Hae Rọ Emebe-Evẹvẹ Ta Usiuwoma
1. Ẹvẹ idibo Ọghẹnẹ a rọ rehọ emebe-evẹvẹ ta usiuwoma no?
1 Evaọ ukpe 1880, C. T. Russell avọ inievo nọ a gbẹ jọ a ro mu emebe-evẹvẹ họ ekere, yọ a jẹ rehọ ae kẹ ahwo nọ a je se Uwou-Eroro Na re a ghale ae kẹ amọfa. Evaọ 1884, C. T. Russell avọ inievo na a te fi odẹ hotọ wọhọ epanọ uzi egọmeti o gwọlọ, re a sai kere ebe nọ a rẹ rọ ta usiuwoma na. Odẹ nọ a kere fihotọ fiki iruẹru rai na họ, Zion’s Watch Tower Tract Society onọ a bi se enẹna inọ Watch Tower Bible and Tract Society of Pennsylvania. Fiki epanọ emebe-evẹvẹ (koyehọ Tract) u wuzou te a ku rie gbe odẹ na. A ghale emebe-evẹvẹ nọ i bu te ima 300 re ukpe 1918 u te ti te. Rite inẹnẹ ma gbẹ be rehọ emebe-evẹvẹ ta usiuwoma.
2. Ẹvẹ emebe-evẹvẹ na e rrọ?
2 Oghẹrẹ nọ E Rrọ: A ru emebe-evẹvẹ mai wowoma. I wo eme bu tere he, rekọ eme rai i wuzou yọ ẹ rẹ were ohwo nọ o bi se ai. Fikiere ahwo a rẹ kake rehọ ae vi emagazini hayo obe. Makọ emaha hayo iwhowho-uvie ekpokpọ a rẹ sae rọ emebe-evẹvẹ na kẹ ahwo lọlọhọ. Fikinọ e rrọ kakao, ma rẹ sae whae lele oma ẹsikpobi.
3. Gbiku ohwo jọ hayo onọ who se evaọ ebe mai nọ u dhesẹ nọ emebe-evẹvẹ mai i wo ẹgba.
3 Ahwo buobu a kurẹriẹ no ẹkwoma emebe-evẹvẹ nọ a kaki se. Wọhọ oriruo, aye jọ evaọ orẹwho nọ a re se Haiti ọ ruẹ omobe-ovẹvẹ mai jọ evaọ otọ. Nọ ọ tọlọ iẹe je sei ọ tẹ ta nọ, “me duku egagọ uzẹme na no!” Oke o be nyaharo na o te mu ewuhrẹ họ, a te mu obe họ ewuhrẹ kugbei, uwhremu na ọ tẹ họ-ame. Onana o via fiki Ẹme Ọghẹnẹ nọ o se evaọ omobe-ovẹvẹ mai.
4. Eme o gwọlọ nọ ma rehọ emebe-evẹvẹ na ru?
4 N’uwou Ruọ Uwou: Nọ orọnọ emebe-evẹvẹ i wo ẹgba tere na, ma te hae rehọ ae ta usiuwoma kẹse kẹse, no umuo amara Akpegbọvo vrẹ. Orọnikọ ma rẹ rehọ emebe-evẹvẹ kẹ ahwo ọvo ho, rekọ ma rẹ rehọ ae ta ẹme kugbe ae. Otẹrọnọ ohwo na ọ gaviezọ evaọ oke ọsosuọ hayo oke ofa nọ who ro zihe bru rie, whọ sae rehọ obe Ebaibol Wuhrẹ hayo obe ọfa wuhrẹ iẹe. Kọ ẹvẹ ma rẹ rọ kẹ ahwo emebe-evẹvẹ evaọ usiuwoma n’uwou ruọ uwou? Nọ emebe-evẹvẹ i wo ohẹriẹ na, o gwọlọ nọ ma rẹ riẹ uzoẹme rai.
5. Ẹvẹ ma rẹ rọ kẹ ohwo omobe-ovẹvẹ evaọ usiuwoma n’uwou ruọ uwou?
