Ẹkpẹti Onọ

◼ Ono o re kere eme fihọ ẹmẹkpẹti ayare nọ e rẹ jọ emu ebe mai gbe oria ayare evaọ Itanẹte?

Ebe mai buobu i re wo ẹmẹkpẹti ayare nọ e rẹ jọ obemu rai nọ ohwo ọ sai kere eme fihọ vi kpobọ uwou ogha rọ yare obe hayo yare inọ Isẹri Jihova a weze bru ei. Ofariẹ, a rẹ sae rehọ Evie Evuẹ www.watchtower.org mai rọ yare obe-uwuhrẹ Ebaibol. Eruẹrẹfihotọ nana i bi ru ei lọhọ nọ ibuobu i bi ro wuhrẹ uzẹme na. Rekọ, ebẹbẹ e romavia no nọ iwhowho-uvie a rehọ eruẹrẹfihotọ nana rọ yare ebe hayo yare inọ Isẹri Jihova a weze bru imoni rai hayo amọfa.

Eva e dha ahwo jọ nọ uwou ogha u vi ebe se fikinọ a yare ebe na ha, a te roro inọ ukoko na o be gba ebe mai họ ai, je mu fi odẹ rai họ usu enọ a re vi ebe se. A kpomovuọ họ iwhowho-uvie jọ oma enọ a ta kẹ inọ a weze bru ohwo jọ nọ ọyọvo ọ yare iweze itieye he. Fikiere, enọ i wo isiuru kpahe uzẹme na họ enọ e rẹ rehọ Evie Evuẹ mai hayo ẹmẹkpẹti ayare na vi uwou se uwou ogha orọnikọ iwhowho-uvie e rẹ rehọ iẹe vi ayare kẹ amọfa ha. Nọ uwou ogha o tẹ riẹ inọ ohwo jọ o vi ayare na fiki omọfa jọ, a te kpahe fihọ ayare otiọye he.

Ẹvẹ ma sai ro fi obọ họ kẹ omoni hayo ogbẹrioma mai evaọ abọ-ẹzi? Whọ tẹ gwọlọ nọ o wo obe mai jọ, whọ sai vi ei sei wọhọ okẹ. Ọ tẹ gwọlọ inọ Isẹri Jihova a weze bru ei yọ whọ riẹ epanọ whọ sae rọ vuẹ ekpako ukoko ẹkwotọ riẹ hẹ, who re kere eme fihọ efọmo ọ Please Follow Up (S-43) whọ vẹ rehọ iẹe kẹ okere-obe ukoko ra nọ o ti vi ei kpobọ uwou ogha. Rekọ, otẹrọnọ ohwo na ọ rrọ uwou-odi, oria nọ a rẹ jọ fi obọ họ kẹ ahwo nọ ivovavovo hayo iruemu iyoma efa e reria obọ no (substance-abuse facility), hayo ẹsipito ubrotọ (state hospital), who re kere se uwou ogha rọ kẹe he. Ukpoye, tuduhọ iẹe awọ re ọ ta ẹgwọlọ riẹ kẹ inievo nọ e be hae ta usiuwoma evaọ etẹe hayo ọyọvo o kere se uwou ogha.