Ẹkpẹti Onọ

◼ Kọ u fo re owhowho-uvie ọ rehọ Itanẹte ta usiuwoma kẹ ohwo nọ ọ be rria orẹwho ọfa hayo wuhrẹ obe kugbei lelehie?

Iwhowho-uvie jọ a rọ ẹkwoma Itanẹte wo ọmọ-uwuhrẹ Ebaibol no evaọ ekwotọ nọ a jọ fi awhaha họ iruo mai hayo oria nọ iwhowho-uvie e jọ bu tere he. Evaọ ẹsibuobu, emamọ iyẹrẹ i no rie ze no. Ghele na, enwoma e vọ riẹ otẹrọnọ owhowho-uvie ọ be hae rọ e-mail vi uwou hayo jọ oria ẹmeọta-kugbe evaọ itanẹte lele ohwo nọ ọ riẹ tere he ta ẹme. (Rri Odibọgba Uvie Mai ọrọ Ahrẹ 2007 ẹwẹ. 3.) Dede nọ emamọ eva whọ gwọlọ rọ ta usiuwoma kẹ ahwo na, usu utioye na o sae lẹliẹ oniọvo-ọmọzae hayo oniọvo-ọmọtẹ mu usu kugbe ikpehre ahwo, makọ ikọ-erue. (1 Kọr. 1:19-25; Kọl. 2:8) Ofariẹ, evaọ erẹwho nọ a jọ fi awhaha họ iruo Uvie na, ahwo egọmeti a sae jọ Itanẹte kiotọ iwou nọ ma bi vi. Eme itieye na e sai fi inievo mai nọ e rrọ orẹwho yena họ ọza. Fikiere, ajọ owhowho-uvie ọvuọvo o kpohọ oria Itanẹte nyae gwọlọ ahwo orẹwho ọfa nọ ọ rẹ ta usiuwoma kẹ hẹ.

Ababọ nọ uwou ogha o kẹ ohrẹ ọfa, o gbẹ rrọ ere he, ma tẹ jọ usiuwoma oke gheghe ta ẹme kẹ ohwo orẹwho ọfa nọ ma riẹ hẹ nọ ọ ziọ erẹ, ma ruabọhọ bọ isiuru na ga nọ o te zihe kpo no vievie he. Ukpoye, ma dhesẹ oghẹrẹ nọ ọ rẹ rọ jọ jw.org ruẹ evuẹ efa hayo kere se uwou ogha nọ o rrọ orẹwho riẹ. Ma sae jẹ tuduhọ iẹe awọ re o kpohọ Ọgwa Uvie nọ o kẹle riẹ. Ma riẹ nọ Egwa Uvie e rrọ erẹwho jọ họ. Rekọ ohwo na ọ tẹ gwọlọ nọ Osẹri jọ nọ ọ kẹle riẹ ọ hae nyai wuhrẹ iẹe, kere eme fihọ efọmo Please Follow Up (S-43) na, whọ vẹ rehọ iẹe kẹ okere-obe ukoko ra re ọ jọ jw.org vi ei. Uwou ogha nọ o be rẹrote iruo orẹwho nọ ohwo na ọ rrọ, ae a mae riẹ uyero orẹwho yena, fikiere a te mae riẹ oghẹrẹ nọ a re ro fiobọhọ kẹ ohwo otiọye na.—Rri Odibọgba Uvie Mai ọrọ Azeza 2014, ẹwẹ. 7, gbe Odibọgba Uvie Mai ọrọ Akpegbivẹ 2011, ẹwẹ. 4.

Otẹrọnọ ozihebro mai jọ ọ kwa kpohọ orẹwho ọfa hayo ma bi wuhrẹ kugbe ohwo jọ nọ ọ be rria orẹwho ọfa nọ ma ruẹ evaọ Itanẹte, o gwọlọ nọ ma ru lele ekpọvio nọ e rrọ obehru na. Rekọ ma sae gbẹ bọ isiuru ohwo na ga bẹsenọ ọ rẹ ruẹ owhowho-uvie nọ ọ rrọ oria riẹ. O make rrọ ere na, otẹrọnọ ohwo na ọ be rria orẹwho nọ a jọ fi awhaha họ iruo mai, ohwo ọ rẹ yọroma gaga nọ ọ tẹ be rọ ileta, ifonu, hayo Itanẹte ta kpahe Ebaibol.—Mat. 10:16.