Ẹkpẹti Onọ

◼ Nọ ma te kpohọ ewuhrẹ ukoko, ẹvẹ ohwo kpobi ọ sai ro fi obọ họ re ewuhrẹ na ọ jọ kpatiẹ? (Izie. 31:12)

Fiki adhẹẹ odidi kẹ Jihova gbe ọruẹrẹfihotọ iwuhrẹ ukoko nọ o ru, a tuduhọ ahwo kpobi awọ re a hae kaki te Ọgwa Uvie na ẹruoke, re a jẹ gaviezọ ziezi. U re woma re ahwo nọ a kake nyaze a mu ekpala obaro họ ẹkeria no ze, a vẹ nyase ekpala obemu ba kẹ ahwo nọ a wo emọ esese gbe ahwo nọ a te nyaze whremu. Taure ewuhrẹ o te ti muhọ, furie ifonu hayo ipeja ra hayo ru ai fihọ oghẹrẹ nọ i gbe ro ru edo kpokpo amọfa ha. Nọ ahwo kpobi nọ a ziọ ewuhrẹ a te bi dhesẹ uruemu ozodhẹ kẹ Ọghẹnẹ, iwuhrẹ na e sae jọ kpatiẹ.—Ọtausi. 5:1; Fil. 2:4.

Nọ ahwo ọkpokpọ a tẹ nyaze ewuhrẹ, u re woma re oniọvo jọ nọ ọ rrọ ukoko na nọ ọ riẹ ahwo na ọ keria kugbe ae. Onana u re fi obọ họ, maero nọ ahwo nana a te wo emọ esese nọ a rẹ rọ ẹro te. Ekpohọ iwuhrẹ o sae jọ oware okpokpọ kẹ uviuwou na. O tẹ rrọ ere, ẹsejọhọ o te mae were ai re a keria kẹle obemu re o siọ amọfa ba ekpokpo otẹrọnọ a gwọlọ kpama ruọ otafe omojọ re a sae rọ ẹro te ẹgwọlọ emọ esese nọ a wha lele oma. (Itẹ 22:6, 15) Orọnikọ onana u dhesẹ nọ iviuwou nọ i wo emọ esese e rẹ nyae keria ubrukpẹ obemu jọ sa re emọ rai e sai wo uvẹ ru edo ho. Otẹrọnọ ọmọ jọ o bi ru edo hayo ọ gwọlọ oware jọ, u woma ha re a jọ evaọ ọgwa na kpei hayo whọ ku ei, rekọ ọsẹ hayo oni na ọ rẹ wọe ruọ etegu, rẹrote ẹgwọlọ ọmọ na, a ve gbe zihe ziọ evaọ ọgwa na.

Eruẹrẹahwohọ i re fi obọ họ ruẹ nọ eware e be nya kpatiẹ evaọ etoke ewuhrẹ. A rẹ kaki te Ọgwa Uvie ẹruoke re a sae kẹ iviuwou gbe amọfa nọ a te nyaze whremu oria ẹkeria. Eruẹrẹahwohọ a rẹ rọ onaa avọ areghẹ fi obọ họ kẹ ahwo na kpobi re a keria Ọgwa Uvie na kpatiẹ ababọ edo oruo. Nọ oware jọ o tẹ wha edo ze idudhe, a rẹ rọ areghẹ rẹrote uyero na. Nọ ọmọ jọ o te bi kpokpo amọfa, eruẹrẹahwohọ a rẹ sai fi obọ họ.

Ahwo kpobi nọ a kpohọ ewuhrẹ a rẹ sae zọhọ fihọ uyero udhedhẹ nọ u re fi obọ họ kẹ ahwo kpobi wuhrẹ kpahe Jihova gbe ẹjiroro riẹ nọ o wo kẹ akpọ ọkpokpọ okiẹrẹe.—Hib. 10:24, 25.