Epanọ A rẹ rọ Ibroshọ Emamọ Usi nọ U No Obọ Ọghẹnẹ Ze! Wuhrẹ Ahwo
A Ru Rie re Ma Rehọ iẹe Ru Izihebro gbe Ebe-Iwuhrẹ Ebaibol
1. Ibroshọ ọkpokpọ vẹ a siobọno evaọ okokohọ “Sẹro Udu Ra,” re ma ro wuhrẹ ahwo nọ ma zihe bru je mu iwuhrẹ Ebaibol họ?
1 Eva e were omai gaga nọ a jọ Okokohọ Ubrotọ “Sẹro Udu Ra” siobọno ibroshọ ọkpokpọ nọ ma re ro ru izihebro je mu iwuhrẹ Ebaibol họ. A rehọ ibroshọ Emamọ Usi Nọ U No Obọ Ọghẹnẹ Ze! na nwene ibroshọ Eme Ọghẹnẹ Ọ Gwọlọ Mi Omai? Yọ, izoẹme nọ e riẹe e rrọ kpẹkpẹe wọhọ erọ ibroshọ Gwọlọ na. Fikiere ma rẹ sae rehọ iẹe wuhrẹ ohwo nọ o wo uvẹ tere he. Ohẹriẹ nọ o rrọ ibroshọ ivẹ na họ, ibroshọ Gwọlọ na o ta ẹme kpahe izi Ọghẹnẹ, nọ e rẹ sae jọ bẹbẹ kẹ ahwo nọ ma bi wuhrẹ re a rọwo, rekọ eware iwoma nọ Ọghẹnẹ ọ ya eyaa rai ọvo ibroshọ ọkpokpọ na ọ mae ta ẹme kpahe.—Iruẹru 15:35.
2. Fikieme a ro ru ibroshọ Emamọ Usi na?
2 Fikieme a ro ru ei? Inievo mai wariẹ akpọ na họ a be ta nọ a gwọlọ obe olọlọhọ nọ o rẹ lẹliẹ ẹme Ọghẹnẹ si ahwo urru, nọ a re ro wuhrẹ ahwo re a te ti kpohọ obe Ebaibol Wuhrẹ na. Ẹsibuobu, ahwo nọ a rẹ dhozọ obe a rẹ jẹ uwuhrẹ rehọ nọ a tẹ ruẹ obe okpakpala wọhọ ibroshọ. U te no ere no, o rẹ mae lọhọ re a fa ibroshọ fihọ evẹrẹ buobu.
3. Ohẹriẹ vẹ o rrọ ibroshọ nana gbe ebe efa nọ ma re ro wuhrẹ ahwo?
3 Epanọ A Ru Rie: A kere ebe mai buobu evaọ oghẹrẹ nọ ohwo ọvo ọ sai ro se ai je wo otoriẹ oware nọ o se ababọ obufihọ. Rekọ ibroshọ nana u wo ohẹriẹ. A ru rie re ma rehọ iẹe wuhrẹ amọfa. Fikiere nọ ma tẹ be rehọ ibroshọ na kẹ ohwo, o rẹ mai woma re ma se edhe-ẹme ọvo hayo ivẹ jẹ ta ẹme kpahe iẹe. Idhe-ẹme na e rrọ kpẹkpẹe, fikiere ma sae rehọ ai wuhrẹ ohwo evaọ unuẹthẹ hayo uwou eki riẹ. Dede nọ u re woma re a rọ uwuhrẹ ọsosuọ muhọ, ma sae jọ oria kpobi muhọ.
4. Ẹvẹ ibroshọ na u ti ro fi obọ họ k’omai wuhrẹ ahwo no Ebaibol na ze ovavo?
