Jọ Ọnọ Ọ Rẹ t’Ẹme Kugbe Ahwo!
1 Re ma ruẹse ru iruo nọ a k’omai re ma ta usiuwoma je ru ilele na gba, ma rẹ rọ ovuẹ mai na nyate udu amọfa hrọ. (Mat. 24:14; 28:19, 20) Ẹmeọta-kugbe ọ rẹ sae jọ oware obẹbẹ makọ evaọ udevie egbẹnyusu. Kọ eme ọ rẹ sai fi obọ họ k’omai rehọ emamọ usi na nya te erara oma?
2 No Ọrara Ruọ Ogbẹnyusu: Dao oma fi oma ra họ ẹta ahwo nọ whọ nya ku evaọ odibọgba na. Evaọ akpọ inẹnẹ, ma rẹ sai rẹro nnọ ahwo jọ a rẹ sai viẹro ku, hayo dhozọ erara. Onana o rẹ sai bru ẹmeọta-kugbe dhe. Kọ ẹvẹ whọ sai ro fi awa-ọruọ ọsosuọ nọ ahwo nọ whọ nya ku a re wo na kparobọ? Taure ma tẹ te t’ẹme jọ kpobi, edhere jọ nọ ma rẹ rọ t’ẹme họ ẹkwoma eriwo-oma okpakpatiẹ mai. Ẹgọ ọkpakpatiẹ mai gbe uruemu adhẹẹ mai o re fi obọ họ le ozodhẹ no.—1 Tim. 2:9, 10.
3 Oware ofa nọ u re fi obọ họ evaọ ẹmeọta-kugbe họ ma re dhoma mu t’ẹme, evaọ oma ogbẹnyusu. Onana u re fi obọ họ ru amọfa rọ udu t’otọ je ru ae gaviezọ viere. Emamọ omaruẹrẹhọ o r’oja evaọ abọ nana. Okenọ ẹme nọ ma be te ta na ọ tẹ rrọ vevẹ evaọ iroro mai, ma re nuhu hu. Yọ udu udhedhẹ mai nana o rẹ sae lẹliẹ ovuẹ mai na si amofa urru. Aye jọ ọ ta kpahe iweze Osẹri jọ nnọ: “Udu udhedhẹ riẹ họ oware nọ mẹ kareghẹhọ evaọ ovao owhẹwhẹtiẹ riẹ. O kpare isiuru mẹ.” Onana u rovie edhere kẹ aye na nọ ọ rọ gaviezọ kẹ emamọ usi na.
4 Iruemu Nọ I Re Siuru: O gwọlọ re ma wo emamọ isiuru omobọ ohwo kẹ amọfa. (Fil. 2:4) Edhere jọ nọ a re ro ru onana họ uvẹ nọ ma rẹ kẹ amọfa re a t’ẹme, o rẹ jọ nọ unu mai ọvo a re yo evaọ ẹmeọta-kugbe na ha. Evaọ uzẹme, ẹmeọta-kugbe o gwọlọ ezọgaviẹ re. Okenọ ma te zizie ahwo nọ a be gaviezọ k’omai nọ a kpahe fihọ ẹme, ma tẹ jẹ be gaviezọ kẹ ẹme rai avọ isiuru, a rẹ ruẹ nnọ ma wo isiuru kẹ ae. Fikiere okenọ enọ e be gaviezọ k’owhẹ a tẹ be kpahe ẹme, whọ rehọ okpakpa bru ẹme riẹ dhe re whọ ruẹse ta ẹme ra nọ whọ ruẹrẹfihọ na re he. Jiri ai otẹrọnọ whọ rẹ sai ru ere no eva ze, re whọ dao oma nwene ẹme ra lele ẹme nọ ọ ta na. Otẹrọnọ ẹme rai o dhesẹ oware jọ nọ o rrọ ọdawẹ kẹ ae gaga, nwene ẹme ra re whọ ta kpahe ọdawẹ rai na.
5 Ẹriẹ-uwhru ohwo gbe omarokpotọ e rẹ lẹliẹ ẹmeọta-kugbe nya yereyere. (Itẹ 11:2; Iruẹru 20:19) Ahwo a bigba Jesu keme ọ jọ “wowolẹ [avọ] eva i ro kpotọ.” (Mat. 11:29) Evaọ abọdekọ riẹ, uruemu omorro u re tu ahwo oma. Fikiere, dede nọ u mu omai ẹro gaga nnọ ma wo uzẹme na, ma rẹ rọ areghẹ whaha ẹmeọta ọrọ edhere obọ o rọ sa udu.
6 Kọ ẹvẹ otẹrọnọ eme ohwo na i dhesẹ orọwọ nọ o rọwokugbe iwuhrẹ Ebaibol ho? Kọ o gba omai họ nọ ma rẹ kpọ e vi? E, ma re ru ere, rekọ ma rẹ dao oma ru ere evaọ iweze ọsosuọ na ha. Ẹsibuobu o rẹ kẹ erere re ma tọ ovao ẹmeọta mai riwi eware nọ t’omai te ọnọ ọ be gaviezọ k’omai na ma jẹ rọwokugbe taure ma tẹ ta kpahe iwuhrẹ Ebaibol nọ e te mae jọ bẹbẹ kẹ e re ọ rọwo. Onana o gwọlọ odiri gbe ona. Pọl o fi oriruo owoma họ otọ evaọ abọ nana okenọ o je se-isẹri kẹ iguẹdhọ erọ Arẹopagọs.—Iruẹru 17:18, 22-31.
7 Maero, uyoyou ababọ-oriobọ u ti fi obọ họ k’omai jọ enọ e rẹ t’ẹme kugbe amọfa evaọ edhere nọ ọ rẹ kẹ erere. Wọhọ Jesu, ma rẹ riohrọ ahwo nọ “a rọ oyoya, a tẹ jẹ vaha wọhọ igodẹ nọ i wo othuru hu.” (Mat. 9:36) Onana o rẹ w’omai wha emamọ usi na se ai je fi obọ họ kẹ ae ruọ edhere uzuazọ na. Ovuẹ uyoyou ma be vuẹ, fikiere joma gbẹ hae vuẹe evaọ edhere oyoyou. Evaọ ere oruo, yọ ma be raro kele Jihova Ọghẹnẹ gbe Jesu Kristi—Enọ e karo evaọ ẹmeọta-kugbe amọfa evaọ ehrugbakpọ na.