1 Jọn 1:3; Ẹf. 1:11, 12) Ima “igodẹ efa” na a ti roro kpahe uvẹ ugbunu nọ a wo re a kuomagbe Jihova gbe Ọmọ riẹ, re a jọ ovo kugbe ai evaọ udu gbe iroro evaọ erugba iruo Ọghẹnẹ!—Jọn 10:16.
2 Iruo nọ A re Ru Kugbe Evaọ Usu Okpekpe: Jihova gbe Jesu a wo okugbe oghọghọ n’otọ ze. A reawere usu okpekpe evaọ etoke nọ a rẹ sai kele mu hu taure a tẹ te ma ohwo-akpọ. (Mae. 5:2) Okugbe uyoyou udidi o tẹ ruọ udevie aimava na. Wọhọ areghẹ nọ a ro dhesẹ ohwo, Ọmọ ọtuyẹ nana evaọ okenọ a ti yẹi wọhọ ohwo-akpọ họ ọ sae ta nnọ: “Mẹ jọ eva-ewerọ kẹ [Jihova] kẹdẹ kẹdẹ jẹ hae ghọghọ eva aro riẹ kẹse kẹse.” (Itẹ 8:30) Ige buobu nọ a sai kele he nọ ọ rọ jọ usu okpekpe kugbe Ehri uyoyou na u kpomahọ Ọmọ Ọghẹnẹ didi!—1 Jọn 4:8.
3 Avọ ẹgwọlọ ohwo-akpọ rọkẹ ẹtanigbo nọ o wo fihọ iroro, Jihova ọ salọ Ọmọ riẹ nọ ọye ọvo ọ ma, ọnọ o you ahwo-akpọ gaga na, re ọ kẹ idhe ẹtanigbo na, onọ o rrọ ẹruore ọvuọvo nọ ma wo. (Itẹ 8:31) Nwanọ epanọ Jihova avọ Ọmọ riẹ a rrọ okugbe evaọ ẹwhaharo ẹjiroro ọvo na, ma rẹ jọ kugbe ai je kugbe ohwohwo evaọ ọgbakugbe uyoyou ogaga, rọ oghọghọ ru oreva Ọghẹnẹ.
4 Edhesẹ Ovuhumuo Mai nọ O no Udu Ze: Ẹkwoma Ekareghẹhọ na nọ ma rẹ jọ ma vẹ jẹ gaviezọ ziezi avọ oma adhẹẹ, ma rẹ sai dhesẹ uvi ovuhumuo mai via kẹ uyoyou Jihova gbe idhe Ọmọ riẹ k’omai. A ti fielo họ oriruo oyoyou Jesu, edikihẹ ga riẹ rite uwhu evaọ ẹrọkẹ ẹtanigbo na, gbe esuo riẹ wọhọ Ovie Uvie Ọghẹnẹ nọ a ro mu no na, jegbe eghale nọ Uvie na o te wha se ahwo-akpọ. A te jẹ kareghẹhọ omai kpahe ẹgwọlọ nọ ma rẹ rọ ruabọhọ edhesẹ ẹrọwọ mai, ruiruo avọ ọwhọ rọwokugbe oreva Jihova wọhọ “[ibe] iruiruo eva uzẹme na.”—3 Jọn 8; Jem. 2:17.
5 Obufihọ kẹ Amọfa rẹ A Kuomagbe Omai: Ugboma ekpako na o rẹ daoma gaga re a tuduhọ Isẹri nọ e siọ iruo uvie ba no riẹriẹriẹ evaọ ẹkwotọ na awọ re a kpohọ Ekareghẹhọ Uwhu Kristi na. (Mat. 18:12, 13) Wha kere edẹ ahwo nọ wha te nya bru fihọ obe re uvumọ ohwo ọ se ẹro ba evo re wha je zizie aikpobi.
6 Kọ whọ riẹ amọfa jọ nọ a sae ziọ Ekareghẹhọ na? J’owọ na re whọ bọ ovuhumuo rai kẹ ehaa na. Rọ oma osasa zizie ai, jẹ whẹtiẹ ae h’oma. Joma daoma mai kpobi re ma zizie emọ-uwuhrẹ Ebaibol mai kpobi gbe amọfa nọ a wo isiuru, jegbe ahwo uviuwou mai gbe egbẹrioma mai, re a kpohọ ehaa nana nọ e mai w’uzou evaọ ẹgbukpe na. Irere ọ ẹtanigbo na i rovie fihọ kẹ ahwo kpobi nọ a wuhrẹ ‘aghare ologbo ọrọ eriariẹ kpahe Kristi Jesu.’ (Fil. 3:8) Enọ i fi ẹrọwọ họ idhe Kristi a rẹ sai wo ẹruore nọ o muẹro ọrọ uzuazọ ibẹdẹ bẹdẹ.—Jọn 3:16.
7 Who rri ewoma nọ Ekareghẹhọ na ọ rẹ sae wha se ahwo udu oruọzewọ vo vievie he. Ikpe ivẹ nọ i kpemu evaọ ukoliko orẹwho ọ Papua New Guinea, ahwo 11 nọ a wo isiuru a biokọ vrẹ euwa 17 nya abade nọ ọ vọ avọ ẹkporo vrẹ re a ruẹse jariẹ. Fikieme? A ta nnọ: “Ma gwọlọ lele ibe egegagọ Jihova ru ehaa Ekareghẹhọ Kristi; fikiere erẹ na o te oware nọ a rẹ ruẹ uye fihọ.” Roro kpahe ọwhọ nọ enọ i wo isiuru na a dhesẹ jegbe ovuhumuo rai rọkẹ oghọghọ nọ a re ro kuomagbe Jihova, Ọmọ riẹ, gbe okugbe-inievo Ileleikristi na!
8 Rọ uwuhrẹ Ebaibol kẹ ahwo kpobi nọ a wo isiuru. Tuduhọ ae awọ re a kpohọ iwuhrẹ ukoko kẹse kẹse re a jẹ ghale uzẹme nọ a bi wuhrẹ na kugbe amọfa. Fiobọhọ kẹ ae “nya eva elo” na je “lele uzẹme” na ẹkwoma efihiruo ehri-izi Ebaibol evaọ uzuazọ rai. (1 Jọn 1:6 7) Fiobọhọ kẹ ae re a bọ usu okpekpe kugbe Jihova jẹ rro haro evaọ ovuhumuo kẹ uvẹ-ọghọ oghaghae orọ omakugbe evaọ eruo oreva riẹ.
9 Ẹvẹ uvẹ-ọghọ nọ ma wo u woma te re ma rọ oghọghọ kuomagbe “eva ẹzi ọvo, avọ iroro evo nọ a re ro kuomagbe họre kẹ orọwọ usiuwoma na”! (Fil. 1:27, 28) Joma rri kpohọ obọdẹ omakugbe mai evaọ Ekareghẹhọ na evaọ March 28, re ma hae kẹ Jihova gbe Ọmọ riẹ uyere ẹsikpobi!—Luk 22:19.