4 Evaọ ebe mai buobu, idhe-ẹme na ma re jo duku iyo enọ na. Rekọ evaọ ibroshọ nana, Ebaibol a rẹ mae jọ ruẹ iyo enọ na. Ahwo buobu a rẹ gwọlọ wuhrẹ no Ebaibol na ze, orọnikọ ebe mai hi. Fikiere enwenọ eria Ebaibol kpobi nọ a fodẹ evaọ idhe-ẹme na a kere eme rai lahwe he. O gwọlọ nọ a se ai no Ebaibol na ze ovavo. Onana u ti fi obọ họ kẹ ohwo na riẹ nọ obọ Ọghẹnẹ oware nọ o bi wuhrẹ na u no ze.—Aiz. 54:13.
5. Fikieme u ro wuzou re ọnọ o bi wuhrẹ ohwo na ọ ruẹrẹ oma kpahe ziezi kẹ uwuhrẹ kpobi?
5 Orọnikọ oria ikere kpobi ibroshọ na o ru vẹ hẹ. Fikieme? Re ọnọ a bi wuhrẹ na ọ ruẹse nọ enọ, o vẹ jẹ lẹliẹ ọnọ o bi wuhrẹ iẹe rehọ onaa uwuhrẹ riẹ ruiruo ziezi. Fikiere, o gwọlọ nọ whẹ nọ who bi wuhrẹ ohwo na whọ rẹ ruẹrẹ oma kpahe ziezi kẹ uwuhrẹ na. Rekọ whọ ta ẹme bu hrọ họ. Dede nọ o rẹ were omai re ma fotọ ikere na, o rẹ mai woma re ma nọ ọmọ-uwuhrẹ na re ọ ta epanọ o wo otoriẹ ikere na. Ma tẹ be nọ enọ, o rẹ lẹliẹ ohwo na roro jẹ riẹ otọ ẹme nọ ma se na.—Iruẹru 17:2.
6. Ẹvẹ ma sae rọ rehọ ibroshọ na ruiruo: (a) evaọ oria nọ ahwo a jọ rọwo Ọghẹnẹ gbe Ebaibol ho? (b) evaọ usiuwoma n’uwou ruọ uwou? (c) ma tẹ be vuẹ ohwo na ovavo kpahe uwuhrẹ Ebaibol? (d) nọ ma te zihe bru ohwo?
6 Wọhọ ebe efa nọ ma bi ro wuhrẹ ahwo, ma sae rehọ ibroshọ na kẹ ahwo evaọ oke kpobi, dede nọ o rrọ usu ebe nọ ma be rọ kẹ ahwo evaọ amara yena ha. O te were ibuobu mai re ma vuẹ ahwo nọ ma ruẹ ovavo nọ ma be rọ obe na wuhrẹ Ebaibol kugbe ahwo. U te no ere no, wọhọ epanọ a ta evaọ okokohọ nọ a jo siobọno ibroshọ na, ma tẹ be rehọ iẹe wuhrẹ ahwo nọ a gaviezọ kẹ omai okenọ ma te zihe bru ai “o te gine lẹliẹ ozihebro were gaga.”—Rri ekpẹti nọ e rrọ ẹwẹ-obe avọ 5 rite 7 na.
7. Ẹvẹ whọ rẹ rọ rehọ ibroshọ na wuhrẹ ohwo?
7 Epanọ A rẹ rọ Rehọ iẹe Wuhrẹ Ohwo: Se onọ nọ a kere mu gbalọ na. Kẹsena who ve se eme nọ e rrọ otọ riẹ gbe oria Ebaibol nọ a kere jẹlẹ na. Nọ ohwo na enọ nọ e rẹ lẹliẹe riẹ otọ ẹme nọ wha jọ Ebaibol se na. Taure wha te ti kpohọ oria ọfa, wariẹ nọe onọ nọ o rrọ ehru oria nọ wha se na re whọ riẹ sọ o wo otoriẹ ẹme na. Isiabro ọsosuọ nọ who ti ro zihe na, o te mai woma re wha wuhrẹ onọ ọvo. Nọ oke o be nyaharo na, wha sai wuhrẹ uzoẹme soso ẹsiẹvo.
