‘Jọ Oreva Ọghẹnẹ U Rugba’
1. Eme họ uzoẹme ẹdẹ okokohọ obọdẹ ọrọ ukpe ọ 2012, kọ fikieme onana u ro fo ẹtakpahe?
1 Fiki oreva Jihova a rọ ma omai. (Evia. 4:11) Fikiere, ma gbe bi wuhrẹ je ru oreva Ọghẹnẹ hẹ, koyehọ ma bi ru ẹjiroro nọ a rọ ma omai gba ha. Eruo oreva Ọghẹnẹ o nwane lọhọ tere he, keme o gwọlọ nọ ma rẹ daoma whaha ekielele “urusio iwo mai” gbe “ẹguọlọ iwo eva mai” hayo ‘eware nọ otu erẹwho na a guọlọ nọ a re ruẹ.’ (Ẹf. 2:3; 1 Pita 4:3; 2 Pita 2:10) Ababọ obufihọ Ọghẹnẹ, Ẹdhọ ọ sai ‘mu omai rehọ re ma ru oreva riẹ.’ (2 Tim. 2:26) Ọruẹrẹfihotọ ẹdẹ okokohọ obọdẹ ọrọ ukpe ọ 2012 na u ti fi obọ họ kẹ omai omomọvo ru eware nọ e rọwokugbe ayare ovo jọ evaọ usu ayare esa nọ e mai wuzou evaọ olẹ oriruo na, inọ “epanọ a rọ obọ odhiwu ru orọ eva ra, ru re a jọ akpọ na ru ere re.”—Mat. 6:9, 10.
2. Enọ vẹ a te kiyo rai evaọ okokohọ na?
2 Enọ nọ A te Kiyo Rai: Nọ whọ te gaviezọ kẹ eme nọ a ti ru na, muẹrohọ iyo enọ nana: Eme u wuzou wọhọ eyo Ẹme Ọghẹnẹ? Ẹvẹ ma sae rọ daoma ẹsikpobi re ma riẹ oreva Ọghẹnẹ kẹ omai? Fikieme o jẹ gwọlọ nọ u re no omai eva ze re ma ta usiuwoma kẹ oghẹrẹ ahwo kpobi? Ẹvẹ whọ sai ro yeri emamọ uzuazọ nọ o rẹ kẹ evevọwẹ? Izoge, eme u fo nọ wha re dhesẹ via kẹ Jihova? Irere vẹ i re no eruo oreva Ọghẹnẹ ze? Fikieme u je wuzou gaga enẹna re ma tuduhọ amọfa awọ?
3. Ẹvẹ ma sai ro wo erere no okokohọ na ze ziezi?
3 Daoma jọ okokohọ na, jẹ gaviezọ ziezi. Ẹsejọhọ omọvo uviuwou Ebẹtẹle hayo ọsẹro ọnyawariẹ ọ te jọ ọkovuẹ ọrara. Taure okokohọ na o te ti muhọ hayo nọ o tẹ fa no, daoma lele iei ta ẹme, yọ otẹrọnọ ọ rọo no, lele aye riẹ ta ẹme re. Wha te zihe kpo no, jọ eme nọ wha yo e thọrọ owhai ẹro ho, rekọ uviuwou na soso u re kuomagbe kiẹ eme ọ okokohọ na riwi, jẹ ta epanọ a sai ro ru eware lele oreva Ọghẹnẹ vi epaọ anwẹdẹ.—Jem. 1:25.
4. Fikieme u ro wuzou re ma rehọ eruo oreva Ọghẹnẹ karo?
4 Kẹle na a te raha ahwo kpobi nọ e be rehọ isiuru obọrai karo, jẹ siọ oreva Jihova. (1 Jọn 2:17) Fikiere, ma bi yere Jihova nọ ọ rọ ruẹrẹ evuẹ ẹruoke nana họ re i fi obọ họ kẹ omai rehọ eruo oreva riẹ karo!