Iruo nọ E Mai Wuzou
1. Eme ovuhumuo odidi nọ ma wo kẹ iruo odibọgba na o rẹ wọ omai ru?
1 Fikieme a be rọ ta udu họ omai awọ ẹsikpobi inọ ma rehọ oke, ẹgba, gbe eyero mai ru iruo odibọgba na? Fikinọ iruo ọvuọvo nọ i wuzou tei e rrọ họ! Ma te roro kpahe irere ilogbo nọ e rrọ iruo usiuwoma ota na o rẹ lẹliẹ omai wo ọwhọ ziezi evaọ iruo nana nọ a te gbẹ wariẹ hẹ na.—Iruẹru 20:24.
2. Ẹvẹ iruo usiuwoma ota na u bi ro fi obọ họ ru odẹ Jihova fo?
2 U re Ru Odẹ Jihova Fo: Emamọ usi na họ, Uvie Jihova nọ Kristi Jesu o bi su u ti nwene egọmeti ahwo-akpọ je ku ebẹbẹ kpobi họ. (Mat. 6:9, 10) Ma te je bi whowho inọ Jihova ọvo họ ọnọ ọ rẹ sai si ẹyao gbe uwhu n’otọ. (Aiz. 25:8; 33:24) Nọ orọnọ a be rọ odẹ riẹ se omai na, ahwo a te kẹe oruaro nọ a te muẹrohọ uruemu ezi gbe ajọwha mai. (1 Pita 2:12) O rrọ oware evawere k’omai nọ ma bi ro whowho odẹ Olori Osu na Jihova evaọ akpọ na soso.—Ol. 83:18.
3. Eghale vẹ i re te ahwo nọ a kezọ kẹ ovuẹ Uvie na?
3 U re Siwi Ahwo: Jihova “ọ guọlọ nọ ohwo ọvo o whu hu, rekọ ahwo kpobi a zite ekurẹriẹ.” (2 Pita 3:9) Kọ otẹrọnọ uvumọ ohwo ọ riẹ nọ o re wuhrẹ ai hi, ẹvẹ a sae rọ riẹ oware nọ uwoma gbe onọ uyoma evaọ aro Jihova? (Jona 4:11; Rom 10:13-15) Nọ ahwo a tẹ gaviezọ kẹ emamọ usi na, uzuazọ rai u re woma nọ a bi siobọno iruemu iyoma na. (Mae. 4:1-4) A rẹ jẹ rọ ere wo ẹruore uzuazọ ebẹdẹ bẹdẹ. Nọ ma te bi w’obọ ziezi evaọ iruo usiuwoma ota na, ma ti siwi uzuazọ mai gbe enọ e gaviezọ k’omai. (1 Tim. 4:16) Uvẹ-ọghọ nọ ma wo o rro kẹhẹ, nọ ma bi ro ru iruo nana nọ e mai wuzou na!
4. Fikieme ma jẹ rehọ oma kpobi kẹ iruo usiuwoma ota gbe ilele-iruo na?
4 Kẹle na uye ulogbo na o te rehọ akpọ omuomu nana toba idudhe. Enọ e be gọ Jihova a te zọ. Fikiere, usiuwoma ota gbe ilele-iruo na họ iruo nọ e mae kpata, mai wuzou jẹ be mai kẹ erere nẹnẹ. Joma rehọ iruo nana karo evaọ uzuazọ mai!—Mat. 6:33.