8. Nọ ma tẹ gwọlọ se ikere jọ, eme ma rẹ ta, kọ fikieme?
8 Eria Ebaibol nọ e rrọ obotọ edhe-ẹme kpobi nọ a kere fihọ nọ “se” na eye e mae kẹ uyo enọ na gbiae. Nọ whọ tẹ gwọlọ se oria ikere jọ, whọ ta nọ, “Pọl ukọ na o kere nọ” hayo “Muẹrohọ ẹme nọ Jerimaya ọ ta” ha. Ohwo na ọ rẹ sai roro nọ ẹme ohwo-akpọ jọ gheghe ma bi se. Fikiere, o rẹ mae woma re ma ta nọ, “Ẹme Ọghẹnẹ ọ ta nọ” hayo, “Rri eruẹaruẹ nana nọ e rrọ Ebaibol na.”
9. A re se eria Ebaibol na kpobi?
9 Kọ ma re se eria Ebaibol na kpobi, manikọ enọ a kere fihọ nọ “se” na ọvo? Oghẹrẹ nọ ohwo na ọ rrọ who re rri. Eria Ebaibol na kpobi i wo ẹme jọ kpahe onọ na, orọnọ a mu kere ai hi. Aikpobi i wo oware jọ nọ whọ rẹ sae ta ẹme kpahe. Rekọ ẹsejọ, fikinọ ohwo na o wo oke tere he, o wo isiuru ziezi hi, hayo ọ riẹ obe ese tere he o rẹ whae ze nọ ma je se eria nọ a kere nọ “se” na ọvo.
10. Oke vẹ ma re ro nwene kpohọ obe Ebaibol Wuhrẹ na?
10 Oke nọ A re ro Nwene Kpohọ Obe Ebaibol Wuhrẹ: Nọ ma te wuhrẹ iẹe isiabro no, hayo nọ ma te muhọ ewuhrẹ koka koka no, ma sai nwene kpohọ obe Ebaibol Wuhrẹ na hayo gbẹ rehọ ibroshọ Emamọ Usi na wuhrẹ iẹe bẹsenọ o reno. Kpahe oke nọ ohwo o re ro kpohọ Ebaibol Wuhrẹ na, ọnọ o bi wuhrẹ iẹe na ọ rẹ jẹ iroro yena kẹ omariẹ. Kọ ma te nwene kpohọ obe Ebaibol Wuhrẹ na, obọ emuhọ riẹ ma re jo muhọ? O rrọ ọgbahọ họ, keme ahwo nọ ma bi wuhrẹ kpobi a rrọ oghẹrẹ ọvo ho. Ghele na, ahwo buobu a rẹ mai wo erere no uwuhrẹ na ze nọ a tẹ wariẹ jọ obe Ebaibol Wuhrẹ na wuhrẹ eware nọ a jọ ibroshọ na wuhrẹ no vẹre.
11. Fikieme ma jẹ rehọ ibroshọ ọkpokpọ nana wuhrẹ ahwo?
11 Evaọ akpọ nana nọ emamọ iyẹrẹ e rrọ họ na, ma wo emamọ usi nọ o mae woma kpaobọ, usi orọ esuo Uvie Ọghẹnẹ nọ u muhọ esu no nọ u ti ru akpọ na họ akpọ ọkpokpọ nọ ẹrẹreokie ọ te jọ! (Mat. 24:14; 2 Pita 3:13) Ma bi rẹro nọ ibuobu nọ i yo usi nana a te rọwokugbe ẹme nana: “Ẹvẹ awọ ọnọ ọ wha usi uwoma na o woma te eva obọ ehru igbehru, ọye nọ ọ be vuẹ ovuẹ udhedhẹ, ọnọ ọ be rehọ emamọ usi uwoma ze, ọnọ ọ be vuẹ ovuẹ usiwo, nọ ọ be ta kẹ Zayọn nọ, ‘Ọghẹnẹ ra na o bi suẹ.’” (Aiz. 52:7) Joma rehọ ibroshọ ọkpokpọ nana wha emamọ usi na se ahwo nọ e gwọlọ yoi evaọ ẹkwotọ mai!
