Who Du Fibo Ho
1. Eme o gwọlọ aruọwha, kọ fikieme?
1 Kọ ozọ inọ a ti se owhẹ ẹkoko o whaha owhẹ usiuwoma ota no ẹdẹjọ evaọ obọ isukulu? O gwọlọ aruọwha re whọ sae ta ẹme evaọ ogbotu, maero otẹrọnọ whọ rẹ dhomovuọ. Eme u re fi obọ họ kẹ owhẹ?
2. Ẹvẹ ohwo ọ sae rọ rehọ orimuo se-isẹri evaọ obọ isukulu?
2 Wo Orimuo: Dede nọ isukulu ra yọ oria nọ whọ rẹ jọ ta usiuwoma, kareghẹhọ inọ orọnikọ ohwo kpobi nọ whọ ruẹ whọ rẹ ta eme Ebaibol kẹ hẹ wọhọ epaọ oke nọ whọ be ta usiuwoma nuwou ruọ uwou. Rri otọ mu re whọ riẹ oke nọ whọ rẹ rọ ta ẹme. (Ọtausi. 3:1, 7) A tẹ be jọ eklase ta ẹme kpahe uzoẹme jọ hayo a kẹ owhai oware jọ nọ wha re kere n’obọ uwou ze, whọ sae rehọ uvẹ yena ta hayo kere kpahe ẹrọwọ ra. Hayo o sae jọnọ ibe emọ-isukulu ra a nọ owhẹ oware nọ who gbe w’obọ họ evaọ iruẹru jọ. Ileleikristi jọ a rẹ vuẹ iticha rai evaọ emuhọ ukpe isukulu na inọ Isẹri Jihova a rrọ, jẹ rehọ ebe mai rọ kẹ ae. Efa a re fi ebe mai họ ehru emẹjẹ rai re ibe emọ-isukulu rai a sae nọ ae enọ.
3. Ẹvẹ whọ sae rọ ruẹrẹ oma kpahe re whọ jọ isukulu se-isẹri?
3 Ruẹrẹ Oma Kpahe: Whọ tẹ ruẹrẹ oma kpahe, udu o te jọ owhẹ awọ ziezi. (1 Pita 3:15) Roro kpahe enọ jọ nọ a sae nọ owhẹ, gbe epanọ whọ sae rọ kiyo rai. (Itẹ 15:28) O tẹ lọhọ, hae wha Ebaibol ra gbe ebe efa, wọhọ Reasoning, Young People Ask, gbe enọ e ta kpahe emama kpohọ isukulu, re whọ sae ta ẹme no ai ze nọ o tẹ gwọlọ ere. Ta kẹ ọsẹgboni ra re wha hae jọ egagọ uviuwou rai ru odhesẹvia.
4. Fikieme u ro fo re whọ ruabọhọ isẹri-ise evaọ obọ isukulu?
4 Rẹro Ewoma: Who du roro ho inọ ẹsikpobi ibe emo-isukulu ra a ti se owhẹ ẹkoko nọ whọ tẹ ta ẹme kpahe Ebaibol. Ẹsejọhọ oma ra o te were ejọ fiki aruọwha ra, jẹ gaviezọ kẹ owhẹ. Rekọ, ohwo ọvo ọ gbẹ kezọ kẹ owhẹ hẹ, o kẹ owhẹ uye he. Eva ra e te were Jihova inọ whọ daoma. (Hib. 13:15, 16) Gbẹ hae lẹ se Jihova inọ o fi obọ họ kẹ owhẹ ‘gbẹ rọ aruọwha ta ẹme.’ (Iruẹru 4:29; 2 Tim. 1:7, 8) Rri epanọ eva e te were owhẹ te nọ ohwo jọ ọ tẹ gaviezọ kẹ owhẹ. Ohwo yena ọ sai tube zihe ruọ ọnọ wha gbẹ te gọ Jihova!