Wuhrẹ Emọ Ra re A jọ Egbodibo
1. Eme Olezi 148:12, 13 ọ tuduhọ esẹgbini awọ nọ a ru?
1 Jihova o zizie emaha na re a jiri ei. (Ol. 148:12, 13) Fikiere, orọnikọ iwuhrẹ Ebaibol gbe izi Ọghẹnẹ ọvo esẹgbini a re wuhrẹ emọ rai hi. A re je wuhrẹ ae re a jọ etausiuwoma. Ẹvẹ a sai ro ru onana?
2. Ẹvẹ emamọ oriruo ọsẹgboni u re kpomahọ emọ riẹ?
2 Emamọ Oriruo: Gidiọn oguẹdhọ na ọ ta kẹ ezae 300 riẹ nọ: “Wha ri omẹ.” (Ibr. 7:17) Emọ a re rri esẹgbini rai jẹ gwọlọ rọ aro kele ai. Ọsẹ jọ o re ru iruo evaọ aso, rekọ ukpenọ ọ rẹ wezẹ evaọ Ẹdẹ-Ọmaha nọ o te no iruo ze, ọ rẹ wha emọ riẹ kpohọ usiuwoma dede nọ oma o be rọe. Ọ gbẹ make rọ unu tae he, uruemu riẹ ọvo u bi dhesẹ kẹ ae nọ iruo usiuwoma na i wuzou. (Mat. 6:33) Kọ emọ ra e be ruẹ owhẹ nọ whọ be rọ evawere w’obọ evaọ eware wọhọ olẹ, isase Ebaibol, ẹkpahefihọ evaọ iwuhrẹ, gbe usiuwoma ota? Orọnikọ o gwọlọ nọ whọ rẹ jọ ohwo ọgbagba ha. Rekọ nọ emọ ra a tẹ ruẹ omodawọ ra nọ whọ be rọ gọ Jihova, ẹsiẹe a te mai ro ru lele oware nọ who bi wuhrẹ ai.—Izie. 6:6, 7; Rom 2:21, 22.
3. Itee unọjọ utọjọ vẹ esẹgbini a re fihọ kẹ emọ rai je fi obọ họ kẹ ae le t’obọ?
3 Itee Unọjọ Utọjọ: Esẹgbini a rẹ rehọ odiri wuhrẹ emọ rai epanọ a rẹ nyonya, ta ẹme, ku iwu họ, gbe eware efa. Nọ emọ e tẹ rro te edhe jọ no, a re fi itee ekpokpọ họ kẹ ae. Ọsẹgboni na a tẹ rrọ ukoko na, a re fi obọ họ kẹ emọ rai fi itee abọ-ẹzi họ gbe epanọ a sai ro le ai t’obọ wọhọ epanọ ikpe gbe ẹgba rai u te. (1 Kọr. 9:26) Kọ who bi wuhrẹ emọ ra re a rehọ eme obọrai kuyo evaọ ewuhrẹ gbe re ae ọvo a ruẹrẹ eme nọ a kẹ rai evaọ Isukulu Odibọgba na họ? (Ol. 35:18) Kọ who bi wuhrẹ ae re a w’obọ evaọ abọ sa-sa iruo odibọgba na? Kọ who fi utee ame-ọhọ gbe iruo odibọgba oke-kpobi họ kẹ ae? Kọ whọ be hai zizie hayo ru re a kuomagbe ekobaro nọ e be rọ ajọwha gbe evawere ru iruo na, nọ e rẹ sae tuduhọ ae awọ?—Itẹ 13:20.
4. Ẹvẹ emọ a re ro wo erere nọ esẹgbini a te mu emọ rai họ ewuhrẹ no emaha ze re a jọ etausiuwoma?
4 Ọso-ilezi na ọ ta nọ: “Ọghẹnẹ who wuhrẹ omẹ no emaha mẹ ze, me gbe bi whowho iruo igbunu ra fienẹ na.” (Ol. 71:17) Wuhrẹ emọ ra epanọ a rẹ rọ jọ egbodibo no emaha ze. Itee abọ-ẹzi nọ who bi fihọ kẹ ae no otọ ze na o te kẹ ae erere evaọ obaro.—Itẹ 22:6.