[Ẹkpẹti nọ ọ rrọ ẹwẹ-obe avọ 5]
Oria nọ Ahwo A Jọ Rọwo Ọghẹnẹ Gbe Ebaibol Ho:
● Evaọ eria jọ, iwhowho-uvie a ruẹ nọ a tẹ ta ẹme te “Ọghẹnẹ” hayo “Ebaibol” ahwo a rẹ gaviezọ họ. O tẹ rrọ ere evaọ ẹkwotọ ra, whọ sae ta ẹme kpahe oware nọ ahwo a bi roro kpahe wọhọ emamọ esuo, epanọ evawere e rẹ rọ jọ uviuwou, gbe oghẹrẹ nọ obaro o te jọ. Nọ who te lele ohwo na ta ẹme unuẹse jọ kpahe oware nọ ma jẹ rọwo Ọghẹnẹ gbe Ebaibol no, whọ sai dhesẹ ibroshọ Emamọ Usi na kẹe.
[Ẹkpẹti nọ ọ rrọ ẹwẹ-obe avọ 6]
Usiuwoma N’uwou Ruọ Uwou:
● “Ma nya bru owhẹ ze re ma dhesẹ oghẹrẹ nọ o lọhọ te re ma riẹ oware nọ Ọghẹnẹ o ti ru kẹ ahwo-akpọ. Kọ u mu owhẹ ẹro nọ Ọghẹnẹ o ti si ebẹbẹ mai kpobi no ẹdẹjọ? [Kuvẹ kẹ uyo.] Obe nana u dhesẹ oria nọ whọ rẹ jọ ruẹ uyo onọ yena evaọ Ebaibol. [Kẹe ibroshọ na, re who se edhe-ẹme ọsosuọ evaọ uwuhrẹ 1, je se Jerimaya 29:11.] Kọ whọ jọ etenẹ na ruẹ nọ Ọghẹnẹ ọ gwọlọ nọ obaro akpọ mai o jọ ziezi? [Kuvẹ kẹ uyo.] Oke ọfa, ma te jọ edhe-ẹme avivẹ ta ẹme kpahe epanọ Ọghẹnẹ o ti ro si omai no uye-oruẹ. Obe na o tẹ were owhẹ, whọ sae rehọ ọyena.” Rekọ, who te rri nọ ohwo na o gbe wo uvẹ, whọ sai se edhe-ẹme avivẹ na jẹ ta ẹme kpahe iẹe avọ eria Ebaibol esa na. Kẹsena wha ve fi oke họ nọ who ti ro zihe re wha ta ẹme kpahe onọ avivẹ evaọ uzoẹme yena.
● “Ahwo buobu a rẹ gwọlọ lẹ, maero oke nọ a te wo ẹbẹbẹ. Kọ whọ rẹ lẹ ẹsejọ? [Kuvẹ kẹ uyo.] Kọ oghẹrẹ olẹ kpobi who roro nọ Ọghẹnẹ o re yo, manikọ ejọ e rẹ dhae eva? [Kuvẹ kẹ uyo.] Me wo obe jọ nọ u dhesẹ oria Ebaibol nọ o kẹ uyo enọ nana. [Kẹe ibroshọ na, wha se edhe-ẹme ọsosuọ evaọ uzoẹme avọ 12 gbe oria Ebaibol nọ a kere nọ “se” na.] U gbe woma nọ ma rọ riẹ nọ Ọghẹnẹ ọ rẹ gaviezọ kẹ olẹ mai? Rekọ re Ọghẹnẹ o yo elẹ mai, o gwọlọ nọ ma rẹ riẹ Ọghẹnẹ ziezi. [Rovie uzoẹme avọ 2 re who dhesẹ izoẹme esese na kẹe.] O tẹ were owhẹ, mẹ sae nyasiọ ọyena ba kẹ owhẹ, oke ọfa ma ti se eria Ebaibol nọ e kẹ iyo enọ nana.”
