Who ti Ru Ọkobaro Obufihọ?

1. Fikieme ezi Ekareghẹhọ na o jẹ rrọ oke nọ ma rẹ rọ ta usiuwoma ziezi?

¹ Ezi Ekareghẹhọ na yọ oke nọ u fo nọ ma re ro fiba usiuwoma ota mai. Oke yena ma re ro roro kpahe oghẹrẹ nọ uyoyou Jihova ọ ro te nọ o ro vi Ọmọ riẹ ze te ta omai no igbo. (Jọn 3:16) Onana o te wọ omai rehọ ẹgba mai kpobi wuhrẹ ahwo kpahe Jihova gbe eware nọ o bi ru kẹ ahwo-akpọ. (Aiz. 12:4, 5; Luk 6:45) O tẹ jẹ rrọ ezi nọ ma ti ro zizie egbẹrioma gbe ahwo ẹkwotọ mai ze Emu Owọwọ na. Ma te ru Emu Owọwọ na no, ma ve zihe bru ahwo na re ma wuhrẹ ae. Kọ who ti ru ọkobaro obufihọ evaọ amara Asa, Ane gbe Asoi?

2. Fikieme amara Asa o jẹ rọ amara obọdẹ nọ a re ro ru ọkobaro obufihọ?

² Ru Asa Họ Obọdẹ Amara: U ti woma kẹhẹ re ma ru ọkobaro obufihọ evaọ amara Asa. Iwhowho-uvie nọ a ru ọkobaro obufihọ evaọ amara Asa a sai ru euwa 30 hayo 50 evaọ amara na. Otẹrọnọ ọsẹro okogho o bi rri ukoko jọ evaọ amara Asa na, ekobaro obufihọ a rẹ jọ ẹgwae nọ ọ te gba kugbe ekobaro oke-kpobi na no emuhọ rite ekuhọ, o tẹ make rọnọ euwa 30 hayo 50 a bi ru. Uzizie na u ti kri vrẹ epaọ anwẹdẹ, yọ u ti muhọ evaọ March 1 rite Edivẹ-Oka, March 26, 2013 nọ o te jọ ẹdẹ Emu Owọwọ na. Ofariẹ, amara Asa o wo Ẹdẹ-Ọmaha avọ Ẹdoka isoi soso. Fikiere, dai roro sọ whọ sai ru Asa họ obọdẹ amara.

3. Ẹvẹ ma sae rọ momaa oghẹrẹ nọ ma ti ro fiba oke usiuwoma mai?

³ Mu Omaa họ Ẹma: Obọnana who re ro mu omaa epanọ who ti ro ru ọkobaro họ ẹma. Wha rehọ omoke jọ ta ẹme kpahe iẹe evaọ Egagọ Uviuwou rai, yọ o te gwọlọ nọ ahwo uviuwou a fi obọ họ kẹ ohwohwo. (Ite 15:22) Otẹrọnọ whọ sai ru ọkobaro obufihọ họ, whọ ruawa ha. Rekọ whọ sai lehie vi epanọ whọ jẹ hai kri te vẹre. Kọ whọ sae nya ẹdẹ jọ kugbe edẹ nọ who re kpohọ usiuwoma koka koka vẹre?

4. Didi erere ma ti wo ma tẹ roma kẹ usiuwoma na evaọ March, April, gbe May?

⁴ Ma tẹ momaa epanọ ma sae ti ro fiba oke usiuwoma mai evaọ March, April, gbe May, ma ti wo oghọghọ ulogbo evaọ iruo nọ ma bi ru kẹ Jihova je fi obọ kẹ amọfa na. (Jọn 4:34; Iruẹru 20:35) Onọ o maero, u ti ru eva were Jihova.—Ite 27:11.