5 Ma rẹ ta ẹme nọ o re kiehọ uzoẹme omobe-ovẹvẹ na gbe ohwo nọ ma be ta ẹme kẹ na. Whọ sae kake kẹ ohwo na omobe-ovẹvẹ na re whọ tẹ te ta ẹme noi ze. Uke riẹ nọ o rrọ wowoma na o te were iẹe. Hayo whọ sai dhesẹ emebe-evẹvẹ buobu rọ kẹe re ọ salọ onọ o mae were iẹe. Otẹrọnọ evaọ ẹkwotọ ra, ahwo a rẹ kake kẹ owhẹ uvẹ rueva uwou rai hi, whọ rẹ kpare omobe-ovẹvẹ na kpehru re ohwo na ọ sae rue riẹ, hayo ma sae nọe sọ ọ gwọlọ nọ ma dhei họ unuẹthẹ na kẹe. Uzoẹme omobe-ovẹvẹ na o tẹ rrọ onọ, ma rẹ nọe oghẹrẹ nọ o rri rie. Hayo whẹ ọvo, whọ sae nọ onọ jọ nọ o rẹ lẹliẹe gaviezọ kẹ owhẹ. Who te ru ere no, se oria jọ omobe-ovẹvẹ na kẹe, nọ who te se te oria onọ, serihọ re ọ kpahe fihọ iẹe. Se eria Ebaibol nọ e mae ta ẹme kpahe uzoẹme na. Wha te se omoria jọ no, ku ẹme na họ, re whọ nọe ẹdẹ nọ whọ sai ro zihe bru ei. Otẹrọnọ ukoko ra a re dhe ebe fihọ unuẹthẹ ahwo nọ wha di họ uwou ho, whọ sai dhe omobe-ovẹvẹ fihọ unuẹthẹ evaọ oghẹrẹ nọ amọfa a gbẹ kake ruẹ e riẹ hẹ.
6. Ẹvẹ ma sae rọ rehọ emebe-evẹvẹ rọ ta usiuwoma evaọ iyẹrẹ?
6 Usiuwoma Iyẹrẹ: Kọ whọ rehọ emebe-evẹvẹ kẹ ahwo evaọ usiuwoma iyẹrẹ no? Orọnikọ ohwo kpobi nọ ọ be nya vrẹ ọ rẹ sai dikihẹ lele omai ta ẹme he. Fikiere, o sae jọ bẹbẹ re ma riẹ sọ a wo isiuru kpahe ebe mai. Ukpenọ ma kẹ ae emagazini yọ ma riẹ sọ a ti se ai hi, ma rẹ kẹ ae emebe-evẹvẹ. Fikinọ e rrọ kakao, yọ uke rai e rrọ wowoma, ahwo a te gwọlọ se ai nọ a te wo umuvẹ. Rekọ otẹrọnọ a gbe bi ru ovovẹrẹ hẹ, ma sae ta ẹme kpẹkpẹe no omobe-ovẹvẹ na ze kẹ ae.
7. Gbiku epanọ a rẹ sae rọ rehọ emebe-evẹvẹ na kẹ ahwo evaọ oke gheghe.
7 Oke Gheghe: O re lọlọhọ re ma rehọ emebe-evẹvẹ lele ahwo ta ẹme evaọ okenọ ma rrọ usiuwoma ha. Oniọvo jọ o re fi ai họ ẹkpa kpohọ oria kpobi. Ọ tẹ ruẹ ohwo, wọhọ oriruo, ọnọ ọ be zẹ eware, ọ vẹ kẹe ọvo jọ. Okenọ ọzae-avọ-aye jọ nọ a jẹ nyai rri eware iwoma nọ e rrọ ẹwho ọfa, a riẹ nọ a te ruẹ ahwo nọ a ti no erẹwho efa ze. Fikiere a tẹ wha omobe Nations nọ o wo evẹrẹ buobu na avọ emebe-evẹvẹ erọ evẹrẹ buobu lele oma. Nọ a tẹ ruẹ ohwo nọ ọ be jẹ ẹrọunu nọ a riẹ hẹ, nọ ọ be zẹ eware evaọ akotọ edhere, ọnọ ọ keria kẹle ae evaọ oria eriosehọ hayo ehọtẹle, a vẹ kẹe omobe-ovẹvẹ orọ ẹrọunu riẹ.
8. Ẹvẹ emebe-evẹvẹ mai e rọ wọhọ ibi?
8 “Kọ Ibi Ra”: Emebe-evẹvẹ na e wọhọ ibi. Ọwhẹrẹ ọ tẹ be kọ ibi, ọ rẹ kọ ibi buobu keme ọ riẹ ọnọ ọ te dhẹze jẹ zọ họ. Ọtausiuwoma Na 11:6 ọ ta nọ: “Evaọ ohiohiẹ kọ ibi ra, gbe evaọ owọwọ who si obọ ra no ho; keme whọ riẹ onọ u re ti woma ha, onana hayo oyena, hayo ai ivẹ i re ti woma.” Fikiere, joma hae rehọ emebe-evẹvẹ na “vaha eriariẹ” Ọghẹnẹ.—Itẹ 15:7.
[Ẹme nọ a fi ẹgba họ nọ ọ rrọ ẹwẹ-obe avọ 3]
Nọ orọnọ emebe-evẹvẹ i wo ẹgba tere na, ma te hae rehọ ae ta usiuwoma kẹse kẹse, no umuo amara Akpegbọvo vrẹ