● “U bi gbe ahwo unu oghẹrẹ nọ akpọ na o bi dhe eyeyoma. Who roro nọ eware i ti woma vi enẹ evaọ obaro? [Kuvẹ kẹ uyo.] U re gbe ahwo buobu unu nọ a te wuhrẹ kpahe emamọ usi nọ o rrọ Ebaibol na. Rri enọ jọ nọ Ebaibol na o kẹ uyo rai.” Kẹe ibroshọ na, jẹ ta kẹe re ọ fodẹ onọ nọ o mae were iẹe evaọ uke ibroshọ na. Rovie uzoẹme yena re who dhesẹ oghẹrẹ nọ ma rẹ rọ rehọ iẹe wuhrẹ ohwo. Ta kpahe epanọ who ti ro zihe re wha ta ẹme kpahe onọ nọ o kẹle riẹ.
[Ẹkpẹti nọ ọ rrọ ẹwẹ-obe avọ 7]
Vuẹe Ovavo Kpahe Uwuhrẹ Ebaibol:
● “Ma gwọlọ dhesẹ obe okpokpọ nọ a re ro wuhrẹ Ebaibol kẹ owhẹ. U wo izoẹme 15 nọ i dhesẹ eria Ebaibol nọ whọ rẹ jọ ruẹ iyo enọ jọ nọ i wuzou gaga. [Dhesẹ t’aro t’emu riẹ kẹe.] Kọ whọ daoma se Ebaibol ra no re whọ riẹ eware nọ e riẹe eva? [Kuvẹ kẹ uyo.] Obe nana u ru uwuhrẹ Ebaibol lọhọ gaga. [Se edhe-ẹme avọ 3 evaọ uwuhrẹ avọ 3, je se obe Eviavia 21:4, 5. O te gbe wo uvẹ, se edhe-ẹme nọ ọ kẹle riẹ gbe eria Ebaibol nọ a kere nọ “se” na.] Obe na ọ tẹ were owhẹ, whọ sae rehọ ọyena. Rehọ iẹe dawo oghẹrẹ nọ uwuhrẹ Ebaibol o rẹ jọ. O tẹ were owhẹ, whọ sai wuhrẹ haro. Ẹdẹfa, ma ti wuhrẹ uzoẹme ọsosuọ na. Rri rie, ẹwẹ-obe ọvuọvo.”
[Ẹkpẹti nọ ọ rrọ ẹwẹ-obe avọ 7]
Dhesẹ iẹe Kẹ Ohwo nọ Who Zihe Bru:
● Ma te zihe bru ohwo nọ ọ gaviezọ kẹ omai, ma sae ta nọ: “Eva e were omẹ nọ mẹ rọ zoma ruẹ owhẹ. Mẹ wha ibroshọ nana se owhẹ nọ whọ te jọ ruẹ epanọ Ebaibol ọ kẹ iyo enọ buobu. [Kẹe ibroshọ na, dhesẹ uke obemu riẹ kẹe.] Uzoẹme vẹ o mae were owhẹ? [Kuvẹ kẹ uyo. Kẹsena who ve rovie kpohọ uzoẹme nọ ọ fodẹ na.] Jọ me dhesẹ oghẹrẹ nọ a sae rọ jariẹ ruẹ eria Ebaibol nọ e kẹ uyo onọ na kẹ owhẹ.” Se jẹ ta ẹme kpahe edhe-ẹme ọvo hayo ivẹ gbe eria Ebaibol nọ a kere nọ “se” na. Who muọ obe-uwuhrẹ họ no ye! Nyasiọ ibroshọ na ba kẹe, re whọ ta kpahe eziheze ra. Nọ wha te wuhrẹ uzoẹme jọ reno, wha sai mu ọfa nọ ohwo na ọ salọ họ hayo muhọ no emuhọ ibroshọ na vrẹ.