Oke Uduotahawọ kẹ Ahwo Kpobi

1. Uvẹ obọdẹ sa-sa vẹ iweze esẹro ọnyawariẹ i bi he rovie fihọ?

¹ Pọl ukọ na o kere se ukoko nọ o jọ obọ Rom inọ: “Uru ẹruẹ rai u bi siomẹ, re mẹ ruẹse ghale okẹ Ẹzi Ẹri na kẹ owhai, o ruẹse ru owhai ga rite urere; koyehọ, ma wo oma osasọ kugbe eva orọwọ ovo, onọ o rọ orai gbe omẹ.” (Rom 1:11, 12) Iweze esẹro ọnyawariẹ evaọ oke mai na i bi rovie uvẹ utioye fihọ nọ ma rẹ rọ ta udu họ ohwohwo awọ.

2. Fikieme a be hae rọ kaki whowho iweze ọsẹro ọnyawariẹ taure oke na u te ti te?

² Ukoko Na: A be hai whowho iweze ọsẹro ọnyawariẹ oware wọhọ emera esa taure oke na u te ti te. Onana u re fiobọhọ k’omai nọ ma rẹ rọ ma omaa kpahotọ re ma sai wo erere no iweze na ze vọvọ. (Ẹf. 5:15, 16) Otẹrọnọ who bi ruiruo egọmeti, ẹsejọhọ whọ te sai mi uvẹ re who wobọ eva usiuwoma ota evaọ ẹkpoka na. Ahwo jọ a rẹ rehọ ọkobaro obufihọ evaọ amara nọ iweze na o kie fihọ. Otẹrọnọ iruẹru ra i ti ru owhẹ jọ uwou hu evaọ oke yena, kọ whọ sai nwene omaa ra re whọ jariẹ evaọ ẹkpoka yena?

3. Eme a tuduhọ omai awọ nọ ma ru evaọ oke iweze ọsẹro ọnyawariẹ re ma wo uduotahawọ noi ze?

³ Ugogo ẹjiroro iweze ọsẹro ọnyawariẹ họ re ọ kẹ ohwo kpobi uduotahawọ je fiobọhọ kẹ iwhowho-uvie wo ẹnyaharo evaọ ona usiuwoma ota. Whọ sae yare nnọ whọ gwọlọ lele iei hayo aye riẹ kpohọ usiuwoma. O rẹ were ọsẹro okogho re o lele iwhowho-uvie sa-sa kpohọ usiuwoma, te enọ i ri wo eriariẹ tere he hayo enọ i wo ona usiuwoma ota tere he. Ahwo kpobi a rẹ sai wuhrẹ no oghẹrẹ nọ ọ be rọ ta usiuwoma ze je fi ithubro nọ ọ kẹ họ iruo. (1 Kọr. 4:16, 17) Nọ who te zizie iei re wha gbẹ re emu kugbe u re rovie uvẹ ofa fihọ kẹ ẹmeọta ọbọga. (Hib. 13:2) Gaviezọ ziezi nọ ọ tẹ be tẹme evaọ iwuhrẹ, keme eme riẹ i re kiekpahe ẹgwọlọ ukoko na.

4. Ẹvẹ ma sae rọ tuduhọ ọsẹro ọnyawariẹ mai awọ?

⁴ Ọsẹro Ọnyawariẹ Na: Pọl ukọ na ọ jọ oghẹrẹ ohwo sa no inievo nọ ọ jẹ gbodibo kẹ na ha, keme ọ jẹ rẹriẹ ovao dhe ebẹbẹ gbe awaruọ yọ o jẹ were iẹe nọ a tẹ kẹe uduotahawọ. (2 Kọr. 11:26-28) Nọ ukoko nọ o jọ obọ Rom a yo inọ Pọl, ọnọ ọ rrọ uwou-odi, ọ be nyaze Rom, inievo na jọ a tẹ ruọ edhere nyai zere iei evaọ Oria-eki Apia—nọ u thabọ te ikilomita 74. “Whaọ nọ Pọl ọ te ruẹ ae, o te yere Ọghẹnẹ, oma o tẹ wha ae.” (Iruẹru 28:15) Whọ sae jọ uduotahawọ kẹ ọsẹro ọnyawariẹ rai re. Dhesẹ “adhẹ akuava” kẹe ẹkwoma ajọwha nọ whọ rẹ rọ tha iweze riẹ uke. (1 Tim. 5:17) Ta je dhesẹ iẹe via inọ iruo riẹ e da owhẹ ẹro fia. Eva e te were iẹe avọ aye riẹ nọ a tẹ ruẹ orọwọ, uyoyou, gbe ithihakọ ra.—2 Tẹs. 1:3, 4.

5. Fikieme mai kpobi ma rọ gwọlọ uduotahawọ nẹnẹ?

⁵ Evaọ “edẹ urere” nana nọ e rrọ bẹbẹ na, ono ọ gwọlọ uduotahawọ họ? (2 Tim. 3:1) Gbaemu enẹna inọ whọ rẹ jariẹ je wobọ vọvọ evaọ ẹkpoka obọdẹ ọrọ iruo kugbe ọsẹro ọnyawariẹ. Mai kpobi, koyehọ te esẹro ọnyawariẹ te iwhowho-uvie, a sae tuduhọ ohwohwo awọ avọ evawere. Enẹ oruo mai ohwo ọ rẹ rọ sasa ohwohwo oma jẹ ‘wha ohwo udu ga.’—1 Tẹs. 5:11.